Pagpapatayo ng mga bagong klasrum sa buong bansa, madaliin

ni Bong Go @Bisyo Magserbisyo | November 14, 2025

Noong November 11, bilang Chairperson ng Senate Committee on Youth, nagsalita tayo sa Senado upang maging co-sponsor ng Senate Bill No. 1482 o ang Classroom Building Acceleration Program Act. Binigyang-diin natin ang kahalagahan ng mabilisang pagtugon sa kakulangan ng mga silid-aralan sa bansa — isang problemang matagal nang nagpapahirap sa kalidad ng edukasyon ng ating mga kabataan.

Isa sa mga paulit-ulit nating naririnig sa mga guro, magulang, at estudyante sa bawat probinsyang napupuntahan natin ay: kulang pa rin ang mga classroom. Sa bawat pagbisita natin sa mga paaralan, ipinapakita ng mga principal ang mga lumang silid na halos ‘di na magamit — bitak-bitak ang dingding, tumutulo ang bubong, at siksikan ang mga bata. Kaya’t naniniwala tayo na panahon na para tutukan at pabilisin ang pagpapatayo ng mga bagong silid-aralan sa buong bansa.

Lagi kong sinasabi na hindi maihihiwalay ang pag-unlad ng kabataan sa kalidad ng edukasyon na kanilang natatanggap. Ang kabataan ang pag-asa ng ating bayan, at bukod sa kanilang kalusugan — na patuloy kong isinusulong sa aking health reforms crusade — dapat maging pangunahing prayoridad din ang edukasyon.

Ayon sa ulat ng Second Congressional Commission on Education (EDCOM 2), may kakulangan tayong mahigit 165,000 classrooms sa buong bansa noong 2023 pa lamang. Ang ganitong sitwasyon ay direktang nakaaapekto sa pagkatuto ng milyun-milyong kabataang Pilipino. Habang ang ibang sektor ay nakatatanggap ng bilyun-bilyong pondo, nananatiling limitado ang pondo para sa mga paaralan.

Nakakalungkot isipin na nasasayang ang pondo para sa mga flood control projects. Sana, inilaan na lamang ito sa sektor ng kalusugan o kaya rito sa sektor ng edukasyon para makapagpatayo tayo ng mga classrooms. Sa P1.2 trillion na budget para sa flood control mula 2022 hanggang 2025, aabot sa 300,000 to 600,000 classrooms sana ang naipatayo, or 60,000 evacuation centers -- batas na ito through Ligtas Pinoy Centers Act, or 80,000 health centers, or even 800 tertiary hospitals ang puwedeng maipatayo sa mga pondong ito.

Ang Classroom Building Acceleration Program Act ay tugon sa obligasyon ng Estado na magbigay ng dekalidad na edukasyon sa lahat ng Pilipino. Sa pamamagitan nito, hinihikayat natin ang pakikiisa ng iba’t ibang sektor — mula sa pambansang pamahalaan, mga lokal na pamahalaan, hanggang sa pribadong sektor — upang sabay-sabay nating mapunan ang kakulangan sa mga silid-aralan. Malaking tulong dito ang mga LGU dahil mas alam nila ang kakulangan ng mga klasrum sa kani-kanilang mga lugar.

Buong puso akong sumusuporta sa panukalang ito at nais maging isa sa mga co-authors nito. Naniniwala ako na ang bawat silid-aralan na maipapatayo ay isang puhunan sa kinabukasan ng ating bansa. Sa bawat batang matututo sa maayos na paaralan, may bagong pag-asang isinisilang para sa Pilipinas.

Samantala, noong November 8, bilang Chairman ng Senate Committee on Sports, inimbitahan naman tayong dumalo sa Mikey Belmonte Cup District 2 Opening Ceremony sa Quezon City.

Noong nakaraang linggo, tuloy pa rin ang pamamahagi ng tulong ng ating Malasakit Team sa mga biktima ng Bagyong Tino sa ilang siyudad at bayan sa probinsya ng Cebu tulad ng Consolacion, Liloan, Compostela, Talisay City, Cebu City, at Danao City; at sa La Castellana, Negros Occidental. Agad ring namahagi ng tulong ang ating Malasakit Team sa mga biktima ng Bagyong Uwan sa Caloocan City, at Hermosa, Bataan.

Bumisita rin ang Malasakit Team sa iba’t ibang kababayan nating nangangailangan sa Mati City, Davao Oriental; Tandag City, Surigao del Sur; at Iloilo City upang tumulong sa mga maliliit na negosyante.

Nabigyan naman ng tulong ang mga solo parent, senior citizens, at persons with disabilities sa Pinamungajan, Cebu at sa Tolosa, Leyte. Tinulungan din ng Malasakit Team ang ilang iskolar mula sa Tarlac State University.

Patuloy akong magseserbisyo sa inyo dahil bisyo ko ang magserbisyo at ako ay naniniwala na ang serbisyo sa tao ay serbisyo ‘yan sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Paghahanda at bayanihan ngayong panahon ng kalamidad

ni Bong Go @Bisyo Magserbisyo | November 7, 2025

Tuwing panahon ng bagyo, hindi lang ulan at hangin ang kalaban natin kundi ang kawalan ng kahandaan. Damang-dama natin ang pananalasa ng Bagyong Tino na nagdudulot ng matinding pag-ulan, malalakas na hangin, pagbaha at pagguho ng lupa sa ilang bahagi ng Luzon, Visayas, at Mindanao. Patuloy ang pag-update ng mga otoridad hinggil sa lakas, galaw, at pinsalang iiwan nito kaya’t dapat tayong manatiling alerto at handa sa lahat ng oras. Higit sa lahat, patuloy din tayong magdasal at manalangin sa Diyos upang bigyan tayo ng lakas ng loob at gabay sa gitna ng pagsubok.

Muli kong ipinapaalala sa ating mga kababayan: huwag balewalain ang mga babala ng Philippine Atmospheric, Geophysical and Astronomical Services Administration (PAGASA) at ng inyong lokal na pamahalaan. Sa panahon ng kalamidad, ang disiplina at pakikipagtulungan ang pinakamabisang proteksyon. Tulad ng madalas kong sabihin, mas mabuti nang mag-ingat kaysa magsisi.

Naniniwala ako na ang kalusugan at kaligtasan ay magkaugnay. Kapag nasisira ang mga bahay at imprastraktura, naapektuhan din ang mga pasilidad pangkalusugan at ang kakayahan ng mga pamilya na manatiling ligtas at malusog. Kaya’t sa aking patuloy na health reforms crusade, sinisiguro kong ang ating mga komunidad ay hindi lamang nakatutok sa pagbangon pagkatapos ng sakuna, kundi sa pagiging handa bago pa man ito tumama.

Bilang principal author at co-sponsor ng Republic Act No. 12076 o ang Ligtas Pinoy Centers Act, isinusulong ko ang tuluy-tuloy na pagpapatupad ng batas na ito upang matiyak ang pagtatayo ng mga permanente, disaster-resilient, at fully equipped evacuation centers sa buong bansa. Mahalaga ito upang may ligtas na mapupuntahan ang ating mga kababayan sa tuwing may kalamidad.

Ako po ay nakikiusap sa mga kasamahan ko sa gobyerno. Bigyang prayoridad ang evacuation centers dahil batas naman po ito kaysa nasasayang sa flood control na ginagawang gatasan ng iilan.

Kaya nga po nananawagan ako: imbes na gamitin sa flood control, gamitin na lang sa evacuation center. Ilang libo ang pwedeng ipatayo kaysa mapunta sa pagnanakaw ng iilang oportunista. Kaya gamitin ang pera ng tao sa tama. Tumbukin natin ang may sala talaga. 'Yung may kalokohan, 'yung mastermind. Kailangan na makulong ang mga buwaya at managot ang nararapat managot.

Bukod dito, muling kong inihain ang Senate Bill No. 173 o ang Department of Disaster Resilience Act, na layuning lumikha ng isang ahensyang tututok lamang sa disaster risk reduction, preparedness, response, at rehabilitation—isang hakbang para mapalakas ang koordinasyon at pagiging epektibo ng ating mga programa laban sa sakuna.

Habang binabantayan natin ang epekto ng Bagyong Tino, sama-sama tayong magdasal at isama po natin sa ating mga panalangin sa Diyos ang mabilis na pagbangon ng ating mga kababayan na nasalanta ng kalamidad. Walang bagyong mas malakas sa isang bansang nagkakaisa para sa kaligtasan at kapakanan ng bawat Pilipino.  Sa mga tinamaan na ng Bagyong Tino, lalo na sa Kabisayaan, umaapela tayo sa mga ahensya ng gobyerno na tulungang makabangon kaagad ang ating mga kababayan.

Noong October 30, personal kong dinalaw at tinulungan ang 1,233 na kababayan mula sa iba’t ibang sektor sa Lupon, Davao Oriental. Patuloy kong sisikapin na makapag-abot ng tulong at suporta sa ating mga nangangailangan na kababayan sa abot ng aking makakaya.

Noong nakaraang linggo naman, nagtungo ang Malasakit Team sa iba’t ibang bahagi ng bansa upang maghatid ng tulong at agad na tumulong sa mga nasunugan sa Jaro, Iloilo City; Cagayan de Oro City; at San Andres Bukid, Manila.

Nag-abot din ng tulong ang Malasakit Team sa mga micro-entrepreneur sa La Paz, Loreto, San Luis, at Bunawan sa Agusan del Sur; at Tandag City, Surigao del Sur.

Bukod dito, ilang mga iskolar din ang tumanggap ng mga regalo mula sa Malasakit Team katuwang ang Greenland Integrated Farm sa Basey, Samar.

Bilang inyong Mr. Malasakit, hangad ko ang kaligtasan ng lahat dahil naniniwala ako na ang kalusugan ay katumbas ng bawat buhay ng bawat Pilipino. Kaya naman po patuloy akong magseserbisyo sa abot ng aking makakaya dahil bisyo ko ang magserbisyo.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Kanser ng lipunan, panahon nang labanan

ni Bong Go @Bisyo Magserbisyo | October 31, 2025

Noong Oktubre 27, buong pasasalamat nating tinanggap ang Humanitarian Service Award mula sa Rotary Club of Bukluran Quezon City. Malaking karangalan ito para sa akin bilang isang lingkod-bayan, pero mas malaking karangalan ang makapagserbisyo at makatulong sa mga kababayan nating nangangailangan. Hindi ko kailanman hinangad ang anumang parangal, pero ang ganitong pagkilala ay nagsisilbing inspirasyon sa ating patuloy na paghahatid ng malasakit at tunay na serbisyo sa kapwa Pilipino.

Bilang isang mambabatas, matagal ko nang itinuturing na tungkulin ang maging kasama ng mga grupo at organisasyong tunay na naglilingkod. Malapit sa puso ko ang Rotary dahil kapareho namin ang paniniwala na ang serbisyo ay dapat ibigay nang walang hinihintay na kapalit. Tulad ng madalas kong banggitin sa kanila, ipinagpapatuloy ko ang laban para sa mas maayos na serbisyong medikal sa bansa, lalo na para sa mga pinakamahihirap na Pilipino.

Bahagi ng aking health reforms crusade ang pagtatatag ng mga Malasakit Centers — mga one-stop shops kung saan mas madali nang makakuha ng tulong medikal mula sa iba’t ibang ahensya ng gobyerno. Ngayon ay mayroon nang 167 Malasakit Centers sa buong bansa na nakatulong na sa milyun-milyong Pilipino na makapagpagamot nang hindi iniintindi ang dagdag gastos. Kasabay nito, itinutulak ko rin ang pagtatayo ng mga Super Health Centers upang matiyak na kahit sa mga malalayong lugar, may access sa primary care, konsultasyon, at maagang pagtukoy ng sakit. Ang palaging kong paalala sa DOH at LGUs, dapat ma-implement nang maayos ang mga Super Health Centers, huwag maging white elephant and make it operational. Maganda ang layunin ng Super Health Center, at malaki ang tulong nito lalo sa mga mahihirap na pasyente.

Hindi rin ako titigil sa pagsusulong ng mga espesyal na serbisyong medikal sa mga rehiyon sa pamamagitan ng Republic Act No. 11959, na ako ang principal sponsor at isa sa mga may-akda. Sa batas na ito, itinatayo ang Regional Specialty Centers sa mga DOH hospitals upang hindi na kailangang bumiyahe ng malayo ang mga pasyente para lamang sa espesyal na gamutan.

Habang nakikinig ako sa mga mensahe ng mga Rotarian, lalo kong naramdaman kung gaano kalakas ang diwa ng volunteerism at malasakit kapag nagsanib. Sabi ko nga, kahanga-hanga ang Rotary sa patuloy nitong pagsasabuhay ng “service above self” — isang motto na hindi lang salita kundi paninindigan ng tapat na paglilingkod sa kapwa. Kapag pinagsama ang serbisyo ng pamahalaan at ng mga organisasyong tulad ng Rotary, mas malawak ang naaabot na tulong at mas maraming buhay ang nababago.

Huwag din nating kalimutan na bahagi ng pagseserbisyo sa bayan ay ang paglaban sa mga kanser ng lipunan tulad ng korupsiyon. I am one with the Filipino people in this crusade! Papanagutin natin ang tunay na mga mastermind sa flood control at ghost projects scandal. Hindi tayo papayag na malihis ang issue at dapat maparusahan ang mga tunay na may kasalanan.

Samantala, noong October 22, personal tayong nagtungo sa Barangay 127 sa Pasay City upang maghatid ng tulong sa 100 biktima ng sunog. Doon ay binisita rin namin ang pamilya ni Jamzy Jamero, isang 10-taong-gulang na tanging nasawi sa nasabing sunog, upang ipaabot ang aming pakikiramay at magbigay ng dagdag na tulong sa panahong kanilang pinagdaraanan.

Noong October 23, inimbitahan din kami sa ika-55 Annual Convention ng Philippine Association of Schools of Medical Technology and Public Health (PASMETH) sa Caloocan City.

Habang noong October 27, personal din tayong nagtungo sa Malabon City upang tulungan ang 459 na mga biktima ng sunog sa lungsod. Naghatid tayo ng tulong upang kahit papaano ay maibsan ang hirap na kanilang pinagdadaanan sa gitna ng trahedya.

Nitong October 28, nagtungo rin tayo sa Brgy. Pulang Lupa Uno, Las Piñas City upang makiramay at mag-abot ng tulong sa mga pamilyang nasunugan. Kasama ng aking Malasakit Team, tinugunan namin ang agarang pangangailangan ng 69 na pamilyang naapektuhan ng insidente.

Samantala, noong nakaraang linggo, bumisita ang Malasakit Team sa iba’t ibang komunidad upang maghatid ng tulong sa mga biktima ng sunog sa Iloilo City, Cagayan de Oro City, Sta. Cruz sa Davao del Sur, Cebu City, at Quezon City.

Nagbigay rin kami ng tulong sa mga maliliit na negosyante at mahihirap na pamilya sa ilang bayan sa Agusan del Sur, Tarlac at Bulacan; at mga barangay workers sa Cebu City.

Patuloy akong maglilingkod sa abot ng aking makakaya dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.