UV lamp na kayang pumatay sa COVID, naimbento

ni Thea Janica Teh | September 22, 2020

Inilunsad ng Ushio Inc., isang Japanese light equipment maker ang kauna-unahang ultraviolet lamp sa buong mundo na kayang pumatay sa COVID-19 nang hindi maaapektuhan ang kalusugan ng mga tao.

Ang “Care 222” UV lamp ay ginawa ng Ushio Inc. kasama ang Colombia University para sa disinfection ng bus, train, elevator, opisina at ilan pang mga lugar na dagsa ng tao. Madalas ginagamit ang UV lamp ngayong panahon ng pandemya para ma-sterilize ang mga bagay na madalas hawakan. Ito rin ay ginagamit sa medical at food-processing industries.

Ngunit, ang UV rays ay hindi magagamit sa mga espasyo kung saan may tao dahil maaari itong magkaroon ng skin cancer at eye problem. Kaya naman gumawa ang Ushio ng UV rays na may wavelength na 222 nanometers na makapapatay ng germs at hindi harmful sa tao.

Sinubukan ng kumpanya na ilagay ang Care 222 sa ceiling. Napatay nito ang 99% virus at bacteria na nasa hangin sa loob lamang ng 6-7 minuto. Bukod pa rito, umabot din ito sa mga gamit na may 2.5 metrong layo sa UV lamp.

Naniniwala rin at sinabi ng Hiroshima University na epektibo ang UV lamp na ito bilang pamatay sa COVID-19. Ang Care 222 ay may bigat na 1.2 kilograms at kasinglaki ng hardcover book. Ito ay may halagang 300,000 yen o $2,860.

Sa ngayon, tumatanggap lamang ng order ang kumpanya mula sa medical institution ngunit, magiging available rin sa lahat kapag naisaayos na ang produksiyon. Inaasahang ilalabas ang Care 222 sa darating na January 2021.

Bagong halaman, natuklasan sa Mt. Arayat

ni Thea Janica Teh | September 18, 2020

Isang bagong plant species ang natuklasan sa Mount Arayat National Park sa Pampanga ng research team mula sa Angeles University Foundation at University of Sto. Tomas at pinangalanang Pyrostria arayatensis.

Ito ay inilabas sa international scientific journal Annales Botanici Fennici noong August 10.

Sa pagkakatuklas sa bagong halaman, sinabi ni Department of Environment and Natural Resources (DENR)-Central Luzon Office Executive Director Paquito Moreno Jr. na napapanatili ng Mt. Arayat ang healthy biological diversity dahil patuloy na nabubuhay at lumalaki ang mga rare native plants dito.

Kaya naman, pinaalalahanan din ni Moreno na protektahan ang lugar na ito dahil ito ay importante sa ecosystem ng rehiyon at nakapaloob sa Expanded National Integrated Protected Areas System Act na ipinagbabawal ang pagwasak sa biodiversity sa naturang lugar.

Bukod pa rito, dito rin natuklasan ang 49 species ng halaman at puno, 86 species ng ibon, 14 species ng mammals at 11 species ng reptiles. Ilan sa mga natuklasan at iniingatang halaman at puno sa lugar na ito ay ang Flame Trees (Brachychiton acerifolius) at Chamberlain’s Pitogo (Cycas chamberlaini).

2 nagbebenta ng bayawak, arestado

ni Lolet Abania | September 9, 2020

Nasagip ng mga tauhan ng Department of Environment and Natural Resources (DENR) Region III at pulisya ang 11 bayawak na ibebenta sana sa Pampanga.

Inaresto rin ng awtoridad ang dalawang tindero matapos na maaktuhang nagbebenta ang mga ito ng bayawak na nagkakahalaga ng P300 hanggang P900 kada isa depende sa laki. Wala namang binanggit na pagkakakilanlan sa mga suspek.

Ayon sa dalawang suspek, galing umano sa palaisdaan ang mga bayawak. Subali’t tinanggalan na ang mga ito ng mga ngipin. Gayunman, sasampahan ng kaukulang kaso ang mga naturang tindero.

Samantala, dinala na ang mga bayawak sa isang rehabilitation center sa Clark, Pampanga bago ito tuluyang pakawalan.

Ayon sa Republic Act 9147 of 2001 o Wildlife Resources Conservation and Protection Act, nakapaloob dito ang pag-iingat at proteksiyon sa wildlife species at sa mga tirahan nito. May karampatang parusa sa sinumang lalabag sa batas.

Itinuturing na endangered species ang bayawak kaya ipinagbabawal ang panghuhuli, pagbebenta at pag-aalaga ng mga ito.