Mga mali-maling learning modules, sobrang nakakahiya!!!

ni Imee Marcos - @Imeesolusyon | October 21, 2020

Mahigit dalawang linggo na ang online class o distance learning, pero samu’t sari pa rin ang mga aberya. Nakakaloka!

Nakakaalarma ang mga palpak na aralin. Isa na riyan ‘yung “bastos o mahahalay” na mga pangalang ginamit na halimbawa, na sinagot din ng mga bastos na salita. Ano ba ang itinuturo natin sa kabataan?

Mabuti na lang at naibabalita ang mga ganyan sa social media, na nagba-viral pa! Kung hindi, paano natin malalaman ang mga kapalpakang ito na kung tutuusin, matagal na ring nangyayari sa ating mga textbook?

Hindi lang ‘yan, namamayagpag din ang mga typo errors at maling grammar! Sa isang module, may nakita kaming 35 mistakes.

Nakakita naman ng 37 mali ang isa naming kasamahan. Ano ba ‘yan?

Kung nagkamali sa pagta-type at sa pag-i-imprenta, mas lalong nakakatakot isipin. Walang oras mag-proofread ang mga gumawa ng modules? O, sadyang wapakels lang?

‘Yung ating mga titser sa Cordillera, Mindanao at iba pang parte ng bansa —extra-challenge para sa kanila ang pagdi-distribute ng mga modules. Tapos, ‘yun pala, bukod sa mahirap intindihin, mali-mali pa. ‘Susmarya, nakakahiya to the max!

‘Yung ibang nanay naman, nagrereklamo rin. Sabi, wala raw silang maintindihan sa module, napakahirap o kumplikado raw.

Hay, naiintindihan ko ang sitwasyon ng DepEd. Naaawa rin ako sa kanila dahil paspasan naman talaga ang paggagawa ng mga learning materials.

IMEEsolusyon lang d’yan ay super-double checking ang gawin ng DepEd. Hindi lang dahil nakakahiya, kundi para masigurong tama ang ating itinuturo sa mga bata. Keri n’yo ‘yan!

Siguraduhin sana ng DepEd na bago ma-release ang mga module sa mga bata, hundred percent korek!

Although sagad to the max na ang pagod ng mga teachers, paki-double check din bago ninyo ituro sa mga estudyante. Kawawa naman sila na tatandang mali ang mga natutunan. Hindi ba?

Pagputol ng kuryente, ipagpaliban muna hanggang next year, para ‘di madilim ang Pasko!!!

ni Imee Marcos - @Imeesolusyon | October 19, 2020

Dapat i-extend ng Meralco ang October 31 deadline sa pagbayad ng bills na nagkapatung-patong dahil sa pandemya.

Ngayong ilang buwan na lang at magpa-Pasko na, inaasahan natin ang pagkutitap ng maraming Christmas lights na siguradong makaka-dagdag sa ating bayarin sa kuryente.

Paano naman ang Pasko kung walang ilaw ang mga parol at Christmas tree?

Pero mukhang magiging super-sad ang marami nating kababayan, lalo na ang mga bata, kapag tuluyan nang naputol ang suplay nila ng kuryente dahil sa kawalan ng pambayad. Juskoday!

Hikahos pa rin kasi ang ating mga kababayan kaya hindi malayong maputulan na ng kuryente ang maraming pamamahay pagkatapos ng itinakdang deadline ng Meralco.

Saludo tayo sa Energy Regulatory Commission na nangakong ipapa-extend hanggang Dec. 31 ang deadline ng pamumutol.

Kapag nagkataon, magiging madilim ang pagsalubong ng karamihan ng mga mahihirap nating kababayan sa Bagong Taon, ‘wag naman sana. Imbes na Merry Christmas, magiging Dark Christmas pa! ‘Kaloka!

At paano naman ang mga mag-aaral sa kanilang online learning, ang mga walang trabahong magulang at naka-graduate na naghahanap ng work online, ang mga nag-o-online business, at ang mga doktor na nagseserbisyo sa pamamagitan ng online consultation?

Kung tutuusin, ang Meralco nga, eh, nagkamali ng paniningil. Over sila sa kalkulasyon ng siningil nila sa taumbayan at sila dapat ang magbigay ng mas mahabang ekstensiyon.

Anyway, don’t be hopeless kasi IMEEsolusyon tayo riyan. Inihihirit natin nga sa ERC, na i-extend pa more ang deadline. Beyond December 31 pa, kasi kung walang kuryente, disconnected din tayo sa inaasahang pag-ahon ng ating ekonomiya, ‘di ba?

Gobyerno, kumuha ng supplier ng nat’l ID na super-daming kontrobersiya at palpak na kontrata, ngek!

ni Imee Marcos - @Imeesolusyon | October 12, 2020

Aarangkada na bukas ang inisyal na registration ng National ID system. Pero kabado tayo sa kredibilidad ng supplier ng card na kinuha ng ating mga kasamahan sa gobyerno.

Eh, ang nanalo kasing bidder ay ‘yung kumpanyang Indian na Madras Security Printers na may rekord ng mga super-daming kontrobersiya o palpak na mga kontrata sa ibang mga bansa, Santisima!

Kabilang dito ay ‘yung report ng Bangladeshi media noong Hulyo lang, nabigo ang Madras na makapag-deliver ng 500K cards para sa driving license project ng Bangladesh Road Transport Authority, kaya napilitan ang kanilang gobyerno na saluhin at akuin ang gastos para matapos ang proyekto. Nakakalokah, ‘di ba?

Hindi lang ‘yan, ini-report din ng media sa Africa na ang Madras ang nagbigay sa Kenya Bureau of Standards ng markang dekalidad na stamp, gayung madali naman itong magalaw dahil gawa lang ito sa ordinaryong adhesive paper na nagpalala pa sa smuggling sa naturang bansa ng mga palpak na produkto. Juskoday!

Kuwestiyunable ang kredibilidad at maraming palpak na rekord, kaya ang hiling natin sa PSA at NEDA, pakipaliwanag para naman justified na gastusin ang pera ng taumbayan dyan!

Reminder, dapat masigurong hindi mangyayari sa ‘Pinas ang sinapit ng ibang bansa, ano ‘yan, panibagong Smartmatic? Kesyo ‘yan lang ang qualified bidder? Hello!

May IMEEsolusyon, tayo sa PSA at NEDA na bago pumasok sa anumang kontrata ganyang mag-eeleksiyon na siguruhin n’yo namang super-duper ganda ng rekord ng kukuning serbisyo.

FYI, polycarbonate na ang materyal na gamit sa mga driver’s license hanggang passport ng iba’ ibang bansa na tulad ng Sweden, Finland, Malaysia, etc, ang Madras ‘yan, di ba?

Bear in mind, integridad ng ating eleksiyon, serbisyo ng mga bangko, healthcare insurance, contact tracing at paghahatid ng mga ayuda ng gobyerno ay ilalagay sa peligro ng palpak na National ID system, at pangmatagalan ‘yan na gagamitin, sure ba kayo na oks ang Madras? I wish!