Mas magastos ang online classes, ibaba ang tuition fees ngayong pandemya!

ni Imee Marcos - @Imeesolusyon | July 09, 2021

Online classes ang mas nananaig ngayon, at dahil blended learning ang umiiral bunsod ng pandemya, dapat mas mababa ang matrikula, ‘di ba?

Biruin n’yo, ilang unibersidad o kolehiyo pa lang ang may face-to-face classes, kaya bakit as is pa rin ang sinisingil sa mga estudyante? Hindi ba dapat bawasan naman ang assessment ng fees dahil bawas din ang operating costs?

Pero sa hybrid hearing ng Committee on Higher, Technical at Vocational Education tungkol sa Senate Bill 1744, ang panukalang i-rebisa ang Republic Act 7722 o Higher Education Act of 1994, lumilitaw na nagtakda ang Commission on Higher Education ng guidelines sa mas resonableng pagtaas ng matrikula at iba pang gastusin sa eskuwelahan.

Napansin lang natin na tila para sa kapakanan ng mga colleges at universities ang palaging nabibigyang-pansin. Puro pro-increase gayung karapat-dapat namang iniintindi rin ang kalagayan ng ating mga estudyante, lalo na ang kanilang mga magulang.

Kahit online classes lang ang mga ‘yan, hindi natin masasabing mababa rin ang gastusin dahil ang nabago lang ay ang face-to-face classes kung saan pamasahe ang nawala sa gastos.

Pero kung tutuusin sa online classes, mas magastos dahil WiFi ang gamit at kuryente sa bahay. Bukod pa riyan ang mga assignment o paper works at projects ng mga unibersidad. Take note, pandemic ngayon, maraming magulang ang nawalan ng trabaho.

Palaging isang side lang ang naaalala. Napakahalagang maging edukado ang mga Pilipino. Ngayong may pandemya, it’s about time na lingunin ang kalagayan ng mga magulang at estudyante.

Remember, ang edukasyon ay hindi dapat prebilehiyo, kundi ito’y karapatan ng bawat Pilipino. Pero dahil sa kahirapan, marami ang tumitigil sa pag-aaral.

In our very own way, karapat-dapat lang na matulungan sila. Kaya naman, IMEEsolusyon, eh, plis, CHED, kung may guidelines kayo para sa resonableng pagtaas ng matrikula, marapat lang na magkaroon din kayo ng guidelines para sa pagbaba ng tuition fee. Agree?

‘Flying coffin’ sa mga sundalo, itigil na!

ni Imee Marcos - @Imeesolusyon | July 07, 2021

Nitong nagdaang mga linggo, dalawang aksidente sa chopper ang nangyari, at nito namang weekend, isang C-130s Hercules military cargo plane ang sumunod. Nakalulunos ang kanilang sinapit. Hindi natin maubos-maisip kung paano nangyari ang huling aksidenteng ito, gayung sinigurado naman ng ating awtoridad na walang problema sa eroplano.

Nakalulungkot ang insidenteng ito dahil hindi basta-basta ang mga sakay na mga mahal nating sundalo. Sa 52 na namatay, 49 ang mga sundalo na kasama ang tatlong ekspertong piloto at limang crew, habang tatlo naman ang mga nasawing sibilyan. Ang mga sugatan ay 47 na sundalo at 4 na sibilyan, Ilan sa kanila ay malubha ang kalagayan.

Karamihan sa kanila’y kamakailan lang nagtapos o kaga-graduate lang at pawang army private pa lang. Sila dapat ang kinabukasan ng Armed Forces of the Philippines (AFP).

Mga beterano nang sundalo ang kasama nila sa nasabing flight na buwis-buhay na naasahan sa paghahatid ng mga relief goods, medisina at iba’t ibang pangangailangan ng ating mga kababayang nadadale ng mga sakuna at mga kalamidad.

At nang sila naman ang nangailangan ng ating tulong, nasunog sila doon sa bumagsak na eroplano, hindi natin sila agad masaklolohan na talagang nakadidismaya. Ano ba talaga ang dahilan ng ganyang aksidente? OMG!

Sa ganang akin, IMEEsolusyon d’yan na itigil na ang mga ‘flying coffin’, plis lang. ‘Wag naman nating pasakayin ang mga sundalo sa mga pipitsugin o mga secondhand na aircraft. Baka naman puwedeng brand new na equipment ang bilhin?

Itodo na natin sa magandang klase ang mga kailangan ng ating mga sundalo, buhay nila ang nakataya araw-araw. Deserve nilang makagamit ng primera klase at plis pag-ipunan pa natin para sa mas mga high-end na equipment ang mai-supply sa kanila.

At praktikalidad din bilang konsiyumer, ‘yung mga kapos sa badyet na mamimili, minsanan lang bumili ang mga ‘yan, pero pinipili nila ‘yung mas mahal dahil matagal ang buhay ng mga nasabing gamit.

‘Ika nga, kung bibili na rin lang, ‘yung pangmatagalan ang kalidad at tibay, hindi ‘yung nakamura nga, ilang linggo lang ang gamit, wasak na. Oh, ‘di ba, mas magastos ‘yun, at nasa peligro pa ang buhay kung pipitsugin ang gagamitin!

Super-laking pondo sa BARMM, isapubliko kung saan napunta

ni Imee Marcos - @Imeesolusyon | July 05, 2021

Huling sona na ni Pangulong Rodrigo Duterte ngayong July, pero mukhang napag-iiwanan na ang kaunlaran sa Bangsamoro Autonomous Region in Muslim Mindanao (BARMM). Why, oh, why?

Juicekolord, binuhusan ng malaking pondo ang BARMM, pero bakit tila nangungulelat pa rin ang madlang pipol at kababayan nating Muslim doon pagdating sa improvement ng rehiyon?

Eh, ano na nga ba ang nanyayari? Isa-isahin ulit natin ang laki ng pondong inilaan ng ating gobyerno para sa kaunlaran ng BARMM.

Una, noong General Appropriations Act of 2020, inilaan ang BARMM ng P7 billion, Annual Block Grants (ABG) na nasa P63.6 billion, at Special Development Fund (SDF) na P5 billion. At dagdag pa rito ang 2021 GAA na P8.6 billion, AGB na nasa P71.6 bilyon at P5 bilyon ulit na SDF.

Hindi lang ‘yan, bago pa naging BARMM at Autonomous Region in Muslim Mindanao o ARMM pa lang ‘yan, may pondo pa sila na nasa P32.4 bilyon, adjustment na nasa P7.2 bilyon at total available na appropriations o laang pondo na P39.7 bilyon.

Oh, ‘di ba?! Ang lalaki ng mga pondong ‘yan! Pero ang tanong, kumusta naman ang hitsura ng BARMM, hello! Eh, hindi nga halos umusad ang pag-unlad ng rehiyon. Naku, saan ba at paano ba ginastos ang pondo ng BARMM?

Aba, eh, mag-eeleksiyon na, ilang buwan na lang din magpa-Pasko na. Ano na nga ba ang status ng mga proyektong ginagawa na raw sa BARMM? Eh, wala man lang tayong nababalitaang pag-unlad d’yan. Dapat malaman natin kung saan napunta ang super-laking mga pondo para sa BARMM.

IMEEsolusyon dito, dapat malaman ito at mabusisi ng ating mga kapwa mambabatas, para naman hindi nakapanghihinayang ang napakalalaking pondong inilaan, natutulog lang ang pera. Anyway, para mas maliwanagan tayong lahat, ipabubusisi natin ‘yan.

Oobligahin din nating maipakita sa ating mga mambabatas ang status ng mga proyekto. Dapat i-report mismo sa atin at maiklaro kung paano ginagamit ang pondo at dahilan ng mga pagka-delay ng mga proyekto.

Nakakaawa ang ating mga kababayan sa BARMM na inabot na lang ng pandemya, tila ang pag-unlad din nila, eh, nakatengga. ‘Wag namang ganyan. ‘Wag patulugin ang pondo, gastusin ng maayos at maging transparent kung paano ito ginastos. At plis lang, pabilisin na ang mga proyekto sa BARMM.

Baka naman abutin pa talaga ‘yan ng 2022 Elections, ano ba?! Bago man lang sana matapos ang termino ni Pangulong Duterte, eh, may nangyari nang improvement sa BARMM. Agree?