Tamang impormasyon tungkol sa bakuna, ipaalam sa publiko

ni Imee Marcos - @Imeesolusyon | March 5, 2021

Ang anumang bagay na hindi pinaghandaan, kadalasan nauuwi sa kapalpakan.

Handa na nga ba tayo sa malawakang immunization program ngayong nagdaratingan na ang mga bakuna?

Ayon sa mga media reports, marami sa ating mga kababayan ay atubiling magpabakuna. Bunsod marahil ito sa kakulangan sa kaalaman tungkol sa benepisyo nito, at sa nababalitaan nila sa ibang bansa na mga malalang side effects at nauuwi pa sa pagkasawi.

Nitong nakaraang mga araw, nasaksihan natin ang pagpapaturok ng mga health workers at frontliners, pati na rin ang ilang opisyales ng gobyerno. Sana ay naibsan, kahit bahagya, ang alinlangan ng ilan nating mga kababayan.

Pero, tanggapin nating hindi sapat ang information campaign ng ating pamahalaan dahil kulang sa partisipasyon ang mga pribadong media networks at publications.

Bilang parte ng kanilang corporate social responsibility, dapat maglaan ang mga TV at radio stations ng ilang minuto kada araw para sa infomercials kung saan ilalahad ang mga dapat malaman ng publiko tungkol sa bakuna at sa COVID-19.

Ang mga tabloid, diyaryo at magasin naman ay maaaring maglabas ng katumbas na mga infographics.

At lahat ng ito dapat ay libre. Walang gastos sa gobyerno bilang pagtugon ng media sa pangangailangan ng panahon at ng taumbayan.

‘Yan ang IMEEsolusyon para sa kakulangan sa impormasyon tungkol sa mga bakuna—na kung tutuusin ay nakapagtataka, bilang tayo ay nasa sinasabing age of too much information.

Hindi naman inaalis ng gobyerno ang karapatan ng mamamayan na mamili ng gusto nilang brand ng bakuna. Pero, higit sa lahat, kailangan silang makumbinsi na magpabakuna dahil ito ang nararapat para sa sarili at sa nakararami.

Posible ring magdulot ng komplikasyon sa pag-iimbak at delivery ng bakuna ang mga pagdududa at maaaring magbunga ito ng dagdag-gastusin at pagsasayang. Kaya dapat effort pa more ang ating gobyerno para maka-engganyo ng magpapa-iniksyon.

Sa totoo lang, hindi lang ang mga Pinoy ang takot at may duda sa mga bakuna, nangyayari rin ito sa iba’t ibang panig ng mundo.

Isa pang IMEEsolusyon para paigtingin ang information campaign ay ang paggamit ng mga influencer na opisyal ng gobyerno o mga taga-showbiz na nagpapa-iniksyon, ‘di ba!

Hindi lang ‘yan, IMEEsolusyon ding linawin ng gobyerno ang sinasabing indemnification policy nito at kung paano gagastusin ang P500 milyong nakalaan para rito sakaling magkaproblema sa kalusugan dahil sa pagpapabakuna.

Puwede ring magbigay ng mga insentibo ang nasa pribadong sektor sa kanilang mga empleyado habang nirerespeto pa rin ang kalayaan na magdesisyon kung magpapabakuna o hindi. ‘Ika nga, para-paraan lang ‘yan.

Online at limited-face-to-face na pangangampanya ngayong may pandemya

ni Imee Marcos - @Imeesolusyon | March 03, 2021

Amoy eleksiyon na. Kani-kanya nang paramdam ang mga may balak tumakbo sa 2022. May direktang umaamin, at merong ayaw umamin. Kani-kanya ring dahilan kung bakit, pero hindi maikakailang ang pansin ng marami ay nakatuon na sa nalalapit na halalan.

Marami na rin ang nag-aabang sa mga political survey ng kung anu-ano’ng grupo. Nangangapa na tila ba mag-aatras-abante kapag nakitang hindi sila papatok sa mga botante.

Gayunman, hindi ‘yan ang ating inaalala. Nasa isip natin bukod sa pangarap nating hybrid elections ay ang magiging sitwasyon ng mga kandidato sa pangangampanya na ganitong nasa gitna pa tayo ng pandemya. May mga nagsasabing online na lang daw, para iwas-COVID.

‘Yun lang, tiyak na dehado rito ang mahihirap na kandidato. Eh, bakit ‘kan’yo? Siyempre, social media ‘yan at mangangailangan ng internet connection, high-tech gadgets, mataas na mbps at malakas na wifi.

Ang tanong, ano ang laban ng mga kandidatong walang kapasidad o resources na magpatakbo ng online campaign? Paano sila makikilala ng mga botanteng nakatira sa mga lugar na hindi abot ng internet? Hindi pamilyar sa social media at walang budget pang advertise sa iba’t ibang online platforms, siguradong ilalampaso lang sila ng mga kandidatong super-yaman dahil hindi magiging patas ang bakbakan sa pangangalap ng boto kung ang labanan ay nakasalalay lamang sa pagiging “visible” online.

IMEEsolusyon natin d’yan ay mega-push ang inyong lingkod na magkaroon ng face-to-face campaign pero may kaakibat na mga restrictions at pag-iingat kontra sa virus.

Applicable lang ‘yan sa mga lugar na bawas na at patuloy pang bumababa ang bilang ng kaso ng COVID-19.

IMEEsolusyon para ang kombinasyon ng online at limited-face-to-face na pangangampanya ngayong may pandemya. May level playing field, wika nga.

Paniningil ni P-Digong sa Amerika, ‘di pangongotong!

ni Imee Marcos - @Imeesolusyon | February 26, 2021

Sa panahon ngayon na maraming bansa ay naghihikahos dahil sa pandemya, hindi makatuwirang manlibre lalo na kung ang ililibre ay ‘superpower’, tulad ng Amerika!

Ang tinutukoy natin ay ‘yung kahit wala nang base militar ng U.S. dito sa atin, eh, patuloy pa rin ang pagpronta ng Pilipinas bilang unang depensa ng Amerika sa Indo-Pacific region.

At huwag ka! Bukod sa buwis-buhay nating kabutihang-loob, pati ang tubig at kuryente natin sa ating mga military base, Pilipinas pa rin ang nagbabayad. Hello? Tama ba ‘yan?

Napakaraming Pilipino ang hindi kayang magbayad sa tubig at kuryente ngayong may pandemya. Itutuloy pa rin ba ang subsidiya sa mga Amerikano?

Kung wala ang Pilipinas, ang kalakal ng Amerika pati na ang mga pangako nito sa seguridad ng rehiyon ay hihina. Ngunit dahil sa pagtanggap natin sa U.S forces, magiging target ang Pilipinas ng mga kalaban ng Amerika, kahit hindi tayo direktang kasali sa anumang giyera na maaaring pumutok sa ating rehiyon.

Noong World War 2, binomba ng Japan ang Pilipinas dahil tayo ay US colony noong panahon na ‘yun. Ang resulta, isa ang Manila sa dumanas ng pinakamadugo at pinakamalaking pinsala sa buong mundo pagkatapos ng pandaigdig na digmaan.

Huwag naman sana tayong pumayag na maulit ang kasaysayan at patuloy na abusuhin.

IMEEsolusyon d’yan, i-review ang EDCA (Enhanced Defense Cooperation Agreement) na pinirmahan ng U.S. at Pilipinas noong Abril 2014.

Sa ilalim ng EDCA, ang Amerika ay maaaring mag-stockpile ng kanilang mga gamit pandigmaan at mag-deploy ng kanilang mga tropa sa limang kampo militar sa Pilipinas.

Ang dating bayad sa ating gobyerno bago mapaalis ang mga U.S. bases halos tatlong dekada na ang nakaraan ay naiiwasan din ng Amerika, ‘di ba? Kaya’t pabor tayo sa sinabi ni Pangulong Rodrigo Duterte na kailangang magbayad ng patas ang U.S. sa atin!

Hindi ‘yan pangongotong, puwede ba?! Karapatan nating naningil ng nararapat dahil seguridad ng ating bansa at buhay ng mga Pilipino ang nakataya rito!