Bilyonaryong Mafia ang Mahal Ko (3)

ni Maria Angela Gonzales @Kuwentong Pag-Ibig | Pebrero 8, 2024

“ANO ho?” Gilalas na tanong ni Via sa kanyang ama-amahan.  Kahit malinaw naman ang kanyang pagkakarinig sa sinabi nito na, “Papatayin nila ako, kapag hindi ko nabayaran ang utang ko.”

Sa halip na sumagot, bigla na lamang humagulgol si Pedro. Natigilan si Via, ganitung-ganito kasi ang hitsura ng kanyang Tatay Pedro noong araw na namatay ang kanyang ina. 

Mahal na mahal kasi nito ang kanyang ina, kaya naman nang mawala ito, sobra rin siyang nagdusa. Sinisisi rin ni Pedro ang kanyang sarili dahil masama ang pakiramdam noon ng ina ni Via at ‘di niya man lang ito nasamahan. 

Kaya kahit hindi niya tunay na ama ang kanyang Tatay Pedro, itinuring niya pa rin itong tunay na magulang. Naging mabait at responsable naman kasi ito at ramdam din niya na mahal siya nito bilang isang anak. 

May mga pagkakataon nga na sinasabi nito na nakakalimutan niya na step daughter niya lang si Via. Iyon din ang rason kung bakit minahal niya ito na parang isang tunay na ama. 

“Mas maigi pa nga sigurong mawala na lang ako sa mundong ito,” wika ng kanyang Tatay Pedro. 

“Babayaran natin ang utang n’yo,” wika niya para magkaroon ito ng lakas na loob. Pero sa katunayan, hindi niya rin alam kung paano siya magkakapera gayung hindi naman siya nakapagtapos ng kanyang pag-aaral. Gayunman, masasabi pa rin niyang masuwerte siya dahil mayroon siyang trabaho sa isang bakery shop. 

“Hindi mo kaya.”

“Kakayanin ko, magkano ba ang utang n’yo?”

Tinitigan muna siya nito na para bang sinisiguro kung seryoso siya sa kanyang sinabi. Hindi tuloy niya napigilan ang mapalunok. Na-realize rin kasi niya na hindi magiging oa ang ekspresyon ng kanyang Tatay Pedro kung barya lang ang utang nito. 

“Limang milyon,” mariing sabi nito. 

Itutuloy…

Bilyonaryong Mafia ang Mahal Ko (2)

ni Maria Angela Gonzales @Kuwentong Pag-Ibig | Pebrero 7, 2024

Malalim na buntong hininga ang kanyang pinawalan habang nakatitig sa screen ng kanilang telebisyon na may sukat na 32 inches. 

Talaga naman kasing nakakainggit kapag nagkakaroon ng nakakakilig na eksena ang mga bida sa Korean telenovela. 

Kahit naman kasi 21-anyos na siya, naniniwala pa rin siya sa happily ever after. Iyon kasi ang sabi ng kanyang ina noong nabubuhay pa ito na sa takdang panahon, matatagpuan niya rin umano ang lalaking karapat-dapat para sa kanya. 

Ngunit, paano? Parang napakaimposible namang makatagpo siya ng isang prinsipe na sobrang guwapo kung siya ay naninirahan lamang sa isang squatter area. 

Hindi naman kasi siya palalabas, maliban na lamang kung may trabaho siya. Ngunit, paano na ngayon? Wala na rin siyang trabaho. Pinatalsik siya sa  trabaho dahil panay ang pagpapa-cute sa kanya ng boyfriend ng kanyang amo. 

Kahit naman kasi namamasukan lang siya bilang waitress, maganda at kaakit-akit pa rin ang kanyang pangangatawan, kaya hindi rin nakapagtataka kung bakit madaming nagkakagusto sa kanya. 

Dapat nga ba niya iyon ikatuwa? Hindi, dahil kahit wala siyang ginagawang masama, siya ang laging nasisisi. Hindi naman kasi niya ginusto na mainlab sa kanya ang mga lalaking taken na.

Siya nga pala si Olivia Castro, Via for short.  

Wala na ang kanyang ina at ama. Pero, mayroon naman siyang Tatay Pedro. 

Si Pedro Pedral ang naging asawa ng kanyang nanay. Hindi man ito ang kanyang tunay na ama, pero nagawa nitong magampanan ang pagiging mabuting asawa at ama sa kanila. 

Kaya, paano siya hindi maniniwala sa pag-ibig kung nakita niya iyon sa ina at sa kanyang Tatay Pedro.

Pagkaraan ay napailing siya dahil mula nang mamatay ang kanyang ina dahil sa aksidente. 

Kahit hindi kasama ang Tatay Pedro, para na rin itong namatay dahil unti-unting itong nagbago. 

“Aalis na tayo sa lugar na ito,” malakas na sabi ng kanyang Tatay Pedro.  

“Bakit po?”

“Dahil papatayin nila ako kapag hindi ko nabayaran ang utang ko,” anitong nanginginig ang boses sabay hagulgol. 

Itutuloy…

Bilyonaryong Mafia ang Mahal Ko (1)

ni Maria Angela Gonzales @Kuwentong Pag-Ibig | Pebrero 6, 2024

UNANG LABAS. 

Si Nhel Zamora ay ang klase ng tao na ‘di nagpapautang, pero may dahilan kaya niya pinautang nang pinautang si Pedro Pedral. 

Ibig niya kasi itong malubog sa utang, at nais din niyang makiusap ito sa kanya para maisagawa niya ang kanyang paghihiganti. 

Kahit na lumaki siyang mayaman, hindi sapat iyon para maging masaya ang kanyang buhay. Mahirap maging masaya, lalo na kung may kulang sa pagkatao mo, at iyon ay ang pagkakaroon niya ng ama.

Hindi man sinabi ng kanyang ina kung ano’ng kinahinatnan ng kanilang love story, narinig naman niya iyon sa kanilang mga katulong.“Napaaway na naman ang alaga ko,” wika ng kanyang Yaya Mameng.“Nakita ko nga may pasa na naman ang alaga mo,” wika naman ng isa pa nilang katulong na si Asunta. 

Sila ay mayroong tatlong kasambahay, pero kabilang na roon ang kanyang yaya na walang ibang ginawa kundi tutukan ang kanyang mga pangangailangan. 

“Ano bang nangyari?” Tanong naman ni Bebang - ang pinakatsismosa sa tatlo. 

“Tinukso na putok sa buho,” wika niya.Nanlaki ang kanyang mga mata nang narinig niya iyon. Hindi naman niya kasi sinabi ang dahilan kung bakit siya napaaway kaya ikinagulat niyang alam iyon ng kanyang yaya.“Nasaan ba kasi ang tatay ni Nhel?” Tanong ni Bebang.“Tsismosa ka talaga,” sagot naman ni Asunta.

“Nalunod yata sa isang mangkok na sabaw,” sambit naman ni Yaya Mameng. 

Si Yaya Mameng ang nag-alaga sa kanyang ina noong bata ito, kaya hindi na rin ito nagkaroon pa ng oras para makapag-asawa at magkaroon ng sariling pamilya.“Paanong nangyari iyon?” 

“Ayaw sa kanya ng mga magulang ni Marie,” 

Ang tinutukoy nilang Marie ay ang Ina ni Nhel Zamora. 

“Dahil mahirap lang ito?” Pagtatanong ni Asunta.“Hindi lang dahil sa mahirap, kundi dahil ambisyoso ito. Pinaibig niya lang nang husto si Marie at binuntis dahil nais niyang makaahon sa kahirapan. Hindi iyon pinayagan nina Senyor at Senyora. Sabi ng mga ito, mas gugustuhin pa nilang maging disgrasyada ang kanilang anak, kaysa maloko ni Pedro Pedral na wala rin namang pakialam. Dahil ‘di na ito bumalik pa nu’ng itaboy ito ng mga magulang ni Marie.”Marami pang pinag-usapan ang trio tsismosa, pero ang pinakatumatak sa kanyang isipan ay ang pangalan ng lalaking iyon na si Pedro Pedral.

Itutuloy…