Bronze kay Nievarez sa Sculls, Wong, Silver sa Wushu Taolu

ni VA / MC / Delle Primo - @Sports | May 15, 2022

Mag-uuwi si Filipino Olympian Cris Nievarez ng isa pang dagdag na medalya sa rowing medal mula sa 31st Southeast Asian Games sa Vietnam.

Bronze medal ang idinagdag niya kahapon sa men's lightweight single sculls event. Unang nakapagwagi siya ng silver medal sa men's lightweight double sculls event.

Bukod kay Nievarez, nakapagbulsa rin ng bronze medal sina Edgar Illas at Zuriel Sumintac para sa men's lightweight pair event. Ang Pilipinas ay mayroon nang kabuuang 8 medalya para sa rowing team.

Samantala, 2 pang medalya ang nakuha nina wushu athletes Agatha Wong at Jones Inso kahapon. Silver medal ang nasungkit ni Wong women's taolu taijiquan event, habang si Inso ay bronze sa men’s taolu taijijian event.

Ito ang ika-2 medal ni Inso kung saan naka-silver siya sa men's taijiquan noong Biyernes. “I’m still grateful for the silver kasi two months lang ang training namin. I wasn’t expecting anything. But I did my best so that’s enough na,” ani Wong, silver medalist noong 2015 World Championships sa Jakarta.

Samantala, naging malamlam ang tsansa ng bansa na muling maka-podium sa men's volleyball matapos mabigo ng ating national team sa una nitong laro kontra Cambodia kahapon sa 31st SEAG sa Hanoi,Vietnam.

Hindi nagawang isalba ng magandang performance na ipinakita ni Bryan Bagunas ang koponan na tumiklop sa loob ng apat na sets, 21-25, 26-24, 28-30, 27-29, sa Cambodian squad sa simula ng kanilang kampanya sa Dai Yen Arena sa Quang Ninh, Vietnam. Winalis ng mga Pinoy ang Cambodia noong 2019 SEAG tungo sa kanilang silver medal finish. Ngunit sa pagkakataong ito ay napaghandaan sila ng mga Cambodians na nagpamalas ng end game poise sa pamumuno ni Voeurn Veasna kaya di nakahirit ng decider ang mga Pinoy.

Matapos maitabla ni Marck Espejo ang 4th set sa 27-all, umiskor ng dalawang sunod ang mga Cambodians mula sa isang block at isang attack upang ganap na tapusin ang laro.

Naka-4th win na ang Lady Bulldogs; Ateneo, wagi sa UAAP Volleyball

ni VA / Delle Primo - @Sports | May 13, 2022

Naiposte ng National University (NU) ang ika-4 na sunod nilang panalo matapos igupo ang University of the East (UE) kahapon sa pagpapatuloy ng UAAP Season 84 women's volleybaĺl tournament sa Mall of Asia Arena.

Dinomina ng Lady Bulldogs ang Lady Warriors para maiposte ang 25-11, 25-20, 25-13 na panalo para manatilìng walang talo na nagsadlak sa Lady Warriors sa kabaligtarang 0-4 na kartada.

"Every team na makakalaban namin, nagpe-prepare kami nang maayos," ani NU Coach Karl Dimaculangan pagkaraang talunin ang dati niyang team.

Si Dimaculangan ang coach ng Lady Warriors noong Season 81 at 82 bago lumipat ng NU. Pinangunahan ni Sheena Toring ang nasabing panalo sa ipinoste nitong 13 puntos mula sa 8 kills, 3 aces at isang block. Gaya ni Toring, tumapos ding may 13 puntos si Ivy Lacsina na kinabibilangan ng 12 hits na sinundan ni Michaela Belen na may 11 puntos, 11 ring digs at 8 excellent receptions.

Samantala, sa ikalawang laro, nakapagtala na ng unang panalo ang Ateneo de Manila University nang walisin ang Far Eastern University (FEU). Nakadagit agad ang Blue Eagles ng three-game slide 25-16, 25-14, 25-14 kontra sa Tamaraws.

Nanggaling ang FEU sa five-set win kontra University of the East, pero hindi nakaporma sa Ateneo. Lagpak sila sa 1-3 win-loss sa torneo, parehong record ng Lady Eagles.

"We're happy na nasa win column na kami," ayon kay Ateneo Coach Oliver Almadro. "I am really happy with what my players did. They responded right away sa challenge ko sa kanila yesterday, and they challenged themselves also."

Tamaraws, sinuwag ang Archers; Maroons, 'di pinaporma ang UE

ni Delle Primo - @Sports | April 27, 2022

Hinigpitan ng Far Eastern University Tamaraws ang kapit sa 67-62 na panalo kontra De La Salle University (DLSU) Green Archers sa 2nd round ng UAAP Season 84 Men's Basketball Tournament sa Mall of Asia Arena sa Pasay City sa unang laro kahapon.

Nagpakita ng impresibong laro si RJ Abbarientos sa naiposteng 21 puntos at 3 rebounds para makamit ng Tamaraws ang pagwawagi. Katuwang niya sina Xyrus Torres na nakapagtala ng 14 puntos at Patrick Sleat para sa 10 puntos sa pagtatapos.

Sa umpisa ng unang kalahati ng laro nagpakita ng lakas ang Tamaraws sa 13 puntos na bentahe nagpatapos ng 42-29.

Samantalang naging mainit ang ikatlong canto sa paggising ng Archers sa pagtatala ng 57-57 sa 2:48 mark at nang ma-injured si Evan Nelle.

Tinangkang lumaban sa huling yugto ang La Salle sa natitirang 7.7 ng laro subalit mahigpit ang kapit ng FEU at kinulang na sa oras ang Archers. Nabalewala naman ang nagbigay-liwanag sa kampo ng Archers na si Evan Nelle na nagtarak ng 15 puntos at 7 rebounds kasama sina Justine Baltazar na nagbigay 13 puntos habang may 10 puntos si Kurt Lojera.

Ang dalawang pangkat ay maglalaro sa Huwebes, Abril 28. Haharapin ng DLSU ang Adamson Falcons nang 12:30 n.t. habang ang FEU vs. Ateneo nang 4:30 p.m.

Samantala, pinayuko ng UP Maroons ang UE Red Warriors sa 81-68. Nanatiling matatag ang UP sa pag-usad ng 10-2 marka parehas ng Adamson at Blue Eagles.

Naging top scorer sa Fighting Maroons si Zavier Lucero sa 20 puntos at 14 rebounds kasunod sina Ricci Rivero sa 17 puntos at CJ Casino para 8 puntos.

Sa umpisa ng laro, nanguna na ang Maroons ng 18 puntos na bentahe at hindi binigyan ng tsansa ang UE at agawin ang panalo sa 44-26 sa first half.

Nakatakdang maglaro sa Huwebes, Abril 28, ang UE kontra NU Bulldogs nang 10 a.m., habang ang UP vs. UST Tigers nang 7 p.m.