Ilang taon man napiit sa bilangguan… Mga inosenteng naakusahan, napawalang-sala na

ni Atty. Persida Rueda-Acosta - @Daing mula sa hukay | Marso 15, 2024

Ang kuwentong ating matutunghayan sa araw na ito ay hango sa kasong Ocampo vs. People (G.R. No. 257781, July 31, 2023, Supreme Court Third Division). Ibinabahagi namin ito para magsilbing patunay na anumang dagok ang ating pagdaanan, lumaban tayo sa legal na paraan dahil ang pag-asa at pananampalataya ay hindi dapat nawawala.

Sapagkat darating din ang panahon, sa hirap at dagok ng buhay tayo ay makakaahon. Partikular sa kuwento natin ngayon, napatunayan na kahit na nakapiit sa kulungan, ang kalayaan ay maaari pa ring makamtan.

Sina Elvira at Gerry ay naharap sa kasong paglabag sa Sections 11 at 12, Article II ng Republic Act (R.A.) No. 9165, as amended.

Batay sa tala ng kanilang kaso, alas-8 ng gabi noong Enero 12, 2017, ipinatupad umano ng mga pulis ang search warrant na ipinalabas ng hukuman.

Sina Elvira at Gerry ay nakuhanan diumano ng sampung pakete na naglalaman ng pinaghihinalaang shabu, ilang aparato at paraphernalia sa paggamit ng ipinagbabawal na gamot.

Batay sa testimonya ni PO1 Garcia, isa sa mga naatasang tagahanap o searcher at si SPO1 Miranda ang imbestigador. Nang ipatupad umano nila ang nasabing search warrant ay nasaksihan ito ng mga opisyal ng barangay at kinatawan mula sa media.

Sa ilalim umano ng unan sa silid nina Elvira nakita ang mga pakete at paraphernalia. Inilagay umano ni PO1 Garcia ang mga nakalap na ebidensya sa kanyang bulsa at inilatag ang mga ito sa mesa nang magsimula na ang pag-iimbentaryo.

Noong nag-iimbentaryo na diumano niya minarkahan ang mga pakete ng kanyang initials. Samantala, si SPO1 Miranda ay naglagay din ng kanyang initials sa mga nakalap na pakete.

Tanging sina Elvira at Gerry lang ang tumayong testigo para sa depensa. Ayon sa testimonya ni Gerry, nasa loob sila ng kanilang silid nang makarinig sila ng ingay mula sa labas. Katatapos lang umano niyang maligo at magbihis nang buksan ang kanilang pinto.

Dito na umano niya nakita ang armadong lalaki na sinabihan siya ng kanyang karapatan na tumahimik. Ang kasama umano ng naturang lalaki ang pumasok at nag-ikot sa kanilang silid, ngunit wala umanong nakitang ipinagbabawal na gamot doon. Nang pababain sila, may inilabas umano ang naturang lalaki na mga ipinagbabawal na gamot at nilagay sa mesa. Nang dumating ang mga opisyal ng barangay, nagsimula na umanong kumuha ng mga litrato at dinala sila sa himpilan ng pulis at ospital upang suriin.

Nalaman ni Gerry na mayroon pa lang ipinatupad na search warrant ang mga pulis ngunit hindi umano niya ito nakita.

Ayon din kay Gerry, nagpositibo sila sa ipinagbabawal na gamot dahil mayroon pinainom sa kanila mula sa hindi selyadong bote.

Pinatotohanan naman ni Elvira ang salaysay ni Gerry. Iginiit niyang walang nakita na ipinagbabawal na gamot sa kanilang silid at hindi rin umano sila gumamit nito.

Lumabas ang desisyon ng Regional Trial Court o RTC noong ika-13 ng Pebrero 2018 na hinahatulan ang dalawang naakusahan para sa parehong kaso.

Naghain sina Elvira at Gerry ng napapanahong apela sa Court of Appeals o CA, subalit inayunan ng CA ang ibinabang hatol ng RTC.

Sa pagnanais na mapawalang-sala, iniangat ni Elvira ang kanyang apela sa Korte Suprema. Iginiit niyang mali ang naging hatol sa kanila, sapagkat hindi lubos na napatunayan ng tagausig ang corpus delicti at ang chain of custody ng mga nakalap na ebidensya. Kung kaya’t hindi umano napatunayan ang kanilang pagkakasala.

Sa inilabas na Resolusyon ng Third Division ng Supreme Court noong Hulyo 31, 2023, binigyang-diin dito na sa mga pag-uusig na mayroong kaugnayan sa ipinagbabawal na gamot, mahalaga na mayroong ebidensya ukol sa identity at integrity ng corpus delicti o ang mismong ipinagbabawal na gamot.

Kaakibat nito ay kinakailangan na mapatunayan ang apat na mahahalagang koneksyon sa chain of custody ng ebidensya – “first, the seizure and marking of the illegal drug recovered from the accused by the apprehending officer; second, the turnover of the illegal drug seized by the apprehending officer to the investigating officer; third, the turnover by the investigating officer of the illegal drug to the forensic chemist for laboratory examination; and fourth, the turnover and submission of the marked illegal drug seized by the forensic chemist to the court.”

Nagkaroon ng pagdududa sa isipan ng Kataas-taasang Hukuman kaugnay sa kriminal na responsibilidad ng dalawang naakusahan. Naging kapuna-puna umano ang pagkukulang sa pagpepreserba ng integridad ng mga nakalap na ebidensya dahil sa hindi maayos na pangangalaga at nahuling pagmamarka sa mga ito.

Nakompromiso umano ang integridad at halaga ng ebidensya sa ginawang pagbubulsa at belated marking ni PO1 Garcia. Kung kaya’t para umano sa Hukuman, hindi napanatili ang unang kawing sa chain of custody.

Hindi rin umano napatunayan ng tagausig na napanatili ang ikaapat na kawing sa chain of custody sapagkat ang sumuring forensic chemist na si PCI Tang ay hindi inupong testigo ng prosekusyon sa hukuman. Bagaman napagkasunduan umano ng tagausig at depensa ang testimonyang isinumite ni PCI Tang, hindi umano naging sapat ang nilalaman ng nasabing testimonya dahil mayroon umanong mga butas kaugnay sa naging pagsasalin ng kustodiya ng ebidensya. Mayroon din umanong kinatawan ng Prosekusyon ang humawak ng kustodiya ng mga ebidensya subalit hindi nakasaad sa tala ng kaso kung sino ang kinatawan na ito. Wala rin umanong Chain of Custody Form na ipinresenta sa hukuman.

Ayon sa Ikatlong Dibisyon: “We emphasize that establishing every link in the chain of custody is crucial to the preservation of the identity, integrity and evidentiary values of the seized illegal drug. Failure to demonstrate compliance with even just one of these links creates reasonable doubt that the substance confiscated from the accused is the same substance offered in evidence.”

Dahil sa mga nabanggit na pagkukulang, nagkaroon ng makatuwirang pagdududa sa kasalanan ng mga naakusahan. Kung kaya’t ipinagkaloob ng Kataas-taasang Hukuman ang pagpapawalang-sala kay Elvira.

Bagaman hindi na nag-apela sa Korte Suprema si Gerry, siya ay makikinabang sa pabor na desisyon na iginawad ng Kataas-taasang Hukuman kay Elvira alinsunod sa tuntuning nakapaloob sa Section 11 (a), Rule 122 ng Revised Rules of Criminal Procedure, as amended, kung saan nakasaad ang mga sumusunod:

“Section 11. Effect of appeal by any of several accused. — (a)   An appeal taken by one or more of several accused shall not affect those who did not appeal, except insofar as the judgment of the appellate court is favorable and applicable to the latter;”

Sa kasong ito, napakadali na tayo ay mahusgahan at maakusahan. Madalas pa nga, ang panghuhusga at pang-aakusa sa buhay ng ilan ay nagiging katapusan. Subalit, hindi dapat mawalan ng pag-asa. Tulad ni Elvira na hanggang sa huli ay inilaban ang anumang katiting na pag-asang natitira at pilit pinanghahawakan. Sa tulong ng aming Tanggapan, sa pangunguna ng aming mga abogado sa PAO Special and Appealed Cases Service (SACS), naialis sina Gerry at Elvira sa piitang tila nagsilbing hukay ng kanilang buhay. Tumagal man ang kanilang legal na pakikipaglaban, nagbunga naman ang kanilang inaasahan at inaasam na kalayaan pati na rin ang pagkakataon na malinis ang kanilang mga pangalan. Dito rin natin makikita ang pag-ikot ng hustisya gaano man ito katagal. Manalig lamang tayo sa kakayahan ng ating mga hukuman na suriin nang mabuti ang mga naisumiteng ebidensya sa kanilang harapan.

Pag-frame-up ng mga kapulisan, bisto

ni Atty. Persida Rueda-Acosta - @Daing mula sa hukay | Marso 2, 2024

Isang kaso na hawak ng aming tanggapan ang tampok ngayon sa ating artikulo.

Mahaba ang naging pagdaing ng aming kliyente na si Cyril, siya ay naakusahan sa kasong may kaugnayan sa ipinagbabawal na gamot. 

Ang haba ng kanyang pakikipaglaban at tila naging mailap sa kanya ang hustisya.

Gayunman, nakamit pa rin niya ang katarungan na kanyang inaasam-asam. Nawa’y magbigay ng pag-asa ang kuwento ni Cyril lalo na sa ating mga mambabasa na kasalukuyan ding dumadaan sa hirap at matinding problema. 

Si Cyril ay naaresto kaugnay sa ilegal na pagbebenta ng ipinagbabawal na gamot. Batay sa tala ng hukuman, Nobyembre 1, 2016 nang magkasa ng buy-bust operation ang himpilan ng pulis sa Bayan ng Tayug, Probinsya ng Pangasinan, bunsod sa natanggap na impormasyon ni PO3 Dilan na nagbebenta diumano si Cyril ng ipinagbabawal na gamot. Si PO3 Dilan ang naatasang tumayo bilang poseur buyer at si PO2 Fernando naman ang nagsilbing back-up.

Nagkita umano ang impormante, kasama si PO3 Dilan, at si Cyril sa harap ng isang paaralan para sa napipintong bentahan. Unang iniabot diumano ni PO3 Dilan ang marked money kay Cyril at ibinigay naman diumano ni Cyril kay PO3 Dilan ang isang pakete. Matapos ay agad umano na nagbigay ng hudyat si PO3 Dilan dahilan upang agad na rumesponde si PO2 Fernando, at mga kasamahan nito para arestuhin si Cyril.

Sa mismong lugar kung saan naaresto si Cyril, minarkahan ang nakuhang pakete. Ang imbentaryo at pagkuha ng larawan ng mga ebidensya ay nasaksihan diumano ng dalawang kagawad ng barangay at isang kinatawan mula sa Department of Justice (DOJ). Matapos iyon ay dinala na umano si Cyril sa ospital para sa eksaminasyon at kalaunan ay dinala siya sa himpilan ng pulis para sa kaukulang imbestigasyon.

Bitbit ni PO3 Dilan ang nakuhang ipinagbabawal na gamot mula sa lugar ng pag-aresto hanggang sa nasabing himpilan. Dinala na niya diumano sa crime laboratory ang kaukulang request upang masuri ang nakalap na ebidensya. Batay umano sa pagsusuring isinagawa ni PSI Boquiren, positibo na ito ay methamphetamine hydrochloride o shabu. Matapos ang pagsusuri ay sinelyuhan ni PSI Boquiren ang pakete gamit ang tape, minarkahan ito at ibinigay sa evidence custodian.

Nang maisampa ang kasong paglabag sa Section 5, Article II ng Republic Act (R.A.) No. 9165, o mas kilala bilang Comprehensive Dangerous Drugs Act of 2002, sa Regional Trial Court (RTC), “not guilty” ang naging pagsamo ni Cyril. Iginiit niyang walang naganap na buy-bust at siya ay isang biktima ng frame-up.

Ayon sa bersyon ni Cyril, siya ay papunta umano sa palengke sakay ng motorsiklo noong araw na iyon nang pahintuin siya ng mga pulis. Hiningi umano sa kanya ang dala niyang backpack at ininspeksyon ito. 

Nang ibalik ito sa kanya ay sinabihan umano siyang maghintay. Halos isang oras ang lumipas nang dumating umano si PO3 Dilan sakay ng isang mobile ng pulis at mayroong kasamang tatlong lalaki. 

Kinuha umano ni PO3 Dilan ang isang pakete at gusot na pera mula sa bulsa nito at dinala si Cyril sa kabilang bahagi ng daan, inilagay ang nasabing pakete at pera sa ibabaw ng kahon ng motorsiklo at nagsimulang kumuha ng litrato. Ilang saglit pa ay mayroon na diumanong mga opisyal ng barangay na dumating, ngunit hindi umano kilala ni Cyril ang mga ito.

Taliwas sa inaasahan ng inakusahan, siya ay hinatulang may-sala ng RTC. Umapela siya sa Court of Appeals o CA, ngunit sinang-ayunan ng appellate court ang hatol ng RTC.

Kung kaya’t inakyat ni Cyril ang kanyang pagsamo sa Supreme Court o SC.

Bagaman sa una ay hindi naging pabor kay Cyril ang SC, batay sa ipinalabas na resolusyon na may petsang Oktubre 13, 2021, nabigyan siya ng isa pang pagkakataon na mapag-aralang muli ang kanyang apela sa pamamagitan ng inihain niyang Motion for Reconsideration. Sa nasabing motion, muling iginiit ni Cyril na siya ay inosente.

Binigyang-diin niya na walang halaga at hindi maaaring gamitin ang mga ebidensya na isinumite ng tagausig laban sa kanya sapagkat nabahiran umano ng pagdududa ang integridad nito bunsod ng naging pagkukulang sa parte ng mga umaresto sa kanya at sa sumuri ng mga ebidensya. Kung kaya’t hindi umano napatunayan ng tagausig na napreserba ang chain of custody ng ebidensya.

Sa muling pagsasaalang-alang sa buong kaso, nakita ng kataas-taasang hukuman na hindi umano lubos na nasunod ang mga alituntuning nakasaad sa Section 21, Article II ng R.A. No. 9165, na naamyendahan ng Republic Act (R.A.) No. 10640, partikular na ang pagpapatunay sa kondisyon ng mga ebidensya nang matanggap ito ni PSI Boquiren, ang paraang ginamit sa pagsusuri ng mga ito, pati na ang paraan ng pangangasiwa at pagtatago ng mga ito bago, habang at matapos ang nasabing pagsusuri. 

Bagaman nagkasundo umano ang depensa at tagausig sa iminungkahing testimonya ni PSI Boquiren sa hukuman, hindi pa rin naging sapat ang nilalaman nito para mapatunayan ang pagtalima sa hinihinging proseso sa ilalim ng nabanggit na probisyon ng batas. At dahil hindi rin iniharap sa hukuman si PSI Boquiren, nanatili umano ang pagdududa ng hukuman sa integridad ng mga isinumiteng ebidensya. Kabalikat nito ay naging kwestyunable ang hatol na pagkakasala sa inakusahan.

Nakadagdag pa umano sa pagdududa ng SC nang hindi rin inupo bilang testigo ng tagausig sa hukuman ang mga kinauukulang opisyal na umano ay nakatanggap ng ebidensyang sinuri. Ang pagkukulang na ito ng tagausig ay nagdulot ng pag-aalinlangan, partikular na kung ang ebidensya na nai-turnover at naisumite sa hukuman ay ang parehong ebidensya na nakumpiska mula sa inakusahan. 

Dahil sa mga nabanggit na pagkukulang ng taga-usig, higit na minarapat ng kataas-taasang hukuman na ipinagkaloob ang pagsamo na ipawalang-sala si Cyril.

Naging mahaba man para kay Cyril ang kanyang legal na pakikipaglaban, sa huli ay ang hustisya at kalayaan na inaasam ang kanyang nakamtan. Kung kaya’t anuman ang dagok o pagsubok ang ating maranasan, ‘wag na ‘wag tayong mawawalan ng pananampalataya at pag-asa. Katulad ni Cyril, umasa at nanalig siya sa pananaig ng katarungan at nakamtan niya rin ito kalaunan.

‘Di pagsunod ng mga pulis sa alituntunin, mga nasasakdal maaaring maabsuwelto

ni Atty. Persida Rueda-Acosta - @Daing mula sa hukay | Pebrero 23, 2024

Madalas kong sabihin na ang gutom at uhaw ay kaya pang tiisin, ngunit ang kawalan ng katarungan ay napakahirap dalhin, lalo na ng mga taong naapi at napiit sa bilangguan na wala namang kasalanan.

Gayundin, ang mga nabilanggo na hindi nagkaroon ng maayos na paglatag ng ebidensya laban sa kanila. Sa katunayan, mayroong mga pagkakataon na ating naririnig at nasasambit ang kawalan ng hustisya sa ating bansa, lalo na para sa mga inakusahan.

Ngunit ang kuwento na aming ibabahagi ngayon ay hango sa kasong People vs. Rosales and Pillado (CA-G.R. CR-H.C. No. 16293, September 18, 2023, na isinulat ni Honorable Court of Appeals Associate Justice Zenaida T. Galapate-Laguilles), ay patunay na ang hustisya ay hindi nahihimlay. Gising ang ating hukuman at pinakikinggan ang bawat pakikipaglaban patungo sa pagkamit ng katarungan.Sina Nene at Emily ay naakusahan sa pagbebenta ng methamphetamine hydrochloride o shabu na isang uri ng ipinagbabawal na gamot, dahilan upang sila ay maharap sa kasong paglabag sa Sections 5 at 11, Article II ng Republic Act (R.A.) No. 9165, na naamyendahan ng Republic Act (R.A.) No. 10640.Batay sa mga isinumite ng tagausig, ang dalawa ay naaresto bunsod ng buy-bust operation na naganap noong Ika-8 ng Enero 2020. Noong araw na iyon ay nakatanggap ng tip mula sa isang impormante ang himpilan ng pulis sa Lungsod ng Quezon. Naghahanap umano si Nene nang mapagbebentahan ng mga ipinagbabawal na gamot. Nang makumpirma ang nasabing tip at makapag-areglo ang impormante at si Nene sa oras at lugar ng bentahan ay agad na nakipag-ugnayan ang nasabing himpilan sa Philippine Drug Enforcement Agency at naghanda para sa ikinasang operasyon. Si PCpl. Bulawan ang tumayong poseur buyer at si PCpl.

Bangayan ang naatasan bilang backup. Alas-5 ng hapon noong araw na iyon ay magkasama na nakipagtagpo si PCpl. Bulawan at ang impormante kay Nene. Matapos na maibigay umano ni Nene kay PCpl. Bulawan ang isang pakete na naglalaman ng pinaghihinalaang ipinagbabawal na gamot at naibigay naman nito kay Nene ang markadong salapi, siyang dating naman diumano ni Emily na kumuha rin ng isang pakete mula kay Nene. Matapos maibigay ang napagkasunduang hudyat, agad umanong inaresto sina Nene at Emily.“Not guilty” ang pagsamo nina Nene at Emily sa hukuman. Ang ilan sa mga naitakda sa pre-trial conference ng kanilang kaso ay si Police Major Bacani, isang kuwalipikadong Forensic Chemist, ang personal na nakatanggap mula kay PCpl. Bulawan ng Request for Laboratory Examination, kalakip ang mga ebidensya na susuriin, isinagawa umano agad ni PM Bacani ang pagsusuri at lumabas na positibo ang mga ito na methamphetamine hydrochloride na nagsumite. Sa naturang pagsusuri at ang mga specimen ay kanyang na-turnover sa evidence custodian na si PO1 Tuccad; at na wala umanong personal na kabatiran si PM Bacani ukol sa naging pag-aresto kina Nene at Emily, gayundin sa pinanggalingan ng mga ebidensya na natanggap niya para suriin.Pinabulaanan naman ni Nene na sila ay naaresto bunsod ng buy-bust operation. Ayon sa kanya, alas-10 ng umaga noong Enero 8, 2020 ay kasama niyang kumakain ang pamilya niya sa loob ng kanilang bahay nang dumating ang mga opisyal ng barangay at inutusan silang lumabas ng bahay. Hindi niya umano kilala ang mga ito sapagkat bago pa lamang siya sa naturang lugar. Laking gulat na lamang umano niya nang maghalughog ang mga ito sa kanyang bahay na tumagal hanggang alas-5 ng hapon. Matapos ay dumating diumano ang mga pulis, dinala siya sa isang eskinita at pilit ipinatuturo ang pinagkukunan ng ipinagbabawal na gamot, ngunit wala umano siyang maisagot. Nang makabalik sila sa kanyang bahay, nakita na lamang umano niyang mayroon na roong isang mesa na may nakapatong na mga gamit.

Naroon na rin umano ang ilan pang mga pulis at isang babae na hindi niya kilala. Nang may dumating na media, nagsimula na umano ang mga pulis na kumuha ng litrato at pinapirma umano sila sa isang dokumento. Pagdating naman barangay kagawad ay pinamwestra umano sila ng pagturo sa mga gamit na sa mesa habang sila ay kinukuhanan ng litrato.Iginiit ni Nene na malaking kasinungalingan ang ibinintang sa kanya. Bagaman siya ay nakagamit na ng ipinagbabawal na gamot, matagal na umano mula nang huli niya itong ginawa. Ang kanya umanong manugang ang nagbebenta ng ipinagbabawal na gamot.Iginiit naman ni Emily na walang katotohanan na siya ay nahulihan na mayroong ipinagbabawal na gamot. Alas-4 ng hapong iyon ay nasa bahay lamang umano siya nang sabihin sa kanya ng kanyang anak na mayroong nahuli ang mga pulis dahil sa hindi legal na pagsusugal. Lumabas umano siya ng bahay dahil baka ang asawa niya ang nahuli, nang bigla na lamang umano mayroong humawak sa kanya at dinala siya sa isang eskinita. Ilang saglit ay dumating na umano ang mga pulis na kasama si Nene, ngunit hindi niya umano alam kung saan ito naaresto.Dagdag pa ni Emily, nakita na lamang niya umano ang mga ipinagbabawal na gamot na hawak na ng mga pulis bago dumating ang media. Makalipas ang ilang saglit, pinasakay umano sila sa sasakyan at dinala sa himpilan ng pulis.Hinatulan ng Regional Trial Court si Nene ng pagkakakulong para sa pagbebenta ng ipinagbabawal na gamot at pinagbabayad ng fine. 12 to 20 years na pagkakakulong naman ang ibinabang hatol sa kanila.  Sa paniwalang sila ay naagrabyado, umapela sina Nene at Emily sa Court of Appeals (CA).

Matapos ang mabusisi at muling pag-aaral sa kaso, kinatigan ng CA ang dalawang nasasakdal. Batay sa kanilang desisyon, hindi umano sumunod ang mga umarestong pulis sa alituntuning nakasaad sa Section 21, Article II ng R.A. No. 9165, as amended by R.A. No. 10640, partikular na ang pagsaksi ng isang nahalal na pampublikong opisyal at kinatawan ng National Prosecution Service (NPS) o media sa pag-iimbentaryo ng nakalap na ebidensya na agad umanong dapat maganap matapos ang pag-aresto sa mga suspek at pagkuha ng mga ebidensya mula sa kanila. Napuna ng appellate court na wala ang mga naturang saksi noong maaresto sina Nene at Emily. Katunayan, lumipas pa ang 20 minutes bago makarating ang opisyal ng barangay at kinatawan ng media upang saksihan ang pag-iimbentaryo. Binigyang-diin ng CA, sa panulat ni Honorable Associate Justice Zenaida T. Galapate-Laguilles ng 13th Division:

“The fact that only the police officers were present during the accused’s apprehension is enough to raise concern. In such an environment, police impunity becomes inherent. To state the obvious, assuming arguendo that there was indeed evidence planted, it would be virtually impossible for the accused to overcome the oft-favored testimony of police officers through mere denial. This is further aggravated by the known fact that entrapment procedures are inevitably shrouded with secrecy and cunningness to ensure the success of the operation.” 

Naging kapuna-puna rin sa CA na may naging puwang sa chain of custody ng mga nakalap na ebidensya. Hindi umano itinakda, at hindi rin umano napatunayan ng tagausig na masusing naitago at napreserba ang mga nakalap na ebidensya laban sa mga nasasakdal. Maliban sa mga nabanggit, hindi rin umano nakapagbigay ang tagausig ng makatwirang dahilan sa mga naging pagkukulang ng mga umarestong pulis sa pagsunod sa hinihingi ng batas. Ayon sa CA, ang buy-bust operation ay planadong pagkilos na kung saan mayroong sapat na panahon ang mga pulis upang maghanda at alam din nila ang mga tuntuning dapat sundin. Ang mga naging pagkukulang sa isinagawang pag-aresto sa mga nasasakdal at ang kawalan ng sapat na dahilan sa likod ng mga pagkukulang na iyon ay nagdulot ng pag-aalinlangan at pagdududa sa hukuman hindi lamang sa integridad ng mga ebidensyang isinumite laban sa mga nasasakdal kundi pati na rin sa mismong pagkakasala ng mga ito. Kung kaya’t ang naging pasya ng CA ay ang igawad ang pagpapawalang-sala kina Nene at Emily.Sa kasong ito ay ating nasaksihan na sa hukuman, hindi lamang daing ng mga biktima ang napapakinggan, kundi pati na rin ang daing ng mga naakusahan. Patunay din ito na ang gulong ng hustisya ay hindi titigil at ang batas ay ipapatupad nang walang pagpigil upang ang bawat kamalian ay masupil, maging sa panig man ng akusado o ng mga pulis na umaresto. Ang patas na hustisya ay karapatan ng bawat tao, nasasakdal man ito o hindi. Parehas silang pangangalagaan ng batas.