PNP COVID-19 fatalities, pumalo na sa 115

ni Jasmin Joy Evangelista | September 26, 2021

Pumalo na sa 115 ang bilang ng mga nasawi sa COVID-19 sa hanay ng Philippine National Police (PNP).

Ito ay matapos madagdag sa talaan ang isa pang pulis.

Ang ika-115 pulis na nasawi ay isang 54-anyos na naka-assign sa Camp Crame.

Ayon kay PNP Chief, General Guillermo Eleazar, Setyembre 17 nang magpositibo sa COVID-19 si Patient No. 115 kaya na-admit ito sa Kiangan Quarantine Facility.

Noong Setyembre 18 ay dinala na ito sa ospital dahil nahirapan nang huminga at noong Setyembre 20 ay na-intubate na habang nasa ICU.

Noong Setyembre 23, isang kaanak nito ang nagpaalam sa PNP na pumanaw na ang biktima dahil sa Cardiac Arrhythmia at Pneumonia.

Batay naman sa PNP Health Service, ang pumanaw na pulis ay may comorbidities at nakatanggap na ng unang dose ng COVID-19 vaccine.

“All the assistance and needs will be given to the bereaved family and I would like to extend the PNP’s sincerest condolences”, ani Eleazar.

Sa kabuuan, umabot na sa 38,916 ang mga dinapuan ng coronavirus diseases 2019 sa PNP kabilang na ang 144 new cases.

Kahit fully vaccinated na... 12 madre sa Carmelite Monastery sa Rizal, positibo sa COVID-19

ni Lolet Abania | September 25, 2021

Nasa 12 mga madre mula sa kabuuang 18 sa kanila na naninirahan sa Carmelite Monastery sa bayan ng Tanay, Rizal province, ang nagpositibo sa test sa COVID-19.

Inianunsiyo ito ng mga sister sa pamamagitan ng kanilang official Facebook account.

“We are fully vaccinated, except one Sister who is still taking chemo tabs,” pahayag ng mga madre.

“At present, we are considered as mild cases and symptomatic,” dagdag nila.

Tinayak naman ng mga sisters sa kanilang mga kaibigan na nasa mabuti silang kalagayan.

“Do not worry about us... we are hoping to recover and whatever happens, someday we will praise Him together in the Kingdom of Light and say with Mary, ‘the Almighty has done great things for me, and holy is His name.’ We love you all!”

Patuloy naman ang mga madre sa kanilang mga panalangin partikular na doon sa mga labis na nangangailangan ng dasal para sa kanilang mga mahal sa buhay at sa mga dumaranas din ng sakit na COVID-19.

“At this time of pandemic, we are offering prayers for you,” ani pa ng mga madre.

Matatandaang nai-report na nasa siyam na miyembro ng Religious of the Virgin Mary (RVM) congregation ang nasawi sanhi ng COVID-19 habang ang kumbento na nasa Quezon City ay kasalukuyang naka-lockdown.

8 madre patay sa COVID-19

ni Lolet Abania | September 22, 2021

Walong madre ang nasawi mula sa Congregation of the Religious of the Virgin Mary (RVM) Sisters matapos na magpositibo sa COVID-19.

Ayon sa pamunuan ng RVM ng Radyo Veritas, pawang mga nasa edad 80 hanggang 90 ang mga namatay na nakabilang sa 62 madre na nagpositibo sa COVID-19 mula Saint Joseph Home at kumbento ng mga RVM Sisters na matatagpuan sa Quezon City.

Sinabi ni RVM Sister Ma. Anicia Co, spokesperson ng kongregasyon, bukod sa mga madre, nakasama rin sa nagpositibo sa COVID-19 ang nasa 52 personnel ng kumbento. “The personnel are still young so they are on the road to recovery. Some Sisters are moving from symptomatic to asymptomatic. Eight of the Sisters, aged 90s and 80s, afflicted with COVID returned home to our heavenly Father,” pahayag ni Sister Co sa isang panayam ng Veritas.

Nilinaw naman ni Sr. Co ang mga naiulat na ang dahilan ng outbreak umano sa loob ng kumbento ay sanhi ng hindi pa pagpapabakuna ng mga RVM Sisters at mga personnel nito. Giit ni Sister Co, wala itong katotohanan dahil nitong Mayo at Hunyo ay isinagawa ang unang batch ng pagbabakuna sa mga RVM sisters habang sinundan naman ito ng ikalawang batch ng vaccination kontra-COVID-19 nitong Hulyo. Paliwanag pa ni Sister Co, ang mga hindi lamang nabakunahan ay ang walong madre na nasawi dahil sila ay nakaratay na rin sa sakit sa loob ng kumbento.

“It was not the decision of the RVM congregation, nor the leaders nor the Sister Administrator of the St. Joseph Home that they would not be vaccinated. The Sister Administrator actually followed up later for their vaccination but it did not come soon,” sabi ni Sister Co.

Patuloy naman na humihiling ng panalangin ang mga apektadong RVM sisters para sa kanilang paggaling at ang iba pang madre at personnel.

“Please pray for us especially our Sisters in St. Joseph Home. May our Sisters come to full recovery. May God grant strength to our other Sisters in the communities in the compound strength to continue serving the affected community,” wika ni Sister Co, habang labis ang kanilang pasasalamat sa mga nagbibigay ng suporta at panalangin.

Nauna nang isinailalim sa lockdown ang kumbento dahil sa naganap na COVID-19 outbreak sa loob nito.

Pinayuhan din ng madre ang publiko na maging maingat sa mga mapagsamantalang indibidwal na ginagamit ang pangalan ng kumbento.

“The RVM Secretariat has received reports of solicitation of funds using our name. [It] was found out [that it was] a false account using the name of an RVM Sister. We ask our benefactors, alumni and friends who want to help to verify with the RVM Secretariat before they send any financial assistance,” ani Sister Co.