Pagpapadala ng domestic workers sa Saudi Arabia, suspendido – DOLE

ni Lolet Abania | November 28, 2021

Isinuspinde pansamantala ng Department of Labor and Employment (DOLE) ang pagpoproseso at deployment ng mga bagong hired na mga household service workers (HSWs) sa Kingdom of Saudi Arabia.

Sa ulat, ang kanilang mga deployments ay sinuspinde dahil sa nangyaring labor abuse incident, kung saan sangkot ang isang retiradong Saudi general na minamaltrato umano ang maraming overseas Filipino workers (OFWs) sa naturang teritoryo.

Ang iba’t ibang pangalan naman ng mga employer ay inilagay na rin sa employment contract ng HSWs.

Si DOLE Secretary Silvestre Bello III ang siyang nag-isyu ng nasabing memorandum habang inatasan na rin ang Philippine Overseas Labor Offices na ihinto muna ang beripikasyon ng mga newly-hired domestic workers.

Ayon pa sa report, ang domestic workers at skilled workers na nagre-renew ng contracts ay exempted sa ipinapatupad na deployment ban.

Alert Level 2, panatilihin sa gitna ng banta ng Omicron — eksperto

ni Jasmin Joy Evangelista | November 28, 2021

May panawagan ang ilang eksperto sa gitna ng banta ng coronavirus disease (COVID-19) Omicron variant.

Anila, kailangang panatilihin ang Alert Level 2 sa buong bansa hanggang Enero, kahit na bumababa na ang bilang ng mga kaso ng COVID-19 nitong mga nagdaang mga linggo. 

Ayon kay Dr. Guido David ng OCTA Research, nararapat lang na manatili sa Alert Level 2 para paghandaan at mas ma-contain ang posibleng pagpasok ng Omicron na unang nadiskubre sa South Africa. 

“I understand the position na we can remain at alert level para ready na din tayo just in case at para ma-contain natin ang spread," ani David. 

Para naman kay health reform advocate Dr. Tony Leachon, dapat maghinay-hinay pa sa ngayon lalo't may pagbabakuna pa. 

“Ang suggestion ko i-retain natin ang Alert Level 2 kasi ang dami pa nating gagawin. Magbabakuna pa tayo, Magbu-booster shots pa tayo. ’Yung mga bata babakunahan pa natin. Pangalawa, parang Alert Level 1 na ’yung Alert level 2, so lalo na ’pag in-Alert Level 1. So maghinay-hinay tayo. I think mas maganda ’yung merrier and safer Christmas, kaya buong December Alert Level 2 muna tayo nang sa gano'n safe na safe talaga ang ating Christmas. Tapos sa January 2022 na tayo mag-Level 1 pag nabakunahan na natin ang at least 50 percent of the population,” ani Leachon. 

Noong Biyernes ay idineklara ng World Health Organization ang Omicron bilang variant of concern dahil sa mas mabilis umano itong makahawa kumpara sa Beta at Delta variant.

30K volunteers, sasabak sa 3-araw na nat’l vaccination drive — DOH

ni Lolet Abania | November 27, 2021

Umabot sa tinatayang 30,000 volunteers sa ngayon, ang nag-sign up para sa 3-araw na national vaccination drive na gaganapin sa Nobyembre 29 hanggang Disyembre 1, ayon sa Department of Health (DOH).

“[Now] we are happy to note that we have around 30,000 who have already volunteered and are being matched to their local government units. Some of them will actually be coming from the National Capital Region (NCR),” ani DOH Health Promotion Bureau/Disease Prevention and Control Bureau Director Dr. Beverly Ho sa Laging Handa briefing ngayong Sabado. “Pero siyempre, we will need more,” dagdag ni Ho.

Una nang sinabi ng pamahalaan na nangangailangan sila ng tinatayang 160,000 volunteers para sa national vaccination drive.

“Marami po kasing nagtatanong kung kailangan may medical background ba bago ka puwede mag-volunteer. So ang sagot po natin doon ay hindi, kasi we actually need educators -- ‘yung mga tumutulong po mag-register at tumutulong din po na mag-orient or mag-observe roon sa sites natin to help traffic, at encoders,” paliwanag ni Ho.

“Lagi naman po tayo sa Pilipinas, best effort always, lalo na ang healthcare workers natin na nagwo-work na for a very, very long time,” sabi pa ni Ho.

Ayon naman sa National Task Force Against COVID-19 (NTF) at ng National Vaccination Operations Center (NVOC) nitong Biyernes, nag-adjust sila ng kanilang target na vaccination output para sa 3-araw na vaccination campaign ng 9 na milyon na lamang sa halip na 15 milyon.

Sinabi rin ng NTF at NVOC na magkakaroon ng isa pang round ng 3-araw na vaccination drive na gaganapin naman mula Disyembre 15 hanggang 17. Makakatulong ito upang makamit ng gobyerno ang target na maging fully vaccinated ang 54 milyong Pinoy bago matapos ang taon.

“The Bayanihan Bakunahan on November 29 to December 1 will primarily focus on increasing the Philippines’ coverage of the first dose to 70% and increase the booster jabs, while the December 15 to 17 activities will be focused on administering the second dose and boosters,” pahayag ng NTF at NVOC.