LGUs, pakubrahin na sa pinalaking pondo sa buwis ng gobyerno, now na!

ni Imee Marcos - @Imeesolusyon | January 07, 2022

Tama ang ating tantiya na sa pagbungad ng taon, sisipa ang Omicron variant. Binulabog na ng Omicron ang iba’t ibang bansa na bagama’t mild lang daw ito, eh, deadly naman sa bilis ang pagkalat.

Kaya naman, mabilis na ring kumikilos ang iba’t ibang ahensiya ng ating pamahalaan para maagapan ito at hindi tayo mabulaga na naman sa hindi maiiwasang paglobo ng numero nito sa ating bansa.

Sa national government, walang problema ang galaw, pero ang mga nasa frontline na sumasabak sa giyera, partikular ang LGUs, paano makagagalaw kung kapos sa pondo? Meron naman kung tutuusin, pero hindi pa agad ma-release.

Take note, LGUs ang sumasabak ng direkta sa mga nasasakupan nilang residente na dinadale ng mga deadly virus na ‘yan sa simula pa lang.

Kaya heto nga, bilang Chairman ng Senate committee on economic affairs, nananawagan tayo sa ating economic managers na gora na sa pag-release ng pinalaking pondong laan sa LGUs sa ilalim ng 2022 national budget.

IMEEsolusyon na palakasin at armasan ng sapat na pondo angLGUs dahil sila ang direktang nasa “battlefield”. Eh, ‘di ba nga napagkaitan na sila sa mga nagdaang taon ng kanilang dapat na-share o bahagi sa buwis sa national government?

Gayung sa 2018 ruling ng Korte Suprema o ‘yung tinatawag na Mandanas-Garcia ruling, 40% ang dapat na pondong nakukubra ng LGUs sa lahat ng koleksiyong-buwis ng national government at hindi lang sa koleksiyong-buwis ng BIR kukunin, tulad ng nangyari sa mga nagdaang taon.

Nasa Php960 bilyon ang inaasahang maibibigay sa LGUs ayon na rin sa ‘tax bas’ o pinagbasehang buwis ng halos Php2.4 trilyong kuwenta ng Department of Finance (DoF).

Pero kapos ang naturang ‘tax base’ sa inaasahan ng LGUs, partikular na sa Ph431 bilyong koleksiyon sa buwis na ibinukod o hindi isinama ng DoF sa pagkuwenta nito para sa ilalaang pondo sa LGUs. Santisima!

Eh, gagastos pa ang LGUs sa paglilipat sa kanila ng national government ng iba pa nitong trabaho sa susunod na tatlong taon. Nakikiusap na ‘wag silang biglain dahil butas ang kanilang bulsa sa pondo, juicekolord, aber, saan na naman sila huhugot ng badyet para riyan?

Kaya nga, plis lang mga eco managers, ilabas na ang pinalaking bahagi sa buwis ng mga LGU frontliners, para magamit na nila sa giyera hindi lang sa pandemya, kundi sa iba’t ibang kalamidad o sakuna sa hinaharap! Now na!

Cash-for-work para sa mga binagyo, i-push pa more!

ni Imee Marcos - @Imeesolusyon | January 03, 2022

Agree tayo sa pagbibigay-trabaho ng DOLE sa mga pinakamatinding dinale ng Bagyong Odette sa Central Visayas, Northern Mindanao at Caraga.

Partikular na ang mga paglilinis ng mga kanal, pagsasaayos o maayos na segregation sa iba't ibang bagay na winasak ni "Odette", at iba pang trabaho para sa rehabilitasyon sa mga lugar na matinding hinagupit ng bagyo.

Malaking bagay na binadyetan ng DOLE ng P100 milyon ang sampung araw na emergency employment ng 25,000 na informal workers sa naturang mga lugar sa ilalim ng flagship cash-for-work Tulong Panghanap-buhay sa Ating Disadvantaged/Displaced Workers o TUPAD program.

Sa harap nito, IMEEsolusyon na i-push pa more ang ganitong ayuda. Baka meron pa namang mahuhugot na badyet ang iba pa nating mga ahensya ng gobyerno, tulad ng DENR na baka pwedeng kumuha ng mga informal workers para magtanim ng mga pamalit na mga puno sa mga pininsala ng bagyo kabilang ang mga nasa kabundukan, sa abot-kaya nitong badyet na pambayad.

Ikalawa, batid nating ang DPWH ay mayroon ding Trabahong Lansangan Programang Pantawid Pamilyang Pilipino na baka naman puwede ring ipatupad para sa mga lokal na residenteng binagyo sa nabanggit na mga lugar.

IMEEsolusyon rin na ang mga negosyanteng nagmamay-ari ng mga mall o malalaking hardware o tindahan, gasolinahan o anumang negosyo na tinamaan ng bagyo, eh, hangga’t maaari kumuha ng mga lokal na residenteng trabahador.

Kapag kasi mismong mga taga-lugar ang kukuning pansamantalang workers, eh, mas bibilis ang pag-asenso ng komunidad na sinalanta ng bagyo. Bakit? Siyempre, sa halip na nakaantabay lang sila sa mga ayuda, eh, may iba pa silang pagkukunan ng pangsuporta at pangkain sa kani-kanilang pamilya.

Nakatulong na sila sa pagsasa-ayos ng kani-kanilang mga lugar, may kontribusyon pa ito sa lokal at pambansang ekonomiya, 'di ba?

'Ika nga, kone-konektado kasi ang lahat at hindi lang dapat huminto sa relief goods ang pagbibigay-ayuda. IMEEsolusyon sa pagbangon ang remedyo tulad ng hanapbuhay, para tugunan ang pangangailangan ng mga nabibiktima ng anumang sakuna o kalamidad.

Kita sa buwis ng gobyerno, ibahagi sa mala-“nanay” na LGUs!

ni Imee Marcos - @Imeesolusyon |December 27, 2021

Iba talaga ang serbisyo-publiko kapag direktang nakakasalamuha ang mamamayan.

Bilang dating gobernador ng Ilocos Norte, kapadung-kapado natin at nakikita ng direkta ang pangangailangan ng nasasakupan.

‘Ika nga, tulad ng nanay na “hands-on” sa mga pangangailangan ng kanyang mga anak, eh, ganyan din ang mga lokal na pamahalaan o LGUs at maituturing nating ama ng tahanan ang national government na provider ng badyet.

May kasabihang ang ina ang best manager ng mga kaperahan sa bahay na kapareho rin ng mga local government units o LGUs kasi nakikita nila ng direkta at sila ang sumasabak sa pang-araw-araw na gawain at detalyadong gastusin sa kanilang nasasakupan.

Kaya naman, hindi natin maiaalis na kapag tinapyasan ng tatay o national government ang badyet ni nanay o ng mga LGU, eh, hayan, si nanay ay pumuputak kasi siya ang sumasabak sa giyera ng gastusan, ‘di bah? Juicekolord! ‘Yung tipong wala nang huhugutin, pipiliting sarilinin ang pamamaraan at diskarte para magkasya ang badyet.

Ganyan ngayon ang lagay ng mga LGU natin na kumukuwestiyon sa Department of Finance kung bakit ba naman tinapyasan ang kanilang share sa national taxes gayung mas daragdagan pa ang kanilang pagkakagastusan dahil ibinibigay na ng national government ang iba pang tungkulin o functions sa kanila sa susunod na tatlong taon.

Aba, eh, saan sila huhugot kung said na said na ng pandemya?

Mantakin ba naman ninyong tanggalin ng DOF ang bilyun-bilyong national tax revenue o kita ng gobyerno sa mga buwis sa pagkukuwenta ng badyet ng mga LGU sa susunod na taon, hello!

Daing ng mga LGU, tinanggal ng DOF ang Php431 bilyon na halaga para sa kanila sa susunod na taon, at Php87 bilyon doon ang pinalagan ng League of Provinces of the Philippines (LPP) at iginiit na malaking kamalian.

Ang mangyayari niyan, kakapusin ang mga LGU ng Php35 bilyon o 40% ng Php87 bilyon, dahil ‘yan ang porsiyento na naisabatas. Hay naku, malaking problema ang idudulot niyan sa mga LGU. Saan pa sila huhugot ng badyet, ano ‘yun magmamadyik?

Agree tayo sa daing ng LGUs, bakit? ‘Di ba, nga ayon sa Mandanas ruling ng Korte Suprema noong 2018, nakalaan sa mga LGU ang 40% ng koleksiyon ng pamahalaan sa lahat ng buwis, na bumabago naman sa nakasanayan na tanging sa koleksiyon lang ng Bureau of Internal Revenue ibinabase ang kanilang badyet.

Eh, may dagdag-pahirap at gastusin pa sila sa inisyung Executive Order 138 tungkol sa debolusyon o paglipat ng ilang responsibilidad ng national government sa mga LGU.

Tapos ganyan ang badyet pinaliit? Santisima, saan pa sila huhugot ng pera, sobrang kakapusin ‘yan!

Pakaisipin naman ng DOF na ang nakalaan para sa mga development program ng mga barangay hanggang sa provincial level ay masasakripisyo at sapilitang pagkakasyahin kasama ang mga ililipat na tungkulin at gastusin sa mga LGU.

IMEEsolusyon d’yan sa hinaing ng mga LGU, eh, plis lang ibalik na ng DOF ang tamang kuwenta ng paglaan ng badyet sa ating mga LGU, ayon sa Mandanas ruling.

Remember, mahalaga ang mga LGU sa ating bansa dahil sila ang nakapronta sa mga serbisyo-publiko, lalo na sa pagrekober sa dagok ng pandemya.

Suportahan natin ng maayos ang pangangailangan ng LGUs, dahil ang pag-usad ng kalagayan ng mga lokal na pamahalaan ay pag-usad at pagrekober din ng national government at ng ating bansa sa kabuuan! ‘Di bah? Plis paki-plantsa na ang isyung ‘yan!