Patuloy na pagpapalawak ng sports program at pagsuporta sa mga atletang Pilipino

ni Bong Go - @Bisyo Magserbisyo | August 11, 2022

Natutuwa tayo na muling pinagkatiwalaan ng mga kasamahan natin sa Senado na maging Chair ng Senate Committee on Sports para sa 19th Congress. Nagpapasalamat ako sa ating mga kapwa senador sa kanilang suporta at pananalig sa aking kakayahan na muling pamunuan ang nasabing komite.

Isa lang ang ibig sabihin nito — na maipagpapatuloy natin ang mga naging inisyatiba natin sa sports development ng ating bansa, gawing instrumento ang larangan ng palakasan sa pagsugpo sa ilegal na droga at kriminalidad, at para mailayo ang kabataang Pilipino sa kaaway ng masamang bisyo sa pamamagitan ng sports.

Kaya naman, tuwing nagsasagawa ang ating tanggapan ng pamamahagi ng ayuda sa mahihirap nating kababayan na ang kabuhayan ay apektado ng pandemya at iba pang krisis ay palagi rin tayong namimigay ng bolang pang-basketball at volleyball sa kabataang benepisyaryo para maengganyo silang mahasa ang kanilang kakayahan sa larong kanilang kinahihiligan.

Naniniwala tayong maraming kabataang Pilipino sa malalayong komunidad ang may pambihirang kakayahan sa iba’t ibang sports. Ito ang isa sa mga dahilan kaya ipaglalaban natin sa Senado ang pagpasa ng Philippine National Games (PNG) Act of 2022.

Kapag naisabatas, layunin nitong mas mapalawak pa ang ating grassroots sports programs at mabigyan ang ating mga atleta mula sa malalayong lugar ng pantay na oportunidad para makalahok sa international competitions at muling kilalanin ang ating bansa na isang “Sports Powerhouse in Asia.”

Natupad ang isa sa mga pangarap natin para sa ating bansa, ang magkaroon ng National Academy of Sports (NAS) na magsasanay sa ating kabataang may potensyal na maging world class athlete. Naitayo na ang NAS noong Hunyo 14, 2022 sa New Clark City, Capas, Tarlac. Kumpleto ito sa mga makabagong pasilidad, silid-aralan at tirahan ng ating mga scholar at nakabatay sa international standards. Bukod sa paghasa sa ating kabataan sa larangan ng sports, pagkakalooban din sila ng de-kalidad na edukasyon para maging produktibong miyembro ng ating lipunan.

Naisakatuparan ang proyektong ito sa pamamagitan ng Republic Act No. 11470 na naisabatas noong 2020, na tayo ang may-akda at isa sa naging sponsor sa Senado.

Hindi naman tayo tumitigil sa pagsuporta sa ating mga atletang lumalahok sa international competitions. Noong Agosto 1 ay isinumite natin ang Senate Resolution No. 83 na nag-aatas sa Committee on Sports para magsagawa ng pagdinig kung paano matutulungan ang Gilas Pilipinas basketball team.

Bagama’t nabigong makuha ang ika-14 na kampeonato sa ginanap na SEA Games sa Hanoi, Vietnam noong Mayo, itinuturing nating oportunidad ito upang magkaisa at araling mabuti kung paano tayo makatutulong para sa ikatatagumpay ng ating mga manlalaro sa basketball na sinusubaybayan ng maraming mga Pilipino.

Iniintindi natin ang pangangailangang tingnan at rebisahin ang mga kasalukuyang patakaran tungkol sa sports para mas maalalayan at mabigyan ng suporta ang ating national teams. Titiyakin natin na talagang suportado sila sa abot ng ating makakaya, protektado ang kanilang kapakanan at long-term ang programa para sa kanilang patuloy na pagtatagumpay.

Samantala, nitong Agosto 8 ay inisponsoran ko ang Senate Resolution No. 84 bilang pagkilala at pagbati kay Davemark “Dobermann” Apolinario, kapwa Mindanaoan, na matagumpay na nasungkit ang International Boxing Organization (IBO) World Flyweight Title laban kay Gideon Buthelezi ng South Africa noong Hulyo 30.

Ang kamangha-manghang panalo ni Dave ang nagbigay-daan para sa kanyang unang world title at nagpaganda sa kanyang malinis na record na 17 panalo—ang 12 rito ay puro knockouts at walang talo. Isa na siya ngayon sa itinuturing na pinakamahusay na boksingerong Pilipino at pambato natin sa international boxing competitions sa hinaharap.

Bilang Chairman of the Committee on Sports, ang mga ganitong karangalan ay tunay na nakakataba ng puso dahil sa kabila ng mga krisis na ating kinakaharap dulot ng pandemya, ang ating mga Pilipinong atleta ay namamayagpag sa mundo ng palakasan at nagbibigay ng malaking inspirasyon sa ating mga kababayan.

Asahan ninyo na ipagpapatuloy ng inyong Kuya Bong Go ang pagpapalaganap at pagpapaunlad ng mga programang pampalakasan, at laging kaisa ako ng bawat Pilipino at ng buong sambayanan sa pagsuporta at pagpupugay sa ating mga atleta.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Nasa paligid pa rin ang mga sakit, ingat!

ni Bong Go - @Bisyo Magserbisyo | August 6, 2022

Bilang Chair ng Senate Committee on Health ay matagal na tayong nananawagan sa ating pamahalaan at sa bawat Pilipino na mas palakasin at palawakin pa ang ating isinasagawang pagbabakuna laban sa COVID-19. Sabi nga natin noon, dapat maging creative maging ang mga LGUs at pribadong sektor para sila na mismo ang magdala ng bakuna sa kanilang mga nasasakupan, lalo na ang nasa malalayong komunidad. Magbahay-bahay dahil bukod sa mga senior citizen na nahihirapan nang lumabas, ang iba naman ay walang pamasahe papunta sa mga vaccination sites.

Kaya masaya tayo na inilunsad ng ating pamahalaan sa pangunguna ng DOH ang PinasLakas campaign na target makapagbakuna ng hanggang 23 milyong Pilipino sa unang 100-araw ng Administrasyong Marcos.

Nauna rito ay pinayagan na ring makatanggap ng second booster ang mga edad 50 pataas at maging ang mga 18-anyos hanggang 49-anyos na may comorbidities. Ang mga trabahador naman ay inaaasahang maaari nang makatanggap ng kanilang booster shot sa kanilang mga kumpanya dahil magkakaroon ng vaccination sites sa kanilang mga lugar ng paggawa.

Magandang hakbang ito ng ating pamahalaan dahil hindi talaga tayo dapat magkumpiyansa. Nitong Agosto 2 lang ay iniulat ng DOH na may na-detect na dalawang kaso ng Omicron subvariant BA 2.75 o “Centaurus” na mas mabilis makahawa kumpara sa iba pang sub variants. Bukod dito, nakapagtatala pa rin ng mahigit 2,000 hanggang mahigit 3,000 kaso kada araw ngayong linggo. Iniulat din na tumataas ang health care utilization rate (HCUR) sa NCR at ang intensive care unit (ICU) utilization sa Capiz dahil sa COVID-19.

Kaya bukod sa ating national government, muli tayong nananawagan sa mga LGUs, community leaders at sa pribadong sektor na mas palakasin pa ang ating pinagsama-samang pagsisikap sa paghikayat sa ating mga kababayan na agad nang magpabakuna para maging ligtas ang ating mga komunidad. Hanggang nand'yan pa ang COVID-19, huwag tayong magkumpiyansa dahil delikado pa. Ang bakuna ang susi para makabalik na tayo sa normal na pamumuhay. Samantalahin ang isinasagawang vaccine rollout at patuloy na sumunod sa ipinatutupad na health protocols. Alalahanin natin, may banta rin ngayon ng monkeypox at may naitala ng kaso sa ating bansa kaya mas higit tayong dapat mag-ingat at huwag hayaang bumagsak ang ating healthcare system.

Sa harap ng maraming pagsubok at banta sa ating kalusugan, magkakaroon ng hearing ang Senate Committee on Health na ating pinamumunuan sa susunod na mga linggo upang talakayin ang mga hakbang na dapat gawin at ipaalam sa taumbayan kung paano sila makakatulong sa ating iisang hangarin na proteksyunan ang buhay ng bawat Pilipino.

Samantala, kaisa tayo ng buong Senado sa paghahatid ng pakikiramay sa pamilya ni dating pangulong Fidel V. Ramos na pumanaw na noong Hulyo 31 dahil sa mga komplikasyon dulot ng COVID-19. Si FVR ay isang tunay na statesman at naging instrumento para sa global competitiveness ng ating bansa sa ilalim ng kanyang Philippines 2000 platform.

Noong Agosto 1 ay naging co-author tayo ng Senate Resolution na ipinasa bilang ating pasasalamat kay FVR at pagbibigay-pugay sa kanyang mga nagawa at naging kontribusyon sa pag-unlad ng ating bansa.

Tulad ng dati, tuluy-tuloy ang pagseserbisyo ng inyong Kuya Bong Go sa mga komunidad na apektado ng pandemya at iba pang krisis. Sumaklolo tayo sa mga kababayan nating nilindol at personal nating pinuntahan sa Abra at pinagkalooban ng tulong ang 1,592 pamilya sa Lagangilang at 100 pa sa Bangued. Pagkatapos ay dumiretso tayo sa Vigan City, Ilocos Sur kung saan nag-abot din tayo ng tulong sa 335 na residente.

Sinaklolohan din natin ang mga pamilyang nabiktima ng sunog, tulad ng 31 pamilya sa Barangay Subangdaku, Mandaue City; walo sa Compostela, Cebu; tatlo sa Barangay Gilutongan, Cordova, Cebu; 12 residente ng Brgy. Calamba, Cebu City; at 27 pamilya sa Tayuman, Maynila.

Naghatid tayo ng ayuda at pinagaan ang dalahin ng mahihirap nating kababayan kabilang ang 2,500 benepisaryo sa San Fernando City, Pampanga; 1,000 sa San Manuel at 1,000 rin sa Pura, Tarlac; 1,000 sa Maragondon, Cavite; at 306 pa sa Lupao, Nueva Ecija. Ang 1,500 kababayan natin mula sa iba’t ibang barangay sa Davao City ay nakatanggap din ng tulong mula sa ating opisina.

Samantala, ipinaalala natin sa ating mga kababayan na ngayong Agosto ay ipinagdiriwang natin ang Buwan ng Wikang Pambansa. Sama-sama at patuloy nating mahalin, ipagmalaki, tangkilikin at pagyamanin pa ang wikang Filipino at iba pang katutubong wika sa Pilipinas, at maipamana ito sa susunod pang henerasyon.

Hindi tayo nawawalan ng mga pagsubok na kinahaharap, pero asahan ninyo na palaging ang inyong kapakanan at kaligtasan ang prayoridad at pinakamahalaga para sa atin. Iisa lang ang ating hinihinging kapalit sa pagseserbisyo sa inyo — ang magkaisa tayo, magtulungan, magbayanihan at sumunod sa mga patakaran ng pamahalaan para sama-sama at sabay-sabay nating makakamit ang mas komportableng buhay para sa lahat.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Paghandaan ang kalamidad, unahin ang kaligtasan

ni Bong Go - @Bisyo Magserbisyo | August 3, 2022

Nitong nakaraang Linggo, Hulyo 31, 2022 ay bumisita ako, kasama si Senator Robin Padilla, sa Abra at Ilocos Sur para tingnan ang naging pinsala ng nagdaang lindol, malaman ang sitwasyon ng ating mga kababayan doon, makapaghatid ng tulong, pagaanin ang kanilang pinapasang hirap at mag-iwan ng ngiti sa oras ng kanilang pagdadalamhati.

Personal nating pinuntahan sa Abra at pinagkalooban ng tulong ang 1,592 pamilya sa Lagangilang; at 100 pa sa Bangued. Pagkatapos ay dumiretso tayo sa Vigan City, Ilocos Sur kung saan nag-abot din tayo ng tulong sa 335 na residente.

Maasahan ng ating mga kababayang naapektuhan ng lindol na patuloy ang ating gagawing pagsuporta sa kanila sa abot ng ating makakaya, kasama ang kapwa nating mga mambabatas at ang buong gobyerno, hanggang muli silang makabangon mula sa krisis na ito.

Dahil sa naganap na malakas na lindol ay napag-uusapan na naman ang importansya ng pagkakaroon ng Department of Disaster Resilience. Nai-file natin na ito sa nakaraang 18th Congress at muli nating isinumite sa 19th Congress. Hindi natin ititigil na isulong ang pagtatatag ng DDR dahil ang kailangan talaga sa pagtugon sa mga kalamidad, sakuna at iba pang emergency ay permanenteng opisina na nakatutok sa kanyang mandato at hindi coordinating body lamang.

Para sa atin, sana ay may Cabinet Secretary na nakatalaga sa mga ganitong klase ng problema at may command sa kanyang opisina. Siya ang magtitimon at magsisiguro ng sapat na kahandaan, kasama na ang prepositioning ng mga emergency goods at rescue personnel, bago pa man dumating ang mga sakuna. Pagkatapos dapat mabilis ding masisimulan ang restorasyon at rehabilitasyon ng mga nasirang imprastruktura at agad ding makababalik sa normal na pamumuhay ang mga kababayan nating naapektuhan.

Inihain natin ang Mandatory Evacuation Center bill na naglalayong magtayo ng evacuation centers sa bawat munisipyo, lungsod at probinsya sa buong bansa. Bukod sa maayos at ligtas na pasilidad na may tulugan at palikuran, ang mga itatayong evacuation center ay kumpleto rin sa pangunahing pangangailangan ng mga evacuees, tulad ng maayos na pagkain, tubig na inumin at mga gamot.

Mahalagang maisabatas ito. Nakita naman natin ang pinsalang nilikha ng lindol sa mga gusali at tahanan ng ating mga apektadong komunidad. Apektado hindi lang ang kanilang kaligtasan kundi maging ang kanilang kabuhayan.

Isusulong din natin ang pag-amyenda sa National Building Code natin. Napakatagal na nito at hindi na tugma sa panahon natin ngayon. Kailangan ay gawing moderno na at may bagong standard na ayon sa makabagong panahon.

Dahil sa ating pag-iikot sa Abra at Ilocos Sur ay nakita natin ang naging pinsala sa mga ancestral houses at ibang heritage sites. Labis nating nanghinayang kaya nagsumite kami ni Sen. Padilla ng resolusyon sa Senado na nag-aatas sa ating pamahalaan na suportahan ang restorasyon ng mga ito upang ma-preserve ang ating kultura na parte na ng ating kasaysayan. Dagdag pa ang kanilang naiaambag sa turismo at kabuhayan ng kanilang komunidad, lalo na ngayon na unti-unti nang bumabangon ang ating ekonomiya mula sa pandemyang dulot ng COVID-19.

Nagsumite rin tayo ng resolusyon kasama ang ating mga kapwa Senador na magsagawa ng inquiry ang Senate Committee on Sports kung paano masusuportahan ang Gilas Pilipinas basketball program at para matiyak ang kanilang magandang performance sa international competitions.

Titingnan natin kung paano tayo makatutulong na palakasin pa lalo ang ating sports programs, lalo na sa basketball na hilig talaga ng mga Pilipino. Bilang mambabatas, nais nating pag-usapan kasama ang mga manlalalaro, organizers, coaches at sports officials kung paano makakatulong ang gobyerno sa ating iisang hangarin na magdala ng karangalan sa ating bansa sa larangan ng palakasan.

Bilang Chair ng Senate Committee on Health, katuwang si Sen. Padilla ay isinumite rin namin ang Senate Resolution 85 para magsagawa ng imbestigasyon at alamin ang kahandaan ng pamahalaan na makontina ang paglaganap ng monkeypox sa ating bansa at maiwasan ang pagbagsak ng ating healthcare system, lalo na ngayong dama pa natin ang epekto ng COVID-19 pandemic.

PINAKAIMPORTANTE sa atin na palaging ligtas ang buhay ng mga Pilipino. Marami na tayong nasaksihan sa ating paglilingkod sa bayan kung anu-ano talaga ang sitwasyon ng ating mga kababayan, lalo na sa panahon ng kanilang pangangailangan. Asahan ninyo na hindi tayo titigil at gagawin natin ang lahat ng ating makakaya para maisakatuparan ang mga hangaring ito at masolusyunan ang mga problema, lalo na ng mahihirap at walang ibang matatakbuhan kundi ang gobyerno.

Katuwang tayo ng administrasyon at suportado ang mga programa nila para matulungan ang ating mga kababayan na maging palaging handa at kayang umagapay sa takbo ng panahon anumang oras at sitwasyon. Magtulungan at makiisa tayo para walang maiiwan sa ating pagbangon bilang mas matatag na sambayanang Pilipino!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.