VP Sara, may pakinabang sa DepEd

ni Ka Ambo - @Bistado | June 4, 2022

ANO raw ang magiging papel ni VP elect Inday Sara sa DepEd?

Maraming inobasyon ang puwede niyang ipatupad taliwas kung academician ang ilalagay sa puwesto.

◘◘◘

DAPAT tutukan at mas bigyang-prayoridad sa DepEd ang Alternative Learning System (ALS).

Inobasyon sa modernong panahon ang ALS na nakatutulong sa ordinaryong Pinoy.

◘◘◘

PANAHON na para lumayo at umiwas sa makalumang traditional educational system na idinikta ng western at mga dayuhan.

Kailangan ang mas epektibo at modernong sistema ng edukasyon gamit ang teknolohiya.

◘◘◘

TANGING si VP Sara lamang ang puwede magpasimuno ng modernong sistema ng edukasyon.

Sariwang-sariwa pa ang kanyang kaisipan na nakauunawa at nakararamdam ng kasalukuyang henerasyon.

◘◘◘

ISA ring malaking isyu ang agrikultura.

Karaniwang ginagamit lang ang mga magsasaka para magkamal ng salapi ang mga opisyal ng gobyerno.

Ang multi-billion subsidy at ayuda sa magsasaka ay dinarambong lang gamit ang sistematikong iskema ng korupsiyon sa gobyerno na kakutsaba ang mga pribadong grupo.

◘◘◘

HANGGANG ngayon, naiiwan ang agrikultura dahil walang inobasyong ipinatutupad maliban sa diskarte sa talamak na korupsiyon.

Inutil at palamunin pa rin ng gobyerno ang santambak na agri-technician na kakutsaba ng nasa itaas sa paggamit sa magsasaka sa pangungurakot ng pondo sa agrikultura.

◘◘◘

ANG talamak na korupsiyon sa DPWH ay nanatili.

Ang subasta ay iniluluto na matagal nang umiiral na tila mafia sa pamahalaan.

Kunwari lang ang subasta.

Alam ‘yan ng Palasyo pero hindi sinusugpo ang mga kawatan sa pamahalaan.

◘◘◘

KUNG paano masusugpo ang kaliwa’t kanang korupsiyon sa pamahalaan ay malaking hamon kay P-BBM.

Magawa kaya niya ang imposibe?

O, walang imposible sa presidente?

‘Wag sana mahaluan ng bulok ang bagong gabinete

ni Ka Ambo - @Bistado | June 3, 2022

MARAMI ang bumibilib sa mga naunang pangalan na nais italaga ni President-elect Ferdinand

“Bongbong” Marcos, Jr.

Sana raw ay hindi mahaluan ng bulok ang gabinete sa mga puwesto na hindi pa nalalagyan ng kalihim.

◘◘◘

KABILANG sa mga tinukoy nang makakasangga ni P-BBM sa Palasyo sina Benjamin Diokno sa Department of Finance (DOF), Felipe Medalla sa Bangko Sentral ng Pilipinas (BSP), at Alfredo Pascual sa Department of Trade and Industry (DTI).

Gayundin sina Arsenio Balisacan sa National Economic Development Authority (NEDA), Bienvenido Laguesma sa Department of Labor and Employment (DOLE) at Susan Ople sa Department of Migrant Workers (DMW).

◘◘◘

PERO, may tsismis na iginigiit ng isang grupo na isiksik kay P-BBM ang “bida” sa barberya at parlor na si Sagip Partylist Rep. Rodante Marcoleta.

Isa si Marcoleta kaya’t nadiskaril ang mga baklita na mapanood tuwing tanghaling tapat si Vice Ganda.

Nabokya na ang kanyang pangalan.

◘◘◘

TOTOO kaya na kaya’t naiwanan sa senatorial survey si Marcoleta ay dahil sa kanyang panukalang batas na tanggalin ang “krus” sa mga ospital?

“Pag-asa” lang ang nagpapahaba ng buhay ng mga pasyente, aalisin pa?

◘◘◘

NOBENTA-PORSIYENTO ng populasyon ng ‘Pinas ay Kristiyano, kaya’t nasira ang kanyang diskarte sa eleksiyon.

Isinusulong din ni Marcoleta na bigyan lamang ng P1,000 annual budget ang CHR.

Huh, simpleng pagsisepsep ‘yan kay P-Digong.

◘◘◘

WALANG landmark bill si Marcoleta sa Kamara kaya’t marami ang naiimbiyerna nang matsismis na kasama siya sa nangangarap na maging kalihim ng Department of Energy (DOE).

Diyusnamabaginglangit, ano ang maitutulong ni Marcoleta sa enerhiya?

◘◘◘

MALAKI ang tsansa na magkaroon na ng face-to-face classes sa next school year.

Klap-klap-klap!

◘◘◘

INAAMIN ng mga eksperto na kakarampot ang natutuhan ng mga estudyante sa online class.

Walang sapat na panahon at diskarte ang mga titser at estudyante na magpalitan ng kuro-kuro.

◘◘◘

NAGKAKAMAL naman ng salapi ang mga school owner dahil naniningil ng matrikula pero hindi naman ginagamit ang pasilidad.

Hindi rin nila itinataas ang suweldo ng mga guro na nagpapaluwal, hindi lang ng oras, bagkus ng sariling resources gamit ang sariling tahanan.

Busy pa more sa pulitika ang ‘Pinas

ni Ka Ambo - @Bistado | June 2, 2022

KRISIS sa ekonomiya pa rin ang isyu sa buong daigdig.

Pero sa ‘Pinas, pulitika pa rin ang pinagkakaabalahan!

◘◘◘

PAANO kaya tutulungan ang mga munting negosyanteng nasa kariton?

Waley!

◘◘◘

UMIINIT ang isyu West Philippine Sea.

Mag-iinarte na naman ang Tsekwa!

◘◘◘

EXCITED ang mga bagong uupo sa gobyerno.

Marami ang mawawalan ng trabaho!

◘◘◘

WALA pang linaw kung sino ang magiging anti-illegal drug czar.

Baka si P-Digong?

◘◘◘

DELIKADO na ang sitwasyon ng buhay ni Kris Aquino.

Kailangan niya nang walang patid na dasal.

Sana ay surpresang dalawin siya ni P-BBM sa ospital.

◘◘◘

IPATUPAD na sana ang 100 percent, face-to-face class sa school year na ito.

Lalaki ang demand sa lipstick at facial cream!

◘◘◘

KAPAG face-to-face classes, mabubuhay ang nagtitinda ng fishball, banana’t camote cue at buko juice.

Sisigla ang negosyo ng mumunting tao sa kalye!

◘◘◘

MAULAN na naman.

Walang nag-aayos ng mga kanal.

Iresponsable ang mga kolokoy!

◘◘◘

DAPAT daw bigyan ng puwesto si VP Leni.

Pwes, ilagay siya sa laylayan!