Dagdag-kaalaman para manatiling ligtas sa COVID-19

ni Nympha Miano-Ang- @Life and Style | April 7, 2022

Napakaliit na lang ng bilang ng mga impektado ng COVID-19 sa bansa at nasa 377 na lang noong isang araw kumpara sa patuloy na pagdami pa ng nagkakasakit sa Shanghai, China na umabot ng 13,354 sa nakaraang 6 na araw. Salamat sa patuloy na pag-iingat ng bawat Pinoy sa sarili upang makaiwas sa nakamamatay na virus. Nakakaugalian na ang tamang pagsusuot ng facemask, madalas na paghuhugas ng mga kamay at paga-alkohol kapag nasa labas ng bahay, sumusunod sa health and safety protocol kahit saan magpunta at higit sa lahat 60% ang fully vaccinated at 10% ang boosted na sa 'Pinas.

Ang patuloy na pagbalanse rin sa tamang nutrisyon, ayon sa isang top-US based immunology expert na si Dr. Emmanuel U. Sarmiento, ngayong 2022 ang makatutulong upang mapanatiling malusog, masaya, maging aktibo at nage-ehersisyo habang nagbabalik sa dating routine ang buhay sa new normal. Isiniwalat niya ang tamang edukasyon bilang dagdag kaalaman para mapanatiling ligtas sa COVID-19 sa forum ng Boosted and Fit in the Pandemic sa Estancia de Lorenzo, The Luxe Pavilion sa San Mateo, Rizal. Ang resistensiya ng katawan kontra viruses at iba pang sakit ay nakasalalay sa pisikal na kondisyon, "Ang supplements kasi ay 'di masabing safe kasi may tinatawag tayong micronutrient malnutrition. You can feel healthy, but if your body is not taking the right amount of micronutrients from the food you eat, then you can still get malnutrition," dagdag ng kinilala ring top allergist at immunologist sa South Carolina noong 2020.

Mahalaga raw sa chemotherapy patients ang supplements na may immunity boosters maging sa nagpapagaling mula sa operasyon. Mabisa rin sa matatanda ang tamang supplements lalo na't humihina ang immunity. Epektibo rin sa pagpapalakas ng immunity ang mga sangkap na Vit. A, C, D, E, Thiamine, B6, B12,Zinc, Selenium, ginger at turmeric. Manatili rin sa pagkain ng sariwang nilulutong gulay o isda kaysa sa mga processed at packed foods para lumakas ang immune system.

Sa katunayan, nakatulong sa medical frontliners sa U.S. noong pandemya ang pag-inom ng immunoboost at ipinagpasalamat na lahat ng gumawa ng diyeta na ito ay hindi tinamaan ng COVID-19 bago pa lang nauso ang bakuna, bagamat may ilang dinapuan ng virus ay mild lang ang naging sintomas.

Pagdating sa tamang pagkain at makaiwas na madagdagan ang timbang, ayon kay Ms. Julianne Malong, malaking challenge ang pagpili ng masustansiyang diyeta. Anuman ang edad at problema sa kalusugan, nakasalalay dito ang tamang kinakain na hindi makasasama sa kalusugan. Ang sustansiyang nakukuha sa pagkain ay susi sa malusog na buhay. Simulan nang magkakain ng gulay, prutas at protina para manatili ang tamang timbang, maiwasan ang sakit sa puso at hindi tumaas ang blood sugar.

Limitahan ang pagkain ng matatamis na meryenda, kendi at softdrinks dahil nakatataba ito at delikado sa katawan. "Ang pagpapalakas ng katawan ay nagsisimula sa cardiovascular system, habang nagkakaedad dapat pleksibol ang katawan, malakas at matibay ang mental health o positibo habang aktibo," mungkahi ni coach Nix Quejada. "Ang regular na ehersisyo kahit 30 minuto bawat araw, kahit busy o abala sa trabaho, anumang oras ka available ay gawin na, tulad ng push ups, weight training, yoga, zumba, cycling or running. Sikaping makilahok sa mga healthy competition o kaya gumamit ng electronic step tracking o fitness tracking gadgets para makita ang pagka-aktibo."

Bukod sa nutrisyon, supplements at ehersisyo, ang pisikal na kakayahan at kalusugan ng isipan, ang siyang pipili para magkaroon din ng sapat na tulog, maiwasang magkasakit, hindi malululong sa alak, masigla sa pakikisalamuha at nakokontrol ang stress levels.

Ika nga, ang dahan-dahang pag-iibayo ng kalusugan mula sa maliit na paraan, ang magbibigay motibasyon na makakasanayan na habang tumatandang malakas at naipagpapatuloy ang pisikal na aktibidad kasama ng pamilya, nakakalahok sa fitness challenges, nakapaglalaro outdoors, nakagagawa pa ng gawaing bahay upang di dapuan ng COVID-19. Tanging ikaw lamang sa iyong sarili ang magbibigay ng positibong pagbabago sa buhay.

Panghuli, sa rami ng dumaranas ng pag-aalala o anxiety tulad ng ilang celebrities, ang meditation na isang sinaunang praktis ang epektibo para pampakalma, mapayapa at mabalanse ang emosyon at isipan. Ang meditasyon o mind-body therapies ay nakatutulong kontra anxiety, stress, fatigue, nagpapaganda ng mood, pampasarap matulog at nagpapaibayo sa kalidad ng buhay.

Senyales ng ‘endemicity’ sa ‘Pinas, nakikita na — health expert

ni Lolet Abania | April 6, 2022

Nakikitaan na ang Pilipinas ng mga palatandaan ng pagpapalit o shifting mula sa pandemic patungo sa endemic state dahil ito sa napabuting healthcare utilization rate at bumababang kaso ng COVID-19, ayon sa isang infectious disease expert.

Sa ginanap na Laging Handa briefing ngayong Miyerkules, ipinaliwanag ni Dr. Edsel Salvana na ang transisyon para sa isang endemic situation ay hindi madali dahil dumaraan ito sa isang gradwal na proseso.

Gayunman aniya, dahil sa mabababang healthcare utilization rate at mga bagong kaso ng COVID-19 na nai-record, maaaring ang bansa ay sumusulong na patungo sa endemic state.

“Nakikita na naman natin ‘yung signs of endemicity dito na hindi na nape-pressure ang ating healthcare system, manageable na, meron tayong mga lunas para dito, and we know how to prevent it with our masks and our vaccines,” sabi ni Salvana.

“In a way, nagiging endemic na siya. Every single day na the cases remain low, that’s a step forward towards endemicity,” dagdag niya. Nitong Martes, nakapagtala ang Department of Health (DOH) ng 225 bagong COVID-19 impeksyon, ang pinakamababang COVID-19 tally ngayong taon na ayon pa sa ahensiya, ang nationwide caseload na naitala ay nasa 3,679,983.

Base sa latest data ng DOH, ang bed occupancy sa bansa ay nasa 16.9%, na may 5,592 beds na okupado, habang 27,579 naman ang bakante. Una nang binanggit ni DOH Undersecretary Maria Rosario Vergeire na ang endemic, “a state wherein cases are stable, already constant, and predictable.”

Dahil dito aniya, dapat na may balanse sa pagitan ng lebel ng transmission at immunity. Paalala naman ni Salvana sa publiko na mahalaga pa rin na manatiling mapagbantay habang patuloy na sumunod sa minimum public health standards.

“Andiyan naman ang ating safeguards. ‘Wag lang sana talaga magsasawa ang mga tao sa paggamit ng masks at magpa-boost na talaga sila para at least mas marami tayong layers of protection,” sabi pa ni Salvana.

“Omicron XE”, inaalam na sa WHO — DOH

ni Lolet Abania | April 4, 2022

Ipinahayag ng Department of Health (DOH) ngayong Lunes na patuloy ang pakikipag-ugnayan ng ahensiya sa World Health Organization (WHO) hinggil sa XE, ang posibleng bagong coronavirus variant na iniuugnay sa mas transmissible na Omicron.

“The DOH is in constant coordination with WHO regarding the reported ‘Omicron XE’ detected in Bangkok, Thailand,” ayon sa DOH sa isang mensahe sa mga reporters.

“Observation and monitoring are still ongoing on whether the variant would be categorized as a sub-variant of Omicron or a new variant to be named by WHO should it display any significant change in characteristics,” dagdag pa ng ahensiya.

Ayon sa WHO, “The XE recombinant is a mutant of the BA.1 and the BA.2 sub-variants of Omicron.”

Sinabi pa ng WHO na ang XE ay nabibilang sa Omicron variant hanggang anila, “significant differences in transmission and disease characteristics, including severity, may be reported.”

Samantala, patuloy din ang DOH sa pagmo-monitor ng mga case trends at katuwang naman ang Philippine Genome Center (PGC).

“In this light, the DOH reminds the public that vaccines, in addition to adhering to the minimum public health standards and now, more importantly, everyone, especially our elderly, the immunocompromised, those with comorbidities, and children are highly encouraged to get vaccinated and boosted,” saad ng ahensiya.