Simbang Gabi, start na sa Dec. 16

ni Bong Revilla @Anak ng Teteng | December 13, 2023

Sa darating na Sabado, Disyembre 16 ay simula na ng Simbang Gabi na kilala rin sa tawag na Misa de Gallo o Mass of the Rooster na nagsimula sa Pilipinas nang dumating ang mga religious missionaries mula sa bansang Mexico noong mid-1600s.

Marami sa ating mga kababayan ang naniniwala na kapag nakumpleto ng isang mananampalataya ang siyam na madaling-araw nang pagsisimba ay may kahilingan itong matutupad na nakagawian na sa mahabang panahon.

Sa paglipas ng panahon, ang mga nakatalagang pari sa mga simbahan ay pumayag na magsagawa ng misa sa madaling-araw kapag nagsimula nang tumilaok ang manok upang ang mga magsasaka at mangingisda ay maaaring makadalo sa kanilang obligasyon sa relihiyon bago pa magsimula sa kani-kanilang trabaho.

Ang kumukuti-kutitap na liwanag mula sa nakasinding parol o Christmas lantern na nakasabit sa bintana ng mga tahanan na nadaraanan patungo sa simbahan ay nagsisilbing gabay para sa mga nais na magsimba ng madaling-araw.

Ang Simbang Gabi ay karaniwang ipinababatid sa pamamagitan ng pagkalembang ng kampana, lalo na sa mga rural communities na madalas ay may mga musiko na tumutugtog ng Christmas music na lumilibot sa buong bayan isang oras bago magsimula ang Simbang Gabi.

Ayon sa naunang kasaysayan, mismong ang mga nakatalagang pari ang nagtutungo sa mga bahay-bahay at isa-isang kinakatok ang mga pintuan upang isa-isang magising ang mga mananampalataya at sama-samang dumalo sa isasagawang misa.

Ang ‘Misa de Gallo’ ay naging isang malaking oportunidad para sa mga maagang misyonaryo na magsagawa ng pagdakila sa Panginoon at naging pagkakataon din ito upang ipaliwanag sa bawat nagsisimba ang kahulugan ng Pasko bilang bahagi ng paghahanda sa muling pagparito ng Messiah.

Ayon kay Franciscan priest Andres Rañoa Jr. na ang ‘Simbang Gabi’ ay panahon ng pagpupuri sa Panginoon kung saan ang  mayaman man o mahirap, babae man o lalaki, bata o matanda ay sama-samang dumadalo bilang isang komunidad na naghihintay sa pangako ng Messiah sa muli niyang pagbabalik.

Nagkaroon din ng panahon na ang ‘Misa de Gallo’ ay hindi ginunita sa loob ng siyam na taon — mula 1680 hanggang 1689 dahil sa Vatican decree na ipinatupad ni Archbishop Felipe Pardo ng Manila.

Ang decree ay ipinatupad din sa Spain, Azores, at Mexico, na nag-ugat sa nakagawian ng mga nagtutungo sa simbahan at sa mga singer na umaawit ng mga kantang sila lamang ang nakakaintindi dahil sa nakagisnan nilang pananalita sa kanilang lugar. 

Noong mga panahong iyon, ang pag-awit gamit ang katutubong wika ay pinapayagan sa simula at pagtatapos ng misa at ang pag-awit ng Christmas song sa gitna ng misa ay bihirang-bihirang mangyari.

Makaraang pumanaw si Archbishop Pardo, ang mga pari ay muling ipinagpatuloy ang pagdiriwang ng ‘Misa de Gallo’ sa Pilipinas maliban sa  Discalced Franciscans.

Ang ‘Misa de Gallo’ ay nagpatuloy sa pagdiriwang kahit noong digmaan sa pagitan ng Spanish at American sa Pilipinas sa panahon ng 19th century at mula noon ay naging tradisyong kultural na ito at naging hudyat ng simula ng pagdiriwang ng Kapaskuhan sa bawat lugar.

May mga nagsasabi rin naman na iba ang kahulugan ng isinasagawang Simbang Gabi dahil panahon umano ito upang magkasama-sama ang buong pamilya, magkakaibigan na masayang nagtitipun-tipon pagtapos ng misa na naging bahagi na ng popular na pagpuri sa Panginoon.

Karaniwang nagsisimula ang ‘Misa de Gallo’, ganap na alas-4 ng madaling-araw at ngayon ay may mga karagdagang oras na rin kabilang na ang anticipated mass para sa ilang hindi makakayang dumalo sa madaling-araw.

Noong 1953, ang First Plenary Council of the Philippines ay nagsagawa ng pormal na petisyon patungo sa Roma upang hilinging ipagpatuloy ang pagsasagawa ng ‘Misa de Gallo’ na nasa Advent season ng kalendaryo ng simbahan.

Pinayagan naman ito sa mga kondisyong dapat ay siyam na araw lamang isasagawa bilang paggunita sa kapanganakan ng Panginoon na magsisimula sa Disyembre 16 – na dapat may kaakibat na taimtim na misa na dadaluhan ng mga mananampalataya.

Marso 24, 1961, pinayagan ng Vatican na ipagpatuloy ang naturang pagdiriwang para sa panibagong limang taon ngunit dahil sa kinakitaan ng aktibong pagdalo ang maraming Pilipino sa ‘Misa de Gallo’ kaya pinayagan na itong ipagpatuloy hanggang sa ngayon sa maraming lugar sa mundo.

Ganyan kahalaga ang pagsisimula ng Simbang Gabi na para sa maraming Pilipino ay panahon ng pagninilay-nilay, pasasalamat at paggunita sa kapanganakan ng Panginoon.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

12 scams of Christmas

ni Bong Revilla @Anak ng Teteng | December 11, 2023

Isang liham mula kay Obispo Broderick Pabillo ng Taytay, Palawan ang kamakailang lumabas. 

Nagbigay suporta ang obispo sa “Christmas Convoy” na ginanap nitong Linggo, Disyembre 10, 2023. Naghatid ng “supplies” at masayang pamaskong pagbati sa mga sundalong Pinoy sa BRP Sierra Madre bilang sagisag ng paninindigang, “atin ang West Philippine Sea”. 

“Nawa’y magbigay ng positibo at masayang epekto ang mapayapang gawaing ito,” dagdag ng Obispo.

Tumulak ang naturang “Christmas Convoy” sa Pandaigdigang Araw ng Karapatang Pantao. At sa mahalaga at makasaysayang araw na iyon, nagsama-sama ang ilang mga mamamayang nagmamahal sa ating bansa para hikayatin ang lahat na magkaisa at manindigang, “atin ang West Philippine Sea”.

Matagal nang ipinaglalaban ng retiradong Justice Carpio ang katotohanan na hindi sa China ang WPS. Malinaw sa mga dokumento na hindi totoong pag-aari ng China ang WPS. 

Sa totoo lang, noon lang 1947 inilabas ng China ang mapang nagsasabing sa kanila raw ang WPS dahil ito ay pumapaloob sa naturang “9 Dash Line,” na ginagamit nilang basehan ng kanilang pag-aari sa malaking bahagi ng ating karagatan. 

Ayon din sa China, ibinigay daw sa kanila ang mga isla sa Paracels at Spratlys, batay sa Cairo at Potsdam Declaration. Ngunit, malinaw din sa San Francisco Peace Treaty, tinutulan ang posisyon ng USSR na ibigay ang Paracels at Spratlys sa China.

Noong Hulyo 12, 2016, malinaw ding idineklara ng United Nations Convention on the Law of the Seas na walang batayan ang iginigiit ng China na 2,000 taong mapa na nagpapatunay na merong 9 Dash Line na sumasakop sa WPS. Ang deklarasyon ng UNCLOS ay bunga ng kasong inihain ng Pilipinas noon pang Enero 2013 sa ilalim ng pamumuno ni dating Pangulong Noynoy Aquino.

Malinaw ang posisyon ng administrasyong Aquino na ipagtanggol natin ang ating pag-aari sa West Philippine Sea, gayundin ipagtanggol natin ang ating soberanya.

Nang matapos ang termino ni PNoy at pumalit dito si dating Pangulong Rodrigo Duterte, nakita natin ang paiba-ibang deklarasyon at polisiya hinggil sa WPS. Sa kanyang kampanya, nagbanta pang “magdye-jet ski” si Duterte patungong Spratlys upang ipagtanggol ang ating karagatan.

Ngunit, nang manalo ito at itanong ng media kung magje-jet ski na nga siya patungong Spratlys, ang sagot nito ay, “Campaign joke lang ito, mga istupido!!!”

At mula noon hanggang natapos ang kanyang termino, hindi ipinagtanggol ni ex-P-Duterte ang ating karagatan. Sa halip, paulit-ulit pang sinabing, “Walang-wala tayong magagawa sa kapangyarihan ng China”. 

Sa panahon ni ex-P-Duterte nasaksihan ng lahat ang agresibong pagpuwesto ng China sa maraming isla sa WPS. Sa katunayan marami nang naitayong mga istraktura sa Paracels at Spratlys ang China.

Mabuti na lang at iba na ang salita at kilos ng kasalukuyang administrasyon. Kinikilala na nito ang UNCLOS ruling ng 2016. Inutusan na rin ang Philippine Coast Guard na bantayan ang ating karagatan.

Gayunman, may magagawa ba ang Christmas Convoy na maglalakbay mula El Nido patungong BRP Sierra Madre?

Unang-una, isa itong mahalagang simbolikong pagkilos. Malaking bahagi ng ating populasyon ang tumututol sa agresibong pananatili ng China sa ating karagatan. Ang maliit na delegasyon ng mga mamamayang tutol sa ginagawa ng naturang bansa sa WPS ay magpapalakas sa paninindigan ng karamihan na igiit at ipaglaban ang karapatan natin sa ating sariling karagatan.

Pangalawa, sana ay maging simula na ito ng tuluy-tuloy na pagkilos ng iba’t ibang grupo at sektor ng mga mamamayan na magpapakita ng matinding pagtutol sa ilegal na pananatili ng China sa WPS.

Pangatlo, sana ay magkaroon na ng malawakang edukasyon mula sa elementarya, hayskul hanggang kolehiyo tungkol sa usapin sa WPS. At magiging malinaw sa lahat kung ano ang ating pambansang teritoryo at ang malalim na kahulugan ng ating soberanya.

Pang-apat, papalapit na ang Pasko. Ano ang ating regalo sa ating Panginoon? Ano ang ating regalo sa mahal na Inang Bayan?

Hindi ba’t napakagandang regalong ipakita ang ating matindi, wagas at kongkretong pagmamahal para kay Inang Bayan? 

Salamat Panginoon sa West Philippine Sea, ang magandang regalo namin! Ipaglalaban namin ang regalong ito!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Cash gift sa mga senior na edad 80, 85, 90 at 95, malapit na!

ni Bong Revilla @Anak ng Teteng | December 8, 2023

Simula pa lamang noong nakaraang Kongreso ay isinusulong na natin ang panukalang batas na ating iniakda hinggil sa benepisyo ng ating mga lolo at lola na makakuha ng P100,000 pagsapit ng 100 taon ngunit nais nating mas mapaaga pa ang naturang benepisyo.

Mula na noon ay tumaas ang excitement na nararamdaman ng ating mga kababayan hinggil dito partikular ang ating mga lolo at lola na siyang higit na makikinabang sakaling maging isang ganap na batas na ito.

Noong nakaraang Hulyo 5, 2022 ay muli nating isinumite ang naturang panukala at hindi natin tinantanan dahil ang tanging hangad natin ay ang pakinabang na makukuha ng mga nakatatanda sa oras na sapitin nila ang mga itinakdang edad na 80 hanggang 100.

Hindi naman nasayang ang ating pagsisikap dahil sa haba ng balitaktakan na ating pinagdaanan sa Senado ay napagtagumpayan nating itawid ang kahalagahan ng panukalang ito sa buhay ng ating mga lolo at lola.

Ang binabanggit nating panukala ay ang tinatawag nilang ‘Revilla Law’ na nakakatuwa naman dahil sa sobra nating pagpupursige na maipasa ang panukalang ito ay sa atin na mismo isinunod kung paano ito tatawagin.

Ito na ngayon ang pinal na bersyon ng ating iniakda, ang AN ACT GRANTING BENEFITS TO FILIPINO OCTOGENARIANS AND NONAGENARIANS, AMENDING FOR THE PURPOSE REPUBLIC ACT NO. 10868, OTHERWISE KNOWN AS THE “CENTENARIANS ACT OF 2016”, AND APPROPRIATING FUND THEREFOR, na ngayon ay lumusot na sa Kongreso.

Noong nakaraang Miyerkules ay niratipikahan na ng Senado ang Bicameral Committee Report na magbibigay ng cash gift para sa ating mga lolo at lola na matagal na rin namang hinihintay at magandang regalo para sa ating mga senior citizen.

Nakapaloob sa panukala na lahat ng Pilipino, kahit nakatira sa ibang bansa, basta aabot sa mga itinakdang edad ay makatatanggap ng cash gift at isang Letter of Felicitation mula sa Pangulo ng Pilipinas na bumabati sa mahaba niyang buhay.

Ang mga lolo at lola na aabot sa edad na 80, 85, 90 at 95 ay pagkakalooban ng P10,000 sa tuwing sasapit sila sa mga nabanggit na mga edad, at ang mga aabot naman ng 100 ay pagkakalooban ng buong P100,000.

Sa kabuuan ay aabot ng P140,000 ang matatanggap nila na manggagaling sa General Appropriations Act o national budget na magkakaroon ng sistema sa tulong ng lokal na pamahalaan upang makarating sa kinauukulan ang cash gift na ito.

Dapat lang nating tandaan na isang taon ang ipinagkakaloob ng batas para sa isang lolo at lola na makuha ang nakalaang benepisyo para sa kanila, kaya medyo mahaba-haba ang pagkakataong matanggap nila ito.

Nakatakda nang isumite sa tanggapan ni Pangulong Ferdinand Bongbong Marcos Jr. ang panukalang ito para sa pinakahihintay na lagda upang maging isang ganap na batas at kailangang mailathala ito sa ilang pahayagan sa loob ng 15 araw bago maipatupad.

Sa lahat kasi ng panukalang batas na ating isinumite ay itong ‘Revilla Law’ ang kahit saan ako magpunta ay napakarami ng nagtatanong kung kailan ito maipapatupad dahil nga sa malaking tulong ito sa mga nakatatanda nating kababayan.

Ang nangyayari tuloy ay palagi kong ipinapaliwanag kahit sa mga okasyon na hindi ko naman dapat talakayin ang tungkol dito ay napipilitan akong magbigay ng kahit maiksing eksplanasyon dahil sa napakarami ng nakaabang at nagtatanong.

Hindi alam ng marami nating kababayan na ang panukalang ito para sa ating mga lolo at lola ay ang kauna-unahang panukalang batas na ating isinumite sa 19th Congress kaya noon pa lamang lumusot ito sa ikatlong pagbasa kamakailan ay tuwang-tuwa na ako.

Patunay kasi ng isang pagiging tunay na Pilipino ang pagkalinga sa mga nakatatanda nating kababayan na bahagi ng kulturang ating kinagisnan kaya napakahalaga sa akin na maipasa ang benepisyong ito.

Naaalala ko pa noon na sa botong 20-0-0 ay lumusot sa ikatlo at huling pagbasa ang naturang panukalang batas na nag-amyenda sa Centenarian Act of 2016 na magkakaloob ng P100,000 cash gift ng mas maaga sa mga senior citizen — at ngayon ay lusot na sa Kongreso.

Ako mismo ang principal author at tumayong co-sponsor ng Senate Bill No. 2028 sa ilalim ng Committee Report No. 61 na naglalayong amyendahan ang Republic Act No. 10868 o ang ‘Centenarian Act of 2016’ upang maibigay ang cash gift sa mga senior citizen.

Maraming hindi na umaabot sa edad na 100 at hindi na nila mapakinabangan ang benepisyong para sa bawat nakatatandang Pilipino at karaniwan ay sa gamot na rin lamang napupunta kaya magandang mas maaga ay pakinabangan na.

Pero ngayon, konting panalangin na lamang at sa oras na nilagdaan na ng Pangulo ang ating panukala ay isang maligayang pagdiriwang ito para sa ating mga lolo at lola.

Ito ang aking maagang pamasko sa lahat ng mga lolo at lola sa bansa!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com