Kabataan, nag-iisip nang patas at ‘di nagpapa-brainwash sa mga pulitiko

ni Ka Ambo @Bistado | September 22, 2025

Hindi petsang bente-uno (21) de Setyembre, naramdaman ang deklarasyon ng Batas Militar ng ordinaryong mamamayan, bagkus ay petsang bente-dos (22).

Nilagdaan nang sikreto ni dating Pangulong Ferdinand Marcos Sr. ang Proclamation 1081, at lihim itong ipinatupad sa dilim ng gabi at lihim na operasyon.

----$$$--

PETSANG bente-dos nang bumalik ang programa sa mga telebisyon at radio kung saan biglang sumungaw ang batambatang mala-tinedyer na si Francisco Tatad — ang kalihin ng Kagawaran ng Impormasyon.

Sa gitna ng pananabik, binasa ni Tatad nang pormal ang deklarasyon ng Martial Law at kung bakit ito idineklara.

----$$$--

MAKIKITA natin ang papel ng kabataan — sa magkakasalungat na panig — maka-Marcos at anti-Marcos.

Taliwas ito sa impresyon na ang hanay ng mga kabataan ay kontra-Marcos lahat.

----$$$--

Tulad ngayon, hinahamon ni dating Governor Chavit Singson ang hanay ng kabataan na pumagitna at mag-alsa laban sa pamahalaan.

Pero, siya rin ang nagsabi na ang mga kabataan ay dapat kumilos at makialam — pero siyempre, ang mga kabataan ay nag-iisip nang patas — at hindi nagpapadikta o nagpapa-brainwash sa mga pulitiko.

----$$$---

HAYAAN nating mag-isip, magsaliksik at magdesisyon ang mga kabataan — hindi natin puwedeng idikta sa kanila — kung ano ang lumalabas na impormasyon sa mainstream media at maging sa social media.

Maraming palsipikadong impormasyon sa mainstream media at maging sa socmed — at higit na nakakaunawa nito ay ang hanay ng kabataan — partikular ang Gen-Z na may tiga-tigatlong gadgets — cellphone, laptop at personal computer.

-----$$$--

MATATALINO ang mga kabataan ngayon, higit sa mga nagdaang hanay ng mga kabataan, sapagkat ang lipunan ngayon ay ibang-iba na kaysa sa nagdaang lipunan.

Huwag nating husgahan o ituring na mangmang at walang alam ang hanay ng mga kabataan — may sarili silang disposisyon, higit sa mga matatandang batbat ng korupsiyon ang kultura at nakamihasnan.

----$$$--

HUWAG basahin o ianalisa ang sitwasyon ngayon, batay sa padron o hulmahan o panukat batay sa nagdaang henerasyon.

Bagumbago na ang henerasyon ngayon.

----$$$--

SA totoo lang, sa ayaw o sa gusto ng mga nagdudunungan na “matatanda” na nag-aakalang monopoly nila ang talino, ideya o konsepto ng lipunan — lipas na lahat ‘yan.

Hindi na angkop ang mismong karanasan, edukasyon at maging ideya ng “matatanda” dahil sila ay nabuhay nang “nalublob” sa burak at mabahong lipunan ng korupsiyon.

----$$$--

WALANG malinis diyan, naglilinis-linisan lamang.

Across all levels of government — ang corruption.

Mula SK, barangay, munisipalidad, siyudad, probinsya, rehiyon, lahat ng department, Kongreso at Malacanang — ay malinaw na may bahid ng ‘korupsiyon’.

----$$$--

KAHIT magpalit-palit ng opisyal ng gobyerno at ipuwesto ang mga nagdudunung-dunungan at naglilinis-linisang kritiko at oposisyon — hindi rin masusugpo ang korupsiyon.

Ang korupsiyon ay may iba’t ibang anyo at walang kamatayan ito gaya ng “kuwentong aswang”.

----$$$--

ANG malawakang protesta ay epekto ng maniobra ng mga “lihim na kamay” na may kanya-kanyang political agenda.

Unawain natin na hindi lang ang Pilipino ang nais makontrol ang sariling gobyerno, bagkus ay maging ang mga dayuhan.

-----$$$--

MAS gusto ng mga dayuhan ay batbat ng korupsiyon ang Republika ng Pilipinas, dahil  mas madali nilang madidiktahan.

Ibig sabihin, hindi lang ang mga mandarambong ang dapat iprotesta, bagkus ay maging ang panghihimasok ng mga dayuhan.

----$$$--

SAKALING mamana ni Marcos Jr. ang sinapit ng kanyang ama, hindi tayo nakakatiyak na mabubura ang korupsiyon — tulad din naman ng mga ipinangako ng grupo na nagpabagsak kay Marcos Sr. — mas naging grabe ang katiwalian — at ngayon ay nagrurok sakto sa administrasyon ng kanyang anak.

Korupsiyon ang isyu laban sa Marcos Sr. — pinalitan siya ng iba’t ibang pangulo — naresolba ba ito, o mas lumala at naging grabe?

----$$$--

NGAYON, nais pabagsakin si Marcos Jr., mareresolba ba ang corruption?Malinaw na hindi!

Eh, bakit ka nasa gitna ng kalsada?

Hindi mo sinasadya, naibuyo ka – ng mga lihim na kamay ng mga dayuhan!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Nahimasmasan lahat nang mag-resign si Romualdez, buti naman!

ni Ka Ambo @Bistado | September 19, 2025

Nahimasmasan ang lahat nang sorpresang magbitiw si House Speaker Martin Romualdez at naupo si Rep. Bojie Dy.

Klap, klap, klap!

-----$$$--

NAG-UGAT ang lahat sa expose mismo ni Pangulong Ferdinand Marcos, Jr. sa maanomalyang flood control project sa kanyang SONA.

Personal na ininspeksyon ni PBBM ang palpak na mga proyektong ito — kung hindi man “non-existent” ay malinaw na “substandard”.

-----$$$--

HANGGANG ngayon nakatutulig ang tinig ng Pangulo sa kanyang SONA: “Mahiya naman kayo!” 

At tinablan ng hiya kaya’t nagpakitang-tao ang Senado at Kamara: nagsagawa ng magkasabay na pagdinig.

-----$$$--

NABISTO ang maraming palpak na proyekto sa inilunsad na diskarte, Isumbong sa Pangulo website kung saan ibinunyag mismo ng Presidente ang “15 contractors” na kumorner ng multi-bilyong pisong mga kontrata.

Binalasa agad ang Philippine Contractors Accreditation Board (PCAB) at mismo ang DPWH.

----$$$--

INIUTOS ni PBBM ang lifestyle check sa mga opisyal at itinalaga si DPWH Secretary Vince Dizon para sa isang masusi at seryosong imbestigasyon.

Magkatuwang na nagsampa ng kaso sa Ombudsman ang Commission on Audit at DPWH laban kina Engr. Hernandez at Engr. Alcantara ng Bulacan at iba pang opisyal ng DPWH.

-----$$$--

PINAKAGRABE ang akusasyon laban sa mag-asawang Discaya dahil hindi lang palpak na proyekto sila inuusig, bagkus ay maging sa nakumpiskang 20 luxury cars ng mga ahente ng Bureau of Customs.

Iniutos din ni PBBM ang pag-freeze ng assets ng mga nasasangkot sa anomalya na agad inaksyunan ng AMLC.

-----$$$--

MALINAW na tinototoo ni PBBM ang kanyang pangako at direktiba: “Walang sasantuhin, kaibigan, kamag-anak o maging kaalyado”.

Ang pagbibitiw ni Romualdez ay mananatiling legacy ni PBBM sa kanyang kampanya kontra graft and corruption.

----$$$--

ANG pagbuo ng Independent Commission for Infrastructure (ICI) gamit ang Executive Order 94 ang magseselyo ng kampanya laban sa katiwalian sa burukrasya.

Ito rin mismo ang babandila sa isinusulong niyang Bagong Pilipinas na magiging pundasyon ang kooperasyon ng bawat Pilipino.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Missing sabungeros at flood control project scam, same lang, multibilyonaryo at malakas ang kapit ng ‘mastermind’

ni Ka Ambo @Bistado | September 17, 2025

Nasapawan na ng katiwalian sa flood control projects ang isyu sa mga nawawalang sabungero.

Sa pinakahuling ulat, sinasabing walang “DNA” ng mga kaanak ng biktima ang nag-match sa mga epektos na narekober sa Taal Lake.

As expected!

----$$$--

WALANG “body of the crime” at walang direktang physical evidence laban sa mastermind, delikadong maabsuwelto ang mga kolokoy.

Ibig sabihin din, ang mas malalakas na ebidensya ay nakapokus laban lamang sa mga whistleblower.

----$$$--

DAPAT nating maunawaan na ang huwes o ang husgado ay magdedesisyon, hindi batay sa “wento-wento” o ispekulasyon o kongklusyon na nakapundasyon sa tsismis, bagkus ay magdedesisyon sila batay sa “ebidensya” na isinumite sa hukuman.

Maaaring may matitibay na ebidensya, pero ito ay dapat pisikal na dalhin sa hukuman o iharap kung saan — iyan ang pagbabatayan ng hatol.

----$$$--

INAAMIN ng ilang eksperto na tumagal ang pagsasampa ng kaso dahil kailangan ang mas matitibay na ebidensya.

Iyan ang dahilan kung bakit ang mga drug lord, gambling lord, smuggling lord -- ay nakakalusot sa kaso -- walang direktang ebidensya laban sa kanila.

----$$$--

KAHIT sa America, nahihirapan ang hukuman na hatulan ng “guilty” ang mga utak ng krimen o lider ng mafia — dahil sa kawalan ng matibay na ebidensya.

Pero, may taktika ang korte upang mahatulan ang isang mastermind batay sa ebidensya — ito ay ang paglabag sa “TAXATION” act o hindi maayos na pagbabayad ng buwis.

-----$$$--

SA isyu ng missing sabungeros — itinatanong, sino sa mastermind at whistleblower — ang mas guilty kung pagbabatayan ang mga nalikom na ebidensya.

Ang masakit, ang ebidensya ay mas nakatuon laban sa mga whistleblower kaysa sa sinasabing mastermind.

Ito ay dahil sa umaamin at naglalabas ng ebidensya laban mismo “sa kanilang sarili” ang mga whistleblower.

-----$$$--

HINDI nagkakalayo ang kaso sa missing sabungeros sa kaso sa korupsiyon sa flood control projects.

Kakaunti rin o halos walang mahahagilap na matibay na ebidensya laban sa hinihinalang “utak ng flood control project scam”.

Pero, mas malinaw ang ebidensya kontra sa mga sinasabing nais maging “whistleblower”.

----$$$--

MALINAW kung gayon na ang “isyu sa whistleblower” o argumento hinggil dito — ay parehong maia-apply sa dalawang kaso.

Ibig sabihin, kung papayagan ng hukuman na kilalanin ang whistleblower sa kaso ng missing sabungeros, dapat ding kilalanin ng gobyerno ang mga “whistleblower” sa flood control projects.

-----$$$--

KUNG makakatakas sa kamandag ng batas ang utak ng flood control project modus operandi, makakatakas din ang hinihinalang utak sa missing sabungeros.

May parehong sitwasyon ang dalawang kaso — multibilyonaryo at malalakas ang kapit at koneksyon ng mga hinihinalang mastermind.

---$$$--

KUNG gaano kahirap mahatulan ang utak ng krimen sa missing sabungeros, lalong mahirap mahatulan ang mga tunay na utak sa katiwalian sa flood control.

Anumang klase ng imbestigasyon — ay tiyak na lalamon ng maraming taon — kapwa sa missing sabungeros at flood control projects scam.

Samantala, magpakasaya tayo sa social media sa panonood sa mala-teleseryeng palitan ng alingasngas at patutsadahan.

---$$$--

MAGDASAL tayo na may mahatulan agad sa dalawang kasong ito na isang “suntok-sa-buwan”.

Utak, whistleblower o fall guys.

Kuno!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.