Pagpapahalaga sa pamilya, kultura at tradisyon ng mga Pilipino

ni Bong Go @Bisyo Magserbisyo | Jan. 25, 2025

Isa sa ipinagmamalaki natin bilang mga Pilipino ay ang matibay na pundasyon ng ating lipunan dahil sa pagpapahalaga natin sa konsepto ng pamilya. Napakatibay ng pagkakabuklod ng pamilya sa ating bansa, at ito ang pinakamahalagang impluwensya sa paghubog ng ating pagkatao at paghahanda sa atin para humarap sa mundo.

Bilang chairman ng Senate Committee on Youth, hangad ko ang lahat ng ikabubuti ng mga kabataan. Laging isinusulong ng inyong Senator Kuya Bong Go ang mga programa na gagabay sa ating mga kabataan mula sa murang edad. Bilang isang mambabatas, palagi kong binibigyan ng halaga ang paniniwala, relihiyon at kultura ng bawat Pilipino. Ito ay dapat irespeto sa bawat polisiya na isusulong. Hindi ako sang-ayon sa anumang panukala na makakasira sa halaga ng pamilya at salungat sa pananampalataya ng ating mga kababayan. 

Pagdating sa paghubog ng kabataan, bigyan dapat ng importansya ang papel ng pamilya. Huwag idikta kung ano ang ituturo sa mga bata. Tayong mga magulang ang pangunahing haligi sa pagsigurong nasa tamang landas ang ating mga anak. Ang tungkuling ito na ginagampanan ng mga magulang ay siyang dapat proteksyunan ng gobyerno kasama na rin ang pagpapahalaga sa relihiyon, mga tradisyon at kultura na humuhubog sa ating pagka-Pilipino. 

Kaya sa pagsisimula ng 2025 ay kabi-kabila ang mga kapistahan sa iba’t ibang bahagi ng ating bansa na ating pinuntahan at binigyan ng halaga bilang parte na ng ating kultura at tradisyon. Sinusuportahan natin ang mga pagdiriwang na ito dahil bilang isang probinsyano na halong Bisaya at Batangueño, naniniwala ako sa kahalagahan ng mga ganitong okasyon.

Ang mga kapistahan ay nagpapakita ng pagkakaisa at pagbabayanihan ng komunidad. Sumasalamin ito sa pagpapahalaga sa bawat pamilyang Pilipino at sa patuloy na pagpapayabong sa ating mayamang kultura at tradisyon na dapat maipagpatuloy ng mga susunod pang henerasyon. 

Nakiisa tayo noong January 23 sa ginanap na Bambanti Festival na isang malaking pagdiriwang tampok ang mga sining, kultura, kagandahan at pagkakaisa ng mga taga-Isabela. Isang Ilocano term ang Bambanti na ang ibig sabihin ay “scarecrows” na inilalagay sa mga taniman ng mais at palay para itaboy ang mga ibon at hayop na namiminsala ng mga pananim. Sumisimbolo ito sa kasipagan ng mga magsasaka ng Isabela, at ng kanilang determinasyon para sa ikagaganda ng kalagayan sa buhay ng kanilang pamilya at ikauunlad ng kanilang komunidad. 

Bukod sa pakikisaya sa Bambanti Festival sa Ilagan City, kinumusta rin natin ang ilang miyembro ng local media roon at naghatid ng serbisyo sa mga komunidad. Personal naman nating sinaksihan ang inagurasyon ng Super Health Center sa bayan ng Echague kasama si Mayor Kiko Dy, National Liga ng mga Barangay President Jessica Dy, at iba pa na nakatuwang natin sa ating pagsisikap na mailapit ang serbisyong medikal sa kanilang lugar, na bahagi ng ating inisyatiba bilang tayo ang chairperson ng Senate Committee on Health. Bumisita rin tayo sa Cauayan City at sinaksihan ang groundbreaking ng itatayong Super Health Center doon. 

Sinaksihan din natin ang groundbreaking ng itatayong Echague Freedom Park at library na isa tayo sa naging instrumento para ito mapondohan. Sumama rin tayo sa groundbreaking ng itatayong Southern Isabela Medical Center Cancer Center sa Echague pa rin na ating isinulong. Kaakibat ang provincial government, pinangunahan natin ang pamamahagi ng tulong sa 1,000 mahihirap na residente sa lugar — na nabigyan din ng tulong pinansyal.

Noong January 22 naman, dumalo tayo sa ginanap na Provincial Board Members League of the Philippines Eastern Visayas First Quarter Assembly sa Pasay City sa paanyaya ni Regional Chairperson Adel Hernandez.  

Kahapon, January 24, naging guest speaker naman tayo sa Lyceum of the Philippines

University - Batangas Awards Convocation sa Batangas City sa paanyaya ni LPU President Dr. Peter Laurel. 

Ipinadala ko naman ang aking Malasakit Team sa iba’t ibang komunidad upang maghatid ng tulong sa ating mga kababayang nangangailangan. 

Binalikan natin at muling binigyan ng tulong ang mga nawalan ng tirahan sanhi ng mga sakuna at kalamidad. Sa South Cotabato, napagkalooban ng tulong ang tatlong residente ng Sto. Niño, dalawa sa Norala, isa sa Lake Sebu, at 10 sa Surallah. Sa Cotabato, merong 16 sa Arakan, dalawa sa Makilala, at 59 sa Pigcawayan na natulungan. May 42 naman sa Jose Abad Santos, Davao Occidental at dalawa sa Koronadal City. Nakatanggap din ang mga ito ng emergency housing allowance mula sa NHA sa ilalim ng programang ating isinulong para may pambili ang mga benepisyaryo ng materyales sa pagpapaayos ng kanilang tirahan. 

Natulungan natin ang 639 market vendors sa Catarman, Northern Samar katuwang sina Mayor Francisco Rosales Jr., at Catarman Market Manager Dr. Arlan Ong — na sa ating pakikipagkapit-bisig sa DOLE ay nabigyan din ng pansamantalang trabaho. 

Nagbigay tulong naman tayo sa mga mahihirap na residente sa Cebu kabilang ang 500 sa Oslob, at 500 din sa Argao katuwang si BM Stanley Caminero. 

Nagbigay din tayo ng dagdag na suporta sa 45 CHED scholars sa Cebu Technological University - San Francisco Campus sa Cebu; at 52 sa UP Mindanao sa Davao City. 

Bukod naman sa ating patuloy na palugaw para sa mga pasyente, kanilang bantay at hospital staff sa mga ospital na may Malasakit Center, nagkaroon din tayo ng katulad na feeding initiative para sa mga naging biktima ng insidente ng sunog sa Brgy. 459, Sampaloc, Maynila na ating huling binisita noong Lunes. 

Palagi kong sinasabi, minsan lang tayong dadaan sa mundong ito. Kung anong kabutihan o tulong na puwede nating gawin sa ating kapwa ay gawin na natin ngayon dahil hindi na tayo babalik sa mundong ito. Bilang inyong Mr. Malasakit, bisyo ko ang magserbisyo dahil naniniwala ako na ang serbisyo sa tao ay serbisyo sa Diyos!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pasasalamat para sa pagkakataong magserbisyo sa kapwa

ni Bong Go @Bisyo Magserbisyo | Jan. 22, 2025

Ang buhay at kalusugan ay mga biyaya na dapat nating ipagpasalamat palagi sa Panginoon. 

Isang masaya at makulay na okasyon para ipahayag natin ang papuri sa Diyos ay ang mga kapistahan na idinadaos sa iba’t ibang panig ng bansa na ako ay nabigyan ng oportunidad na makisama at makisaya nitong mga nakaraang araw. 

Tulad na lamang ng Sinulog Festival sa Cebu, bilang isa ring Bisaya, nakiisa tayo nitong January 19 sa mga kababayan nating Cebuano sa ipinagmamalaki nilang pagdiriwang na talaga namang dinarayo ng mga turista mula sa loob at labas ng bansa. Ang pagdiriwang na ito ay nagbibigay-pugay sa Sto. Niño bilang pagpapahalaga sa ating Diyos. 

Bukod sa kasiyahan ng Sinulog, personal din nating dinaluhan ang inagurasyon ng itinayong Super Health Center sa Moalboal, Cebu gayundin ang Malasakit Center na nasa Vicente Sotto Memorial Medical Center sa Cebu City. Nagpalugaw tayo roon at namahagi ng tulong sa mga healthcare worker. Lubos kong ipinagpapasalamat sa Panginoon ang pagkakataong makapagsilbi sa kapwa ko Pilipino. Viva Pit Señor Sto. Niño! 

Bago ito ay dumalo tayo sa selebrasyon ng Ati-Atihan Festival sa Kalibo, Aklan sa paanyaya nina Mayor Juris Sucro at Gov. Joen Miraflores. Nakiisa tayo sa ating mga kababayan sa street dancing bilang pasasalamat sa Poong Sto. Niño sa mga biyayang ibinibigay Niya. 

Bukod sa pakikisaya, inuna rin natin ang serbisyo. Binisita natin ang Malasakit Center na nasa Dr. Rafael Tumbokon Memorial Hospital kung saan namahagi tayo ng tulong sa mga pasyente at healthcare workers, at nagsagawa ng feeding initiative. Nag-inspeksyon din tayo ng itinayong Super Health Center sa Kalibo.

Nais kong iparating ang pagsaludo sa ating mga uniformed personnel para sa mapayapang mga pagdiriwang nitong mga nakaraang araw. Hindi biro ang magbantay sa isang okasyon na dinadaluhan ng milyun-milyong tao. Napakahalaga ng papel ng ating mga pulis at sundalo sa pagpapanatili ng kapayapaan at katahimikan sa ating bansa. Kaya naman noong Lunes, January 20, bilang Vice Chairperson ng Senate Committee on Public Order, sinuportahan natin ang isang resolusyon na nagbibigay-pugay sa ating uniformed personnel. 

Co-sponsor tayo ng Senate Resolution No. 1270, na kinikilala ang kabayanihan nina Police Senior Master Sergeant Ryan Mariano at Correction Officer 1 Melvin Cabanal Magnaye ng Bureau of Corrections, kasama si PCol. Kimberly Molitas, dahil sa kanilang pambihirang katapangan at dedikasyon sa pagprotekta sa ating mga kababayan. Ang ating kasamahang si Senator Ronald dela Rosa ang principal sponsor ng naturang resolusyon. 

Si Mariano ay nasugatan noong December 31, 2024 habang naka-duty sa isang simbahan sa Zamboanga City matapos makipaglaban sa mga armadong kalalakihan. Nasaksihan iyon ni Magnaye, na agad namang ipinosisyon ang kanyang sasakyan para maprotektahan ang mga tao sa paligid. Nagpapasalamat tayo sa kanilang serbisyo at sakripisyo sa ating mga kababayan. 

Sa ilalim ng administrasyon ni dating Pangulong Rodrigo Duterte, minabuti nating unahin ang kapakanan ng ating mga uniformed personnel at law enforcement officers at itinaas ang kanilang sahod sa tulong ng mga ahensya at mga nasa Kongreso noon.

Ang serbisyong ibinibigay nila sa bansa ay hindi matutumbasan. Kaya dapat lamang na suportahan sila sa lahat ng aspeto — mula sa kanilang sahod, pasilidad, at maging sa mga programa at batas na tumutulong sa kanilang propesyon. 

Ang inyong lingkod ang principal author at co-sponsor ng RA11589, o ang Bureau of Fire Protection Modernization Act of 2021. Co-author naman tayo ng Republic Act No. 11549, na nagbawas sa height requirements ng mga gustong maging pulis. Isinumite rin natin ang Senate Bill No. 422, na kung maisabatas ay naglalayon na magkaloob ng free legal assistance sa mga sundalo at pulis na may makakaharap na isyung legal sa kanilang opisyal na pagtupad sa tungkulin.

Sa lahat ng ito, iisa lang naman lagi ang hiling natin sa ating mga pulis at sundalo — gawin lagi ang tama, at unahin ang kapakanan ng mga Pilipino at interes ng bansang ating pinaglilingkuran. Simula’t sapul ay prayoridad ko na ang kapayapaan at kaayusan ng ating bansa — na pundasyon para sa ating pagsulong at pag-unlad. 

Patuloy naman ang inyong Senator Kuya Bong Go sa paghahatid ng serbisyo sa mga nangangailangang Pilipino. Inalam natin ang kalayagan at nagbigay tayo ng tulong noong January 18 sa 327 residenteng naging biktima ng insidente ng sunog sa Brgy. 458, habang 67 naman ang binigyan natin ng tulong sa Brgy. 459, Sampaloc, Manila. 

Ang 216 residente ng Bacoor City, Cavite na naging biktima ng sunog naman ang ating personal na binisita at pinagkalooban ng tulong noong January 20. 

Sinaksihan naman ng aking opisina ang groundbreaking ceremony ng Super Health Center sa Oroquieta City, Misamis Occidental. 

Ipinadala ko rin ang aking Malasakit Team para maghatid ng tulong sa ating mga kababayan. Naalalayan natin ang isang residente ng Lupon, Davao Oriental na nasunugan. Nabigyan ng dagdag na tulong ang 371 scholars ng Cebu Technological University - Danao City Campus, Cebu. 

Natulungan din ang 854 nawalan ng hanapbuhay sa Candijay, Guindulman, Mabini, Valencia, Garcia Hernandez, at Duero, mga bayan sa Bohol na nabigyan din ng pansamantalang trabaho. 

Tuluy-tuloy din ang ating palugaw sa mga ospital na may Malasakit Center para sa mga pasyente, kanilang bantay at hospital staff. 

Tandaan natin na minsan lang tayong dadaan sa mundong ito, kaya kung ano mang kabutihan ang puwede nating gawin sa ating kapwa, gawin na natin ngayon dahil hinding-hindi na tayo babalik sa mundong ito. 

Bilang inyong Mr. Malasakit, patuloy akong magseserbisyo sa inyo dahil bisyo ko ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Tiyakin ang abot-kaya at makatarungang serbisyong pangkalusugan para sa mga Pilipino!

ni Bong Go @Bisyo Magserbisyo | Jan. 18, 2025

Bilang Chairman ng Senate Committee on Health, prayoridad natin ang pagtiyak na maayos ang kalagayan ng ating mga kababayan lalo na ang kanilang kalusugan. Napakahalaga na abot-kaya at makatarungan ang serbisyong pangkalusugan para sa lahat lalo na sa mga mahihirap at higit na nangangailangan. Iyan ang pinakaimportante ngayon, dahil ang kalusugan ay katumbas ng buhay ng bawat Pilipino.

Sa isa pang pagdinig na isinagawa ng komite na ating pinamumunuan noong January 16 sa Senado, muli nating iginiit sa PhilHealth na maging transparent sila at ipagpatuloy ang mga reporma sa harap ng patuloy na pagtaas ng gastos sa pagpapagamot at ang mga hindi pa nila natutupad na pangako sa ating mga kababayan.

Health is a basic right. Hindi ito dapat maging pribilehiyo lamang ng iilan. Dapat nating siguraduhin na ang bawat Pilipino — lalung-lalo na ang mga mahihirap at walang kakayahang magbayad — ay may access sa serbisyong pangkalusugan.

Binigyang-diin natin na batay sa WTW Global Medical Trends Survey, nakaaalarma na posibleng tumaas sa 18.3 porsyento ang gastusing medikal sa Pilipinas tulad ng pagpapaospital, mga gamot, at iba pang serbisyo ngayong 2025. Ikalawa ito sa pinakamalaking itinaas sa Asia Pacific region. Ano bang ibig sabihin nito? Lalo pang mabubutas ang bulsa ng mga Pilipino!

Pinagpaliwanag natin ang PhilHealth kung bakit marami sa ating mga kababayan ang hindi nakakaalam ng tungkol sa kanilang mga benepisyo at kung bakit ang enrollment sa kanilang Konsulta program ay nananatiling mababa sa 10 porsyento.

Ipinaalala ko na bilang isang Pilipino, tayo’y miyembro ng PhilHealth ayon sa Universal Health Care Law. Lahat tayo ay entitled sa benepisyo mula sa ahensya. Nasa P500 billion o mahigit pa ang nakatiwangwang na pondo ng PhilHealth, o ang sinasabing reserve fund. Kaya ang tanong: Bakit hindi ito mapakinabangan ng mga Pilipino, lalo na ng mahihirap?

Sa Cavite, may lalaking namatay dahil umalis siya sa clinic nang hindi na nasuri. Sa Cebu, may buntis na sa kalye na nanganak at namatay dahil sa takot magpaospital. Ilan lamang iyan sa mga halimbawa ng mga nangyayari sa ating mga kababayan dahil takot sila sa babayaran sa ospital habang mayroon naman silang benepisyo dapat mula PhilHealth na hindi lang sa kanila naipaalam.

Kinikilala naman natin ang mga repormang ipinatupad ng PhilHealth gaya ng mas pinalawak na benefit packages, pagtataas ng case rates para sa critical diseases, at pag-aalis sa kanilang anti-poor policies partikular ang 24-hour confinement rule para sa outpatients at ang single-period confinement policy.

Sulit ang ating pangungulit dahil kahit papaano ay ginagawan na ng aksyon ng PhilHealth ang mga hinaing na naisiwalat sa sunud-sunod na Senate Health Committee hearings na ating pinamunuan. Ngunit hindi tayo rito titigil hangga’t hindi naisasakatuparan ang mga pangakong ito na kanilang binanggit under oath.

Sa hearing ay inalam din natin kung ano na ang update sa pagbabayad sa Health Emergency Allowances o HEA ng ating healthcare workers na nagpakabayani noong pandemya. Marami pa ring sumisigaw ng ‘HEA, HEA,’ kahit saan tayo magpunta. Dapat na mabayaran na sila dahil service rendered na iyan, pinagtrabahuhan at pinagsakripisyuhan na nila — na ang iba ay nagbuwis pa ng kanilang buhay.

Samantala, tuluy-tuloy ang ating paglalapit ng serbisyo sa mga kababayan. Kahapon, January 17, personal nating pinangunahan ang pamamahagi ng tulong para sa 48 residente ng Pasay City na nawalan ng tirahan. Nakatanggap din sila ng emergency housing allowance mula sa NHA na ating isinulong at sinusuportahan para may pambili ng materyales sa pagpapaayos ng bahay ang mga biktima ng sunog o sakuna.

Ipinadala ko naman ang aking Malasakit Team para maalalayan ang mga nangangailangan maging sa malalayong komunidad. Nahatiran natin ng tulong ang mga nawalan ng tirahan kabilang ang anim sa New Corella, 10 sa Talaingod, 15 sa Asuncion, 32 sa Mawab at 16 sa Mabini sa Davao de Oro; 13 sa Kalamansig, Sultan Kudarat; 39 sa Davao City; 14 sa Lupon at lima sa Manay, Davao Oriental. Sa ating suporta ay nabigyan din sila ng emergency housing allowance ng NHA.

Natulungan natin ang 47 na nawalan ng hanapbuhay sa Majayjay, Laguna katuwang si VM Juan Arganosa. Sa ating pakikipagkapit-bisig sa DOLE, nagkaroon din sila ng pansamantalang trabaho.

Nagkaloob din tayo ng dagdag na tulong sa mga CHED scholars kabilang ang 145 sa Antipolo City; at 233 sa Rizal Province. Dagdag na tulong din ang ibinigay natin sa mga TESDA scholars gaya ng mahigit isanlibo sa Legazpi City; at 900 sa Iriga City, Camarines Sur.

Nagsagawa naman ang aking opisina ng serye ng pamamahagi ng tulong para sa mga mahihirap na manggagawa sa Bohol at naabutan natin ang higit 2,000 residente mula sa Bien Unido, Talibon, Getafe, Sagbayan, San Miguel, Trinidad, Tubigon, Loon, Corella, Cortes, Baclayon, Dauis, Maribojoc, at Tagbilaran City.

Tuluy-tuloy din ang ating palugaw sa mga ospital na may Malasakit Center para sa mga pasyente, kanilang bantay at hospital staff.

Hindi ako titigil sa pagbibigay ng serbisyo sa mga kapwa ko Pilipino sa abot ng aking makakaya. Bisyo ko na ang magserbisyo, at naniniwala akong ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.