El Niño Phenomenon, humahataw na

ni Bong Revilla @Anak ng Teteng | Enero 26, 2024

Napaaga ang papalapit na El Niño phenomenon sa bansa kung saan ay walong probinsiya ang nakararanas na ng tagtuyot dahil sa kakulangan ng buhos ng ulan.

Ayon kay Office of Civil Defense (OCD) Administrator Ariel Nepomuceno, kabilang dito ang mga probinsiya ng Apayao, Bataan, Cagayan, Cavite, Ilocos Norte, Kalinga, Palawan at Zambales.

Nauna nang sinabi ni Nepomuceno na mahigit sa 50 lalawigan sa bansa ang makararanas ng tagtuyot sa pagsapit ng Abril taong kasalukuyan.

Samantala, may ilang lugar lang umano sa Mindanao ang hindi masasapol ng tagtuyot o drought.

Ipinaliwanag naman ng Philippine Atmospheric, Geophysical and Astronomical Services Administration (PAGASA) na apektado ng El Niño phenomenon ang malawak na bahagi ng Pilipinas dahil kulang na ang pagbagsak ng ulan sa bansa.

Nagsimulang maramdaman ang El Niño sa bansa noong Hulyo 2023 kung saan ay naitala ang madalang na pagbagsak ng ulan. Sa puntong ito ay mariin tayong pinag-iingat hindi lang sa epekto ng tagtuyot kundi maging sa sunog kahit hindi naman panahon ng fire prevention month.

Ayon sa Bureau of Fire Protection (BFP) ang nararanasang alinsangan ng panahon ay may malaking epekto sa mabilis na pagliyab ng mga bagay-bagay at nagdudulot din ito ng mabilis na pagkalat ng apoy kaya pinag-iingat ang lahat.

Ayon pa sa PAGASA, ang majority ng climate models ay nag-anunsyo na ang El Niño ay posibleng tumagal hanggang sa Marso ng 2024 at maaaring mas tumagal pa hanggang sa mga susunod na buwan. 

Sana, lagi tayong maging alerto at alalahanin ang naganap na pagkatusta ng 13 estudyante sa sunog sa isang dormitoryo sa Henan province, China, kamakailan lamang. 

Bagama’t sa labas ito ng ating bansa nangyari, isa itong matinding paalala na lagi tayong magdoble-ingat para maiwasan ang sunog. Kaya naman nananawagan ang PAGASA sa lahat ng ahensya ng gobyerno pati na sa publiko na gawin ang lahat ng precautionary measures laban sa epekto nito.

Magugunitang bumuo si Pangulong Ferdinand “Bongbong” Marcos Jr. ng Task Force El Niño upang tumutok sa El Niño phenomenon at para maging alerto tayong lahat laban dito.

Ito’y makaraang ianunsyo ng Department of Science and Technology (DOST) na bago pa man pumasok ang buwan ng Mayo taong ito ay mayroon nang 77 porsyento sa mga lalawigan sa buong kapuluan ang mararanasan ang epekto ng El Niño, samantalang 7 porsyento naman ang makararanas ng tagtuyot.

Tayo namang mga Pilipino bihasa tayo sa pagharap sa anumang kahirapan — maging ito ay tag-ulan, tagtuyot. Dinadamba man tayo ng sandamakmak na mga pagsubok sa buhay alam natin kung papaano ito harapin at pagkatapos ng El Niño, may darating namang La Niña — basta’t mag-ingat lang tayo palagi. 

Anak ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Pagtitipid sa kuryente at langis, simulan na

ni Bong Revilla @Anak ng Teteng | Enero 24, 2024

Mariing ipinag-utos ni Pangulong Ferdinand “Bongbong” Marcos Jr. (P-BBM) ang pagpapatupad ng energy audit at random energy spot check sa lahat ng tanggapan ng gobyerno, kabilang na ang government-owned and controlled corporations, upang masiguro na sumusunod ang mga ito sa kautusan hinggil sa pagtitipid sa konsumo ng kuryente at langis. 

Ang direktiba ng Pangulo ay nakapaloob sa Administrative Order No. 15 na inisyu ni Executive Secretary Lucas Bersamin alinsunod sa Energy Efficiency and Conservation Act (EEC) na layuning mabawasan ang buwanang konsumo ng gobyerno ng enerhiya at langis.

Pinagsusumite rin ni P-BBM ang mga ahensya ng gobyerno ng inventory ng mga kagamitang gobyerno na kumokonsumo ng kuryente gaya ng ilaw sa mga gusali at kalsada, heating, ventilation at air-conditioning units, at mga sasakyan.

Nakasaad sa administrative order na lahat ng agencies, instrumentalities ng national government, kabilang ang government-owned and controlled corporations ay inaatasang magtipid ng kuryente, gayundin ang mga LGUs na hinihikayat na sumunod sa direktiba.

Nais ni P-BBM na matiyak na ipinapatupad sa mga tanggapan ng gobyerno ang 24°C sa mga AC units, pagpatay sa mga ilaw at aircon kapag walang tao at ilagay sa sleeping setting ang mga kagamitan sa opisina.

Ang energy audits ay regular na gagawin ng mga energy auditor ng gobyerno para maging epektibo ang kautusan.

Hindi lang kuryente ang pinasisinop ni P-BBM dahil maging ang paggamit ng langis ay pinatitipid na rin kasama ang mga service vehicle ng pamahalaan na dapat umano ay ginagamit sa mga mahahalagang lakad lamang.

Maganda nga naman ang hangaring ito ni P-BBM dahil ang matitipid mula rito ay maaaring maidagdag sa mga gastusin at maitutulong pa sa ating mga kababayan lalo na ang mga biktima ng kalamidad.

Kaya sana, lahat ng empleyado ng pamahalaan ay sumunod sa kautusang ito para sa kapakanan ng taumbayan, pero may ilan sa atin na dahil sa katigasan ng ulo ay babalewalain lang ang pagsisikap ng pamahalaan, aba’y mahiya naman tayo!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Senior at PWD, ‘wag mahiyang habulin ang 12% VAT exemption at 20% discount

ni Bong Revilla @Anak ng Teteng | January 22, 2024

Isa sa naaabusong sektor ay ang hanay ng mga senior citizen na madalas ay hindi kinikilala ang diskuwentong pinaiiral ng batas at maraming establisimyento ang nagsasamantala hinggil dito na walang pakialam sa kalagayan ng mga senior citizen o nakatatanda.

Dapat nating alalahanin na maraming senior ang halos hindi na nae-enjoy ang 20% discount na kanilang tinatamasa dahil karamihan sa kanila ang maysakit na.

Hindi ba’t may isang siyudad sa Metro Manila na libre ang sine sa mga senior citizen?

Subukan ninyong tingnan sa loob ng sinehan ang mga senior, kadalasan, kung sila ay nasa loob ng sinehan, sila ay nakakatulog lang. Pagdating naman sa pagkain ay halos ayaw silang bigyan ng diskuwento samantalang marami sa kanila ang limitado na lamang ang puwedang kainin dahil puro bawal.

Kaya sana naman sa mga establisimyento na walang pakundangan sa pagkalinga sa ating mga senior citizen ay dapat ninyong isipin na kung tutuusin ay binibigyan talaga ng discount ang mga ito dahil ilang saglit pa ay hindi na nila mapapakinabangan ang diskuwento dahil sa mamamaalam na rin sila.

Dapat nga makonsensya tayo na kung kailan tumanda na ang ating mga kababayan ay saka natin binibigyan ng discount na sana ay noon pa. Kaya sana ay maging aral ang ginawang pagsasampa ng kaso ng Pasig City Prosecutors’ Office laban sa dalawang opisyal ng Marco Polo Hotel sa naturang lungsod dahil sa umano’y paglabag nito sa Senior Citizen’s Law at Consumers Act of the Philippines nang inireklamo ang dalawang ito ng isang senior citizen na pinagkaitan ng naturang hotel ng discount noong Nobyembre 2023 dahil sa naka-promo raw ang booking nito.

Ayon sa imbestigasyon, ang sinampahan ng kaso ay sina Marco Polo Senior Vice President Lily Te Pedrosa at Marco Polo Finance Director Angel Co. Naganap ang insidente sa Marco Polo Hotel-Ortigas, isang five-star hotel sa Pasig City. Tig-P36,000 ang ipinataw na piyansa kina Pedrosa at Co.

Sa isinampang reklamo ni Melinda Rada, nag-check in siya at ang kapatid niyang senior citizen din sa Marco Polo Hotel-Ortigas noong Nobyembre 2023. Nang sila ay nag-check out na, hiningi niya ang kanyang 12% value-added tax (VAT) exemption at ang kanyang 20% discount bilang senior citizen.

Tumanggi ang hotel na magbigay ng discount dahil naka-promo umano sila. Walang maipakitang patunay kay Rada na ang promo ay aprubado ng Department of Trade and Industry (DTI) at base naman sa Consumers Act of the Philippines, kailangan munang kumuha ng sales promotion permit ang sinuman bago nila ito ipatupad.

Karaniwang istilo ito hindi lang ng mga establisimyento kundi maging ng mga restaurant na ayaw magbigay ng diskuwento — na kadalasang sinasabi na nasa ilalim sila ng promo.

Sa puntong ito, madalas ay walang magawa ang ating mga senior citizen dahil iniiwasan din nilang magmukhang kawawa sa paghahabol sa discount kaya karaniwan ay nagiging depensa ito ng mga establisimyento at restaurant para hindi makakuha ng diskuwento ang ating mga senior.

Tinangka nating kunin ang panig ng Marco Polo Hotel-Ortigas sa pangyayaring ito ngunit wala pa itong sagot habang isinusulat ang artikulong ito.

Samantala, hindi na itinuloy ng Starbucks Philippines ang inanunsyo nitong paglimita sa discount na ibinibigay sa mga senior citizen. 

Sa joint hearing ng House Committee on Ways and Means at Senior Citizens nitong nakaraang Miyerkules, humingi rin ng paumanhin ang Starbucks sa pamamagitan ng operations director nito na si Angela Cole.

Ayon kay Cole, tinatanggap ng pamunuan ng Starbucks ang kanilang pagkakamali at humihingi sila ng paumanhin sa maling signage.

Batay sa kontrobersiyal na signage, ang senior citizen discount ay lilimitahan sa isang food item at isang inumin.

Nauna nang nanawagan si Speaker Ferdinand Martin Romualdez ng imbestigasyon kaugnay ng hindi umano tamang diskuwento na ibinibigay sa mga senior citizen at persons with disabilities (PWD).

Kaya sa mga senior citizen at PWD na nakararanas ng parehong insidente sa kamay ng mga mapagsamantalang establisimyento, huwag kayong mag-atubiling umangal at magreklamo dahil mayroon kayong mga kaukulang karapatan bilang mga miyembro ng senior citizen at PWD, at ang mga diskuwentong inyong nararanasan ay hindi limos.

Marahil ay panahon na para magkaroon ng police assistance desk sa loob ng mga shopping mall na tinatauhan ng nakaunipormeng kaanib ng Philippine National Police (PNP) upang maging madali sa mga senior citizen na magsampa ng reklamo sakaling makaranas ng pang-aabuso sa mga restaurant at mall, at mga kauri nito — dahil madalas ay hindi na lumalabas ng shopping mall ang ilang senior citizen para lang maghanap ng presinto at doon ay magharap ng reklamo.   

Kung may PNP assistance desk sa loob ng shopping mall hindi lang mga senior citizen ang makikinabang dahil ultimo masasamang loob na naglipana sa mga mall ay mabilis na maaaksyunan, maiiwas pa sa panganib ang mga senior citizen sa paroo’t parito sa mga presinto habang agad silang mabibigyan ng karampatang solusyon.

Pinagsikapang maipasa sa Senado ang batas na iyan bilang pagkalinga natin sa ating mga senior citizen na karamihan ay walang hanapbuhay at kung meron man ay kulang pa para sa pambili nila ng pang-araw-araw na gamot kaya hindi tamang hiyain at pahirapan ang mga senior citizen.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com