Buti Na Lang May SSS 2/87

Schedule ng pagbabayad ng kontribusyon sa SSS

BULGAR
Sep 21

by Info @Buti na lang may SSS | Setyembre 21, 2025

Dear SSS,

Magandang araw! Ako ay dentista dito sa Mandaluyong City. Ano ang schedule ng pagbabayad sa SSS ng katulad kong dentista? Salamat. — Lara

Mabuting araw sa iyo, Lara!

Itinuturing ng SSS ang mga katulad ninyong dentista bilang mga self-employed member. At para sa mga self-employed member, ang deadline ng pagbabayad ng inyong kontribusyon sa SSS ay tuwing huling araw ng kasunod na buwan ng applicable month o quarter.

Kung nagbabayad ka ng quarterly, tuwing last working day ng kasunod na buwan ng applicable quarter ang inyong deadline. Ibig sabihin ang iyong kontribusyon para sa 3^rd quarter ng 2025 (Hulyo hanggang Setyembre 2025) ay maaari mong bayaran hanggang 31 Oktubre 2025.

Kung monthly naman ang pagbabayad mo, ang iyong kontribusyon para sa buwan ng Agosto 2025 ay maaari mong bayaran hanggang 30 Setyembre 2025. Samantala, ang iyong kontribusyon para sa buwan ng Setyembre 2025 ay maaari mong bayaran hanggang 31 Oktubre 2025.

Ito rin ang sinusunod na deadline ng contribution payment ng mga voluntary at non-working spouse member ng SSS gayundin ng ibang self-employed members na katulad mo.

Subalit alinsunod sa SSS Circular No. 2022-028, ang mga magsasaka, mangingisda, at iba pang self-employed members na kabilang sa informal economy ay mayroong flexible payment schedule kung saan pinapayagan ng SSS na bayaran nila ang kanilang kontribusyon sa nakalipas na 12 buwan mula sa kasalukuyang buwan. Halimbawa, ngayong buwan ng Setyembre 2025, maaari nilang bayaran ang mga kontribusyon para sa Setyembre 2024 hanggang Agosto 2025.

Iba rin ang payment schedule ng mga overseas Filipino workers (OFW) members. Ang kanilang SSS contributions para sa Enero hanggang Setyembre 2025 ay maaari nilang bayaran hanggang 31 Oktubre 2025. At ang hulog nila para sa Enero hanggang Disyembre 2025 ay maaari nilang bayaran hanggang sa huling working day ng Enero 2026.

Tandaan na hindi pinahihintulutan ng SSS ang retroactive payments. Halimbawa, ang isang self-employed member ay hindi niya nabayaran ang kanyang kontribusyon para sa Abril 2025. Hindi na niya ito maaaring bayaran pa ngayong buwan at ito ay magiging laktaw sa kanyang contribution records. Napakahalaga na alam ng isang miyembro ang akmang contribution payment deadline sa kanya.

Mas pinadali na rin ng SSS ang pagbabayad ng kontribusyon na maaaring gawin sa iba’t ibang SSS-accredited payment channels tulad mga accredited banks, payment centers, online banking, at e-wallet facilities.

***

Patuloy na tumatanggap ng aplikasyon ang SSS para sa bagong loan penalty condonation program nito. Inilunsad ang Consolidation of Past Due Short-Term Member Loans with Condonation of Penalty Program (Conso Loan) para tulungan ang mga miyembro na mayroong past-due loans sa SSS. Sa ilalim ng programa, hindi na sisingilin ang kaukulang penalties o multa ng kanilang past-due loans. Sa halip, ang tangi na lamang nilang babayaran ay ang orihinal o principal amount at interes nito.

Sakop ng Conso Loan ang salary loan, calamity loan, Salary Loan Early Renewal Program (SLERP), emergency loan at restructured loans gaya ng Loan Restructuring Program (LRP) noong mga nakaraang taon.

Samantala, maaari nilang bayaran ang prinsipal at interes sa pamamagitan ng one-time full payment, o kaya’y bayaran kahit 10% nito bilang down payment at ang natitirang balanse ay babayaran ng installment sa loob ng hanggang 60 buwan o limang taon, depende sa halaga ng kanilang pagkakautang.

Upang makapagrehistro sa My.SSS, maaari kang magtungo sa SSS website (www.sss.gov.ph) at magparehistro sa Member portal. Kailangang punan mo ang lahat ng kinakailangang impormasyon. Tandaan na ang irerehistrong e-mail address ay kailangang aktibo at nagagamit pa dahil dito ipadadala ng SSS ang link para i-activate at magamit mo ang iyong My.SSS account.

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System - SSS” o sa X, ang dating Twitter, sa @PHLSSS. Maaari ring mag-subscribe sa YouTube channel sa “MYSSSPH”, at sumali sa SSS Viber Community, “MYSSSPH Updates”. Maaari kayong magpadala ng inyong concerns at katanungan sa usssaptayo@sss.gov.ph.

Bakit mahalaga na maging SSS member ang bawat manggagawa?

BULGAR
Aug 31

by Info @Buti na lang may SSS | August 31, 2025

Dear SSS,

Magandang araw! Ako ay isang construction worker dito sa Taguig City. Nais kong itanong kung bakit kinakailangan akong magpamiyembro sa Social Security System (SSS)? Bakit ba ito mahalaga sa isang manggagawa na katulad ko? Salamat — Randy

Mabuting araw sa iyo, Randy!

Napapanahon ang iyong katanungan sapagkat bukas, Setyembre 1, ay ipagdiriwang natin ang ika-68^th SSS anniversary, kung saan sa buong buwan ng Setyembre ay magkakaroon ng iba’t ibang aktibidad upang gunitain ang anibersaryo ng SSS. Kabilang sa mga aktibidad na ito ay ang Pensioners’ Day sa Setyembre 12 na isasagawa bilang pagpupugay sa mga SSS pensioners at Balikat ng Bayan Awards sa Setyembre 17 na pararangalan ang mga top employers, disbursement partners, media organizations, at accredited partner agents sa 31 kategorya.

Para sa iyong kaalaman, ang SSS ay naitatag noong Setyembre 1, 1957 sa bisa ng Republic Act No. 1161 o ang Social Security Act of 1954. Layon ng batas na mabigyang proteksyon ang mga manggagawa sa pribadong sektor, maging mga propesyunal at nasa informal sector. Bilang tugon, ang SSS ang itinalaga ng gobyerno upang pangasiwaan ang iba’t ibang social security programs para sa mga miyembro nito. Ang Republic Act No. 11199 o ang Social Security Act of 2018 ang kasalukuyang batas na gabay ng SSS.

Samantala, ang paghuhulog sa SSS ay isang paraan ng pag-iipon para sa iyong pagreretiro, maging ang paghahanda sa oras ng pangangailangan o contingencies.

Bilang isang miyembro, maaari kang makakuha ng benepisyo para sa pagkakasakit (sickness), panganganak (maternity), pagkabalda (disability), pagkawala ng trabaho (unemployment), pagreretiro (retirement), pagpapalibing (funeral) at pagkamatay (death). Kailangan lamang na makatugon ka sa mga kwalipikasyon ng bawat benepisyo. Gayundin, maaari kang makahiram sa mga programang pautang nito tulad ng salary loan, calamity loan, educational assistance loan, at pension loan para naman sa retirement pensioners.

May kasabihan na “once a member, always a member” dahil pang-habambuhay ang pagiging miyembro sa SSS. Kahit pa mahabang panahon ka na hindi nakapaghulog ay hindi mawawalang bisa ang iyong mga naihulog na kontribusyon sa SSS.

Kaya, malaki ang maitutulong ng SSS sa mga taon ng iyong pagtatrabaho, Randy. Sa panahon ng iyong pagreretiro ay mapapakinabangan mo na ang naimpok mo sa SSS bilang pensyon na tatanggapin mo habang ikaw ay nabubuhay.

Ang SSS ay patuloy na mananatiling kaagapay ng bawat manggagawang Pilipino sa makabagong panahon at sinisiguro na makapagbigay ng tamang benepisyo sa mga miyembro sapagkat “Sa SSS, Sigurado ang Bukas.”

***

Sakop ng ConsoLoan ang salary loan, calamity loan, Salary Loan Early Renewal Program (SLERP), emergency loan at restructured loans gaya ng Loan Restructuring Program (LRP) noong mga nakaraang taon.

Flexible payment schedule para sa mga magsasaka, mangingisda at self-employed sa informal economy na SSS member

BULGAR
Aug 24

by Info @Buti na lang may SSS | August 24, 2025

Dear SSS,

Magandang araw! Ako ay isang magsasaka dito sa Pampanga. Nais ko sanang itanong kung paano maipagpapatuloy ng katulad kong magsasaka ang paghuhulog sa SSS. Salamat.

— Mang Pedring

Mabuting araw sa iyo, Mang Pedring!

Kinikilala ng SSS ang mahalagang tungkulin na ginagampanan ng mga magsasaka at mangingisda sa ating ekonomiya. Noong Oktubre 1995 ay sinimulan ng SSS ang coverage ng mga magsasaka at mangingisda upang mabigyan din sila ng kaukulang social security protection upang sa panahon ng kanilang pagkakasakit, panganganak, pagkabalda, pagreretiro, inboluntaryong pagkawala ng trabaho, pagpapalibing at pagkamatay ay may magagamit sila sa oras ng kanilang pangangailangan.

Batay sa SSS Circular No. 2022-028, inilunsad ng SSS ang programang Flexible Payment Schedule ng Social Security (SS) at Employees’ Compensation (EC) contributions sa lahat ng magsasaka, mangingisda at mga self-employed individual sa informal economy.

Sa ilalim ng nasabing programa, maaari na kayong magbayad, Mang Pedring, ng inyong SSS contributions sa nakalipas na 12 buwan mula sa kasalukuyang buwan. Halimbawa, kung kayo ay magbabayad ng SSS contributions ngayong buwan ng Agosto 2025, maaari ninyong bayaran ang mga kontribusyon para sa Agosto 2024 hanggang Hunyo 2025.

Samantala, ang schedule na ito ay hindi pinapahintulutan sa ibang mga miyembro lalo na sa mga regular na self-employed dahil walang retroactive payments.

Narito naman ang comparison ng regular na payment schedule para sa mga self-employed member at ang bagong flexible payment schedule para sa mga magsasaka, mangingisda at mga self-employed individual na kabilang sa informal economy:

A. Regular Payment Schedule para sa mga Self-Employed Member
Petsa ng Pagbabayad	Mga Buwan na Maaaring Bayaran
31 Oktubre 2025	Hulyo 2024 to Setyembre 2025
31 Enero 2026	Oktubre 2025 to Disyembre 2025

B. New Payment Schedule para sa mga magsasaka, mangingisda at mga self-employed individual sa Informal Economy
Petsa ng Pagbabayad	Mga Buwan na Maaaring Bayaran
Agosto 2025	Agosto 2024 to Hunyo 2025
Setyembre 2025	Setyembre 2024 to Agosto 2025

Nakita ng SSS na ang regular payment schedule para sa mga self-employed member ay hindi naaayon sa schedule ng kita ng ating mga magsasaka at mangingisda. Hindi kasi ito tulad ng karaniwang manggagawa na tumatanggap ng kita kada buwan dahil sila ay nagkakaroon lamang ng kita sa panahon ng anihan ng kanilang produkto na may mga kaukulang buwan lamang sa loob ng isang taon.

Sa isinagawang pag-aaral ng SSS, lumalabas na para sa ating mga magsasaka, may kaukulang harvest season sila na sinusunod at ito ay:

Para sa palay

Pangunahing ani: Setyembre hanggang Disyembre

Ikalawang ani: Enero hanggang Abril

Kabuuang bilang ng buwan: walong buwan/12 buwan

Para sa mais

Pangunahing ani: Hulyo hanggang Setyembre

Ikalawang ani: Pebrero hanggang Mayo

Kabuuang bilang ng buwan: walong buwan/12 buwan

Kaya minarapat ng SSS na ibatay sa kanilang harvesting season ang schedule ng pagbabayad ng kanilang kontribusyon at maipagpatuloy nila ang kanilang pagiging miyembro.

Ang kontribusyon naman na kanilang ihuhulog ay batay sa idedeklara nilang buwanang kita. Sa kasalukuyan, maaari silang maghulog ng P760 hanggang P5,280 na kontribusyon kada buwan. Kasama na rito ang kontribusyon sa ilalim ng Employees’ Compensation Program (ECP) na P10 kung ang Monthly Salary Credit o MSC ay P4,000 hanggang P14,500 at P30 naman kung ang MSC ay P15,000 o higit pa. Maaari silang magbayad ng kanilang kontribusyon gamit ang MySSS Mobile App o SSS collecting partner. Gayundin, maaari nila itong bayaran sa pamamagitan ng internet banking facility ng mga accredited banks at collecting partners, sa mga SSS branch na may tellering facility, mga accredited payment center, at SSS-accredited partner agents.

Malaki ang magiging pakinabang ng isang magsasaka o mangingisda kung patuloy na maghuhulog sa SSS hanggang sa siya ay magretiro. Sa panahon ng inyong pagreretiro, Mang Pedring, ay aanihin ninyo ang naimpok sa SSS bilang benepisyo gaya ng pensyon kung kayo ay may naipon na 120 buwan na kontribusyon. Kayo rin ang makikinabang sa kontribusyong inihuhulog ninyo ngayon sa SSS at sa darating pang mga taon.

***

Sakop ng ConsoLoan ang salary loan, calamity loan, Salary Loan Early Renewal Program (SLERP), emergency loan at restructured loans gaya ng Loan Restructuring Program (LRP) noong mga nakaraang taon.

. .

Schedule ng pagbabayad ng kontribusyon sa SSS

Bakit mahalaga na maging SSS member ang bawat manggagawa?

Flexible payment schedule para sa mga magsasaka, mangingisda at self-employed sa informal economy na SSS member

RECOMMENDED