DOH, push pa more sa bakuna ng mga bata; ‘parental authority’, naaapakan na!

ni Imee Marcos - @Imeesolusyon | February 07, 2022

Tila sumusobra na ang Department of Health sa pakikialam sa bawat pamilya pagdating sa usaping pangkalusugan.

Bakit kanyo? Aba, nagpalabas ba naman ang DOH ng memorandum na kahit walang permiso ng mga magulang, puwedeng umakto ang estado, partikular ang ilang ahensiya ng gobyerno tulad ng Department of Social Welfare and Development (DSWD) at sila na mismo ang pipirma sa vaccination consent form kapag ginusto ng bata na magpabakuna! Grrrr! Grabe ‘yan, ha?

Take note DOH, bakunado ang inyong lingkod. Pero bilang isa ring magulang, feel natin ang galit ng ilang parents sa pagbalewala ninyo sa kanilang pagtanggi na mabakunahan ang kanilang anak porke gusto ng mga bata?! Duh!

Hindi puwede ang ganyan! ‘Wag kayong agaw-eksena sa mga magulang pagdating sa kanilang mga anak, ha? Reminder lamang, hindi ninyo puwedeng balewalain o sagasaan na lang ang ‘parental authority’! Ano kayo, hilo?! Wala ba kayong anak?

Hay naku, nakakapikon ang pinakahuli ninyong kapalpakang ‘yan! Malaking kasalanan ‘yan sa bawat pamilyang Pilipino at hindi ‘yan uubra, ha! Marami kayong dapat ipaliwanag!

Pansin lang natin kung bakit tila habang patagal nang patagal, nawawalan na ng galang sa karapatan ng bawat Pinoy, mula nang maminsala ang mabagsik na COVID-19?

IMEEsolusyon sa mga ipinatutupad na patakarang may kinalaman sa pagbabakuna kontra sa COVID-19, kailangan ng matinding diplomasya at maingat, masistemang pamamaraan sa paghikayat para magpabakuna. Lumang tugtugin na ang estilong pamumwersa at labag ito sa karapatan ng bawat Pilipino!

IMEEsolusyon na maglunsad kayo ng kampanya sa telebisyon, radyo, print ads o social media at puwede ninyo itong gamitin sa paghahatid ng balanseng impormasyon sa mga banta at benepisyo ng bakuna sa mga bata, ‘di bah?

Parang ang peg, nanliligaw ang binata sa dalaga lang ‘yan, eh! Hindi kailangang mamilit, kundi kailangang todo-effort para masungkit ang matamis na “oo” ng mga magulang. Eh, ‘di ba nga, kapag ipinipilit, mas darami ang kokontra?! Kailangan lang ng diplomatikong diskarte at dapat magpakatotoo sa impormasyon. Walang bolahan!

Plis naman DOH, ‘wag ninyong aapakan ang parental authority, dahil lalo lang ninyong gagalitin ang mga magulang at pamilyang Pilipino. Agree?

Mock polls, praktis pa more!

ni Imee Marcos - @Imeesolusyon | February 04, 2022

Apat na buwan na lang eleksiyon na. Kamakailan, natapos na rin ang mock elections sa ilang piling lugar para masiguro ang kahandaan ng ating bansa sa paparating na halalan.

Pero ‘yun nga lang, dahil praktis pa lang ito, marami tayong nakitang butas o problemang teknikal sa isinagawang mock polls. Kapag hindi naisaayos pihadong malalagay din sa peligro ang kaayusan ng ating eleksiyon sa Mayo, ‘di ba?

Kabilang dito ang aberya sa transmission ng boto dulot ng mahinang internet signal, ang mahabang oras ng pagpila sa presinto, hindi mahanap na pangalan at voting precinct, kung saan natagalan ang mga botante.

Hindi ba ang target ng Comelec ang 10-minuto at 47-segundo na bilis ng pagboto ng bawat botante, eh, ang tanong, keri bang gawin ‘yan kung maraming butas o aberyang lumabas sa mock polls pa lang?

Sa mock polls, kamakailan ay nakulangan tayo sa partisipasyon ng Department of Health.

Napakahalaga niyan para sa kaligtasan ng mga botante ngayong may pandemya.

Sa harap niyan bilang chairman ng Senate committee on electoral reforms and people’s participation, IMEEsolusyon natin ay ipaulit sa Comelec ang mock polls sa mga piling lugar para masubukan kung naitama na ang mga butas sa teknikal na problema.

Ikalawa, kailangan ibigay nang maaga ng Comelec ang voting precinct number ng mga botante na magsisigurong mabilis silang makaboboto, maiiwasan ang mahabang pila at hindi na magkakagulo sa paghahanap nito.

Maigi rin kung mai-online ng Comelec at i-post agad sa bawat mga barangay ang mga voting precinct number ng mga botante, gayundin ang mga guidelines para sa mabilis na pagboto.

Nakapanghihinayang talaga na hindi naipasa ang ating Expanded Early Voting Bill na magiging daan sana para mas maagang makaboto ang mga buntis, senior citizen at PWDs para maiwasan din sana ang mahabang pila.

Nasa gitna pa tayo ng pandemya, kailangang plantsado na lahat at hindi magkaroon ng aberya sa mga teknikal na aspeto at health protocols ang botohan. Kaya sana Comelec, plis lang, paki paspasan na ang mga dapat gawin at gamutin na ang maliliit na butas na ‘yan para sa mabilis, iwas-COVID-19, mapayapa at maayos na eleksiyon. Agree?

Para mas ma-enjoy ang Valentine’s Day… Mga couples, magpabakuna na!

ni Imee Marcos - @Imeesolusyon | February 02, 2022

Wow, Pebrero na! Nangangamoy pag-ibig na tayo, ngayon ang buwan na pinakahihintay ng mga lovers. Paano natin ipagdiriwang ang Valentine’s Day?

Nasa Alert Level 2 na ang National Capital Region at meron pa rin namang natitirang mga naka-granular lockdown at sa mga karatig lugar at ilang lalawigan naman ay meron pa ring nasa Alert level 3, meaning, meron pa ring restriksiyon, lalo na sa mga hindi pa bakunado. ‘Ika nga, limitado pa rin ang ating galaw.

Eh, paano na lang ngayon ang pagde-date ng mga hindi bakunado at bakunado?! Ay, dieta ang mga hindi bakunado, at least makalalabas kahit paano ang mga bakunado. Kawawa naman, limitado pa rin ang galaw ng mga unvax!

Ooops! Reminder sa mga mag-boyfriend na ang isa ay bakunado at hindi bakunado, ha? ‘Wag na ‘wag kayong pupuslit para mag-date nakupo, hindi ganun kasigurado ang bawat isa na walang “tama” ni COVID, ‘di ba?! Eh, kasi nga bagama’t mild lang, mabagsik pa ring maituturing ang Omicron variant.

Remember, ‘yung mga unvax ay may posibilidad na kapag severe ang tama, lalo na ‘yung may comorbidity, malalagay sa peligro ang buhay, habang kahit bakunado na ang iba, eh, meron pa ring tinatamaan ng Omicron pero ‘yun nga lang, hindi seryoso ang tama dahil protektado na sila.

Sa mga mister naman na sure na bakunado dahil obligado, aba, eh, sad to say, hindi rin kayo puwedeng mag-date o lumabas sa Valentine’s kapag ang misis ninyo ay hindi bakunado.

Mahigpit pa rin kasi sa mall at nanghihingi sila ng vaccine card at kahit saang pasyalan.

Numero unong IMEEsolusyon ay magpabakuna na ang mga hindi pa, para makasama ninyo ang inyong mga nililigawan, ka-boyprenan at mister sa pagde-date ngayong Valentine’s! Reminder, maliit ang mundo ngayon ng mga hindi pa bakunado, walang mapasyalan o mapuntahan maliban na lang kung essential ito, ‘di ba!

Pero IMEEsolusyon din naman kung talagang hindi ubra ang bakuna sa mga kapareha ninyong mayroong comorbidity, puwede namang ‘yung mga mag-asawa, eh, gawin na ang date sa inyong pamamahay, gawin ninyong romatiko ang dinner, ‘di ba? Ipaghanda na lang ng special meals ang mga misis o mister.

Sa mga mag-boyfriend naman o nililigawang hindi pa bakunado, eh, i-enjoy ang virtual date!

Puwede rin namang pumunta kayo sa harapan ng bahay ng inyong GF o BF at iwanan ang regalo, mas maganda nga kung pang-ulam o makakain ang ibigay ninyo, ‘di ba? Mas praktikal, ‘di ba, krisis ngayon!

Ngayong may pandemya, para-paraan lang ang pagpapakita ng pagmamahal, hindi porke hindi nakapag-date ay mababawasan na ang ating love sa kapareha. Kaunting tiis-tiis pa’t mairaraos natin ‘yan! Pero, pinakamaganda sa lahat para makasama ang inyong nililigawan, BF o GF o mga asawa sa date, magpabakuna na! Gora na!