Aksyon sa Senado, tuloy ang serbisyo

ni Bong Go - @Bisyo Magserbisyo | August 19, 2022

Sumabak tayo ngayong linggo sa mga gawain sa Senado dahil sinimulan na ng iba’t ibang committee ang kani-kanilang organizational meeting and briefing. Mahalaga ito dahil nasusubaybayan natin ang mga ginagawang aksyon ng pamahalaan, natutukoy natin ang mga isyu na kailangan ng legislative action at nakakakuha tayo ng mga tamang impormasyon para makapaghanda at magkaroon ng karampatang aksyon sa Senado.

Bilang Chair ng Senate Committee on Health and Demography, sa ating komite ay tinalakay namin—kabilang ang mga health officials at iba pang stakeholders—ang public health situation, implementasyon ng Universal Health Care Law at kung paano tuluyang makokontina ang COVID-19, dengue at ang banta ng monkeypox at Langya virus, maging ang pagpapalakas pa sa ginagawang vaccine rollout ng pamahalaan at walang dapat masayang na bakuna.

Tiniyak din na ang magiging aksyon ng Health Committee ay naaayon sa mga prayoridad na panukalang batas ng kasalukuyang administrasyon gaya ng mga nabanggit ni Pangulong Ferdinand "Bongbong" Marcos, Jr. sa kanyang unang SONA. Tumutugma naman ang karamihan sa ating prayoridad na panukalang batas sa gustong mangyari ng Pangulo tulad ng paglikha sa Center for Disease Control and Prevention, ng Virology Science and Technology Institute of the Philippines at pagbuo ng Medical Reserve Corps.

Kabilang din sa ating ginagawang paghahanda ang patuloy na pagtatayo ng mga Super Health Centers sa buong bansa. Sinilip din natin kung maayos na naiimplementa ang Malasakit Centers Act na aking iniakda at inisponsor noong nakaraang 18th Congress.

Bilang Vice-Chair naman ng Senate Committee on Public Order and Dangerous Drugs, masaya tayo na ipagpapatuloy ng kasalukuyang administrasyon ang kampanya laban sa ilegal na droga. Isinumite na natin sa Senado ang Senate Bill No. 428, na kung maisasabatas ay magtatayo ng drug abuse treatment and rehabilitation center sa bawat probinsya na tutulong at gagabay sa mga nalulong sa droga para makaalis sa bisyo at makabalik sa normal na pamumuhay, sa kanilang pamilya at sa ating lipunan.

At dahil miyembro tayo ng Senate Committee on Public Information and Mass Media, na pinamumunuan ng ating kaibigan na si Sen. Robinhood Padilla, umapela tayo sa publiko na sama-samang labanan ang paglaganap ng fake news. Napakarami pong fake news ngayon, at tungkulin natin na pigilan ito para ang mga nakararating na balita at impormasyon sa mga tao ay totoo, makabuluhan at makatutulong sa kanila.

Samantala, noong Miyerkules, Agosto 17 ay sinegundahan natin ang privilege speech ng aking butihing kapwa senador, Raffy Tulfo, na siyang chair ng bagong Senate Committee on Migrant Workers. Ilang dekada ring ipinaglaban ng mga OFWs ang pagkakaroon ng sariling departamentong mangangalaga sa kanila. Kaya mabuti na naisabatas natin noong nakaraang 18th Congress ang pagtatayo ng Department of Migrant Workers na ating iniakda at naging co-sponsor.

Sa pagkakaroon ng bagong Senate committee on Migrant Workers, mas matututukan ang mga kababayan nating OFWs na itinuturing na ating modern-day heroes. Hangad nating maiiwasan na ang mga pang-aabuso sa kanila at mapait na karanasan, katulad ng mga tinulungan natin noon na sina Roderick Aguinaldo, Rose Policarpio, Malik Darimbang, mga masahistang inabuso sa Kuwait, at iba pang mga kababayan na tinugunan natin ang kanilang mga suliranin sa malalayong lugar.

Sa kabila ng ating pagiging abala sa tungkulin, tuluy-tuloy ang isinasagawang relief effort sa mga kababayan nating higit na nangangailangan.

Tulad ng dati ay maagap nating inabutan ng tulong ang mga naging biktima ng sunog. Sinaklolohan natin ang humigit-kumulang 200 pamilya sa Bacoor City, Cavite na aking personal na pinuntahan noong Linggo; 46 na residenteng nasunugan sa Buenavista, Quezon; gayundin ang 43 pamilya sa Brgy. Duljo-Fatima, pito sa Bgy. Barrio Luz, at isa sa Bgy. Capitol Site sa Cebu City; siyam sa Bgy. Zamora, at walo sa Brgy. Zamora-Melliza sa Iloilo City; dalawa pa sa Bgy. Pispis at Linab, Maasin, Iloilo; 11 sa Malaybalay, Bukidnon; at 23 naman sa Taguig City.

Maagap din tayong umalalay sa 104 benepisaryo na biktima naman ng diarrhea outbreak sa Bgy. Toril Proper, Davao City. Sumaklolo tayo sa 30 residente ng Talaingod, Davao del Norte na biktima ng landslide, habang 935 na biktima ng lindol ang naayudahan sa San Emilio at Santa Maria sa Ilocos Sur.

Hindi rin natin kinalimutan ang paghahatid ng ayuda sa mga kababayan nating nakararanas ng iba’t ibang krisis sa buhay. Napagaan natin ang dalahin ng 1,667 mahihirap na residente ng Angeles City, at 350 sa Mexico, Pampanga; 1,053 sa Taytay, Rizal; 1,000 sa Dasmariñas City, Cavite; at 1,604 sa Danao, Bohol. Sa Iloilo ay napasaya natin ang 600 benepisyaryo mula sa Dumangas, 302 sa Sara, 68 sa Pavia at 63 pa sa Leon.

Sinuportahan din natin ang kabuhayan ng 100 micro-entrepreneurs sa Alimodian, Iloilo, habang 1,600 na benepisyaryo naman ang nakatanggap ng tulong mula sa San Andres, Gumaca at Calauag sa probinsya ng Quezon.

Tuluy-tuloy ang serbisyo ng inyong Kuya Bong Go para sama-sama at walang maiiwang Pilipino sa pagkakamit natin ng mas komportableng buhay.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Med student, kahit wala pang lisensya, puwedeng tumulong sa health emergency ng bansa

ni Bong Go - @Bisyo Magserbisyo | August 17, 2022

Noong Lunes, Agosto 15, 2022, pinangunahan natin ang organizational meeting at briefing ng Committee on Health and Demography bilang Chairman ng nasabing committee sa ating 19th Congress ngayon. Dinaluhan ito ng ating mga health officials at iba pang stakeholders.

Noong unang dumating ang pandemya sa ating bansa, nahirapan ang healthcare system na ilang dekadang napabayaan. Wala tayong masyadong alam noon sa bagong kalabang hindi naman nakikita—ang COVID-19.

Pero imbes hayaan lang na tuluyang bumagsak ang healthcare system at mamatay ang marami nating kababayan na hindi man lang natingnan ng mga doktor, naghanap tayo ng mga solusyon. Dahil sa bawat minutong lumilipas noon, buhay ng mga Pilipino ang nalalagay sa panganib, gumawa agad tayo ng mga agarang aksyon.

Kaya sa kasalukuyang 19th Congress, pinag-usapan nating muli ang pangkalahatang sitwasyon ng kalusugan sa bansa lalo pa at patuloy tayong nakikipaglaban sa pandemya at iba pang banta sa kalusugan, kasama na riyan ang monkeypox, dengue, langya virus at iba pa.

Tinalakay natin ang ginagawang pagsisikap ng pamahalaan upang tuluyang makontina ang COVID-19. Sa mga nakalipas na araw ay nakapagtatala pa rin ng mahigit 4,000 bagong kaso. Kailangan nating makatiyak na ginagawa ang mga nararapat na hakbang para maiwasan ang patuloy na paglaganap ng virus lalo pa at magbabalik na ang ating mga estudyante sa kanilang face-to-face classes.

Napag-usapan din ang napaulat na nasayang na mga bakuna, na binanggit ni Sen. Risa Hontiveros sa kanyang isinumiteng Senate Resolution 92. Naging matagumpay tayo sa pagkakaroon ng sapat na suplay ng bakuna, pero kailangang maging agresibo rin tayo sa pagbabakuna lalo na sa mga lugar na kakaunti ang bilang ng mga bakunado para matiyak na walang bakunang masasayang.

Nababahala rin tayo dahil naiulat sa ilang talaan na 15% lamang ng mga bakunado ang nagpapa-booster. Ang Pilipinas ang isa sa may pinakamababang booster rate sa buong Asya. Kailangan itong maisaayos dahil ang proteksyon ng bakuna ang tanging solusyon para makabalik tayo sa normal na pamumuhay.

Tinalakay rin ang banta ng monkeypox, na hindi ito dapat balewalain dahil may napaulat nang kaso sa ating bansa. Nauna rito, ako at ang aking kapwa mambabatas na si Sen. Robinhood Padilla ay nagsumite ng panukalang Senate Resolution 85, na nag-aatas sa Committee on Health and Demography na magsagawa ng inquiry sa ginagawang paghahanda ng ating bansa para makontina ang monkeypox, na idineklara ng World Health Organization na isang “public health emergency of international concern”.

Kabilang din sa dapat tugunan ang patuloy na pagtaas ng kaso ng dengue. Batay sa ulat ng DOH, nakapagtala na ang Pilipinas ng 92,343 kaso ng dengue mula Enero 1 hanggang Hulyo 23. Ang bilang na ito ay 118 porsyentong mas mataas kumpara sa mga naiulat na kaso sa katulad na panahon noong 2021.

Pinakaimportante sa atin ang kaligtasan at kalusugan ng bawat Pilipino, at bilang Chair ng Senate Committee on Health, tinitiyak ko na ang mga pagsisikap ng komite ay naaayon sa mga prayoridad na panukalang batas ng kasalukuyang administrasyon.

Sa katunayan, tumutugma ang karamihan sa ating 20 na prayoridad na panukalang batas na nakasumite sa Senado, tulad ng paglikha sa Philippine Center for Disease Control and Prevention at ng Virology Science and Technology Institute of the Philippines—sa mga binanggit naman ni Pangulong Ferdinand Marcos, Jr. sa kanyang unang SONA.

Isa rin sa nabanggit ni Pangulong Marcos sa kanyang SONA ay ang pagbuo ng Medical Reserve Corps. Suportado ko rin ito dahil noong 2020 ay isinumite natin ang Senate Bill No. 1451, o ang “Medical Reserve Corps Act of 2020,” na naglalayong ang mga nagtapos ng kursong may kinalaman sa medisina pero hindi pa lisensyado ay maaaring tumulong sa pamahalaan sa pagtugon sa health emergencies.

Samantala, ipagpapatuloy rin natin ang pagpapatayo ng Super Health Centers sa buong bansa, na kailangang-kailangan, lalo na sa malalayong komunidad. Ang Super Health Centers ay improved version ng rural health center na ang serbisyong ipagkakaloob at mga pasilidad ay kahalintulad ng modernong ospital sa urban areas.

Bahagi rin ng aking tungkulin bilang senador ang subaybayan ang patuloy na implementasyon ng Malasakit Centers Act at makapagpatayo ng marami pang Malasakit Centers sa buong bansa. Napakalaking tulong nito sa mahihirap na kababayan dahil madaling nalalapitan kapag kailangan nila ng tulong medikal at de-kalidad na serbisyong pangkalusugan.

Bago pa man nagkaroon ng pandemya ay naakda at naisponsoran natin ito at tuluyang naging batas. Sa ngayon ay mahigit tatlong milyong kababayan na natin ang napagkalooban ng tulong ng 151 Malasakit Center sa iba’t ibang parte ng ating bansa.

At dahil sinisikap ng pamahalaan na manatiling ligtas at protektado ang kalusugan ng ating mga kababayan, umaapela tayo na samantalahin ang isinasagawang vaccine rollout at patuloy na sumunod sa ipinatutupad na health protocols.

Mas malaki ang tsansa natin na tuluyang makontina ang pandemya kung mas maraming kababayan natin ang mababakunahan at mabibigyan ng booster shots. Huwag kayong magpatumpik-tumpik pa dahil ligtas ang bakuna at nakabatay ito sa agham. Ang bakuna ang susi para tuluyan na nating malampasan ang krisis.

Magtulungan tao sa pagresolba sa ating problema at krisis na kinahaharap, para tuluyan na tayong makabangon tungo sa sama-samang pag-unlad. Proteksyunan natin ang buhay ng bawat Pilipino!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Serbisyong pangkalusugan na kailangan sa bawat sulok ng bansa

ni Bong Go - @Bisyo Magserbisyo | August 13, 2022

Bilang lingkod-bayan, isinasabuhay natin ang panuntunan na dapat ang gobyerno at serbisyo ang lumalapit sa mga tao. Kaya naman, basta kaya ng oras, personal tayong nagtutungo sa mga komunidad para mamahagi ng ayuda.

Kapag personal nating napupuntahan ang mga lugar na pinagkakalooban ng tulong ay mas nakikita natin ang aktwal na sitwasyon. Nalalaman natin ang tunay na kalagayan ng ating mga kababayan.

Noong Agosto 11 ay bumiyahe tayo sa Maasin City, Southern Leyte para personal na magkaloob ng tulong sa 500 benepisaryo na mga TODA members. Nakisaya rin tayo sa kanilang cityhood anniversary celebration doon.

Samantala, kahapon, Agosto 12, sa Iloilo City naman tayo personal na namahagi ng ayuda sa mahigit 1,000 benepisaryo mula sa Guimbal at 500 sa San Joaquin.

Kamakailan ay binisita at nagbigayang-ayuda rin ang 1,000 residente ng Taytay, Rizal na ang kabuhayan ay apektado ng pandemya at iba pang krisis. Sinaksihan din natin ang pagkakaloob ng Original Certificates of Title sa 35 benepisaryo na miyembro ng Samahang Masigasig Tapayan Homeowners Association (SAMATHOA). Nakakatuwa na ngayon ay may sarili na silang pag-aaring lupa. Nawa’y magbigay-inspirasyon ito para pangalagaan ang kanilang lupa at maging daan para mas umangat pa ang kanilang buhay.

Tulad naman ng dati, maagap nating kinumusta ang mga biktima ng magkakahiwalay na insidente ng sunog tulad ng 39 na pamilya sa Baseco, Manila City; 16 sa Pasig City; anim sa Las Piñas City; lima sa Maasin, Iloilo; at 200 pamilya sa Barangay Matina Aplaya, Davao City.

Ang mga kababayan nating patuloy na nahihirapan dahil sa pandemya at ibang krisis ay pinadalhan din natin ng tulong, tulad ng 1,000 benepisaryo sa Olongapo City, Zambales; 1,000 sa Dasmariñas City, Cavite; 1,000 sa Magsaysay, at 800 sa Salay sa Misamis Oriental; 789 sa San Miguel, Bohol; at 776 sa Malolos City, Bulacan.

Sa Nueva Ecija ay naayudahan natin ang 70 benepisaryo sa Carranglan; 60 sa District 1, Cuyapo; at 20 sa Talavera. Nabigyan din natin ng tulong ang 59 na madre sa St. Mary’s, Silang, Cavite.

Samantala, kaugnay pa rin ng ating tungkulin bilang Chair ng Senate Committee on Health, ipagpapatuloy natin ang pagsusulong na makapagtayo ng mas maraming Super Health Centers. Ito ay para dalhin natin ang serbisyong pangkalusugan na kailangan ng ating mga kababayan sa bawat sulok ng ating bansa.

Masaya nating ibalita na sisimulan na ang pagtatayo ng San Joaquin Super Health Center sa Iloilo na ating dinalaw, kahapon. Nauna rito, sinimulan na rin ang pagtatayo ng mga Super Health Centers sa Libungan at Banisilan, North Cotabato. Tuluy-tuloy ito sa iba’t iba pang sulok ng ating bansa.

Layunin ng mga centers na mas ilapit pa sa ating mga kababayan ang mga serbisyong medikal ng gobyerno, lalo na sa mga nasa liblib na lugar at pinakanangangailangan ng mga ito.

Ang Super Health Center po ay “improved version” ng rural health unit. Kabilang sa mga serbisyong ipagkakaloob nito ang database management, outpatient, pagpapaanak, isolation, X-ray at ultrasound. May sarili itong botika at ambulatory surgical unit.

Kabilang din ang eye, ear, nose and throat (EENT) service; oncology center; physical therapy at maging rehabilitation center. Mayroon din itong telemedicine kung saan puwedeng tumawag ang pasyente para ipaalam ang kanyang nararamdaman at malapatan ng lunas kung hindi siya agad personal na makakapagpa-checkup.

Isinulong natin ang pondo para rito na nagkakahalaga ng PhP3.6 bilyon sa 2022 Health Facilities Enhancement Program para makapagpatayo ng 305 Super Health Centers.

Ngayon ang tamang panahon para mag-invest sa healthcare system, lalo pa at maraming nauusong mga bagong sakit. Kailangang palagi tayong handa dahil hindi natin alam kung ano pa ang mga susunod na pandemya o banta sa kalusugan ng mamamayan. Sa pamamagitan ng Super Health Centers, kumpiyansa tayo na maibibigay natin ang pinakamagandang serbisyong pangkalusugan at de-kalidad na mga pasilidad sa bawat Pilipino.

Tulad ng madalas nating sabihin, prayoridad natin pangalagaan ang buhay, kaligtasan at kalusugan ng bawat Pilipino.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.