Magtipid sa tubig, ang mga panghugas, i-recycle na!

ni Imee Marcos @Imeesolusyon | April 5, 2023

May krisis tayo ngayon sa tubig. Sabi ng PAGASA, inaasahan pa ang El Niño at siguradong malaking perwisyo ang tagtuyot na ito. Magiging epekto rin ng sobrang init ng panahon ang mga pag-ulan, juskoday!

Take note sa mga kustomer ng Maynilad sa National Capital Region (NCR) at Cavite ha, 19 hours ang water interruption kaya mayroon na ring mga pagrarasyon ng tubig na mangyayari.

Sa gitna niyan, IMEEsolusyon natin ang pagtitipid ng tubig. Huwag mag-aksaya, lalo na kapag naglalaba, abah, eh ‘yung tubig na pinagbanlawan natin, ‘yan na rin ang gamitin na pandilig.

IMEEsolusyon din na i-recycle natin ang tubig na panghugas ng pinggan. Ilagay natin ang huling pambanlaw sa timba at puwedeng ito rin ang gamitin sa panlinis ng iba pang gamit sa bahay o kaya iimbak natin ito sa mga drum o anumang lagayan ng tubig.

Kapag naghuhugas tayo ng kahit ano’ng bagay, ‘wag nating hayaan na nakabukas ang gripo, gumamit tayo ng kahit anong container na paglalagyan natin ng tubig at patayin ang gripo.

IMEEsolusyon na ang huling banlaw natin ng tubig sa paglalaba at paghuhugas ng pinggan ay puwede rin nating gamitin na panlinis sa banyo at pambuhos sa mga walang flush na toilet.

IMEEsolusyon sa may gripong may leak ng tubig na agad na itong takpan ng sealant para tipid na sa tubig, iwas pa sa malaking water bill.

Ang maliit na bagay na pagtitipid at hindi natin pag-aaksaya ng tubig kapag marami ang gumawa, tiyak na makakatulong ng malaki sa ating bansa sa kinakaharap nating water shortage.

Agree?

Mga tips sa mga bakasyonista ngayong summer

ni Imee Marcos @Imeesolusyon | April 01, 2023

Summer na talaga dahil feel na feel na nating lahat ang init sa umaga pa lang hanggang gabi ay talagang maalinsangan.

At ngayong summer vacation, ang pinakaunang maluwag-luwag nang restriksyon ng pandemya kaya inaasahang 1.2 million na mga pasahero o biyahero ang daragsa sa NAIA para lumipad patungo sa kani-kanilang destinasyon na out of town o international vacay.

‘Yung iba naman na limited budget, eh, pihadong kani-kanya nang booking sa iba’t ibang pinakamalapit na resort dito sa Metro Manila o karatig-probinsya. Sa mga walang datung, eh nagkakasya na sa mga inflated swimming pool ang ating mga kababayan dahil talaga namang sobrang init ngayon!

Speaking of super init na panahon, well mga friendship, magpapaka-nanay na naman ang peg ko ngayon sa mga bakasyunista, IMEEsolusyon ng inyong lingkod sa mga magbabakasyon, palaging magbitbit ng tubig o mag-hydrate para hindi manghina at hindi tamaan ng heatstroke.

IMEEsolusyon din ang pagdadala at pagkain ng mga matutubig na prutas para mapanatiling hydrated tayo gaya ng pakwan na ating paborito, gayundin ng melon, hay kaysasarap!

IMEEsolusyon din na magdamit ng light ang kulay dahil hindi ito nag-aabsorb ng init at kailangan ding maluluwag ang suot para komportable sa mga biyahe at mga outing, magpayong o magsuot ng sumbrero.

IMEEsolusyon pa rin na magdala ng first aid kit na may gamot sa sipon, pananakit ng ulo, mga pagkahilo o pagsusuka para sureball na ready tayo, saanman tayo mapadpad na probinsya.

IMEEsolusyon din, eh, mag-ingat kayo sa mga summer diseases, magdala ng mga sunscreen para maprotektahan sa tindi ng sikat ng araw. ‘Yung mga may comorbidity na may hypertension, hikain hinay-hinay sa pagbibilad sa araw, magdala at uminom ng gamot pang-maintenance.

IMEEsolusyon din na ‘wag masyadong maging kampante, dahil COVID-19 is still around, ingat pa rin at magsuot ng facemask, lalo na ‘yung ating mga senior citizen na sakitin para sa inyong proteksyon.

Mga bagets, sanaying kumain ng gulay para ‘di maging bansot

ni Imee Marcos @Imeesolusyon | March 22, 2023

Kayo ba ay mahilig sa gulay? Masustansya ba ang mga kinakain n’yo?

Well, kung ako ang inyong tatanungin, mukhang no need to explain, he-he-he! Kaming mga certified Ilocano ay alam na, taga-probinsya at laki sa pagkain ng mga gulay!

Ako ay nababahala sa kaka-report lang na pag-aaral ng World Health Organization (WHO) na tatlo raw sa bawat apat na batang Pinoy na nasa edad 13 hanggang 15 o 74% ang hindi kumakain o kaunti lang kung kumain ng gulay kada araw.

Habang mahigit sa 1/3 o 38% ang umiinom ng carbonated drinks kada araw tulad ng softdrinks, mga juice, kape atbp.

Samantalang, sa hiwalay namang study ng United Nations Children's Fund na ang nasabing poor diet ng mga bata ay tripleng nagiging sanhi ng malnutrisyon, undernutrition, sanhi ng pagiging bansot at micronutrient deficiencies at overweight.

Eh, kung matatandaan n’yo rin sa pag-aaral ng Food and Nutrition Research Institute o FNRI noong 2021, lumilitaw na halos 30% ng mga Pinoy na edad 16 hanggang 19 ay mga lumaking bansot o maliit sa kanilang edad.

Habang 20% ng mga bata na 13 hanggang 15 years old at 19% ng mga batang Pinoy mula 10 hanggang 12 years old ay maliit o pandak.

Sinasabing karamihan sa mga bansot na bata ay mula sa mahihirap na pamilya.

Sa harap nito, IMEEsolusyon natin na simulan sa ating maliliit na anak ang pagpapakain ng gulay.

Gumawa tayo ng paraan o mga teknik para mapakain natin sila ng gulay. Maging halimbawa tayong mga magulang sa pagkain ng gulay, ‘wag natin sila i-spoil!

IMEEsolusyon din na puspusan ang gawing pang-eengganyo ng ating mga guro sa kanilang mga estudyante na masarap kumain ng gulay.

IMEEsolusyon din na gumawa ang media at socmed ng mga ads na hihikayat sa mga bata na kumain ng gulay.

Tanda n’yo ba ang commercial na sikat dati na, “Makulay ang buhay, makulay ang buhay ng may sinabawang gulay!” Ganyan! Gamitin na pati mga TikTok, Instagram, at reels sa Facebook para gumaya ang mga bata sa pagkain ng gulay.

IMEEsolusyon naman sa mga walang makain na gulay dahil mahirap lang sila at walang pambili na turuan sila ng mga LGUs ng backyard farming o pagtatanim sa bakuran o hydroponics para malibre sila sa mga gulay at makakain sila Agree? Gawin na ‘yan, now na!