2M COVID-19 vax doses, expired na sa Hunyo 30 — DOH

ni Lolet Abania | May 27, 2022

Nasa tinatayang 2 milyon na COVID-19 vaccine doses ang inaasahang mag-e-expire kung hindi pa rin magagamit hanggang Hunyo 30, ayon sa Department of Health (DOH).

Gayunman, sinabi ni DOH Undersecretary Myrna Cabotaje na hindi pa dalawang milyong doses ang pinal o kabuuang bilang ng COVID-19 vaccine.

“Sa ating expiring na vaccine, we will have the final numbers by end of May. But hanggang June we are expecting kung hindi ma-jab almost 2 million kung hindi magamit by end of June,” saad ni Cabotaje sa Laging Handa briefing.

Ayon kay Cabotaje, nagsumite na ang DOH ng demand forecast ng 34 million doses. “Ito ‘yung parang pang palit, ‘yung nag-expire na at saka ‘yung pwede pa [at] mga pa-expire, which includes brands such as Sinovac, AstraZeneca, and Pfizer,” pahayag ng opisyal.

“From the communication we received from COVAX, replacement for vaccine includes vaccines from all sources, so hindi lang po ‘yung galing sa kanila, but they will also consider some of the vaccines that have been procured by the national government, even our private sector, and our local government,” dagdag niya.

Samantala, binanggit ni Cabotaje na nasa mahigit 73.7 milyong indibidwal ang nabakunahan ng unang dose habang 69.1 milyon naman ang fully vaccinated na laban sa virus. Aniya pa, nasa tinatayang 200,000 indibidwal ang nababakunahan kada araw laban sa COVID-19.

DOH: 3 close contacts ng unang kaso ng Omicron subvariant BA.4, asymptomatic

ni Lolet Abania | May 24, 2022

Asymptomatic lahat ang tatlong naging close contacts ng kauna-unahang kaso ng Omicron subvariant BA.4 na isang Pilipino na nanggaling sa Middle East, ayon sa Department of Health (DOH) ngayong Martes.

Sinabi ni Dr. Alethea de Guzman, officer-in-charge ng DOH Epidemiology Bureau, ang pasyente, na hindi pa nabakunahan kontra COVID-19 at asymptomatic, ay may travel history mula sa Qatar at South Africa.

Ayon kay De Guzman, nakumpleto naman ng returning Filipino worker ang kanyang mandatory quarantine na 14-day isolation mula Mayo 4 hanggang 18, bago pa naging close contact ang tatlong miyembro ng kanyang household, kung saan lahat sila ay asymptomatic at fully vaccinated na rin.

Ayon naman sa DOH, ang testing status ng mga close contacts ay kanila nang bineberipika. Una nang klinasipika ng European Center for Disease Prevention and Control (ECDPC) ang BA.4 bilang variant of concern (VOC), kung saan ito ay maaaring mas transmissible o “cause worse illness.”

Batay sa mga pag-aaral, ang sublineage ay maaaring hindi mag-cause ng severe COVID-19 symptoms kumpara sa ibang Omicron subvariants subalit posibleng mapuno ang mga ospital ulit dahil sa kanyang transmissibility.

Pag-aaral ng ivermectin laban sa COVID-19, ibinasura na ng DOST

ni Lolet Abania | May 23, 2022

Ibinasura na ng Department of Science and Technology (DOST) ang kanilang clinical trial kaugnay sa paggamit ng antiparasitic drug ivermectin para sa COVID-19.

Ayon kay DOST Secretary Fortunato dela Peña, nabatid na nahirapan silang kumuha ng ethics clearance hinggil sa pag-aaral nito at nagdesisyon na rin ang Department of Health (DOH) na gamitin ang humigit-kumulang na P48-milyon pondo sa ibang bagay.

“Ang pinaka-final decision namin ang recommendation ng Department of Health kasi sila rin naman ang nagrekomenda ng trials. Sila rin naman ang nag-recommend na itigil ang trials at i-save na lang ang almost P48 million for other purposes,” pahayag ni Dela Peña sa radio interview ngayong Lunes.

Sinabi ni Dela Peña na wala ring bagong impormasyon na available internationally sa ivermectin. “Ang grupo na binuo for our trial ay member din ng international network at ‘yun nga ang kanilang sinasabi, wala pang dumadating na anything that is clear na may benefits sa ivermectin,” saad ng opisyal.

Aniya pa, ilang pasyente ang nagawang lumahok sa clinical trial, habang ang mga suppliers ng ivermectin ay tumatangging makiisa sa pag-aaral kapag nabatid na nila ang kanilang layunin.

“Nahirapan kami kumuha ng supplier ng gamot. ‘Pag nalaman nilang gagamitin sa trial ay umaatras sila. Natatakot siguro sila ang effect ay makasira ang market,” paliwanag ni Dela Peña.