Sa gitna ng mga tensyon sa West Philippine Sea... Self-Reliant Defense Posture Program, buhayin now

ni Imee Marcos @Imeesolusyon | February 18, 2023

Sa gitna ng umiinit na tensyon sa territorial dispute sa West Philippine Sea, madalas na sumasagi sa isip nating lahat kung kamusta kaya ang ating mga armas na pangdepensa?

Klaruhin ko lang, mga friendship, tayo ay peace advocate, ayaw nating sumuong sa giyera. Pero hindi ito nangangahulugang magiging kampante na tayo. May tensyon man o wala, kinakailangang kasado parati ang ating hukbong pangdepensa.

May mga alok sa atin na tulong sa labas ng bansa, ating mga kaibigan. Pero dapat talaga na mayroon tayong sariling pangdepensa para mabawasan ang pagdepende o pagsandig sa mga dayuhan kung saan naiipit tayo sa pamumulitika ng mga superpower?

Natatanging IMEEsolusyon dito ay ang pagbuhay sa ating programang Self-Reliant Defense Posture Program o SRDP, kung saan kailan lang ay nakipagkonsultasyon tayo sa Western Mindanao Command sa Zamboanga Sibugay.

Eh, kailangan natin itong gawin, lalo na’t naghahanda ang ating bansa para sa apat na lugar na bibigyang access ang U.S. military at sa kasunduan para sa mas malakas na kooperasyong pangdepensa sa pagitan ng Pilipinas at Japan.

Kung matatandaan n’yo, ang SRDP ay ipinatupad noong 1974 ng aking ama na si FM para ibsan ang pagdepende sa mga dayuhan. Tingnan n’yo ang Thailand, naco-customize na nila ang mga rifle nila na mas slim at mas magaan para sa mga sundalo nila.

‘Yung Vietnam naman, kaya nang gumawa ng mga anti-surface warfare missiles. Eh tayo, hanggang saan na ba ang narating natin?

Noong dekada ‘70 at ‘80, ang ating SRDP ay gumagawa na ng M-16 rifles, mga helmet, handheld radio, Jiffy jeeps, granada at mga bala. Lumikha rin ito ng mga trabaho at pinaliit nito ang gastos natin sa pagkuha ng imported na gamit pang-militar.

Kaya kailangan tayo, eh buhayin na rin natin ang SRDP. ‘Yung mga Pinoy manufacturer ay gumagamit ng mga lokal na materyales at nakakamit naman ang teknikal na kaalaman sa mga imported na parte.

Kaya dapat lang na gora na tayo sa SRDP, kering-keri at walang duda sa ating mga Pinoy na gawin ito, ‘di ba?! Buhayin na ang SRDP, now na!

Kamatis, pinamimigay na lang dahil sobra-sobra ang suplay

ni Imee Marcos @Imeesolusyon | February 10, 2023

Matapos ang kakulangan daw sa sibuyas at bawang, ngayon naman ay oversupply ng kamatis ang pinoproblema ng ating mga kaibigang magsasaka at maliliit na mga negosyante.

Nauulit na naman ang pagtatapon ng mga produkto na galing sa dugo at pawis ng mga nagtatanim para tayong lahat ay may makain.

Juskolord! Kawawa ang ating mga farmers at domino reaction nga nito siyempre, apaw-apaw ang supply, bagsak-presyo na ang mga kamatis.

Naglalaro ngayon sa P25 hanggang P40 ang kilo ng kamatis. Ang problema, wala na halos bumibili, as in matumal!

Kaya sa bagsakan nito sa Balintawak Market, aba, eh makikita raw na ipinamimigay na lang ng ilang tindera ang mga sobrang hinog na kamatis. Hindi na kasi mabenta!

May ilang tinderang nagsabi na dahil matumal ang bentahan, baka kaunti na lang din ang kanilang i-order na supply sa kanilang mga suki.

Ano ba ‘yan! Ang saklap. Pero may IMEEsolusyon tayo r’yan.

Huwag nang itapon ang mga kamatis na sobra-sobra ang supply. ‘Yung ating DOST-Industrial Technology Development Institute ay makakatulong.

Lahat ng kanilang mga regional offices ay mayroong processing equipment na puwedeng gamitin sa pagsisimula ng negosyong tomato-based products. Kabilang na rito ang paggawa ng ketchup, tomato puree, tomato paste, tomato sauce at candies.

Hindi na kailangang pumunta sa Maynila dahil sa kanilang regional offices na maaaring magsagawa ng research and development sa kanilang mga produkto.

Sa ilalim naman ng Community Empowerment sa pamamagitan ng Science and Technology program, bawat komunidad, eh, maaaring bigyan ng gamit para mapalago ang produktong gaya ng kamatis.

Nilinaw nila na hindi ito utang kundi ibibigay ang mga equipment na kinakailangan ng mga komunidad para makapagproseso ng kanilang produkto.

Pakiusap natin sa mga LGUs, paki-asistehan o tulungan ang ating farmers at mga lokal na mga negosyante sa pakikipagkoordinasyon sa DOST sa bagay na ‘yan, plis lang.

Saka pakiusap din natin sa ating LGUs at mga pribadong sektor na tulungan ang farmers sa inyong lugar na maibenta ang kanilang mga produkto sa inyong komunidad.

Direkta nating bilhin sa mga kababayan nating farmers ang mga kamatis.

Tulong-tulong na tayo, ang hirap ng buhay ngayon, plis lang!

Itlog, next sa sibuyas na may mala-gintong presyo

ni Imee Marcos - @Imeesolusyon | January 20, 2023

Matapos ang gintong presyo ng sibuyas, ngayon naman itlog! Juskoday! Sampung piso na ang kada piraso ng itlog! Bakit?

Eh, nakapagtataka dahil tumaas ang farmgate price ng itlog? Nasa P6.70 hanggang P7.20 pa rin ito kada piraso. So, ano'ng meron, bakit sumirit ang presyo? Hmmm…

Ayon sa ating mga friendship sa Department of Agriculture, sinisilip na nila kung bakit mataas ang presyo ng itlog. Sinabi naman ng Egg Board Association, na asahang tataas pa ang presyo ng itlog. Katwiran ng asosasyon, hindi nila kontroladong egg producers ang dikta sa presyuhan nito sa merkado.

Paliwanag nila, eh kapag tumaas ang kada piraso ng itlog na pumalo na sa P10 sa Metro Manila at sa amin sa Laoag, eh P13 kada piraso, marami na ang mag-aatubili na bumili at bababa ang presyo nito dahil hindi nila puwedeng iimbak ng matagal ang itlog dahil agad nasisira o nabubulok.

Ibebenta nila ito ng palugi sa mga trader at ang mga trader, hindi raw nila masisisi na gusto rin kumita, pero' yun nga lang ay may iba sa mga ito na talaga namang switik sa patong sa presyo… na siyang ugat ng pagtaas pa lalo ng pagmahal ng itlog.

Meaning, talagang nasa kamay ngayon ng mga trader ang manipulasyon sa presyuhan ng itlog!

Pero ang masaklap, mga frennie, sangkap ang itlog sa maraming pagkain at may domino effect ang pagsipa ng presyo niyan! Tataas ang presyo ng tinapay na gumagamit ng itlog, cake at iba pang pagkain.

Kaya naman, juskoLord, plis, plis, DA at DTI, pakiagapan ang sitwasyong ito bago pa lumala ang krisis sa itlog. Huwag ninyo gawing solusyon na naman ang importasyon, 'wag na wag! Boboldyakin ko na kayo kapag ginawa n'yo pa 'yan, nakalusot na naman kayo sa sibuyas ng importasyon, huwag na ang itlog, plis lang!

IMEEsolusyon bago pa matulad sa sibuyas na pang-mayaman na ang presyo, DA, pakisiguro ang supply niyan sa merkado maayos.

IMEEsolusyon sa mga poultry farmers na dumirekta na kaya kayo sa mga konsyumer o magbukas na kayo ng Kadiwa store para sa inyong produktong itlog, isama n'yo na rin ang mga manok! Para meron ding alternatibong pupuntahan ang mga konsyumer, bawasan ang pagbenta sa traders.

IMEEsolusyon naman sa panig ng DTI, na bantayan ang mga nag-o-overprice ng itlog, plis lang, trabahuhin n'yo na may kaukulang parusa o papanagutin naman ang mga abusadong negosyante!

IMEEsolusyon naman sa mga netizen na if keri ng lugar ninyo, eh mag-alaga na rin kayo ng manok sa inyong backyard, 'yung mga native na manok, paitlugin n'yo at paramihin n'yo para hindi na kayo bibili. Diskartehan n'yo na para iwas-gastos, di bah? Maging maparaan na tayo para maka-survive sa egg-flation na ito! Agree?