Revilla, nagpaabot ng tulong sa mga kababayang hinagupit ng Bagyong Kristine

by Info @Brand Zone | Oct. 24, 2024

Nagpaabot na si Senador Ramon Bong Revilla ng tulong para sa mga kababayang hinagupit ng Bagyong Kristine sa Bicol region.

Sa Facebook Live ni Senador Ramon Bong Revilla, ipinakita nya ang bayanihan truck na punong puno ng relief goods na bumiyahe na ngayong gabi (Oct. 23) patungo sa mga kababayang sinalanta ng bagyo.

Unang bibigyan ng tulong ang mga taga Naga na isa sa mga matinding tinamaan ng bagyo.

Nakadepende ayon kay Revilla ang paghahatid ng tulong sa lagay pa rin ng panahon at kung passable na ba ang mga kalsada at tulay doon.

Marami kasi aniyang tulay at kalsada ang sinira dahil sa mga landslide at umagos na lahar dahil sa malakas na buhos ng ulan na dala ni Kristine.

May inaayos pa aniyang mga relief packs ang kaniyang tanggapan para naman sa iba pang lugar na tinamaan rin ng bagyo.

Umapila naman si Revilla sa mga kaibigan at sa publiko na tumulong sa bayanihan para sa mga kababayan na nawalan ng tahanan at ari arian dahil sa bagyo.

Biyaya ng langit ang aking mga anak

ni Bong Revilla @Anak ng Teteng | Oct. 22, 2024

Hindi pa humuhupa ang kaligayahang nararamdaman ng aming buong pamilya dahil sa pagkakapasa ng aking anak sa Bar exam noong nakaraang taon at ngayon ay biniyayaan na naman kami ng isa pang buwenas dahil pumasa naman sa board exam ang isa ko pang anak na ngayon ay ganap nang doktora.

Umagos ang luha ng kaligayahan sa buo naming pamilya matapos ibalita sa amin ng aking anak na si Loudette Bautista na pumasa siya sa 2024 Physician Licensure Examination o ang tinatawag na board exam para sa mga doktor ng medisina.

Bilang ama ay proud na proud ako at ang aking maybahay na si Cong. Lani Mercado-Revilla kaya kahit hatinggabi na lumabas ang resulta ng exam ay agad akong nag-post sa Facebook at tuwang-tuwa rin ang marami naming kamag-anak, mga kaibigan, at tagasuporta. 

Si Dra. Loudette ay nagtapos ng pre-med sa Ateneo de Manila University at ng medisina sa University of the East Ramon Magsaysay Memorial Medical Center (UERMMMC).

Pinatunayan niyang kaya niyang abutin ang pangarap, hindi lang para sa sarili kundi para sa kanyang pamilya at sa mga taong kanyang mapaglilingkuran bilang doktor.

Congratulations sa aming Doktora Loudette! Certified doctor ka na, anak! You bring pride, joy, and honor to the whole family! Salamat sa pagtupad ng pangarap ni daddy na magkaroon ng doktor sa pamilya. Thank you God talaga!

Hindi lang isang malaking karangalan at saya ang dulot nito sa pamilya Revilla, lalo na’t siya ang kauna-unahang doktor sa aming pamilya.

Kaya sa’yo anak, mabuhay ka! You are now licensed to heal, at marami ang natutuwa at umaasa sa iyong mga susunod na tagumpay. Tiyak na maraming kababayan natin ang matutulungan mo.

Marami rin ang bumabati sa akin dahil sa sunud-sunod umano ang buwenas na dumarating sa akin. Sa tingin ko ganyan lang naman ang buhay sa mundo — minsan na rin namang sunud-sunod na dagok ang dumating sa buhay ko ng wala akong kinalaman at marahil ay binabalanse lamang ng langit ang lahat.

Basta’t ang mahalaga ay ipagpatuloy lamang natin ang mabuting gawa — hindi lang naman sa akin nangyayari ang ganito. Kahit kanino ay puwedeng mangyari ang pagdating ng mga blessings – wala namang sikreto dito kundi ang gumawa lamang ng mabuti  ang bawat isa at tiyak na may biyayang kapalit – siksik, liglig at umaapaw.

Walang bayad ang paggawa ng mabuti ngunit palagi itong may sukli – kaya ito lagi ang itinuturo ko sa aking mga anak — dahil kahit kailan hindi magbubunga ng masama ang paggawa ng mabuti.

Higit sa lahat ay huwag tayong makakalimot sa itaas para may gumagabay sa atin.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Pagbibigay tulong, walang pinipiling lugar at panahon

ni Bong Revilla @Anak ng Teteng | Oct. 18, 2024

Noong Oktubre 16, 2024, halos hindi kami nakausad nang magtungo kami sa lalawigan ng Negros Occidental dahil sa libu-libong residenteng sumalubong sa amin na lahat ay hindi magkamayaw sa pagyakap, paghalik at pagpapakuha ng litrato.

Tumagal ng halos ilang minuto bago namin narating ang entablado, kailangan naming makaakyat sa entablado dahil doon ako magsasalita bago tayo mamahagi ng tulong.

Malaking tulong naman ang ginawang pagsalubong sa amin nina Governor Bong Lacson, E.B. Magalona Mayor Marvin Malacon, Bacolod City Mayor Albee Benitez, kasama na si Abang Lingkod Partylist Rep. Joseph Stephen Paduano, dahil napabilis ang aming pag-usad at natuloy din ang pakikipagpulong ko sa kanila.

Inalam natin kung ano ang mga pangunahing pangangailangan ng buong probinsya na dapat mabigyan ng agarang aksyon.

Nakakataba ng puso ang mainit na pagsalubong ng mga tao at ramdam ko ang kanilang kasiyahan sa aking pagbisita.

Gayundin, dumalaw tayo sa Negros Occidental upang kumustahin at alamin kung ano ang dapat na unahing proyekto at programa, kasabay ng patuloy nating pagsusumikap na magawaran ng tamang suporta at serbisyo ang ating mga kababayan.

Hindi tayo puro pangako o salita lang, ginagawa natin ang lahat ng ating makakaya upang maihatid ang mga proyektong tunay na may pakinabang sa bawat Pilipino.

Kaya nga umabot sa halos dalawang libong panukalang batas ang ating naisumite at mahigit sa 300 na ang naisabatas at pinakikinabangan ng ating mga kababayan, at marami pa ang mga nakabinbin -- patunay na nais nating ibalik ang tamang serbisyo sa mga kababayan na nagtiwala sa atin para maluklok tayo sa Senado.

Sayang nga lamang at malapit na ang halalan — ayoko sanang makulayan na kaya lamang natin ginagawa ang pagtulong dahil may iba tayong motibo.

Sabagay, mula pa noon hanggang ngayon -- mula nang ako ay maging senador ay regular na tayong naglilibot at bumibisita sa iba’t ibang bahagi ng bansa para magbigay ng tulong -- biktima man ng kalamidad o hindi dahil regular din tayong nagtutungo sa mga lugar na hindi tinamaan ng kalamidad.

May mga staff ako na bumuo ng Bayanihan Relief (BR) Team na walang ginagawa araw at gabi kung hindi ang magbasta ng mga ipamamahagi sa mga lugar na biktima ng kalamidad. Kahon-kahong food packs bukod pa sa cash assistance ang ating inihahanda sa panahong walang kalamidad at kung sakaling dumating ang trahedya ay agad-agad na makapagdadala ng tulong at hindi ‘yung maghahagilap pa ng ipamimigay.

Ngayong malapit na ang midterm elections ay napakahirap nang kumilos, ngunit hindi naman ito hadlang para basta na lamang itigil ang pamamahagi sa mga nangangailangan. Kaya tuluy-tuloy lang tayo kahit ano pa ang kanilang isipin dahil malinis ang ating hangarin.

Sa ating mga kababayan, maaari kayong makipag-ugnayan sa mga lokal na pamahalaang nakakasakop sa inyo upang matiyak kung kailan ako nakatakdang dumalaw sa inyong lahat. 

Wala tayong pinipiling lugar basta nangangailangan ng tulong ay darating ang inyong lingkod bumabaha man o bumabagyo. 

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com