Isinilang sa Year of the Sheep, pinakasuwerte sa lahat ng animal sign kahit ‘di magtrabaho

ni Maestro Honorio Ong - @Forecast 2020 | July 18, 2020

Sa pagpapatuloy ng pagtalakay sa bawat animal sign ngayong 2020, talakayin naman natin ang ugali at magiging kapalaran ng Sheep o Tupa ngayong Year of the Metal Rat. Ang Sheep o Tupa ay tinatawag ding Goat o Kambing.

Kung ikaw ay isinilang noong 1919, 1931, 1943, 1955, 1967, 1979, 1991, 2003 at 2015, ikaw ay mapabibilang sa animal sign na Sheep o Goat.

Ang Sheep o Tupa ay isa sa pinakamapalad na nilalang sa 12 animal signs na ipinatawag ni Lord Buddha sa kanyang palasyo dahil kahit hindi siya magtrabaho nang sobrang bigat o sobrang hirap, tiyak na siya ay yayaman at uunlad, lalo na sa negosyo at pamomolitika.

Ipinagkaloob din ng langit sa Tupa ang mabubuti at tagapagtangkilik na kaibigan, kamag-anak, karelasyon, kasamahan sa trabaho o kasama sa buhay, na handa laging tumulong at magmahal sa kanya.

Ang ikatutuwa mo pa sa isang Tupa, sa panahon namang siya ay sobrang sagana na at napakayaman, hindi niya nakakalimutang tumulong sa mahihirap at nangangailangan, kaya hindi kataka-taka na palagi siyang pinagpapala at pinauulanan ng sari-saring mga biyaya at pagpapala ng langit.

Sa pakikipagrelasyon at pakikipagkaibigan, ang Tupa ay sinasabing sobrang mapagmahal sa kanyang pamilya at handa itong isakripisyo ang lahat alang-alang sa kanyang mga mahal sa buhay. Dahil likas na mabait, likas din sa puso niya ang maaawain at mapagmahal, lalo na sa mga tao o bagay na nagiging kaakibat o bahagi ng kanyang buhay at makulay na karanasan.

Sa kabuuan, masarap kasama ang Tupa dahil madalas na siya ay bukod sa may magandang panlabas na anyo, maganda rin ang kanyang likas na ugali at minsan ay masiyahin at nakatutuwang kasama, pero kadalasan ay likas na tahimik at hindi gaaanong papansin.

Dagdag pa rito, sa lahat ng bagay, top priority o pinapahalagahan niya, higit sa materyal na bagay ay ang sitwasyong gustung-gusto niyang nakikitang buo, sama-sama at masaya ang kanyang iniingat-ingatang pamilya.

Sa pag-ibig, sobrang mapagmahal ang Tupa kahit dumating sa puntong siya ay hindi gaanong mahal ng taong kanyang tinatangi-tangi at sinasamba, okey lang sa kanya ang ganu’ng sitwasyon. Kaya namang bagama’t, nagagawa niyang maging masaya sa sariling paraan, kahit madalang ang mga kaibigan at kabarkada, mas masarap na saya ang nararanasan niya kapag kasama niya ang kanyang pamilya.

Ang isa pang nakatutuwang ugali ng Tupa ay mahilig din siyang umalala sa kanyang mga mahal sa buhay sa panahon ng kanilang anniversary, birthday o anumang okasyon, hindi niya ito pinalalagpas nang hindi bumabati o nag-o-offer kahit na isang simpleng kasiyahan. Bukod sa mahilig umalala sa mahahalagang okasyon, mahilig din siyang bumili at magbigay ng mga bagay sa mga mahal niya sa buhay para mapasaya sila.

Sa pakikipagrelasyon, ka-compatible ng Tupa ang Rabbit o Kuneho at kadalasan ay tumatagal at kung minsan ay panghabambuhay na ang pagkakaibigan ng Tupa at Kuneho dahil nagkakaintindihan sila, hindi lamang ang kanilang damdamin kundi pati na rin ang kanilang kaluluwa.

Tugma rin sa mahiyain, kimi at tahimik na Tupa ang optimistic, masayahin na Kabayo.

Dagdag pa rito, puwede ring makasama ng Tupa ang maharot na Unggoy, ang matapang at malakas ang loob na Dragon at ang praktikal at nagtatali-talinuhan na Tandang.

Itutuloy

Isinilang sa Year of the Sheep, masarap maging kaibigan pero masamang kaaway

ni Maestro Honorio Ong - @Forecast 2020 | July 16, 2020

Sa pagpapatuloy ng pagtalakay sa bawat animal sign ngayong 2020, talakayin naman natin ang ugali at magiging kapalaran ng Sheep o Tupa ngayong Year of the Metal Rat. Ang Sheep o Tupa ay tinatawag ding Goat o Kambing.

Kung ikaw ay isinilang noong 1919, 1931, 1943, 1955, 1967, 1979, 1991, 2003 at 2015, ikaw ay mapabibilang sa animal sign na Sheep o Goat.

Samantala, bukod sa pagiging likas na mabuti at mabait, may kakaibang galing din ang Tupa upang mangyari ang kanilang gusto sa pamamagitan ng pagpupumilit. Pagpupumilit sa malumanay, mahusay at may lambing na paraan. Dahil bukod sa pagiging likas na mabait, may taglay ding intuition ang Tupa kung saan nababasa o nalalaman niya ang paraan na ipatutupad o ipagagawa niya sa iba ang kanyang mga binabalak at ninanais mangyari.

Dagdag pa rito, may kakayahan din ang Tupa na maghintay nang matagal at hindi naiinip sa magiging resulta ng kanyang paghihintay. Sapagkat batid niyang sa bandang dulo ng mga pangyayari, siya ay papatnubayan ng kapalaran, kaya naman madali ring ibibigay ng langit ang mga bagay na matagal niyang pinagtiyagaang hintayin. Kapag patuloy sa pagtitiyaga at paghihitay ang Tupa, tulad ng paisa-isang patak ng ulan na tumutunaw sa dambuhalang bato, matutupad niya ang lahat ng mga pangarap at ambisyon niya sa buhay.

Dahil likas na mabait, masama ring magalit ang Tupa at bagay na bagay sa kanya ang kasabihang, “Mabuting kaibigan, pero masamang kaaway.”

Ang isa pang kahanga-hanga sa kapalaran ng Tupa ay sa totoo lang, hindi naman niya kailangang maghirap at magpakasipag nang mabuti, dahil ang kanyang tadhana o kapwa ay pagsisilbihan siya para mangyari ang gusto niyang mangyari at matupad ang kanyang mga pangarap at gusto sa buhay.

Halimbawa nito ang Tupa na nakapag-asawa ng mayaman, kaya yumaman din siya. Puwede rin namang wala siyang planong pinetisyon siya ng kanyang kamag-anak patungong ibang bansa at nang naroon na, siya ay tuloy-tuloy na yumaman at sinuwerte. Laging ganu’n ang nagiging kapalaran ng Tupa kung saan dumarating sa kanyang buhay ang marami at magagandang kapalarang hindi niya inaasahan na dulot o bigay ng mga taong malalapit sa kanya.

Ang ikinaganda pa sa kapalaran ng Tupa kaya siya ay laging pinagpapala ng tadhana ay ang likas na ugali niyang mapagbigay at handang tumulong sa mga nangangailangan. Habang ganu’n ang ugali ng Tupa, tuloy-tuloy naman siyang ginarantiyahan ng tadhana ng doble at mas maraming pagpapala ng higit sa mga itinulong niya sa kanyang kapwa.

Dahil likas na mabait at matulungin, masarap maging kaibigan ang Tupa dahil palagi siyang handang magbigay ng simpatya at pagmamahal, hindi lamang sa kanyang mga kaibigan kundi maging sa kanyang mga mahal sa buhay.

Bagama’t hindi siya direktang nagbibigay ng advice o solusyon sa isang problema, mararamdaman mo ang kanyang presensiya, malasakit at pagmamahal, kaya sinasabing mapalad ang mga anak na may magulang na Tupa, gayundin ang may karelasyon o asawa na Tupa, na tunay ngang laging mag-aaruga at magmamahal sa kanya.

Itutuloy

Year of the Sheep, ‘di yumayaman dahil ‘di madamot sa kapwa

ni Maestro Honorio Ong - @Forecast 2020 | July 14, 2020

Sa pagpapatuloy ng pagtalakay sa magiging kapalaran ng bawat animal sign ngayong 2020, tatalakayin naman natin ang pangunahing ugali at magiging kapalaran ng animal sign na Sheep o Tupa ngayong Year of the Metal Rat kung saan ang Sheep o Tupa ay tinatawag ding Goat o Kambing.

Kung ikaw ay isinilang noong 1919, 1931, 1943,1955, 1967, 1979, 1991, 2003 at 2015, ikaw ay mapabibilang sa may animal sign na Sheep o Goat.

Ang Sheep, Goat o Ram ay ika-8 sa 12 animal signs ng Chinese Astrology kung saan siya rin ang zodiac sign na Cancer sa Western Astrology, na may kaakibat na planetang Moon.

Ang kanyang mapalad na oras ay mula ala-1:00 hanggang sa alas-3:00 ng hapon sa direksiyong south-southwest o timog-timog kanluran.

Dahil nagtataglay ng planetang Moon o Buwan, kilala ang Kambing o Tupa sa pagiging matulungin, lalo na sa kanyang mga kamag-anak at kapamilya. Sila rin ay ang tinatawag na “good samaritan” kung saan may mga pagkakataong kahit hindi nila gaanong kakilala ay tinutulungan talaga nila. Dahil dito, bihira sa mga Sheep ang yumayaman dahil wala sa bokabularyo nila ang maging madamot. Kaya kung makakakita ka ng Tupa o Kambing na napakayaman, siguradong siya ay may pagka-kuripot o sobrang sinop sa buhay.

Tama, sinasabing yayaman lamang ang Tupa kung habang namimigay at tumutulong sa kanyang kapwa ay matututunan niya rin ang pagsisinop at pagmamahal sa kabuhayan na tinatamasa niya sa kasalukuyan.

Kapag nakakita ka ng hayop na napakabait, concern sa kapwa at mapagmahal sa kanyang pamilya, tiyak na ang hayop na ito ay walang iba kundi ang maamo at mabait na Tupa.

Bagama’t likas na mabait at matulungin, taglay din ng Tupa ang pagiging maramdamin at matampuhin kung saan ayaw na ayaw niyang minamaliit siya at pinipintasan sa kanyang mga ginawa at maging sa kanyang hitsura. Kapag pinintasan mo ang Tupa o sabihin na lang nating pinuna mo ang kanyang mga ginagawa, malamang na lantad man o lihim, tiyak na magtatampo at magagalit siya sa iyo. Dahil para sa isang Tupa na sobrang maramdamin, ang pagkikritiko mo sa kanya ay iniinda at dinadamdam niya dahil ang isa pa sa kahinaan ng Tupa o Kambing ay ang ugali niya na madaling maniwala sa mga opinyon o sinasabi ng iba kahit hindi ito totoo.

Kaya sa mundo ng maninila, utakan at lamangan, ang Tupa o Kambing ang madalas na naloloko at napaglalangan ng kanyang kapwa.

Gayunman, dahil sa pagiging sensitive, maramdamin at madalas maloko ng kapwa, karamihan sa mga Tupa ay nagiging mapag-isa, malungkutin at minsan ay pinipili nila na kaunti na lang ang mga kaibigan at piling-pili ang mapagkakatiwalaan.

Talagang mapalad at pinagpala ang Tupa na makakatagpo ng tapat at mabuting kaibigan, ganundin ang tapat at mabuting asawa na sa pag-iisa at sa mga suliranin ay dadamayan siya.

Sa bagay ito rin naman, mga tapat at mabubuting kaibigan ang sadyang ipinagkakaloob sa kanila ng langit upang sila ay magkaroon ng maunlad, matagumpay at maligayang pamumuhay.

Itutuloy