Madir na OFW, problemado sa anak na lumaking suwail at bastos

ni Sister Isabel del Mundo - @Mga kuwento ng buhay at pag-ibig | December 20, 2023

Dear Sister Isabel,

Sobrang lungkot ko ngayon. Bumalik kasi ang dating pag-uugali ng nag-iisa kong anak. Lumaki siyang walang respeto sa akin. Hindi ako ang nagpalaki sa kanya, kundi ang nakababata kong kapatid. Maaga akong nabiyuda kaya naisipan kong mag-abroad upang maibigay sa kanya ang magandang kinabukasan at makapagtapos na may mataas na pinag-aralan. Bago ako umalis para mangibang-bansa, in-enroll ko muna siya sa paaralan ng mga madre para kahit hindi ko siya maturuan ng magandang asal, at least mapapalapit siya sa Panginoon. Ngunit, hindi iyon ang nangyari. Nang makabalik ako from abroad, wala na siya nikatiting na respeto sa akin. Gayunman, tiniis at sinikap kong gawin ang lahat para gumaan muli ang loob niya sa akin, at tratuhin niya akong ina. Sa awa ng Diyos, nagbago rin siya. Naramdaman ko na ang pagrespeto at pagmamahal na hinahanap ko sa isang anak. Subalit, hindi rin nagtagal dahil bumalik na naman ang nakalakihan niyang ugali at lumala pa kaysa dati.

Sinisigawan at sinasabihan niya na akong buwisit. Pinagpasensyahan ko siya dahil baka kako nakatikim na siya ng ipinagbabawal na gamot. 

Muli, napakasakit sa akin bilang ina. Napakahirap pala maging ina lalo na kung magkakaroon ka ng anak na suwail at walang respeto. 

Ano ang gagawin ko, Sister Isabel? Hindi ko na talaga kayang dibdibin ang ginagawa sa akin ng anak ko. Lalaki siya, at 18-anyos na rin. 

Nagpapasalamat,

Dorothy ng Aklan

Sa iyo, Dorothy,

Nakikisimpatya ako sa nararamdaman mo sa anak mong lumaking walang respeto.

Ganyan talaga ang nagiging ugali ng mga anak na iniwan sa pangangalaga ng ibang tao.

Pero, hindi kita masisisi kung iniwan mo siya upang magtrabaho sa abroad dahil para rin naman sa kabutihan niya ang ginawa mo. 

Ang pinakamaganda mong gawin ay iparamdam sa kanya na may ina pang nagmamamahal at nagmamalasakit sa kanya. Dalasan n’yo ang inyong bonding moment. At kung nasa mood siya, yayain mo rin siyang magsimba. Mamasyal kayo sa mga spiritual place. Kung maaari, sumali rin kayo sa samahan sa simbahan na alam mong mapupunta siya sa magandang ugali. Tiyaga lang, natitiyak kong hindi likas sa kanya ang pagiging salbahe. Hindi pa huli ang lahat. Humingi ka ng advice sa isang dalubhasang psychologist upang ma-guide upang maiwasto mo ang ugali ng iyong anak. Magdasal ka rin ng taimtim. Kung maaari, mag-novena ka. Hilingin mo sa Diyos na hipuin ang anak mo upang isang araw, malaking pagbabago na ang maganap. 

Sumasaiyo,

Sister Isabel del Mundo

Gayuma (4)

ni Maria Angela Gonzales @Kuwentong Pag-Ibig | December 19, 2023

“Senyorito….””

Agad itong nilingon ni Princess at nanlaki ang kanyang mga mata nang makita niyang tumatakbo si Baninay patungo sa direksyon ni Gabriel. Alam niyang yayakap ito sa binata, kaya agad niyang hinarang ang kanyang katawan. Maunawain siya sa mga fans, pero hindi sa mga taong gustong maki-third party sa kanila. 

“Okey na,” wika niya. 

“Ha?”

“Hindi mo na kailangang yakapin ang boyfriend ko,” mariin niyang sabi.

Marami na siyang nakasalamuhang babae na katulad ni Baninay, pero ibang presensiya ang nararamdaman niya rito. Ngunit, wala siyang pakialam. Mas nais niyang ipakita kung paano niya pinoprotektahan ang para sa kanya. 

“Sorry,” wika nito na parang napahiya.

“Pumasok ka na sa loob, Baninay,” utos ng ina nitong si Aling Mameng. 

‘Di niya alam kung bakit hindi kampante ang loob niya kay Baninay samantalang magaan naman ang loob niya sa ina nito.

“Salamat sa pag-aalala, Baninay.” Sambit naman ni Gabriel at sabay akbay sa kanyang nobya. 

Gumagaan ang pakiramdam ni Princess kapag nasa paligid niya ito, kaya hindi niya napigilang yakapin ito. Mahal na mahal niya ang kanyang nobyo, kaya hindi niya gugustuhing makita itong nakayakap sa iba. 

May tiwala siya kay Gabriel, pero sa ibang tao ay wala, lalo na sa mga babaeng nagkakagusto rito. 

“Pumasok ka na sa kuwarto,” wika uli ni Aling Mameng. 

Marahas na buntong hininga ang pinawalan ni Baninay. Ngunit bago ito tumalikod, binigyan niya si Princess ng matalim na tingin. ‘Yun bang parang gustong manakit. 

“Aray!” Gulat na bigkas ni Princess. Wala namang tao sa kanyang harapan, pero parang may nagbigay sa kanya ng sampal na talagang nagpayanig sa kanya. 

Itutuloy…

Gayuma (3)

ni Maria Angela Gonzales @Kuwentong Pag-Ibig | December 18, 2023

Kumunot ang noo ni Princess sa tanong na iyon ni Gabriel. Hindi niya maintindihan kung bakit hinahanap nito si Baninay na anak ng katulong ng mga Monteverde at aware rin siyang crush na crush nito Gabriel. 

Dinaluhong tuloy ng kaba ang kanyang puso. Bakit kailangan nitong hanapin ang babae? Nagtatakang tanong niya sa sarili. Gayunman, hindi naman siya nakaramdam ng pagseselos. Malaki ang tiwala niya sa kanyang nobyo at alam niyang mahal na mahal siya nito.

“Bakit mo siya hinahanap?” 

“Ha?”

“Bakit hinahanap mo si Baninay?”

“‘Di ko rin alam.”

Kumunot ang noo niya at sabay sabing, “malamang nasa bahay n’yo, gusto mo bang tawagan ko?”

Mabilis itong sumagot na para bang nakikipaglaban sa sarili. “No. Hindi ko rin alam kung bakit ko siya hinahanap.”

“Kumusta na ang pakiramdam mo?” 

Sa halip na mag-isip pa nang husto. Mas inalala niya pa rin ang kalusugan ng kanyang mahal. Hindi tuloy niya naiwasan ang makaramdam ng matinding pag-aalala. Mula kasi nang pasukin nito ang showbiz lagi na lang itong puyat, para tuloy gusto niyang sisihin ang kanyang sarili. Alam niyang malaki ang kinalaman niya kaya nangyari iyon. 

“Hey,” wika nito, at para bang gusto niyang umiyak ng mga sandaling iyon.

“I’m sorry.”

“Saan?” Nagtatakang tanong nito. 

“Dahil sa akin nagkaganyan ka,” tiyak niyang sabi. 

Marahang tawa ang pinawalan nito. “Huwag ka ngang mag-isip ng kung anu-ano.” 

Ibig sana niyang ngumiti, ngunit hindi niya magawa, at bigla na lamang siyang kinabahan. Bigla rin kasing pumasok sa kanyang isipan ang nakangising si Baninay. 

Kahit kasi sinasabi ng utak niya na malaki ang tiwala niya kay Gabriel. Parang may isang bahagi sa isip niya ang nagsasabi na magiging isang malaking banta ito sa relasyon nila ng kanyang nobyo. 

Dapat nga ba siyang kabahan? Ayaw sana ng utak niya. Ngunit, may pangamba sa puso niyang labis na umiibig lalo na ng pumasok sa isipan niya ang nakakainis na hitsura ni Baninay na nagsasabing, “pustahan, maaagaw ko siya sa’yo.” 

Itutuloy…