Mahigit P2 trilyong halaga ng kalakal ipinupuslit sa Pilipinas taun-taon

ni Chit Luna @News | August 7, 2024

Photo: Punching

Mahigit P2 trilyong halaga ng kalakal, kabilang ang mga pekeng kontrabando, produktong agrikultural, sigarilyo at tabako ang ipinupuslit sa Pilipinas taun-taon, na dumadaya sa kita ng gobyerno at nagpapahina sa mga lokal na industriya, ayon sa Federation of Philippine Industries Inc. (FPI).

Sinabi ni FPI president Jesus Montemayor sa National Anti-Illicit Trade Summit na ginanap sa Manila Hotel noong Hulyo 25, 2024 na ang smuggling at illicit trade ay hindi lamang krimen sa ekonomiya kundi panganib din sa komunidad.

Aniya, ang mga puslit ng kalakal ay sumisira sa tiwala ng publiko sa gobyerno, nakokompromiso sa kalidad at kaligtasan ng mga mamimili at pinipigilan ang paglago ng mga lehitimong negosyo.

Sinabi ni Montemayor na sa nakalipas na limang taon, nawalan ang gobyerno ng tinatayang P905 bilyon na potensyal na kita dahil sa smuggling.

Nagpakita naman si FPI chairman Jesus Lim Arranza ng resulta ng isang pag-aaral na nalulugi ang pamahalaan ng P250 bilyon na halaga ng value-added tax dahil sa smuggling kada taon.

Dahil ang VAT ay kumakatawan sa 12 porsiyento ng halaga ng mga imported goods, mahigit P2.3 trilyon na halaga ng mga puslit na produkto ang hindi patas na nakikipagkumpitensya laban sa mga lokal na produkto bawat taon, dagdag ni Arranza.

Ayon kay Arranza, ang mga kalakal na pumapasok sa Pilipinas na hindi nagbabayad ng karaniwang buwis ay umaabot sa P2.3 trilyon, at ito ay may ripple effects sa ekonomiya at sa pamahalaan.

Sinabi ni Assistant Secretary Carlos C. Carag ng Department of Agriculture Inspectorate and Enforcement Office (DAIE) na naaapektuhan din ng smuggling ang sektor ng agrikultura at pangisdaan.

Ang pagpupuslit ng agrikultura ay nagdudulot ng malaking banta sa kabuhayan ng mga magsasaka at mangingisda, at malaking panganib para sa kalusugan at kaligtasan ng mga mamimili, ayon kay Carag.

Sinabi ni Carag na ang mga smuggled na produkto ng pagkain ay lumalampas sa kontrol at inspeksyon sa kalidad, umiiwas sa pagbabayad ng buwis at nagpapahina sa lokal na produksyon ng pagkain. Ito ay dapat ituring na economic sabotage, ayon kay Carag.

Kinilala ni Paul Oliver Pacunayen, hepe ng Intellectual Property Rights Division ng Bureau of Customs, ang limang pinakakaraniwang ipinuslit na produkto bilang sigarilyo, iligal na droga, pekeng produkto, produktong pang-agrikultura at general merchandise.

Batay aniya ito sa dami ng mga bodega na sinalakay ng mga ahente ng Bureau of Customs noong unang kalahati ng 2024. Bilyon-bilyong halaga ng ipinagbabawal na sigarilyo at vape ang nakumpiska ng ahensiya ngayong taon, na nagpapaliwanag sa pagbaba ng koleksyon ng tobacco excise tax.

Tinatayang 20 porsiyento ng mga sigarilyong ibinebenta sa Pilipinas ay iligal, at dahil dito ay bumagsak ang koleksyon ng excise tax ng tabako ng P41 bilyon sa nakalipas na dalawang taon.

Sinabi ni Bienvenido-Oplas Jr., presidente ng Bienvenido S. Oplas Jr. Research Consultancy Services at Minimal Government Thinkers, sa kanyang regular na column sa isang pahayagan na tumindi ang smuggling ng sigarilyo nang lumagpas sa P50 kada pakete ang tabako ang excise tax noong 2021.

Humigit-kumulang 50 porsiyento ng mga koleksyon ng buwis sa tabako ang nagpopondo sa Philippine Health Insurance Corp. at Health Facilities Enhancement Programs (HFEP). Samantala, 5 porsiyento, o P4 bilyon, ang napupunta sa mga local government units na pinagmumulan ng burley at native tobacco habang 15 porsiyento, o P17 bilyon, ay inilaan sa mga LGUs na gumagawa ng Virginia tobacco.

Hiniling ng FPI sa mga ahensiya ng gobyerno na puspusang ipatupad ang mandato ni Pangulong Ferdinand Marcos Jr. na wakasan ang smuggling at iba pang anyo ng ipinagbabawal na kalakalan.

Ang pagtutulungan ng industriya at gobyerno ay makatutulong ng malaki para makamit ito, ani Montemayor.

Milyon-milyong konsyumer tanggap ang mas ligtas na alternatibo sa sigarilyo

ni Chit Luna @News | July 17, 2024

Milyon-milyong konsyumer ang lumilipat mula sa tradisyunal na sigarilyo patungo sa mas ligtas na mga produktong nikotina tulad ng vape, heated tobacco at oral nicotine pouches sa kabila ng mga mapanirang slogan at pananakot ng mga anti-vaping organizations, ayon sa mga tagapagtaguyod ng tobacco harm reduction (THR).

Ayon kay Prof. David Sweanor, isang adjunct professor of law sa University of Ottawa sa Canada na may 40 taong karanasan sa tobacco control law, maraming tao na ang nakadiskubre na ang nikotina ay hindi ang sanhi ng problema.

Nalaman nila na sila ay niloloko ng mga organisasyong laban sa mga walang-usok na alternatibo sa sigarilyo, sabi ni Prof. Sweanor sa nakaraang Global Forum on Nicotine na ginanap sa Warsaw, Poland.

Ang mga bagong teknolohiyang ito ay nagbibigay sa mga naninigarilyo ng mas hindi nakakapinsalang alternatibo na maaaring maiwasan ang milyun-milyong pagkamatay taun-taon.

Ang mga smoke-free products ay hindi nagdudulot ng usok na naglalaman ng mga nakakalason na sangkap. Ang tumataas na ebidensyang siyentipiko mula sa mga pinagtitiwalaang institusyon sa kalusugan ng publiko ay nagsabing ang nikotina ay hindi ang problema, dahil hindi ito nagdudulot ng mga sakit na may kaugnayan sa paninigarilyo.

Sa halip, ang pagsunog ng tabako ang siyang pinagmumulan ng libo-libong nakakalason na kemikal na nagdudulot ng kanser at iba pang nakamamatay na sakit.

Natukoy ng Office for Health Improvements and Disparities (OHID) ng United Kingdom mula sa kasalukuyang serye ng mga pagsusuri sa ebidensya na ang vaping o paggamit ng electronic cigarettes ay may 95 porsiyentong mas mababang pinsala kumpara sa paninigarilyo.

Kinuwestiyon ni Prof. Sweanor ang pagtanggi ng World Health Organization sa potensyal ng vape, heated tobacco at oral nicotine pouches na bawasan ang pinsalang dulot ng paninigarilyo sa kabila ng dumaraming bilang ng mga konsyumer na makakapagpatunay sa kaibahan ng mga smoke-free alternatives.

Ayon kay Prof. Sweanor, hindi maitatanggi ng WHO ang lahat ng mga taong nakakapag-quit at lumipat sa mga produktong may mas mababang panganib. Ito ay hindi nakamit ng anumang nicotine replacement therapy o NRT na isinulong ng WHO.

Ang mga konsyumer mismo ang gumagalaw at nakakilala ng benepisyo ng paglipat sa mga makabagong alternatibo, ayon kay Prof. Sweanor.

Sinabi pa niya na hindi dapat matakot ang mga tao sa bagong teknolohiya at sa kinakaharap na pagbabago.

Ang mga konsyumer, aniya, ang nangunguna sa pagbabago dahil sa paghahanap nila sa benepisyong pangkalusugan.

Dagdag niya, binabalewala din ng mga konsyumer ang mga mapanirang slogan ng anti-vaping organizations na walang batayan sa agham.

Ang merkado ng mga alternatibo sa sigarilyo ay umabot na sa $350 billion, ayon kay Harry Shapiro, executive editor ng Global State of Tobacco Harm Reduction report.

Higit sa 120 milyong tao sa buong mundo, lalo na sa mga mayayamang bansa, ang gumagamit na ngayon ng mas ligtas na mga produktong nikotina, sabi ni Shapiro.

Ikinumpara ni Prof. Sweanor ang mabilis na pagbabago sa industriya ng nikotina sa pagunlad ng mobile phone.

Kahit na may hadlang, ang mga konsyumer ay lumilipat sa mga produktong ito, dagdag niya.

Pinuna rin ni Prof. Sweanor ang mga anti-vaping group sa pagbibigay-priyoridad sa mga slogan kaysa sa mga diskarte na nakabatay sa agham.

Aniya, kung ipagpapatuloy ng mga anti-vaping groups ang pananakot, milyon-milyong tao, kabilang na ang kabataan, ang patuloy na maninigarilyo at magdaranas sa masamang epekto nito.

ASEAN nagkaisa para paigtingin ang laban sa iligal na kalakalan

ni Chit Luna @News | July 10, 2024

Nagkaisa ang mga bansang kasapi ng Association of Southeast Asian Nation (ASEAN) na labanan ang lumalalang banta ng iligal na kalakalan, kabilang ang pagpupuslit ng mga produktong tabako na nagdudulot sa bilyon-bilyong dolyar na nawawalang buwis.

Isang daang delegado kabilang ang mga Customs officials mula sa 10 miyembro ng ASEAN (AMS), kasama ang mga ASEAN partners tulad ng China, Japan, Korea at Australia ang nagtipon mula Hunyo 4 hanggang 6 para sa 33rd Meeting of ASEAN Directors-General of Customs sa Phu Quoc, Vietnam para sa pinaigting na kooperasyon sa customs, pigilan ang mga iligal na kalakalan at pasiglahin ang lehitimong kalakalan sa rehiyon.

Ayon sa isang ulat ng Transnational Alliance to Combat Illicit Trade (TRACIT) at ng EU-ASEAN Business Council, ang pagtugon sa iligal na kalakalan ay nananatiling priyoridad dahil maaari nitong hadlangan ang mithiing integrasyon ng rehiyon sa 2025.

Halos US$3 bilyon na buwis ang nawala sa mga pamahalaan ng ASEAN mula sa mga iligal na produktong tabako noong 2017. Sa Pilipinas, humigit-kumulang P100 bilyon o US$1.9 bilyon ang nawawala kada taon dahil sa di pagbabayad sa buwis sa sigarilyo.

Iniulat naman ng Thailand na nawalan ito ng THB7 bilyon o US$202 milyon noong 2021 dahil sa iligal na kalakalan ng sigarilyo.

Ayon sa ulat ng TRACIT, ang Indonesia, Malaysia, Pilipinas at Vietnam ang kumatawan sa 95 porsiyento ng iligal na konsumo ng sigarilyo sa rehiyon noong 2017.

Dagdag nito, ang mga puslit na sigarilyo ay iniluluwas mula sa Indonesia patungo sa ibang bansa tulad ng Pilipinas sa pamamagitan ng mga daungan tulad ng Nunukan at Tarakan. Ang Pilipinas ay nakatanggap din ng mga puslit na produkto mula sa Vietnam, Cambodia at India na dumaan sa Singapore.

Ayon sa mga balita, ang mga lugar sa Pilipinas tulad ng Palawan, Zamboanga, Sulu at Tawi-Tawi ay kinilala ng mga lokal na awtoridad bilang mga kritikal na entry point para sa pagpupuslit ng sigarilyo mula Indonesia, Malaysia, Cambodia at Vietnam.

Ang mga ibang produkto tulad ng smokeless tobacco ay naapektuhan din ng iligal na kalakalan. Ang pagbabawal sa e-cigarette sa Singapore at Thailand ay nag-ambag sa pagtaas ng pagpupuslit ng mga produktong ito mula sa kalapit na Malaysia, ayon sa TRACIT.

Sa Thailand, natuklasan na ang mga tatak na iniluluwas mula sa Vietnam at Indonesia at tila may mga consignee na nakabase sa Singapore, Hong Kong, Malaysia at United Arab Emirates.

Ang Customs meeting ay nag-update din tungkol sa ASEAN customs integration, kabilang ang paglagda sa ASEAN Authorized Economic Operator Mutual Recognition Agreement (AAMRA).

Anim na bansa—ang Pilipinas, Brunei, Indonesia, Malaysia, Singapore at Thailand—ang nagpatupad ng pilot program ng AAMRA.

Kamakailan, isang operasyon ng Joint Customs Control (JCC) ay nagresulta sa pagkakahuli sa mga ilegal na produkto ng tabako kabilang ang 1,250 kilo ng tuyong dahon ng tabako at mahigit 50,000 pakete ng mga puslit na sigarilyo. Ito ay matagumpay naisagawa dahil sa pagtutulungan ng Pilipinas, Malaysia, Singapore, Thailand at Vietnam.

Nagkaisa din ang mga bansa sa ASEAN sa pagbuo ng mga alituntunin para sa mas mahusay na pagpapalitan ng impormasyon sa pagitan ng mga awtoridad sa customs at mga e-commerce operators para pigilan ang pagbebenta ng mga iligal na produkto sa online platforms.

Binigyang-diin naman ni Vietnam Customs Director General Nguyen Van Can, chairman ng ASEAN Customs sa taong 2024-2025, na panahon na para sa ASEAN na magsanib kamay para sa mas mataas na lebel ng integrasyon at koneksyon at maisakatuparan ang ASEAN vision ng "One Vision, One Identity, One Community.”