Tulong-pinansiyal ng gobyerno, aarangkada na!

ni Imee Marcos - @Imeesolusyon | August 12, 2021

Lockdown na naman tayo. Alam naman nating maganda ang purpose nito laban sa banta ng Delta variant. Pero tulad ng dati, epekto rin nito ang dagdag-pahirap sa bulsa ng ating mga kababayan, at puwede ring panibagong kawalan ng trabaho.

At saludo tayo sa pamahalaan dahil nalaanan ng pondo at sinigurong ibibigay na ang cash na ayuda sa ating mga kababayan. Batid naman nating mabilis maubos ang pera kaya pag naubos na ito, balik sa pagiging "nganga" ang ating mga kababayan.

Hirit natin nga, trabaho ang isunod na ayuda na pangmatagalan at mas produktibo. Hirap na hirap ang ating mga kababayan na maghanap ng mapapasukan ngayong may pandemya.

Lampas tatlong milyong Pinoy ang jobless pa rin, at ngayong may lockdown ulit, hindi malayong muling madagdagan ang mga walang trabaho.

Hinihirit din nating kung puwedeng pag-isahin ang pamamahagi ng ayuda sa pagre-recruit ng mga manggagawa. IMEEsolusyon naman sa hirap ng paghahanap sa trabaho ang inihain natin noon pang nakaraang taon ang Senate Bill 1590 o TROPA Bill (Trabaho sa Oras ng Pandemya Act).

Sa ilalim ng TROPA bill, pag-iisahin ang kalat-kalat na legislative measures sa mga subsidiya sa suweldo at cash-for-work program para sa mga skilled at unskilled workers sa buong panahon ng pandemya.

Maraming trabaho ang puwedeng malikha sa mga tanggapan at project sites ng gobyerno, o sa anumang programa ng pamahalaan na may kinalaman sa mga infrastracture projects, sa kalusugan, paglilinis at pangangalaga sa kalikasan. Puwede rin sa mga pag-aaring imprastruktura ng gobyerno, reforestation, flood control, mga conservation project, pagpapaganda ng mga national park, mga kagubatan, at mga historical site sa bansa.

'Yung bilyun-bilyong cash na ayuda, dapat palawakin ang mga cash-for-work program ng DOLE para sa formal at informal workers sa ilalim ng CAMP (COVID-19 Adjustment Measures Program) at TUPAD (Tulong Panghanapbuhay sa Ating Disadvantaged/Displaced Workers Program). Meron ding mga cash-for-work programs ang DPWH at DSWD.

Kapag naisaayos ang mga imprastruktura, manumbalik ang foreign investment at turismo na puwede ring makadagdag pa ng trabaho sa ating mga kababayan, 'di ba!

Nababastos na kultura ni Whang-Od at ibang IPs, tama na!

ni Imee Marcos - @Imeesolusyon | August 09, 2021

Kamakailan nabalot ng kontrobersiya ang ating world-famous tattooist na si Whang-Od at ang popular na vlogger na si Nas Daily. Inakusahan kasi si Nas Daily ng apo na inii-scam si Whang-Od.

Eh, ‘di ba nga napabalitang merong pinirmahang kontrata si Whang-Od kay Nas Daily para magturo ng “tattoo masterclass” online. Alegasyon ng apo ni Whang-Od na scam si Nas Daily na pinipilit namang nagpo-promote lamang siya ng naglalaho nang tradisyon at may ibabahagi naman sa kung ano’ng makalap sa Php750 na bayad ng bawat tatangkilik sa nasabing kurso.

At sabi pa ng apo ni Whang-Od, wala umanong maayos na consent o pagsang-ayon si Whang-Od sa nasabing kontrata dahil hindi ito buong naintindihan. Pero ang sabi naman ng kampo ni Nas Daily, nilagdaan ng thumbmark ang kontrata. Eh, ano ba talaga?

Malaki ang papel nating lahat bilang Pilipino na protektahan ang ating mga kalahing katutubo sa anumang uri ng pananamantala, o pagkaladkad sa kanila sa anumang kontrobersiya. Reminder hindi basta-basta ang 104-year-old nang Whang-Od, ha? Kinakatawan niya ang buong IPs.

At siyempre, bilang chairman ng Senate Committee on cultural communities, hinding-hindi natin mapapatawad ang anumang uri ng mga pananamantala o pagbalahura sa ating mga ‘national treasure’ na IPs. Take note, hindi ito first time sa ating mga IPs.

May mga dati nang reklamo na nababalewala ang halaga ng mga IPs, hindi lang nakakaladkad ang kanilang minanang kultura, kundi nanakaw pa ang kanilang kostumbre, tradisyong may spiritual value na dapat nating pinakakaingatan, pero tinatrato lang ng mga taga-lunsod na isang bagay at potensiyal na pagkakakitaan. Grabe!

Partikular dito ‘yung inireklamong New Era Cap Co. na gumawa ng koleksiyon ng Whang-Od t-shirts, ‘yung sandalyas ng Tribu Nation na ginamit ang pangalan ng Kankana-ey at dalawa pang ipinangalan rin sa Yakan ng Basilan at sa Manobo ng northern Mindanao, at nabastos din ang T’boli community sa southwestern Mindanao sa paggamit ng kanilang sagradong T’nalak textile para sa isang sapatos.

IMEEsolusyon dito ang pagbuhay sa inihain nating Senate Resolution 517 last year na kailangang imbestigahan ang mga paglapastangan sa ating mga IPs at gumawa ng batas para bigyang-depinisyon ang pagbabalahura sa cultural heritage at mapanagot ang mga guilty!

Need nating protektahan sila at pinakamatibay nga ditong IMEEsolusyon ang pagbigay-permiso na sa communal o pang-komunidad na intellectual property. Sa ngayon, pang-indibidwal lang ang tinatawag na intellectual property rights sa ating batas.

Para silyado ang proteksiyon sa mga IPs, dapat nakalagay din sa bagong batas na lifetime o pang-habambuhay na maaangkin ng mga IPs ang kanilang mga minanang kultura at hindi pansamantala lang. Agree?

Bigyang-prayoridad ang pagbibigay-ayuda sa mahihirap

ni Imee Marcos - @Imeesolusyon | August 06, 2021

Lockdown na ngayong araw sa NCR, at magtatagal ito hanggang sa August 20. Pero ang tanong, nakapamili na ba ang mga tao ng sapat na pagkain?

Kung may ilang bukas na tindahan o maliliit na bilihan ng pagkain o groceries sa mga lugar na naka-lockdown, mas mahal kaya ang bilihin?

Harinawa’y may sapat na ayuda ngayong ECQ sa NCR at ibang lugar para hindi magutom ang ating mga kababayan. Lalo na sa mga arawang pasahod na mga manggagawa.

Bago pa mag-lockdown, nakiusap tayo sa mga taga-DTI na ipagpaliban muna ang inaprub nilang hirit na price hike ng mga de-lata, instant noodles, gatas at iba pang basic goods. Ang hirit kasi ng mga manufacturers, noong 2019 pa raw ang kanilang huling pagtataas.

Pero nga ‘di ba, premature at hindi pa naman naisasapubliko ang mga panibagong SRP o Suggested Retail Price, kaya naman puwede pa ipagpaliban ang mga pagtaas-presyo, plis naman. Bawal sa panahon ng emergency situations ang profiteering o pananamantala ng mga negosyante sa publiko para lang kumita ng mas mataas, alinsunod na rin sa Republic Act 7581.

Eh, biruin n’yo naman, kahit piso-pisong pagtaas-presyo ay hindi dapat minamani-mani kasi malaki ang mawawala sa mga workers na arawan ang suweldo. Mas kaya naman ng mga negosyante na manatiling ahon hanggang malampasan ang lockdown.

At ang tanong, paano na ang mga walang kita sa loob ng dalawang linggong lockdown? IMEEsolusyon para may makain ang mga kapos ang pambili, paspasan na ang pamamahagi ng ayuda. Cash ang ibigay para siguradong buo ang matatanggap at wala nang mabigat na binibitbit.

Remember, mas mahirap naman na nakaligtas nga sa Delta variant ang ating kababayan pero nadale naman ng kagutuman. Dapat patas ‘yan na naiintindi at naikakasa nang maayos.

IMEEsolusyon din na nakikita natin, eh, payagan na ring makatulong ang mga community pantry, basta ang importante ay no-touch sila at talagang kung puwede nga ay hindi na visible ang magmamaniobra ng mga community pantry. O kaya’y gawin na lang rolling community pantry na magha-house to house. Keri ‘yan!