Private school, tutol sa ‘No Permit, No Exam Prohibition Act’, mababangkarote raw

ni Ka Ambo @Bistado | August 29, 2023

HINDI mapigil ang mataas na presyo ng petrolyo.

Kasunod nito ay mataas na singil sa pasahe.

---$$$---

MAGING ang bigas at iba pang produkto ay diretso sa pagtaas ng presyo.

Hindi ito mapipigil.

Ito ay sanhi ng “batas” ng supply and demand.

---$$$---

NARE-REPEAL ba o nababago ng Kongreso ang batas ng suplay at demand?

Ang tanging puwedeng gawin at paramihin ang suplay at paliitin ang demand.

Ganu’n lang kasimple.

---$$$---

BER month na this week.

Pero, ramdam na ramdam ang hirap ng buhay.

---$$$---

TECHNICAL recession ang tawag ng mga eksperto sa “side effect” ng COVID pandemic.

Wala nang COVID, pero sarado pa rin ang maraming negosyo.

---$$$---

KABILANG sa nabangkarote ang mga private schools.

Nag-exodus tungo sa public school ang mga estudyante.

---$$$---

TINUTUTULAN ng mga pribadong eskwelahan ang No Permit, No Exam Prohibition Act dahil mababangkarote ang mga naka-survive na eskwelahan.

Kung hindi maniningil nang maayos ang mga iskul, saan kukuha ng pantustos ang pribadong eskwelahan.

Paano na ang mga due date sa utilities tulad ng kuryente at tubig, at maging telephone at internet?

---$$$---

SA biglang tingin, mukhang maganda naman ang layon dahil makakapag-exam ang mga estudyante kahit hindi pa bayad sa matrikula.

Pero, hindi nila makukuha ang kanilang school credentials hangga’t walang full payment sa matrikula.

---$$$---

MALINAW na pansamantala lamang ang lunas dahil utang pa rin ito na sisingilin ng mga paaralan.

Baon pa rin sa utang ang mga magulang.

Hindi iyan ang tunay na solusyon sa krisis.

---$$$---

PAANO makakasuweldo nang kinsenas ang mga guro at school personnel kung hindi magbabayad sa due date ang mga estudyante?

Sakop ba ng batas na itengga ang suweldo ng mga guro dahil sa pagbabawal sa “no permit, no exam policy”?

---$$$---

UMAAPELA ang private schools na makipagdayalogo muna ang mga mambabatas sa kanilang grupo.

Ito ay para maiayos ang batas at mismo ang problema.

---$$$---

SA demokrasya, dapat ay hinihingi ang panig at tinig ng sektor na apektado ng panukalang batas.

Mahirap bang gawin ito?

Iyan ay isang tradisyonal na proseso sa Kongreso.

Pagsalakay sa mga bodega ng bigas, hanggang balita lang

ni Ka Ambo @Bistado | August 26, 2023

NAIIPIT ang mga residente sa pinag-aagawang teritoryo ng Makati at Taguig.

Bakit ayaw nilang igalang ang desisyon ng Korte Suprema?

---$$$---

SA bagay, binubuwenas din ang mga estudyante dahil lumalabas na “dalawang ayuda” ang puwede nilang tanggapin.

Nagdadaigan ang dalawang siyudad sa pag-asiste sa mga estudyante.

---$$$---

MAY jurisprudence na sa naturang isyu pero bakit ginugulo ang sitwasyon.

Malinaw ang desisyon na ang Parcels 3 & 4 of Psu 2031 (na kinabibilangan ng 10 barangay) na nasa Makati City ay nasa legal na hurisdiksyon ng Taguig City.

---$$$---

ISA sa dapat pagbatayan ay ang kasong Camarines Norte vs Province of Quezon.

Niresolba rin noong November 1989 ng SC ang 67-taong territorial dispute.

Idineklara dito na ang 9 na barangay ay nasa hurisdiksyon ng Camarines Norte.

---$$$---

PINATAWAN ng contempt ng SC ang mismong gobernador at mayor.

Nilinaw ng SC na naiintindihan ng 2 opisyal na final and executory decision hinggil sa dispute subalit sinasadya lamang na hindi sundin.

---$$$---

MALINAW din sa desisyon na hindi na tatanggap ang korte ng anumang pleadings, motions, letters o anumang uri ng komunikasyon ukol sa kaso dahil nagkaroon na ng entry of judgment.

Walang ipinalabas na WRIT OF EXECUTION ang SC, bagkus ipinatupad ito nang maayos ang desisyon.

----$$$---

DAPAT nang mag-move-on ang dalawang siyudad at ipatupad ang desisyon ng hukuman.

Malinaw na iniaayos na ng Comelec, PNP at DepEd ang transisyon.

Iyan ay dapat sundan din ng iba pang ahensya.

---$$$---

PINATAY na ang lider ng Wagner na nagrebelde sa Russia.

Nakakakilabot ang mga ulat.

---$$$---

SINALAKAY ang ilang ricemill sa Bulacan.

As usual, inakusahan sila na nagre-repack ng imported rice para ibenta bilang local rice.

Hanggang balita lang ‘yan.

---$$$---

KINUMPIRMA na ang technical recession na nararanasan ng Pilipinas.

Teknikal at aktuwal nang may krisis.

Pag-i-import ng agri products, sintomas ng seryosong krisis

ni Ka Ambo @Bistado | August 20, 2023

UULIT-ULITIN natin: Iisa ang long-term na solusyon sa kakapusan ng suplay at mataas na presyo ng bigas.

Ito ay ang pagbubungkal gamit ang heavy equipment sa mga panot na bundok at nakatiwangwang na lupain.

---$$$---

ANG mga ekta-ektaryang nakatiwangwang na lupain ay nakamkam o napatituluhan ng mga haciendero at mga korporasyon.

Kapag iyan ay binuwisan ng gobyerno tulad sa Sin Tax at Sugar Tax, mapipilitan ang mga korporasyong ito na bungkalin ang kanilang lupain upang maging plantasyon.

---$$$---

SA idle land tax, tatabo ang gobyerno ng buwis mula sa pinakamayayaman.

Ibig sabihin, hindi tatamaan ng buwis ang mga ordinaryong tao tulad sa sin tax at sugar tax.

---$$$---

BAKIT hindi gumagawa ng batas para sa idle land tax?

Ito ay dahil ang mga korporasyon at mga multi-bilyonaryong nagmamay-ari nito ay siyang “financer o donor” ng campaign fund.

Kitam?

---$$$---

ISANG “Ferdinand E. Marcos, Sr.” lamang ang may kakayahang gumawa at magpatupad ng batas upang buwisan ang mga multi-bilyonaryo.

Kung tumagal naman sa puwesto si Digong, disinsanay nabuwisan niya ang mga tinatawag niyang “oligarko”.

---$$$---

HANGGANG ngayon, tanging si ex-P-Digong lamang ang maikukumpara sa matandang Marcos kung pag-uusapan ang paglaban sa mga multi-bilyonaryo.

Isa rin itong dahilan kung bakit kinukuyog siya ng mga dayuhan.

---$$$---

MARAMING korporasyon kasi ay may sosyo ang mga dayuhan at maraming bilyonaryo ay dummy ng mga multi-bilyonaryong foreign investors.

Pero, hindi iyan ang isyu, bagkus ay kailangang mahimok ng Malacañang ang mga multi-bilyonaryo na maging bahagi ng industriyalisasyon ng agrikultura.

---$$$---

MALINAW na hindi dapat tayo na magalit sa mga multi-bilyonaryo — dayuhan man o hindi, dahil sila ay may kakayahang isalba ang Pilipinas mula sa anumang krisis.

Sa ayaw o sa gusto mo, may krisis na sa agrikultura.

---$$$---

Ang malawakang importasyon ng agri-products ay kongkretong sintomas ng isang seryosong krisis.

Hindi kailanman solusyon sa shortage at high price ang importasyon.

Pansamantala lang iyan, pero iskema sa isang mala-lehitimong korupsyon!

---$$$---

MAAGA pa lamang ay nararamdaman na ang El Niño.

Maliban sa talumpati at boladas, wala namang aktuwal na aktibidad at programa laban sa napipintong tagtuyot.

---$$$---

KUNG kailan dumaranas ng tagtuyot, saka lamang mag-aapura ang publiko at pribadong sektor.

Walang seryosong pagkilos at desisyon laban sa El Niño sa Luzon, Visayas at Mindanao.

---$$$---

ANG wild fire sa Hawaii at sa Europe ay posibleng maranasan sa Pilipinas partikular sa Baguio City.

Pinaghahandaan ba ito ng mga kolokoy?

Hindeee!!!