PBBM, kung gustong sibakin ang gabinete, sibakin, wala nang tsetseburetse

ni Ka Ambo @Bistado | May 24, 2025

Pinagsumite ng courtesy resignation ang 100 percent ng gabinete at mga presidential appointees.

Eh, bakit?

Awtomatik naman na puwedeng sibakin lahat — kapag gusto ng Pangulo ng Republika ng Pilipinas.

----$$$--

Hindi isyu ang courtesy resignation, ang isyu — ay kung sino talaga ang mawawala sa gabinete.

‘Yun na mismo, sibakin kung sisibakin, wala nang tsetseburetse.

----$$$--

DISPOSISYON at political will ang tawag diyan.

Dapat ay magdesisyon nang kongkreto at malinaw si PBBM — kahit sino pa ang madamay at kahit ano ang opinyon ng publiko.

----$$$--

SA totoo lang, mas mainam kung ihahayag ng Malacañang na magbubuo sila ng “task force” o confidential committee na magrerebyu ng performance at qualification.

Kumbaga, mayroon dapat na tipong “advisory group” na aasiste sa Pangulo kaugnay sa revamp.

-----$$$--

MAHIRAP kasing paniwalaan na “solo lang ni PBBM” ang desisyon.

Dapat ding linawin kung ano ang “papel” ng inner circle — kasama ang miyembro ng pamilya — sa paghuhusga kung sino ang mananatili at sino ang masisibak.

-----$$$--

PERO ang malawakang pagbalasa ay malinaw na epekto sa negatibong resulta ng eleksyon.

Walang masama, ang mahalaga ay nagtatangka si PBBM na maisaayos ang lahat — para sa ikabubuti ng marami.

----$$$--

SA personal nating pagtaya, wala ring gaanong epekto ang balasa dahil walang malinaw na batayan kung paano “huhugot” o pipili ng bagong gabinete.

Nakakatakot kasi na baka mabiktima si PBBM ng “bulong brigade” o simpleng mga sipsip ang iimpluwensya sa pilian at pagsibak.

----$$$--

KAPAG pumalpak sa desisyon si PBBM kaugnay ng ipinagmamalaking balasa, lalong bibilis ang paghina ng poder.

Hindi biro ang sitwasyon — dahil “malakas ang sigwada ng alon” sa karagatan.

Sa popular na kasabihan, hindi dapat “nagpapalit” ng kabayo ang kabalyero — sa gitna ng “umaalimpuyong alon”.

Kahit bihasa, sa gitna ng nagngangalit na alon -- possible ang kabalyero ay “biglang mahulog” at malunod!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Mga cabinet member, pinag-courtesy resignation, sino ba ang matino sa kanila?

ni Ka Ambo @Bistado | May 23, 2025

Pinagsusumite ng courtesy resignation ang lahat ng miyembro ng gabinete.

Klap, klap, klap!

----$$$--

Iisa lang naman talaga ang matino sa mga gabinete.

Iyan ay tanging si Defense secretary Gibo Teodoro.

Wala nang iba pa.

----$$$--

PALPAK ang mga kalihim sa Health, Agriculture, DSWD, Finance, Labor at marami pang iba.

Kahit sa DepEd ay walang pambihirang achievements.

-----$$$---

PINAKAMAHALAGA ay sa media group, malinaw na walang talab ang mga communicators.

Masyadong mabu-NGANGA lang.

----$$$--

HINDI dapat mapagkamalang propaganda o press releases — ang magagandang nagagawa ni PBBM.

Dapat ay pumosturang lehitimong news ang mga ulat kaugnay ng achievement ng Marcos Jr. administration.

Paano gagawin?

Diyan sila kakapusin — dahil wala silang epektibong diskarte!

----$$$--

HINDI naman batikang editor o news director o may tahid na media practitioner — ang pinupulot ng Malacañang.

Nilalamon ang rekomendasyon ng “personalidad” imbes kuwalipikasyon — ang batayan sa pagtatalaga.

----$$$--

HINDI dahil nagmula sa malalaking media network — ay mahuhusay o may sapat na karanasan.

Biased ang mga iyan — at tila walang karanasan sa “estratehiya” o kung paano humubog o lumikha ng “epektibong balita”.

Kakaunti ang nakakaunawa niyan — at mga beteranong editor lang ang puwedeng gumawa.

----$$$--

HINDI naman popularity contest — ang pagtatalaga sa mga bagong gabinete, lalong hindi dapat palakasan o kama-kamag-anak o kaibi-kaibigan.

Kuwalipikasyon dapat at hindi pa huli ang lahat — para maisalba ang reputasyon ng Marcos Jr. administration.

----$$$---

DAPAT maunawaan natin — na hindi sapat naglalabas o nagre-release o nagpo-post ng positive news.

Hindi positive news ang kailangan, ang kailangan ay “credible news” o kapani-paniwalang impormasyon.

Paano gagawin?

Diyan na sila mahihirapan, sapagkat — tiyak na hindi nila mauunawaan kung “ano ang credible at hindi credible”.

----$$$--

TULUNGAN natin na maunawaan kung ano ang credible?

Una, hindi teksto, hindi rin content o konteksto lamang ang may kaugnayan sa credible news.

Bagkus, ang credible news — ay nakapundasyon din o nakasandal kung paano ikinalat ang “ulat” — sino ang nagkalat at anong klase ng entidad ang nagkalat.

----$$$--

IBIG sabihin, kapag ang isang “aktuwal na balita” — ay ikinalat gamit ang “layer o proseso” na ginagamit sa propaganda — nawawalan ‘yan ng kredibilidad.

Maselan ang paglalabas ng komunikasyon — lalo na’t nagmumula sa Malacañang.

----$$$--

HALIMBAWA, inilabas ng Malacañang ay isang aktuwal o tunay na balita — pero ang nagbrodkast nito ay mga block timer o “bayarang entidad” o nagbabayad na entidad — ang letihimo ay napagkamalang propaganda.

Halimbawa naman, ang isang ulat ay positibo o tunay, pero ang gumawa o naghubog ng balita — ay ginamit sa unang dalawang linya — ay personalidad, imbes na isyu — nagiging “bayad” ang balita — kahit hindi naman.

-----$$$--

NAIS lamang nating sabihin, na maselan ang proseso sa paggawa ng balita o pagkakalat ng impormasyon.

Maraming nasasayang na “lehitimong balita” na dapat ay maunawaan o ma-absorb ng mga mamamayan — pero isinusuka ito at napagkakamalan propaganda — kahit hindi naman!

----$$$--

KAHIT naman ang mga matitinong editor o brodkaster ay napukulan ng “balitang palpak” ang pagkaka-compose o pagkakalikha — napagkakamalan “may bayad” — kahit wala naman!

Naipapahamak ng “maling konteksto” ng balita — ang mismong nagbobrodkast o nagpaplakda sa diyaryo o nagpo-post — kahit wala naman silang natatanggap na pabor mula sa pinagmulan ng mga ulat.

----$$$--

Ang masakit, walang talab ang “dispalinghadong ulat” sa mga nakinig, nanood o nagbasa, maliban sa “masaya” ang tao na “pinuri’ sa balita — na karaniwan ay tinatawag na “PRINCIPAL”.

At ang pinakamabigat, mababansagan itong isang klase ng “fake news” — kahit hindi naman talaga!

Ang talamak na iskemang iyan — ang isa sa nagwawasak ng media industry — na hindi namamalayan ng mga taong gumagalaw sa loob nito!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Ex-PDu30, imiiskor sa kaso sa ICC

ni Ka Ambo @Bistado | May 18, 2025

Umiiskor si Digong sa kanyang kaso sa ICC.

Nagbakasyon ang prosecutor.

-----$$$--

INAKSYUNAN ng president ng ICC at plenaryo ng mga huwes ang petisyon kaugnay sa pag-i-inhibit ng 2 judges sa isyu ng hurisdiksyon.

Hiningian ng paliwanag ng plenaryo ang 2 sa 3 huwes na may hawak ng kaso kung bakit hindi sila puwedeng mag-inhibit o ma-disqualify sa pagdedesisyon hinggil sa isyu.

----$$$--

MALAKING bagay ang super landslide win ni Digong bilang mayor ng Davao City na nagpapatunay na kinakatigan siya ng “super majority”.

Sa proseso ng demokratikong gobyerno — ang lahat ng kapangyarihan — ay nagmumula at nag-uugat sa “mayorya” ng mga mamamayan — lalo pa’t ito ay super mayorya.

----$$$--

DAPAT ay iginagalang at hindi sinasapawan ng anumang entidad o ibang bansa -- UN man o ICC — ang kultura, tradisyon at Konstitusyon ng isang bansa.

Ang impluwensya ng “pulitika” sa kaso ni Digong — ay napakalinaw.

Pero, kailangan iyan ay maipaliwanag at maipakipaglaban — gamit ang epektibong argumento ng kanyang mga abogado!

----$$$--

MAAARING nasa tamang posisyon, disposisyon at sitwasyon si Digong — pero kapag palpak ang kanyang mga abogado — maaari pa ring siyang maparusahan.

Malinaw ang argumento — at nakasalalay ito sa kanyang mga abogado — imbes sa mga huwes o judges.

----$$$---

NAIS nang pumagitna o mag-neutral ni PBBM.

Iyan ay napakalaking tama.

----$$$--

SA totoo lang, hindi dapat nakialam si PBBM sa midterm election — nadamay lamang siya sa “kahinaan ng grupo” ng kanyang mga alipores.

Malinaw na natulungan siya ng kanyang Ate Imee sa 2022 presidential election, pero malinaw na hindi niya natulungan, bagkus ay naipahamak pa niya ang kanyang nakatatandang kapatid.

-------$$$--

MAS maganda sana ay nakipagtuwang at nakinig siya sa kanyang Ate Imee, kaysa sa kanyang pinsang buo.

Tapos na ang midterm election, papanipis na ang poder ni PBBM.

----$$$-

UNTI-UNTI nang maglalaho ang impluwensya ni PBBM — dahil patungo siya sa pagbabakasyon gaya nina Digong, at ex-PGMA.

Kung Marcos-at-Marcos ang pag-uusapan — malilipat na kay Sen. Imee ang baton ng kanilang ama na si Ferdinand E. Marcos, Sr.

Hindi siya dapat masira, bagkus siya ay dapat saklolohan ng mga dugong Marcos at mga maka-Marcos!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.