Pabagu-bagong panlasa at isipan...

dahilan kaya ‘di nagkakaroon ng pangmatagalang relasyon ang Water Horse

ni Maestro Honorio Ong - @Forecast 2020 | June 27, 2020

Sa pagpapatuloy ng pagtalakay sa magiging kapalaran ng bawat animal sign ngayong taon, tatalakayin naman natin ang ugali at magiging kapalaran ng mga isinilang sa Year of the Horse ngayong Year of the Metal Rat.

Alalahaning ang Horse o Kabayo ay nahahati sa limang uri batay sa taglay nilang elemento. Ang iba’t ibang uri ng Kabayo base sa taglay niyang elemento ay ang mga sumusunod:

• Metal Horse o Bakal na Kabayo - silang mga isinilang noong 1930 at 1990

• Water Horse o Tubig na Kabayo - silang mga isinilang noong 1942 at 2002

• Wood Horse o Kahoy na Kabayo - silang mga isinilang noong 1954 at 2014

• Fire Horse o Apoy na Kabayo - silang mga isinilang noong 1966

• Earth Horse o Lupa na Kabayo - silang mga isinilang noong 1978 at 1938

Noong nakaraang isyu, tinalakay natin ang magiging kapalaran ng Metal Horse at ngayon, dadako tayo sa ikalawang uri ng Horse at ito ang Water Horse o Kabayong Tubig.

Bukod sa palakaibigan, ang isa pang pangunahing katangian ng Water Horse ay ang pagkakaroon ng likas na taglay na katalinuhan, na magagamit upang lalo pa niyang mapaunlad at mapasigla ang career at pangkabuhayan. Dahil sa katalinuhang taglay ng Water Horse na biniyayaan din ng malakas na magnetismo ng kanilang pagkatao, sa anumang larangan, napakalayo ng kanilang nararating at kayang-kaya nilang mapaunlad ang kanilang kabuhayan at mapataas nang mapataas ang kanilang posisyon hanggang sa marating nila ang tuktok ng tagumpay.

Kaya ngayong 2020, kung gagamitin ng Water Horse ang ugali niyang palakaibigan, talino at likas na pang-akit, anumang krisis sa kabuhayan o career ang dumating sa kanya, tiyak na siya ay muling makababalik sa normal, masigla at maunlad na pamumuhay.

Sa pag-ibig at pakikipagrelasyon, dahil likas din ang kagandahang taglay at mapang-akit na panlabas na katangian, ang Water Horse ay maraming tagahanga kung saan ‘yung iba ay nabibisto nila, pero ang iba ay nananatiling secret admirer habambuhay.

Bagama’t malakas ang atraskyon sa opposite sex, ang problema ng Water Horse pagdating na sa relasyon at pag-ibig ay ang madaling nagpapabagu-bago ng panlasa at isipan, kaya naman nakakaipon siya ng marami, pero maiikling pakikipagrelasyon lang ito sa kung kani-kaninong nilalang. At sinasabing hangga’t nananatili ang ganu’ng ugali ng Water Horse, matatagalan pa bago siya makatagpo ng masaya at panghabambuhay na karelasyon.

Sa pangkalahatan, sa kalagitnaan 2020, siguradong gaganda nang gaganda ang career ng Water Horse at kasabay nito, marami at iba’t ibang uri rin ng pakikipagrelasyon ang maaari niyang mapasukan, na sa umpisa ay talaga namang masaya at nakakikilig, pero sa bandang huli ay may kalungkutan ding sukli.

Upang maiwasang mabigo agad sa larangan ng pag-ibig, hindi dapat magpadala sa biglaan at bugso ng damdamin. Sa halip, dapat ay timbangin munang mabuti ang sitwasyon at kilalaning mabuti ang lalaki o babaeng pag-aalayan ng pagmamahal bago tuluyang seryosohin. Sa ganu’ng paraan, dapat dahan-dahan lang at hayaan mo munang mahinog ang “friendship” sa pagitan n’yong dalawa, sa susunod pang mga taon, tiyak na makatatagpo ka ng maligaya at panghabambuhay na pag-ibig.

Itutuloy

Pakikipagrelasyon ng Metal Horse, dapat ipagpaliban ngayong 2020 para magpokus sa career

ni Maestro Honorio Ong - @Forecast 2020 | June 25, 2020

Sa pagpapatuloy ng pagtalakay sa magiging kapalaran ng bawat animal sign ngayong taon, tatalakayin naman natin ang ugali at magiging kapalaran ng mga isinilang sa Year of the Horse ngayong Year of the Metal Rat.

Alalahaning ang Horse o Kabayo ay nahahati sa limang uri batay sa taglay nilang elemento. Ang iba’t ibang uri ng Kabayo base sa taglay niyang elemento ay ang mga sumsunod:

• Metal Horse o Bakal na Kabayo - silang mga isinilang noong 1930 at 1990

• Water Horse o Tubig na Kabayo - silang mga isinilang noong 1942 at 2002

• Wood Horse o Kahoy na Kabayo - silang mga isinilang noong 1954 at 2014

• Fire Horse o Apoy na Kabayo - silang mga isinilang noong 1966

• Earth Horse o Lupa na Kabayo - silang mga isinilang noong 1978 at 1938

Sa isyung ito, ang tatalakayin natin ang magiging kapalaran ng Metal Horse o ang Bakal na Kabayo.

Ngayong 2020, bagama’t maraming pagsubok na kakaharapin, kabilang ang mga pagsubok na may kaugnayan sa career, pinansiyal at pakikipagrelasyon, may pangako namang sa malapit na hinaharap, dahil sa pagkakaroon ng mabuting puso at matuwid na pamumuhay, unti-unti na ring babalik ang mga dating suwerte at magagandang kapalaran na dati mo nang hawak at madaragagan pa ito nang doble at mas marami.

Dagdag pa rito, dahil ang Metal Horse ay likas na malaya at ayaw na ayaw niyang hinahadlangan ang kanyang mga lakad, kaya ngayong 2020, ipagpipilitan ng iyong kapalaran na ikaw ay muling makalaya upang magawa nang husto ang mga gawaing dati mo nang ginagawa at kung tuluyan nang makakabalik ang Metal Horse sa dati niyang mga ginagawa, ito ang magiging dahilan upang gumanda ulit nang gumanda ang kanyang kapalaran hanggang sa siya ay tuluyan na muling suwertehin at datnan ng ibat-ibang uri ng buwenas sa mga nalalabi pang buwan ng 2020.

Sa career at sa pinansyal na aspeto, hindi iminumungkahing magdagdag ng puhunan o effort ang Metal Horse. Sa halip, mas mainam kung pananatilihin niya ang dati nang puhunan at pagsisikap. Kumbaga sa magsasaka, walang dapat gawin ang Metal Horse ngayong taon kundi hayaan na lumipas at dumaan ang malalakas na bagyo o sigwa sa kanyang bukirin at pagkatapos nito, saka lang siya muling lumabas ng bahay at magtanim. Ibig sabihin, mas maganda kung “at ease” muna ang lahat ng pinagkakakitaan at ‘wag itong hayaang mawala, pero ‘wag namang maghangad ng mas malalaki pang kita dahil may babala na mapahamak ang kanyang kabuhayan ngayong taon at mahulog sa tuluy-tuloy na pagkalugi at pagkakamali ng mga desisyon.

Sa pag-ibig at pakikipagrelasyon, kung ikaw ay wala pang karelasyon o asawa, hindi iminumungkahing mag-asawa o makipagrelasyon ngayong 2020. Sa halip, hindi dapat mag-apura sa pakikipagrelasyon dahil sa 2021 ang the best na panahon para sumuong sa seryoso at totohanang relasyon. Kung ikaw ay Metal Horse na single, ituon muna ang energy at time sa career at pagpaparami ng ipon o pera upang tuluy-tuloy na lumago ang savings na magagamit para sa future.

Sa mga may asawa na, may pamilya at may karelasyon, bagama’t makakaranas ng bahagyang problema o tampuhan, ito ay pansamantala lang dahil sa malapit na hinaharap ay muling iinit ang relasyon. Kung may mga tampuhang nagaganap, mag-ingat dahil may babala na maaaring kusa kang mapalapit sa dati nang mga kasama at kaibigan na maaaring mauwi sa lihim na relasyon. Ang mga relasyong ito na bigla-bigla na lang dumating at na-develop ang dapat iwasan upang mapanatili ang masaya at panghabambuhay na pamilya.

Sa pangkalahatan, bagama’t maraming suliraning nangyari at naganap sa bungad ng 2020, dahil sa COVID-19 pandemic, pagpasok ng Hulyo, umasa kang unti-unti nang magbabalik sa normal ang lahat at ang dating magandang career at hanapbuhay ay bababalik sa dati niyang sukat, kasabay ng pagkakaroon ng mas masarap at maligayang karelasyon.

Itutuloy

Year of the Horse, assuming na kapareho ng ugali ang partner kaya lagging bigo sa love life

ni Maestro Honorio Ong - @Forecast 2020 | June 23, 2020

Sa pagpapatuloy ng pagtalakay sa magiging kapalaran ng bawat animal sign ngayong taon, tatalakayin naman natin ang ugali at magiging kapalaran ng mga isinilang sa Year of the Horse ngayong Year of the Metal Rat.

Ang Horse o Kabayo ay ang ika-pito sa 12 animal signs ng Chinese Astrology. Kung ikaw ay isinilang noong 1930,1942, 1954, 1966, 1978, 1990, 2002 at 2014, ikaw ay mapabibilang sa mga indibidwal na pinaghaharian ng animal sign na Horse.

Sa pakikipagkaibigan at pakikipagrelasyon, isa ang Kabayo sa may pinakamarami at masasayang kabigan dahil siya ay masaya at masarap kasama sa lahat ng uri ng kasiyahan at gimmikan. Pero dahil may paka-moody o sumpungin, karamihan sa kanyang mga kaibigan ay nakakatampuhan, na nagiging dahilan upang mawalan siya ng mga tunay, matalik at tapat na kaibigan na nagtatagal ng mahabang panahon. Kaya kadalasan, mabibilang sa mga darili ang naiiwanang kaibigan ng Kabayo sa kanyang pagtanda.

Dagdag pa rito, dahil sa pagiging makasarili at mahilig sa pakikipagsapalaran, karaniwan nang hindi napipirmi ang Horse sa bahay, ganundin sa grupo ng mga kaibigan, kaya pangkaraniwan nang maraming mga kaibigan ang Horse, pero iba’t ibang sirkulo naman ang kinabibilangan. Gaundin sa pamilya, hindi siya tumatagal na nasa bahay lang dahil ang sikreto ay mas kumbinyente at masaya siya ‘pag gumi-gimmick at gumagala.

Gayundin, hindi mahalaga sa Kabayo ang seguridad sa kinabukasan. Para sa kanya, ang higit na mahalaga ay ang maging malaya at masaya. Hindi rin siya naniniwala sa kasabihang “Magiging masaya rin ang araw bukas,” dahil para sa Kabayo, dapat maging masaya ang kasalukuyan. Nabubuhay ang iba para mag-ipon at magpundar para sa kinabukasan, ngunit nabubuhay siya para sa kasalukuyan.

Kaya naman kapag nakarelasyon mo ang Horse, sa unang araw pa lang ng inyong pagde-date at paglalambingan, ibubuhos niya ang lahat upang ikaw ay kanyang mapaligaya dahil para sa kanya, ang kinabukasan ay hindi pa darating, kaya kasalukuyan ang higit na mahalaga.

Sa tampuhan at hindi pagkakaunawaan, iniisip ng Kabayo na mapapatawad mo agad siya sa kanyang mga pagkakamali, pagkukulang at kasalanan, kung gaano siya kabilis magpatawad at lumimot sa mga nagkasala sa kanya ay ganu’n ka rin. Akala niya, ganu’n ang lahat ng tao, pero hindi ‘yun ang reyalidad ng buhay. May mga tao na matagal magpatawad at makalimot sa kasalanan at nagiging dahilan ito ng matinding kalungkutan ng Kabayo sa pag-ibig at emosyon, dahil akala niya, kung ano ang kanyang ugali ay ganundin ang kanyang karelasyon, pero sa katotohanan ay hindi, kaya karamihan sa mga Kabayo ay hindi nakasusumpong ng masaya at panghabambuhay na karelasyon. Kahit kailan, malabong maunawaan ng Kabayo na iba’t iba ang ugali at sentimyento ng bawat nilalang. Gayunman, magiging maligaya lamang ang Horse sa pag-ibig at pakikipagrelasyon kapag natanggap niya na sa mundong ito, walang magkakapareho ng kulay at sa halip, sa isang kahon ng bagong biling krayola, iba’t iba ang kulay ng bawat isa.

The best na kapareha ng Horse ay ang Tiger na lalong magpapainit ng kanyang kaluluwa at pagkatao sa mga gawaing may kaugnayan sa paglalakwatsa at pamamasyal. Habang okey ding kapartner ng Horse ang Dog, na kokontrol at lilimita sa kanya upang hindi lubusang maging gastador at lakwatsera. Makadarama naman ng masarap na pag-aalaga ang Kabayo sa Tupa, na kukunsinte sa hindi maunawaan at pabagu-bagong ugali niya.

Magiging kasangga naman ng Kabayo ang Dragon na magbibigay sa kanya ng mga epektibo at makabuluhang advice upang hindi niya maituon sa kung saan-saang walang kabuluhang gawain ang kanyang enerhiya.

Bagay din sa Horse ang Monkey, Rabbit, Boar at Rooster, na hindi hahadlangan ang likas na kursunada niya na maglakwatsa nang maglakwatsa at maging adventurous at pagiging malaya.

Itutuloy