Mga programa para sa mga mahihirap, prayoridad natin sa 20th Congress

ni Bong Go @Bisyo Magserbisyo | July 3, 2025

Ngayong opisyal nang nagsimula ang 20th Congress, umasa kayo na patuloy na isusulong ng inyong Senator Kuya Bong Go ang ating nasimulan, upang mailapit ang serbisyo ng pamahalaan sa kapwa natin Pilipino lalo na sa mahihirap.

Nitong nakaraang 19th Congress, katuwang ang mga kapwa ko mambabatas, ay ipinaglaban natin ang mga batas at programa para maging abot-kaya ang serbisyong medikal sa ating mga kababayan. Bagama’t tagumpay nating naisulong ang ilang mahahalagang reporma sa PhilHealth at sa Universal Health Care (UHC) Law, malayo pa tayo sa full implementation nito. Hindi pa tapos ang ating trabaho para ibaba ang gastusin ng mga pasyenteng Pilipino.

Patuloy nating tututukan ang ipinapatupad na ngayong 50% increase sa PhilHealth benefit packages, gayundin ang expanded benefits para sa top 10 mortality rate cases gaya ng heart diseases, diabetes, respiratory illnesses, at hypertensive diseases. Dahil din sa ating walang tigil na pagbabantay, ipinatigil na ang luma, hindi makatarungan, at anti-poor na mga patakaran ng PhilHealth tulad ng Single Period of Confinement Policy, 24-hour confinement policy, at ang 45-day benefit limit. Lagi nating paalala, ang pondo ng PhilHealth ay pera ng taumbayan kaya’y dapat lang na ibalik sa kanila sa pamamagitan ng maayos na medical benefits at services.

Kasunod ng ating mga pagdinig sa Senado, ilan pang reporma ang ipinatupad ng PhilHealth at sinusuportahan natin: ang expanded o mas pinataas pang kidney transplant benefit package; ang dinagdagang suporta sa dialysis patients, kabilang na ngayon ang pagpapalaboratoryo at maintenance medicines; at ang pinalawak na benefit package para sa atake sa puso, na malaki rin ang itinaas.

Bilang inyong kinatawan sa Senado, magtatrabaho ako para maisulong ang marami pang health initiatives. Sa katunayan, sa unang araw ng 20th Congress ay 10 prayoridad na panukalang batas ang ating inihain.

Ipaglalaban natin na maisabatas ang mahahalagang panukala gaya ng pag-institutionalize ng PhilHealth ID Cards para maging panatag ang kalooban ng mahihirap nating kababayan na may maaasahan silang medical benefits; pagtatag ng mental health offices sa state universities and colleges; at modernisasyon ng legal framework na nangangasiwa sa propesyon ng ating Medical Technologists.

Sa sports sector, isusulong natin ang regionalization ng National Academy of Sports para sa mga atleta mula sa Visayas at Mindanao.

Isinumite rin natin ang Expanded Tertiary Education Subsidy Bill na kung maisasabatas ay mas maraming estudyante ang makaka-avail ng libreng higher education.

Pagsisikapan din nating maipasa ang mga panukala na layong itatag ang Department of Disaster Resilience para mapabilis ang paghahanda at aksyon sa oras ng kalamidad; pagtataas sa daily minimum wage ng manggagawa sa pribadong sektor nang P100 kada araw across the board; ang Indigent Jobseekers Assistance Bill para magkaloob ng libre o discounted fees para sa job requirements; pagsasabatas ng Magna Carta for Barangays para mapagkalooban ang barangay officials ng katulad na benepisyo at pribelihiyong natatanggap ng regular na kawani ng gobyerno; at ma-institutionalize ang rural employment assistance para magkaloob ng pansamantalang trabaho.

Kasama ang mga kapwa ko mambabatas sa 20th Congress, isusulong natin ang mga batas at programa na tunay na mapapakinabangan ng kapwa natin Pilipino.

Samantala, dumalo tayo noong June 24 sa National Fire Training Institute (NFTI) Fire Officer Basic Course (FOBC) 2025-36 Class “Pagsilak” Graduating Ceremony sa paanyaya ni F/SSupt. Christine Doctor Cula sa Calamba City, Laguna.

Sinaksihan natin noong June 26 ang inagurasyon ng Batangas Provincial Medical Complex sa Tuy, Batangas kasama si Gov. Dodo Mandanas. Nagtungo rin tayo sa Bacoor City, Cavite para sa inagurasyon ng itinayong Super Health Center kasama sina Congresswoman Lani Revilla, Mayor Strike Revilla at Vice Mayor Rowena Mendiola.

Nasa Davao City tayo noong June 27 at sinaksihan ang Public Safety Officers Advance Course (PSOAC) “Lex Aegis” Class of 2024-32 graduation na may 58 nagtapos.

Dumalo rin tayo sa inaugural ceremony ng mga bagong halal na lokal na opisyal kabilang si Vice Mayor-elect Sebastian Duterte at mga konsehal mula sa 1st, 2nd and 3rd districts ng lungsod. Sinaksihan din ito nina Vice President Inday Sara Duterte, Ms. Elizabeth Zimmerman Duterte, Congressman Omar Duterte at Councilor Rigo Duterte.

Personal tayong naghatid ng tulong noong June 28 sa 58 residenteng biktima ng insidente ng sunog sa Barangay Baclaran, Parañaque City katuwang si Barangay Captain Jun Zaide.

Bilang Chairperson din ng Senate Committee on Sports ay lumahok at nakiisa tayo sa ginanap na Still Got Game 50&Up event nitong June 29 sa Mandaluyong City.

Samantala, ipinadala ko ang aking Malasakit Team sa iba’t ibang bahagi ng ating bansa para maghatid ng tulong. Agad naalalayan ang 66 na biktima ng insidente ng sunog sa Cebu City, at 248 sa Talisay City sa probinsya ng Cebu; at 36 sa Sampaloc, Manila.

Nabigyan ng karagdagang tulong ang dalawang pamilyang naging biktima ng buhawi sa Surallah at Lake Sebu, South Cotabato; at 57 sa Kabacan at Makilala, North Cotabato.

Nakatanggap din ang mga ito ng tulong mula sa national government.

Sinaksihan ng aking tanggapan ang inagurasyon ng Super Health Center sa Calapan City, Oriental Mindoro kasama si Mayor Marilou Morillo; ang League of the Municipalities of the Philippines Bohol Chapter Term-End Assessment sa Parañaque City kasama si Mayor Ian Mendez; at ang Tulong Dunong Program distribution and orientation para sa 58 scholars ng STI College-Cainta Campus.

Muli, nagpapasalamat ang inyong Mr. Malasakit para sa pagkakataong ipagpatuloy ang ating pagseserbisyo. Bisyo ko ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Kabataan, lumayo sa droga para manatiling fit at healthy

ni Bong Go @Bisyo Magserbisyo | June 26, 2025

Bilang Chairman ng Senate Committee on Sports at isa ring atleta at sports enthusiast, suportado ng inyong Senator Kuya Bong Go ang mga batas, programa, at inisyatiba na magpapalakas sa sports sa ating mga komunidad. Napakahalaga na mahikayat ang ating kapwa Pilipino na magkaroon ng aktibong lifestyle at sumabak sa sports kung kaya pa ng ating katawan.

Bilang Chairman ng Senate Committees on Health at on Youth, naniniwala ako na konektado ang lahat ng ito. Kapag healthy at physically fit, mas hahaba ang ating buhay. Isa rin itong epektibong paraan para mailayo ang ating kabataan sa impluwensya ng ilegal na droga. Get into sports, stay away from drugs, to keep us healthy and fit!

Ang inyong Mr. Malasakit ay 51 years old na pero hindi ito sapat na dahilan para hindi maging active sa sports, lalo na’t nakakadagdag ang exercise ng enerhiya para makatugon tayo sa aking paglilingkod sa bayan. At tulad ng maraming Pilipino, basta may oras, sumasabak tayo sa iba’t ibang sport.

Nito mga nakaraang araw, habang sunud-sunod ang schedule natin sa paghahatid ng kaunting tulong sa mga kapwang nangangailangan, may oras pa rin tayo sa mga sporting events. 

Naimbitahan tayo noong June 21 para sa pagbubukas ng 50-Up Basketball League sa Cainta. Inisyatiba ito ng brodkaster na si Aljo Bendijo, na nilahukan ng mga manlalarong edad 50 pataas mula sa Pasig City, at mga bayan ng Cainta at Taytay sa Rizal. 

Noong June 22 naman ay nakiisa rin tayo sa Still Got Game (SGG) 50-Up Division na ginanap sa Mandaluyong City, kung saan nakasama natin ang mga kapwa alumni ng La

Salle Greenhills, at ilang local officials.

Kamakailan lang, guest of honor and speaker tayo sa 5th Founding Anniversary ng National Academy of Sports sa New Clark City. Labis ang aking tuwa sa pagdalo dahil pangarap ko lamang dati para kabataang Pilipino ang isang campus na nagkakaloob ng secondary education na may sports-focused curriculum. Dahil sa NAS, hindi masasakripisyo ang pag-aaral ng ating student-athletes habang tuloy ang kanilang training. Tayo ang may-akda at co-sponsor ng Republic Act 11470 na lumikha sa NAS. 

Ang pangarap ko naman ngayon ay magkaroon din ng NAS campus sa Visayas at Mindanao para sa mga mahihirap nating student-athletes doon. Sana balang araw ay makita ang ating NAS graduates na iwinawagayway ang ating bandila sa Olympics at iba pang global sports competitions at makapag-uwi ng karangalan sa ating bansa.

Samantala, hindi naman tayo tumitigil sa paghahatid ng serbisyo bukod sa ating mga gawain sa Senado. Pinangunahan natin noong June 16 ang ribbon-cutting ceremony ng itinayong Super Health Center sa Initao, Misamis Oriental katuwang si Mayor Grace Acain. Binisita at hinatidan natin ng tulong ang 348 residente ng Iligan City na nawalan ng tirahan sanhi ng Bagyong Kristine. 

Nakatanggap din ang mga ito ng karagdagang tulong mula sa national government sa ilalim ng programang ating isinulong at sinuportahan para may pambili sila ng materyales sa pagpapakumpuni ng kanilang tahanan. Nakiisa rin tayo sa pagdiriwang ng 75th Araw ng Iligan, sa paanyaya ni Mayor Frederick Siao.

Bilang Vice Chairperson ng Senate Committee on Finance at miyembro ng Senate Committee on Higher Education, sinuportahan natin ang proyekto ng University of the Philippines – Mindanao, ang kanilang bagong School of Management Building, at dumalo tayo sa inagurasyon nito sa Davao City kasama si Chancellor Professor Lyre Murao noong June 17.

Binisita natin noong June 18 ang 68 residenteng biktima ng sunog sa Mandaue City, Cebu. Naging panauhin din tayo sa ginanap na Philippine Councilors’ League - Region VII Term-End Assembly sa paanyaya ni Chairman Councilor Mark Aurelia.

Naghatid naman ang aking Malasakit Team ng tulong sa ating mga kababayan sa iba’t ibang lugar sa ating bansa. Agad tayong umalalay sa 96 residenteng naging biktima ng insidente ng sunog sa Iligan City, at 148 sa Cagayan de Oro City.

Nagbigay din tayo ng karagdagang tulong sa 93 residenteng biktima ng sunog sa Bacolod City, Negros Occidental. Nakatanggap din ang mga ito ng tulong mula sa national government sa ilalim ng programang ating isinulong at sinuportahan para maipaayos nilang muli ang kanilang tirahan.

Nagkaloob naman tayo ng tulong sa 203 scholars mula sa iba’t ibang kolehiyo at unibersidad sa Metro Manila. Sinaksihan ng aking tanggapan, kasama ang Call Center Academy, ang ginanap na Technical Vocational Graduation sa Cebu City, at nagbigay tayo ng regalo sa 125 graduates. Dumalo rin tayo sa J.H. Cerilles State College – Dumingag Campus 26th Commencement Exercises sa Zamboanga del Sur; at sa Caraga State University – Cabadbaran Campus 27th Commencement Exercises sa Agusan del Norte.

Sinaksihan naman ng aking tanggapan ang turnover ng itinayong tulay sa Brgy. Tambis, Barobo, Surigao del Sur, kasama si Mayor Joey Pama; at ang turnover ng Super Health Center sa Maasim, Sarangani kasama si Mayor Zyrex Pacquiao.

Bilang inyong Mr. Malasakit, patuloy kong isusulong ang mga programang magpapaunlad sa ating sports sector. Bisyo ko ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Serbisyo noon, serbisyo pa more sa mga Pilipino!

ni Bong Go @Bisyo Magserbisyo | June 19, 2025

Sa pagtatapos ng 19th Congress, lubos nating ipinagmamalaki ang maraming mga batas, programa, adbokasiya at inisyatibang ipinaglaban at naisakatuparan natin. Nagpapasalamat ako sa tiwalang ipinagkaloob ninyo sa isang probinsyanong tulad ko, gayundin sa tulong ng mga kapwa ko mambabatas at mga manggagawa sa gobyerno para patuloy na mailapit ang serbisyo sa ating mga kababayan — lalo na sa mga mahihirap, may karamdaman at higit na nangangailangan.  

Malaking karangalan para sa akin na maging Chairman ng Senate Committees on Health and Demography, on Youth, at on Sports. Dahil sa mga tungkuling ito, naipaglaban natin sa Senado ang mga mahahalagang batas na direktang nagbebenepisyo sa mga kapwa ko Pilipino.

Nitong 19th Congress, principal author tayo ng Republic Act No. 12076, o ang “Ligtas Pinoy Centers Act” na naglalayon na magtatag ng mandatory evacuation centers sa lahat ng lungsod at munisipalidad para mapangalagaan ang dignidad ng mga evacuees. Principal author din tayo ng RA 12177, o ang “Free Legal Assistance to Military and Uniformed Personnel” bilang bahagi ng ating patuloy na pagsisikap na mapahalagahan ang sakripisyo ng ating men and women in uniform. Ilan lamang ang mga ito sa mga batas na tayo ang pangunahing nagsulong.

Samantala, co-author naman tayo ng iba’t ibang batas, tulad ng RA 12077, o ang “Student Loan Payment Moratorium During Disasters Law” at ng RA 11996, o ang “Eddie Garcia Law.” Prayoridad natin lagi ang kapakanan ng ating mga kababayan sa lahat ng sektor. Sa ating krusada na mas mapatatag ang ating bansa, hangad natin na walang Pilipinong maiiwan.

Sa kasalukuyan ay nakapag-akda na tayo ng 19 na batas sa ating layuning mapagserbisyuhan ang mga Pilipino sa buong bansa. Principal sponsor din tayo ng 94 na mga batas — ang 92 sa mga ito ay para sa pagpapatayo at upgrading ng mga pampublikong ospital sa buong Pilipinas. Dalangin natin na ang mga proyektong ito ay makasasagip ng buhay at kalusugan ng mga kababayan natin lalo na ang mga naninirahan sa malalayong lugar at bihirang maabot ng serbisyo ng gobyerno.

Tinutukan din natin na matugunan ang mga problema sa kalusugan, edukasyon, disaster preparedness, at kaligtasan ng publiko sa pamamagitan ng 190 iba pang mga batas na co-author o co-sponsor ng inyong lingkod.

Sa mga isinagawa nating pagdinig sa Senado, patuloy din nating kinakamusta ang implementasyon ng mga batas at inisyatibang isinulong tulad ng Malasakit Centers Act, ang Super Health Centers program, at ang Regional Specialty Center Act. Walang humpay nating isinusulong ang pagpapalakas ng ating healthcare system. Katunayan, naungkat at naipatigil natin ang mga luma na at anti-poor policies ng Philippine Health Insurance Corporation. Hindi rin tayo tumitigil para ipaglaban na matanggap na ng ating healthcare workers na nagsakripisyo noong pandemya ang hindi pa nababayarang Health Emergency Allowance.

Sa ilalim din ng 19th Congress, lumikha ng kasaysayan ang mga atletang Pilipino sa international competitions, tulad ng 2024 Paris Olympics. Bilang Chairperson ng Senate Committee on Sports, nagbunga ang ating pagsisikap na maipaglaban ang dagdag na pondo para sa mga atleta. Ipagpapatuloy natin ang pagsuporta sa kanilang paghahanda at pagsasanay lalo na ng mga atleta sa grassroots level.

Hindi pa tapos ang ating mga gawain bilang senador. Sa ating patuloy na pagseserbisyo, noong June 9 ay dumalo tayo sa pagdinig ng Commission on Appointments para sa ad interim appointments ng mga opisyal ng Armed Forces of the Philippines. Nakilahok tayo sa sesyon ng Senado kung saan inihayag natin na dapat ay sumunod sa mga prosesong legal ang impeachment laban kay Vice President Sara Duterte.

Muli tayong nakiisa sa CA noong June 11 para sa kumpirmasyon ng ad interim appointments ng mga opisyal ng AFP at ng Department of Human Settlements and Urban Development, at ad interim appointments and nominations ng mga opisyal mula sa Department of Foreign Affairs. Nagsagawa rin tayo ng ating huling regular session sa 19th Congress.

Ipinagdiwang natin ang ika-127 Araw ng Kalayaan, at bilang advance birthday celebration na rin natin sa aking ika-51 kaarawan, ay naglaan tayo ng oras sa mga batang pasyente ng Philippine Children’s Medical Center sa Quezon City noong June 11.

Naimbitahan naman tayo noong June 13 sa 2nd El Presidente Cup, Ramon Fernandez Charity Golf Tournament Ceremonial Tee-Off sa Cavite bilang tayo ang Chairperson ng Senate Committee on Sports.

Sa mismong kaarawan ko noong June 14, nagtanghalian tayo kasama ang mga mangingisda ng Davao del Norte. Matapos ito ay binisita natin at inalam ang kalagayan ng 36 residenteng naging biktima ng insidente ng sunog sa Barangay Lapu-Lapu, Agdao District, Davao City. Tulad ng aking mentor na si dating Pangulong Rodrigo Duterte, hindi ako nagpa-party sa aking birthday. Naging tradisyon ko na ang ipagdiwang ito sa pamamagitan ng pagseserbisyo sa mga kapwa ko Pilipino.  

Personal nating sinaksihan noong June 16 ang ribbon cutting ceremony ng itinayong Super Health Center sa Initao, Misamis Oriental kasama si Mayor Grace Acain. Pinangunahan natin ang pamamahagi ng tulong para sa 348 na biktima ng Typhoon Kristine sa Iligan City. Nakiisa rin tayo sa pagdiriwang ng ika-75 Araw ng Iligan sa paanyaya ni Mayor Frederick Siao.

Naghatid naman ng tulong ang aking Malasakit Team sa 16 na naging biktima ng insidente ng sunog sa Barangay Buting, Pasig City; 141 sa Bacoor City, Cavite; 75 sa Las Piñas City, at lima sa Barangay 76-A sa Davao City.

Namahagi rin tayo ng karagdagang tulong sa 12 pamilyang nawalan ng tahanan sa Padre Burgos, Southern Leyte katuwang si Mayor Freitche Poblete. Nakatanggap din ang mga benepisyaryo ng tulong pinansyal mula sa national government sa ilalim ng programang ating isinulong at sinuportahan para may pambili sila ng mga materyales sa pagpapaayos ng kanilang nasirang tirahan.

Nakilahok tayo sa Batong Bulilit Art and Talent Contest sa National Kidney and Transplant Institute sa imbitasyon ni Division of Pediatric Nephrology Chair Dr. Lorna Simangan. Kinatawan tayo ni Congresswoman Girlie Veloso. Namahagi ang aking Malasakit Team ng food packs doon.

Nagbigay din tayo ng karagdagang tulong sa 203 estudyante mula sa iba’t ibang paaralan at unibersidad sa Metro Manila.

Bilang inyong Mr. Malasakit, ipagpapatuloy ko ang aking pagseserbisyo dahil ‘yan naman ang mandato ninyo sa akin. Ang birthday wish ko ay ang makatulong sa mas maraming Pilipino at makapagpasa ng mas maraming batas na magbebenepisyo ang ating mga kapwa. Bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.