Non-wheat flour na alternatibo sa trigo sa paggawa ng tinapay, i-gora na!

ni Imee Marcos - @Imeesolusyon | March 7, 2022

Tulad ng ating pangamba mula nang sumiklab ang giyera ng Russia at Ukraine, taas-presyo sa mga bilihin at krisis sa pagkain ang dulot nito, lalo na’t supplier pa naman natin ang Ukraine ng trigo na sangkap ng harina.

Biruin n’yo naman, sumirit sa 73% ang presyo ng trigo sa ‘trading’ nitong Byernes, kung saan mula sa dating $7.80 kada bushel pumalo na sa $13.50 dahil sa giyerang Ukraine at Russia, kaya ang resulta niyan, tataas na rin ang presyo ng trigo sa merkado, kung saan tayo umaangkat.

Tengga rin ang kanilang pagsu-supply ng trigo sa iba’t ibang bansa at tigil din ang pagtatanim ng Ukraine. At dahil d’yan, nakabababahala na kapag naubos ang imbak nating trigo, paano na lang tayo?

At dahil sa imported na trigo umaasa ang ating mga kababayang flour miller, siguradong lalaki rin ang kanilang gastusin sa produksiyon nito na tiyak ipapasa rin nila sa mga gumagawa ng tinapay at mga mamimili, dagdag-gastusin din ang mataas na presyo ng LPG! ‘Kalokah!

Paano na lang ang mga nagtitipid na mga Pinoy na nagmemeryenda ng tinapay at inuulam ang noodles kapag sumirit ng husto ang presyo ng harina dahil sa napakamahal na trigo? Juicekolord!

Bilang chairman ng Senate committee on economic affairs, nakikita nating IMEEsolusyon na maghanap na muna tayo ng alternatibong supplier ng trigo at isa ritong puwede ang China.

Makihati na muna tayo sa supply ng China na malapit sa atin, lalo na’t inalis na nito ang restriksiyon sa mga ini-export ng Russia.

Pero take note, kailangang plantsahin na muna natin sa kanila ang presyuhan sa trigo habang naghihintay pa tayo sa mas inaasahang supply sa U.S. at Australia, ‘di bah!?

IMEEsolusyon din ang non-wheat flour bilang alternatibo sa trigo sa paggawa ng tinapay at para maiwasan nating umangkat sa Thailand at Vietnam ng mga non-wheat flour, magtanim na rin tayo at mag-ani ng sarili nating mga tanim, tulad ng bigas, kamote, patatas at munggo.

‘Wag na nating isnabin ang potensiyal ng mga non-wheat flour sa paggawa ng tinapay, lalo na’t napatunayan na ‘yan at ginamit na sa iconic Nutribun na super masustansiya!

‘Yan ang isa sa makatutulong para mabawasan ang pagtaas ng presyo ng tinapay at sa kagutumang dinaranas ng ating mahihirap na mga kababayan! Agree?!

Ilikas ang mga OFW na naiipit sa silangang Europa, now na!

ni Imee Marcos - @Imeesolusyon | March 2, 2022

Humuhupa na ang pandemya sa buong mundo, pero heto naman at sinusubok tayong lahat sa epektong dulot sa buong mundo ng giyera ng Russia at Ukraine. Nakakatakot!

Hindi pa tuluyang humupa ang tensiyon kahit pa nag-uusap na ang dalawang bansa.

May nakaamba pa ring banta o posibilidad na mauwi ito sa ikatlong digmaang pandaigdig lalo na’t nakakasa pa rin ang mabibigat at mas nakamamatay na armas na supply ng European Union na pansuporta nito sa Ukraine.

Kung nakakapangamba para sa mga taga-Ukraine at kalapit nitong mga bansa sa Eastern Europe, mas nakapag-aalala sa mga kababayan nating Pilipino na hanggang ngayon ay nasa Ukraine at naiipit sa tensiyon, bagama’t nailikas na sa kalapit na bansa ang iba sa kanila.

Tumulak pa-Ukraine si DFA Secretary Teddy Locsin at personal na nangunguna sa pag-aasikaso sa mga OFWs at mga migranteng Pinoy para mailikas sila sa ligtas na lugar. Hirit natin na ilikas na agad lahat ng natitira pang Pinoy sa Ukraine na ang iba’y nag-aatubili pa ring umalis, para matiyak na safe na sila lalo na’t wala pang kasiguraduhan, kung saan papunta ang giyera.

Eh, mahirap na maipit tayo at magkumahog na nakikipagsabayan sa iba pang lahi na inililikas ang kanilang mga kababayan. ‘Di bah!

IMEEsolusyon para hindi rin tayo mataranta, ikasa na ngayon ang mas malawakang evacuation plan para sa iba pang Pinoy na nasa mga bansang katabi ng Ukraine, kabilang ang Belarus, Moldova, Romania, Hungary, Slovakia at Poland na puwede ring madamay sa kaguluhan.

IMEEsolusyon naman para maiwasan ang mga pagkukumahog, may tensiyon man o wala, dapat maipermanente na ang mga contingency plan sa bawat bansang may Pinoy. Dapat masiguro na komprehensibo ang contingency plan, mula sa pondo para sa paglilikas, pagkain, tutuluyan at komunikasyon ng OFWs.

Buhay ng mga Pinoy na nasa abroad ang nalalagay sa peligro kapag may mga tensiyon, kaya dapat klaro at permanente na ang mga plano at mabilis ang kilos para sa kanilang kaligtasan at proteksiyon. Agree?!

Fuel subsidy, ‘wag na pakiyeme-kiyeme!

ni Imee Marcos - @Imeesolusyon | February 28, 2022

Bakit hanggang ngayon, wala pa talagang eksaktong petsa ang ating mga kasamahan sa gobyerno sa paglalabas ng fuel subsidy sa sektor ng agrikultura at transportasyon, gayung nagtataasan na ang mga bilihin at langis dahil sa giyera ng Ukraine at Russia?

Eh, ano’ng petsa na? Ano pa ba ang hinihintay, Pasko? Santisima! Eh, sumisirit na ang presyo ng langis at magma-Marso na, tiyak na ang matinding epekto nito sa ekonomiya at sa ating mga pang-araw-araw na gastusin!

Ang dami nang nakiusap sa mga ahensiya ng gobyerno na ilabas na yang fuel subsidy.

Kailan ba talaga ‘yan ibibigay? Jusko, aanhin pa ang damo pag patay na ang kabayo?

Puwede bang isapinal na ng Department of Agriculture ang mga patakaran sa paglabas ng ayuda sa mga magsasaka at mangingisda dahil P500 milyon ang nakalaan d’yan.

Sa ilalim ng Special Provision No. 8 ng ating 2022 national budget, pwedeng maglabas din ang gobyerno ng P2.5 bilyong pang-fuel subsidy para sa mga tsuper ng pampublikong sasakyan, taxi, traysikel, pati na rin sa mga nagmamaneho ng mga delivery services.

‘Wag nang hintayin pa ng Department of Budget and Management ang Abril para sa paglalabas ng subsidiyang ‘yan! Eh, ngayon nga iniipit na ang Russia na isa sa pinagkukunan natin ng supply ng langis.

At baka mabawasan pa ang supply sa Middle East kung dagsain ito ng mga taga-Europa.

Ayon sa mga eksperto, ngayong pumalo na sa $100 ang krudo, mananatili sa ganitong lebel ang presyo dahil balak ipitin ng U.S. at ng mga taga-Europa ang ekonomiya ng Russia sa halip na magpadala sila ng mga sundalo at armas sa Ukraine.

Hay naku, siguradong tataas na naman ang presyo ng pagkain at iba pang bilihin. Kaya IMEEsolusyon, bumili na tayo ng mas murang langis sa China o Russia. Nariyan din ang iba pang oil supplier tulad ng Venezuela at mga bansa sa Africa. Kasi nga ang target natin eh makabili ng marami hindi lang para siguraduhin ang pang araw-araw na konsumo kundi pati na rin ang ating reserba, agree?

Tulad ng nauna na nating nabanggit, eh, dahil may krisis na sa gasolina, bawas-bawasan na ang paggamit nyan. Sampol na lang itong ginagamit namin sa Ilocos Norte na mga windmill at solar panels, ‘di ba nga successful naman?

Panghuli, puwede namang makipagtulungan ang Pilipinas sa ibang bansang oil at gas explorer na tulad ng China, Japan, Australia at New Zealand, basta ba masisiguro nating makapaghihikayat ang alok nating sistema sa pagbubuwis sa mga foreign investor.

Kailangan na talagang tutukan ang pagpaparami ng reserbang langis at paigtingin ang paggamit ng tinatawag na renewable energy mula sa hangin at sikat ng araw. Now na!