'Arcturus' COVID variant, pasok na sa 'Pinas

ni Madel Moratillo | April 26, 2023

Nakapasok na rin sa bansa ang Omicron subvariant na XBB.1.16 na kumakalat na sa buong mundo.

Sa biosurveillance report ng Department of Health, ang natukoy na kaso ng XBB.1.16 o 'Arcturus' ay nakita sa Western Visayas.

Sinasabing ito ay recombinant ng dalawang lineage ng BA.2.

Sa ngayon, kabilang ito sa variant of interest ng World Health Organization.

Nabatid na kumalat na ito sa 33 bansa na karamihan ng kaso ay natukoy sa India.

Bagama't wala pa umanong ebidensya na magdudulot ito ng malalang COVID-19, mahigpit itong binabantayan dahil sa immune escape characteristics nito.

Maliban dito, may 84 iba pang Omicron subvariants ang natukoy sa bansa.

Kabilang dito ang 38 XBB, 28 na BA.2.3.20 at iba pang Omicron sublineages.

Positive sa COVID, higit 10K na — DOH

ni Madel Moratillo | April 20, 2023

Pumalo na sa higit 10 libo ang aktibong kaso ng COVID-19 sa bansa.

Sa ginawang pulong nitong Martes, sinabi ni DOH OIC Maria Rosario Vergeire, na nagkaroon talaga ng pagtaas ng mga kaso.

Nanatili rin aniyang manageable ang hospital system.

Hindi rin aniya mataas ang bilang ng hospital admission.

Sa kabuuan, umabot na sa 4,086,620 ang naitalang kaso ng COVID sa bansa.

Pero 98 porsyento rito ay nakarekober na pero may 66,443 ang nasawi.

Sa Mayo, inaasahan na muling magpupulong ang World Health Organization para talakayin kung babawiin na ba ang umiiral na public health emergency of international concern dahil sa COVID-19.

2nd booster para sa general public, start na

ni Mylene Alfonso | April 20, 2023

Sisimulan na ng lokal na pamahalaan ng Maynila ang pagtuturok ng second booster shot laban sa COVID-19 para sa general population.

Ito ay makaraang ilabas ng Department of Health (DOH) ang guidelines para sa 2nd COVID-19 booster shot sa general population.

Ito ang inanunsiyo ni Manila Mayor Honey Lacuna sa regular na pagdaraos ng 'Kalinga sa Maynila' sa Barangay 328, Sta. Cruz, Maynila, kahapon.

Ayon kay Atty. Princess Abante, kabilang sa maaaring pagkalooban ng second booster shots ay general population na nasa 18-anyos pataas, buntis, nagpapasuso at immunocompromised individuals.

Maaaring magpaturok ng kanilang ikalawang booster shot, anim na buwan pagkatapos ng unang booster.

Nabatid na ang 2nd booster shot ng COVID-19 vaccines ay available sa lahat ng 44 health centers sa lungsod mula Lunes hanggang Biyernes, 8am-4pm.

Nabatid na ipamamahagi ang second booster sa pangunguna ng Manila Health Department (MHD), na pinamumunuan ni Dr. Poks Pangan.

Kinakailangan lamang na dalhin ang QR code mula sa inyong rehistro sa manilacovid19vaccine.ph. para makapagpa-booster.