Mock polls, praktis pa more!

ni Imee Marcos - @Imeesolusyon | February 04, 2022

Apat na buwan na lang eleksiyon na. Kamakailan, natapos na rin ang mock elections sa ilang piling lugar para masiguro ang kahandaan ng ating bansa sa paparating na halalan.

Pero ‘yun nga lang, dahil praktis pa lang ito, marami tayong nakitang butas o problemang teknikal sa isinagawang mock polls. Kapag hindi naisaayos pihadong malalagay din sa peligro ang kaayusan ng ating eleksiyon sa Mayo, ‘di ba?

Kabilang dito ang aberya sa transmission ng boto dulot ng mahinang internet signal, ang mahabang oras ng pagpila sa presinto, hindi mahanap na pangalan at voting precinct, kung saan natagalan ang mga botante.

Hindi ba ang target ng Comelec ang 10-minuto at 47-segundo na bilis ng pagboto ng bawat botante, eh, ang tanong, keri bang gawin ‘yan kung maraming butas o aberyang lumabas sa mock polls pa lang?

Sa mock polls, kamakailan ay nakulangan tayo sa partisipasyon ng Department of Health.

Napakahalaga niyan para sa kaligtasan ng mga botante ngayong may pandemya.

Sa harap niyan bilang chairman ng Senate committee on electoral reforms and people’s participation, IMEEsolusyon natin ay ipaulit sa Comelec ang mock polls sa mga piling lugar para masubukan kung naitama na ang mga butas sa teknikal na problema.

Ikalawa, kailangan ibigay nang maaga ng Comelec ang voting precinct number ng mga botante na magsisigurong mabilis silang makaboboto, maiiwasan ang mahabang pila at hindi na magkakagulo sa paghahanap nito.

Maigi rin kung mai-online ng Comelec at i-post agad sa bawat mga barangay ang mga voting precinct number ng mga botante, gayundin ang mga guidelines para sa mabilis na pagboto.

Nakapanghihinayang talaga na hindi naipasa ang ating Expanded Early Voting Bill na magiging daan sana para mas maagang makaboto ang mga buntis, senior citizen at PWDs para maiwasan din sana ang mahabang pila.

Nasa gitna pa tayo ng pandemya, kailangang plantsado na lahat at hindi magkaroon ng aberya sa mga teknikal na aspeto at health protocols ang botohan. Kaya sana Comelec, plis lang, paki paspasan na ang mga dapat gawin at gamutin na ang maliliit na butas na ‘yan para sa mabilis, iwas-COVID-19, mapayapa at maayos na eleksiyon. Agree?

Para mas ma-enjoy ang Valentine’s Day… Mga couples, magpabakuna na!

ni Imee Marcos - @Imeesolusyon | February 02, 2022

Wow, Pebrero na! Nangangamoy pag-ibig na tayo, ngayon ang buwan na pinakahihintay ng mga lovers. Paano natin ipagdiriwang ang Valentine’s Day?

Nasa Alert Level 2 na ang National Capital Region at meron pa rin namang natitirang mga naka-granular lockdown at sa mga karatig lugar at ilang lalawigan naman ay meron pa ring nasa Alert level 3, meaning, meron pa ring restriksiyon, lalo na sa mga hindi pa bakunado. ‘Ika nga, limitado pa rin ang ating galaw.

Eh, paano na lang ngayon ang pagde-date ng mga hindi bakunado at bakunado?! Ay, dieta ang mga hindi bakunado, at least makalalabas kahit paano ang mga bakunado. Kawawa naman, limitado pa rin ang galaw ng mga unvax!

Ooops! Reminder sa mga mag-boyfriend na ang isa ay bakunado at hindi bakunado, ha? ‘Wag na ‘wag kayong pupuslit para mag-date nakupo, hindi ganun kasigurado ang bawat isa na walang “tama” ni COVID, ‘di ba?! Eh, kasi nga bagama’t mild lang, mabagsik pa ring maituturing ang Omicron variant.

Remember, ‘yung mga unvax ay may posibilidad na kapag severe ang tama, lalo na ‘yung may comorbidity, malalagay sa peligro ang buhay, habang kahit bakunado na ang iba, eh, meron pa ring tinatamaan ng Omicron pero ‘yun nga lang, hindi seryoso ang tama dahil protektado na sila.

Sa mga mister naman na sure na bakunado dahil obligado, aba, eh, sad to say, hindi rin kayo puwedeng mag-date o lumabas sa Valentine’s kapag ang misis ninyo ay hindi bakunado.

Mahigpit pa rin kasi sa mall at nanghihingi sila ng vaccine card at kahit saang pasyalan.

Numero unong IMEEsolusyon ay magpabakuna na ang mga hindi pa, para makasama ninyo ang inyong mga nililigawan, ka-boyprenan at mister sa pagde-date ngayong Valentine’s! Reminder, maliit ang mundo ngayon ng mga hindi pa bakunado, walang mapasyalan o mapuntahan maliban na lang kung essential ito, ‘di ba!

Pero IMEEsolusyon din naman kung talagang hindi ubra ang bakuna sa mga kapareha ninyong mayroong comorbidity, puwede namang ‘yung mga mag-asawa, eh, gawin na ang date sa inyong pamamahay, gawin ninyong romatiko ang dinner, ‘di ba? Ipaghanda na lang ng special meals ang mga misis o mister.

Sa mga mag-boyfriend naman o nililigawang hindi pa bakunado, eh, i-enjoy ang virtual date!

Puwede rin namang pumunta kayo sa harapan ng bahay ng inyong GF o BF at iwanan ang regalo, mas maganda nga kung pang-ulam o makakain ang ibigay ninyo, ‘di ba? Mas praktikal, ‘di ba, krisis ngayon!

Ngayong may pandemya, para-paraan lang ang pagpapakita ng pagmamahal, hindi porke hindi nakapag-date ay mababawasan na ang ating love sa kapareha. Kaunting tiis-tiis pa’t mairaraos natin ‘yan! Pero, pinakamaganda sa lahat para makasama ang inyong nililigawan, BF o GF o mga asawa sa date, magpabakuna na! Gora na!

Ngayong magmamahal ang bilihin, magmala-Ilocano sa pagkukuripot!

ni Imee Marcos - @Imeesolusyon | January 31, 2022

Nakakaburido na na-isnab ang ating pakiusap sa Department of Trade and Industry (DTI) na ‘price freeze’ muna sa mga presyo ng pandesal at Pinoy Tasty at sa halip, eh, inaprub pa ang price hike ng ilang basic goods, juskoday!

Katwiran ng DTI, ‘domino effect’ ‘yan ng pagtaas ng presyo ng gasolina. Hanggang 6% daw ang pinayagan ng DTI na dagdag-presyo sa mga produktong Pinoy tasty, pandesal, sardinas, canned meat, gatas, kape, instant noodles, sabong panligo at panlaba, bottled water, kandila, battery at asin.

Paano na lang ang ating mga kababayan na halos wala na ngang makain, taas-presyo pa ang bubungad? Take note, marami pa rin ang walang trabaho sa ngayon at nalimitahan pa ang mga galaw dahil nga sa nag-Alert Level 3 dulot ng COVID-19. ‘Kalokah!

Bilang chairman ng Senate committee on economic affairs, IMEEsolusyon sa tumataas na bilihin ngayon, eh, mag-mala-Ilocano sa pagtitipid at magbalik-sigla ulit tayo sa backyard planting (plantito at plantita) ng mga gulay-gulay para may mapagkunan ng mauulam at makatitipid na sa gastos, masustansiya pa!

Pabidahin natin ang IMEElunggay, tanim din tayo ng kamatis, sibuyas, okra, sitaw, bawang, talong at iba pa, keri ‘yan! At kung wala naman tayong lupang pagtatamnan, kahit ‘yung mga nasa condo, IMEEsolusyon, ilagay natin sa mga paso o ‘yung improvised na paso tulad ng plastik na pinaglagyan ng softdrinks o detergent products, ‘di ba?!

Sa mala-Ilocanong pagtitipid naman, lalo na ng mga nanay, kung dati-rati ang sabon nating ginagamit isang buo agad, eh, suhestiyon natin na hati-hatiin ninyo ‘yan na pa-cubes para hindi lahat nalulusaw, saka ang mga gagamiting sabon ay ipatong sa foam para hindi agad matunaw, ‘di bah!

Kung magluluto naman, kung puwedeng lutuin minsanan ang ulam na aabot hanggang pang-dinner, gawin na para makatipid sa gasul, ‘di bah! Saka sa kape naman kung walang pambili, aba, ibusa-busa ang bigas hanggang sa umitim at presto! Meron na kayong kape na ligtas pa sa caffeine, ‘di bah!

‘Yung mga pa-bottled-bottled water pa, kaysa bumili, naku pakuluan n’yo na lang muna ang inyong tubig, sure na sure pang ligtas kayo sa virus niyan, agree? Kung makatitipid sa paggamit ng uling, why not! Tipirin ang badyet, bilhin lang ‘yung talagang mga kailangan, saka na ang mga ekstra-ekstrang sitsirya na hindi naman masustansiya.

Panawagan naman natin sa DTI, siguraduhin ang maagap na pagpapalabas ng Suggested Retail Price oras na ipatupad na ang price hike sa basic goods. Ikalawa, aktuwal at puspusan ang gagawing pag-iinspeksiyon sa mga magho-hoard ng produkto at magpapataw ng sobrang singil!

Sa gitna ng mga napipintong price hike, tularan kaming mga Ilocano, panahon ngayon para magkuripot sa paggastos, makararaos din ang lahat. ‘Ika nga, “Habang maiksi pa ang kumot, magtiis na mamaluktot”! Keri ‘yan!

#30#