‘Pinas, walang panama sa mga armas pandigma, ‘wag utak-giyera

ni Imee Marcos @Imeesolusyon | November 6, 2023

Magkakasunod na ang show of force ng ating friendship na China sa teritoryo natin sa West Philippine Sea.

‘Di pa rin tinatantanan ang pambu-bully sa ating mga Phil Coast Guard at Philippine Navy. Abah at nadagdag pa ‘yung isa nating airplane na binuntutan daw kamakailan?!

Nakita naman noong isang araw na mahigit isandaan o 135 to be exact ang nagkukumpulang mga Chinese militia vessels sa bisinidad ng Julian Felipe Reef sa West Phil Sea. Jusmio!

Iba na itetch ha, nakakabahala na. Friendship natin ang China, at naniniwala pa rin naman ako na mapag-uusapan pa rin ‘yan.

Marami na tayong mga kababayan lalo na ang ating mga kasundaluhan at hukbong katihan na gigil na ha at gustung-gusto nang pitikin ang mga Chinese vessels na ‘yan.

Pero ooopsss mga kababayan, walang magandang ibubunga sa ‘tin na maging marahas dahil sa bugso ng damdamin.

Kahit ganyan na ang sitwasyon mga kababayan, preno pa rin tayo.

IMEEsolusyon na idaan pa rin ‘yan sa mabuting usapan o talakayan.

Katunayan nga ako mismo, ang inyong senadorang Super Ate, isusugo ko ang aking sarili para kausapin ang ating counter-part sa China.

IMEEsolusyon na gamitin na lahat ng paraan, sa ganang akin, hinding-hindi tayo dapat maging utak-giyera. Ayaw ko n’yan at alam kong ayaw n’yo rin!

Saka aminin na natin wala tayong panama sa mga armas pandigma ‘di bah?!

Kahit naman ‘di tayo makikigiyera, its about time na buhusan talaga natin ng pondo ang mga armas natin pandigma para sa ating national security, Agree?!

ICC, wa’ pakels sa sistema ng hustisya sa ‘Pinas

ni Imee Marcos @Imeesolusyon | November 24, 2023

Heto na naman tayo, umiinit na naman ang isyu ng planong pakikialam ng mga dayuhan sa sistema ng hustisya sa ating bansa.

At ang masaklap, kinakampihan pa ng ilan sa ating mga mambabatas.

Eh, ‘di ba tablado na ‘yan sa nagdaang administrasyon, at inisnab na rin ng aking Ading na si P-BBM ng maraming beses?!

Abah, eh, ke kulit naman! Unli nang pagtatangka ‘yan ng International Criminal Court sa ‘tin ha!

Helllo, walang respeto sa ating justice system!

IMEEsolusyon para ‘di na tayo kulitin ng ICC, panawagan ko sa ating kapwa mga mambabatas na magkaisa tayo sa paninindigan na malayang bansa tayo at sagka sa ating soberanya ang panghihimasok ng mga dayuhang ICC.

And take note, ang kasarinlan ng hudikatura ay naroroon at totoo. Ang ating hukuman ay isang hukuman ng batas at katarungan, walang pakialam sa personalidad o anumang pulitikal na ingay.

Ang pagpapalabas ng piyansa ni dating Senador Leila De Lima ay patunay dito.

Ito ay nagpapalakas sa aking posisyon mula pa sa simula, na ang ICC ay walang hurisdiksyon sa sinumang Pilipino -- lalo na kay PRRD. Walang pakialam ang ICC sa ating sistemang pangkatarungan!

Sundin n’yo naman ang ating Pangulo na no to ICC intervention sa ating justice system.

Kahihiyan din natin na papayagan ang ICC, gayong may sarili tayong justice system!

Ano ba ‘yan, meron kasing nanggugulo eh... malayo pa ang eleksyon tila buwitre o vulture, abangers sa mga gusto nilang wakwakin para makamit ang ambisyon!

IMEEsolusyon sa mga kapwa ko mambabatas, i-prioritize naman natin ang mga basic

issues at needs ng ating mga kababayan.

Gaya ng mataas na presyo ng bilihin, kuryente, tubig at saka puwede ba parusahan at magpakulong na ng mga agri-smugglers?!

Kaya sa ganang akin, ‘wag magsayang ng oras sa isyu ng ICC.

IMEEsolusyon na unahin na natin ang problema ng kalderong walang laman, sikmurang kumakalam! Agree?

No to half rice, mag-isip ng malalim na solusyon!

ni Imee Marcos @Imeesolusyon | November 14, 2023

Inirekomenda ng Philippine Rice Institute na buhayin ang panukalang Half Rice Law para raw hindi masayang o matapon lang ang mga kanin lalo na sa mga restoran.

Tulad ng inaasahan, maganda man ang intensyon ng PhilRice, hindi naman ito katanggap-tanggap sa ating mga Pinoy! Remember, malakas tayong kumain ng kanin! Kaya sa ganang akin, no, a big, big no sa half rice!

Abah eh, ayoko kayang magutom ang ating mga kababayan, lalo na ‘yung kumakain sa mga karinderya, sa boodle fight at sa bahay ng bawat pamilyang Pinoy!

Agree ako sa mabuting intensyon nito. Pero ang paghahain ng half rice ay hindi sapat na tugon sa mas malalim na problema ng kahirapan at pagkagutom.

Maaari ring magdulot ng positibo at negatibong epekto sa mga maliliit na negosyo ang paghahain ng half rice.

Makakatipid sila kapag half rice na ang inihain. Pero ‘yung mga may pa-unli rice, nakupowz ‘yung tiyak mababawasan ang kanilang mga customer at maninibago.

Kailangan natin ng mas malawak at mas malalim na mga hakbang para tugunan ito.

IMEEsolusyon natin d’yan eh, tulungan natin ang ating mga magsasaka na pataasin ang produksyon ng bigas.

Pangunahing IMEEsolusyon na pagtulong eh, tutukan ang natatapong postharvest matapos ang ani, na halos 23% ang nasasayang sa mga kalyeng pinagpatuyuan ng palay.

Bigyan natin ng mga bodegang mapagtutuyuan ng mga palay ang ating mga magsasaka at hindi sa mga kalsada lang, ‘di bah!

Take note, para sa ating mga Pinoy, KANIN IS LIFE! Agree?!