Gayuma (16)

ni Maria Angela Gonzales @Kuwentong Pag-Ibig | January 7, 2024

Kahit ano’ng pilit ni Gabriel, hindi niya magawang maging komportable kay Princess. Para tuloy gusto niyang isipin na nagbago na ang damdamin niya para rito. 

Marahas na buntong hininga ang kanyang pinawalan nang maisip niyang napakaimposible naman nu’n. Sa tuwing tinitingnan kasi niya ang picture ni Princess, tumitibok naman ang kanyang puso, pero iba ang nararamdaman niya kapag kaharap na niya ito. Para tuloy gusto niyang isipin na magkaibang tao ang nasa larawan at ang kanyang nakakasama ngayon. 

“Sweetheart, my love, honey,” wika nito. 

Nasasabik na siyang marinig ang mga endearment na iyon mula sa kanyang mahal, subalit ngayong binibigkas iyon ni Princess, parang gusto niyang mangilabot at magsuka. 

“Miss you.”

“Ilang oras lang tayong hindi nagkita,” wika nito.

Agad na niyakap ni Princess si Gabriel, ibig sana niyang tiisin ang yakap ni Princess dahil ayaw niyang mapahiya ito, kaya lang parang sinisilaban siya.

“Huwag mo nga akong yakapin!” Sigaw ni Gabriel

“May ginawa ba akong masama?” 

“Wala, masyado lang mainit.” 

Unti-unting nagkakahugis ang ngiti sa labi ni Princess at sabay sabing, “baka naman kasi nag-iinit ka. Gusto mo bang…?”

“No way!” buwisit niyang sabi. 

Ang makatabi nga lang ito ay parang babaligtad na ang kanyang sikmura. Kung puwede niya nga lang itong itaboy, ginawa na sana niya. 

“Eh hindi ba nagmamahalan naman tayo?” kunwa’y tanong nito. 

“Tumigil ka nga,” asar niyang sabi. 

Dati naman ay madalas siyang tuksuhin nito, pero katakut-takot ang pagpipigil niya na bumigay. Nang makita niya ang sakit sa mga mata nito ay bigla siyang na-guilty. “Hindi kasi tama ang panunukso mo. Hindi pa naman tayo mag-asawa.”

“Eh ‘di asawahin mo na ako. Ready na akong magpakasal sa’yo.” Nakangiting sabi ni Princess. 

Gustung-gusto nang sumigaw ni Gabriel nu’ng mga oras na ‘yun at sabihing, “tigilan mo ako!”

Itutuloy…

Gayuma (15)

ni Maria Angela Gonzales @Kuwentong Pag-Ibig | January 6, 2024

“Kailangan kong makawala rito!” Ito ang paulit-ulit na sinasabi ni Princess sa kanyang sarili, pero hindi niya alam kung paano niya ito gagawin. Kahit naman nagawa na siyang pakawalan ni Baninay, hindi pa rin siya nakasisiguro kung hanggang kailan siya tatagal sa lugar na iyon. 

Sa tuwing ‘di niya nakikita si Gabriel, para bang gusto na ng kanyang puso na huminto sa pagtibok. Natigilan lang siya nang mapagtanto niyang kapag hinayaan niyang mangyari iyon, baka tuluyan lang makuha ni Baninay si Gabriel. At panigurado kapag namatay siya, hindi na siya makababalik kailanman. ‘Di niya alam kung paano niya naisip ang mga ganu’ng senaryo pero nakatitiyak siyang ‘yun ang mangyayari. 

O baka naman, kaya niya naisip ang mga ganu'ng senaryo ay dahil pinangarap din naman nilang maging isang magaling na manunulat, kaya kung anu-ano’ng ideya rin ang pumapasok sa kanyang isipan. 

Bigla siyang napamura dahil parang nakita niya sa kanyang isipan si Baninay na kumakaway na para bang nagpapaalam, at maya-maya ay nakita niya itong nakasuot ng gown na pangkasal. 

Hindi niya alam kung bakit nga ba siya nagkaroon ng ganitong vision, pero tiyak niyang hindi niya kakayanin na dumating ang sandaling iyon. Subalit, ano’ng gawin niya para makawala rito? 

Hanggang sa maalala niya na ang salita ng isip ng tao ay mas makapangyarihan. Kung ano ang isipin natin, maaari itong magkatotoo, at nang mga sandaling iyon, nakatitiyak siyang makakatakas siya rito. Ang kailangan lang niyang gawin ay mag-concentrate.

“Matatakasan kita, matatakasan kita, matatakasan kita!” Paulit-ulit niya itong binibigkas habang nakapikit.

“Ano bang ginagawa mo r’yan, ineng?” Nagtatakang tanong ng isang boses. 

Bigla siyang dumilat, at nanggilalas siya nang mapagtanto niyang nasa ibang lugar na siya. Ibig sabihin ba nito ay nakatakas na siya? 

Itutuloy…

Balak na magsama at magpakalayu-layo…Magpinsang nagkainlaban, dapat nang tumigil

ni Sister Isabel del Mundo - @Mga kuwento ng buhay at pag-ibig | January 4, 2024

Dear Sister Isabel,

Akala ko kapag nag-asawa ko, magiging masaya at maayos na ang pamumuhay ko. Ngunit hindi pala, kalbaryo ang sinapit ko sa napangasawa ko na mama's girl.

Ayaw niyang humiwalay sa kanyang ina, at dahil mahal ko siya, napilitan akong du’n na rin tumira sa bahay nila kahit na labag sa kalooban ko. Hanggang sa nagkaanak kami ng tatlo. Hinimok ko ang asawa ko na bumukod na kami upang magkaroon na kami ng masayang pamilya, at para wala na ring nakikialam na in-laws. Sinabi ko sa kanya na nahihirapan na ako sa sitwasyon namin kahit na may sarili na kaming pamilya.

Bumili na ako ng house and lot for my family, para pumayag na ang asawa ko na magbukod kami, pero hindi ko pa rin siya makumbinsi. 

Ano ang puwede kong gawin para pumayag ang asawa ko sa gusto kong mangyari? Napapaisip tuloy ako minsan na mag-asawa na lang kaya ako ng iba?

‘Yung susunod sa mga gusto ko. Muntik-muntikanan na akong matukso at

kumuha ng pangalawang asawa. Hindi ko na matitiis na habambuhay nakatira sa biyenan, gayung kaya ko namang buhayin ng maayos at sagana ang pamilya ko. 

Ano ba ang maaari n’yong ipayo sa akin? Hirap na hirap na talaga ako sa sitwasyon ko ngayon sa piling ng mga biyenan ko. Umaasa ako sa pamamagitan ng inyong payo upang malutas ang problemang kinasadlakan ko sa kasalukuyan.

Nagpapasalamat,

Garry ng Nueva Ecija

Sa iyo, Garry,

Nararamdaman ko ang hirap ng kalooban na dinaranas mo sa piling ng iyong biyenan, gayung kaya mo namang itaguyod ang iyong pamilya at bigyan sila ng maayos na pamumuhay. 

Ang maipapayo ko sa iyo ay kausapin mo ang biyenan mong lalaki na himukin niya ang kanyang asawa na yaman din lang may mga anak na kayo ng asawa mo at kaya mo naman silang bigyan ng magandang buhay, hayaan na kayong bumukod at tumayo sa sarili n’yong mga paa. Palayain na umano niya ang asawa mo. Ipaliwanag mong mabuti na kapag nag-asawa na ang isang babae dapat na siyang sumama sa asawa niya, at humiwalay na sa magulang. Hindi na dalaga ang kanilang anak, may sarili na siyang pamilya. Kausapin niya rin ang asawa mo na dapat siyang sumunod sa iyo para sa ikabubuti ng inyong pagsasama.

Umaasa akong magiging maayos ang pakikipagusap mo sa biyenan mong lalaki. Lahat ay nadadaan sa masinsinang pag-uusap. Natitiyak kong malulutas na ang problema mo. Papayag na ang asawa mo na iwan ang mommy niya upang sumama sa iyo. 

Sumasaiyo,