Salamat sa mga taga-Sablayan, Occidental Mindoro

ni Bong Revilla @Anak ng Teteng | Abril 12, 2024

Nakakataba ng puso nang makumpirma nating pormal na nagpasa ng resolusyon ang Sangguniang Bayan ng Sablayan, Occidental Mindoro na idinedeklara ang inyong lingkod bilang adopted son ng naturang bayan. 

Sa isang programa nitong nakaraang Lunes, Abril 8, ay iginawad sa atin ang kopya ng resolusyon nina Mayor Walter “Bong” Marquez, Vice Mayor Edwin Mintu, at iba pang mga opisyales at kawani ng lokal na pamahalaan. Kasama rin sa naturang programa ang punonglalawigan ng Occidental Mindoro na si Governor Eduardo Gadiano.

Sa Resolution No. 2024-SDM335, kinilala at binigyang halaga ang suporta at tulong na ipinakita natin sa nasabing bayan, kasama na rito ang ating pakikibahagi bilang panauhing pandangal sa pagbubukas ng Palarong Panlalawigan ng Occidental Mindoro ngayong taon. 

Kinilala rin sa nasabing okasyon ang “Revilla Law” na inakda ng inyong lingkod na magpapaaga sa pagbibigay ng cash gift sa mga senior citizen. 

Lubos akong nagpapasalamat sa aking mga kababayan sa Sablayan, Occidental Mindoro sa kanilang pagtanggap sa akin bilang adopted son. Isang malaking karangalan ito sa akin at buong buhay kong tatanawin at papahalagahan ang kanilang pagtanggap, pagmamahal, at pagkilala.

Hindi ko akalain na gagawin ito ng mga taga-Sablayan sa akin at hindi ko maisip na nagkaroon ako ng bagong pamilya at damang-dama ko ang pagmamahal na ipinakita nila sa akin.

Isang napakalaking karangalan ang iginawad na ito sa akin dahil sa tuwang-tuwa ang aking buong pamilya at isa itong halimbawa ng mabuting pakikitungo sa ating mga kababayan na palagi kong itinuturo sa aking mga anak.

Lalo pa at tatlo sa aking mga anak ang naglilingkod na rin sa taumbayan at kailangang maging mabuting halimbawa ang tulad nito upang lalo nilang pag-ibayuhin ang malinis na paglilingkod.

Maging biktima man sila ng masamang pamumulitika ay hindi naman matatawaran ang pagtatanggol ng sambayanan na siyang tunay na nakakakita ng tunay na serbisyo ng isang lingkod-bayan.

Hindi na natin kailangang magbuhat ng sarili nating bangko dahil may mga kababayan tayong tunay na nagmamahal sa atin at hindi lang suporta ang kanilang ibinigay dahil itinuring pa nila tayong adopted son.

Matatapos ang aking panunungkulan bilang halal na opisyal ngunit, mananatili akong anak ng Sablayan habang ako ay nabubuhay at habambuhay ko itong tatanawin.

Malaking kalungkutan ang idinulot sa akin nang pumanaw ang aking ama ngunit, kahit paano ay naibsan ang nararanasan kong lungkot dahil isang buong bayan ang nagpadama sa akin ng panibagong pagmamahal.

Kaya taus-puso ang ating pagpapaunlak nang imbitahan tayo ng mga taga-Sablayan na dumalo sa kanilang Palarong Panlalawigan sa Sablayan, Occidental, Mindoro.

Pagdating natin sa Sablayan, bandang alas-12 ng tanghali ay agad tayong sinalubong ng isang masaganang tanghalian sa Siburan Municipal Hall na dinaluhan nina Gov. Gadiano, at ilan pang mayor ng mga karatig-bayan.

Bandang ala-1 ng hapon ay nagsagawa kami ng payout sa Occidental Mindoro, State College, kung saan umabot sa 2,000 benepisyaryo ang nabiyayaan ng tig-P2,000 bawat isa.

Bandang alas-2 ng hapon ay nagsimula na ang opening ng Palarong Panlalawigan at nagbigay tayo ng maikling pananalita na labis na ikinatuwa ng mga residente na walang tigil sa pagpapakuha ng larawan.

Bagama’t napakaraming aktibidades ng araw na iyon noong nakaraang Lunes, Abril 8 ay hindi tayo nakaranas ng pagod dahil sa sobrang init ng pagsalubong sa atin ng mga taga-Sablayan.

Napakarami ng nabuo kong pangarap para sa Sablayan na pakiramdam ko ay sarili ko ng bayan.

Kaya sa mga taga Sablayan — maraming salamat sa pagmamahal!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Eid Mubarak!

ni Bong Revilla @Anak ng Teteng | Abril 10, 2024

Isang mainit na pagbati sa ating mga kapatid na Muslim ngayong araw -- Eid’l -Fitr o Ramadan Eid -- na marka ng pagtatapos ng fasting month ng Ramadan. 

Sadya namang espesyal ang pagdiriwang ngayong taon sapagkat ayon sa mga eksperto ay may kakaibang ipinamalas ang buwan dahil sa total solar eclipse. 

Lumalabas na ang crescent moon na hindi agad nagpakita matapos ang eclipse na naging dahilan ng pagkaantala para makita ang kabuuan ng buwan hanggang kahapon, Abril 9, 2024. 

Ngunit, anuman ang naging resulta sa pag-antabay sa paggalaw ng buwan ay idineklara pa ring regular holiday sa buong Pilipinas ngayong Miyerkules para sa pagdiriwang ng Eid’l Fitr o pagtatapos ng Ramadan, bagay na nangyayari matapos ang isang buwang pag-aayuno sa Islam. 

Sa pamamagitan ng Proclamation 514 ay idineklara ni Pangulong Ferdinand Bongbong Marcos Jr. (PBBM) upang palawakin ang kaalaman tungkol sa paniniwala ng ating mga kapatid na Muslim at tuloy ay maintindihan ng marami pa nating mga kababayan ang napakabanal na araw na ito para sa kanila. 

Una nang inirekomenda ng National Commission on Muslim Filipinos ang ika-10 ng Abril bilang national holiday kaugnay ng okasyon. 

Dahil sa deklarasyon ng regular holiday sa araw na ito, karapatan ng mga empleyadong makakuha ng “double pay” kung sakaling papasok sa araw ng Eid’l Fitr. Makakukuha ng 100% ng kanilang sahod ang mga manggagawang hindi papasok sa naturang araw.

Dagdag na 30% naman ng hour rate sa naturang araw ang makukuha ng mga empleyadong lalampas ng walong oras sa trabaho.

Napapanahon ang proklamasyong ito ni PBBM dahil sa malaking hakbang ng pakikiisa natin bilang Kristiyano para sa mga kapatid na Muslim at maisa-isantabi saglit ang pagkakawatak-watak ng paniniwala. 

Sa ngayon, ang mga tagapamahala ng Manila Golden Mosque ay handang-handa upang alalayan ang mahigit sa 10,000 na mananalangin para sa Eid Al-Fitr na magbibigay hudyat na tapos na ang Ramadan. 

Dahil sa halos mga Katoliko ang nasa Pilipinas, hindi maikakaila na humigit-kumulang 10 porsyento ng 110 milyong populasyon ng bansa ay Muslim na karaniwang naninirahan sa southern island ng Mindanao at sa malaking bahagi ng Sulu. 

Sa pagtatapos ng Ramadan at ang mga kapatid na Muslim sa buong mundo ay ginugunita ang Eid Al-Fitr, marapat lamang na maipakita natin sa kanila ang ating pakikiisa kaya malaking bagay na maideklara itong national holiday. 

Ngayong araw na ito ay inaasahang dudumugin ng mga kapatid nating Muslim ang Manila Golden Mosque, na kilala rin sa tawag na Masjid Al-Dahaba, na may kapasidad na 22,000 mananampalataya. Ang naturang mosque ay pinakamalaki sa buong Metro Manila na tinawag base sa kulay ng naturang istraktura. 

Matapos na maisagawa nila ang taunang ‘moon sighting’ ay ginugunita na nila ngayong araw ang Eid Al-Fitr na kanilang sinisimulan sa panalangin kasunod ng maikling sermon. 

Ngayon ding araw ay inaasahan nila ang pagdagsa ng kapwa nila Muslim at bandang alas-6 ng umaga ay magsisimula na ang mga aktibidades at ang panalangin bandang alas-7 ng umaga. Kaya naman ilang araw nilang inihanda ang pagdarausan ng taunang paggunita.

Itinuturing nilang pinakamahalagang araw ang Ramadan, bilang Muslim pangunahing pagtugon umano sa aral ni Allah na panahon din ng pagbibigayan at pagtulong sa bawat isang mananampalataya. 

Ayon kay PBBM, ang Abril 10 ay ginawang national holiday upang ang umiiral na napakahalagang araw na ito para sa mga kapatid na Muslim ay mabigyang paggalang din ng mga kababayang Kristiyano at maisama na sa sistema ng bawat isa. 

Sa buong bansa, ang Golden Mosque ang pinakamalaking pagdarausan ng Eid Al-Fitr, kasabay ng kaparehong selebrasyon na isasagawa din ngayon sa Rizal Park at Blue Mosque sa Taguig City. 

Ang Eid Al-Fitr ay ang katapusan ng 30-araw na pag-aayuno sa mundo ng mga Muslim kaya masaya nila itong ipinagdiriwang na punumpuno ng pagkakaisa. 

Kung dati-rati ay hindi naiintindihan ng marami nating kababayan ang kahalagahan ng Eid Al-Fitr ngayong proklamadong national holiday ay mauunawaan na ito ng mga hindi Muslim na kababayan na taun-taon na ring makikiisa. 

Kaya sa mga kapatid nating Muslim -- buo ang ating pakikiisa sa paggunita ng Eid Al-Fitr at nawa ay maging matagumpay ang pagkikita-kita at mga kasayahang inyong isasagawa. 

Kasama ng ating mga kababayang hindi Muslim ay nakikiisa kami at nagbibigay respeto sa napakahalagang araw na ito. 

Eid Mubarak!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Ika-82 taon ng Araw Ng Kagitingan at Philippine Veterans Week

ni Bong Revilla @Anak ng Teteng | Abril 8, 2024

Lahat ng mga Pilipino ay iniimbitahang makilahok sa paggunita para sa ika-82 taon ng Araw ng Kagitingan at ng 2024 Philippine Veterans’ Week na pinangungunahan ng Department of National Defense (DND) at ng Philippine Veterans Affair Office (PVAO) na nagsanib-puwersa para sa pag-alala sa taong ito na papatak ng Abril 5 hanggang Abril 11.

Tatawagin itong “Pagpaparangal sa Kagitingan ng mga Beterano: Saligan ng Nagkakaisang Pilipino,” ang aktibidad na ito ay upang bigyang-diin ang kahalagahan ng pagpupugay sa katapangan at pagsasakripisyo ng ating mga beterano — na kung hindi dahil sa kanila ay hindi natin tinatamasa ang kalayaan, na dapat nating pasalamatan at tuloy ay tumimo sa isip ng mga kabataan.

Ang aktibidades ngayong taon ay magsisimula sa pamamagitan ng tradisyunal na Sunrise ceremony na ginanap noong Abril 5, alas-6 ng umaga sa Libingan ng mga Bayani sa Fort Bonifacio, Taguig City.

Sinundan ito ng Wreath-Laying Ceremony bandang alas-7 ng umaga at Review in Honor of the Veterans, bandang alas-9 ng umaga na ginanap naman sa Hunters ROTC Guerilla Field ng Philippine Army Headquarters sa Fort Bonifacio ng siyudad ding nabanggit.

Ang pinakalundo sa paggunita ng veterans’ week ay ang ika-82 taon ng Araw ng Kagitingan na gaganapin bukas, Martes (Abril 9, 2024) ng umaga sa Mount Samat National Shrine, Pilar, Bataan na pangungunahan ni Pangulong Ferdinand Marcos Jr. (PBBM) kabilang din ang wreath-laying ceremony na isasagawa sa Dambana ng Kagitingan upang gunitain ang mga Pilipino at Amerikanong beterano noong Ikalawang Digmaang Pandaigdig. 

Magsasagawa rin ng talumpati si PBBM upang bigyan ng pag-asa ang mga Pilipinong beterano na hindi bumibitaw ang pamahalaan sa pangako hinggil sa kapakanan ng mga ito.

Sa Abril 10 naman ay magkakaroon ng ‘Tribute to all Filipino Heroes’ na tatawaging ‘Paggunita sa Capas’ na isasagawa ganap na alas-9 ng umaga sa Capas National Shrine sa Capas, Tarlac.

Kabilang din dito ang paggunita sa Philippine Veterans Week, na lalahukan naman ng pamilya ng mga beterano sa bansa na gagawin sa Libingan ng mga Bayani para sa Sunset Ceremony sa Abril 11, 2024, dakong alas-5 ng hapon.

Ang seremonya ay kapapalooban naman ng misa at mataimtim na programa kung saan ang mga magsisidalo ay magbabahagi ng kanilang personal na karanasan hinggil sa pagiging beterano at kung paano ito nakaapekto sa kanilang buhay.

Napakarami ng iba’t ibang klase ng pag-alaala ang ating mararanasan sa mga darating na araw kabilang na r’yan ang handog na ‘libreng sakay’ ng pamunuan ng MRT-3 sa loob ng isang linggo para sa lahat ng war veterans sa bansa.

Sa mga lokal na pamahalaan sa iba’t ibang bahagi ng bansa, may kani-kanyang paraan ng isasagawang aktibidad ngunit ang mahalaga ay makiisa tayong gunitain kahit simpleng lingon lamang sa ating mga watawat para alalahanin na minsan, may mga beteranong nagbuwis ng buhay para sa ating lahat.

Hindi basta isang selebrasyon ang paggunita sa Araw ng Kagitingan kung hindi ay pag-alaala sa katapangan ng mga Pilipinong nakipaglaban at nagbuwis ng buhay para sa bayan kahit pa ‘bumagsak’ ang depensa ng bansa sa Corregidor sa Bataan noong Abril 9, 1942.

Nangyari ito noong panahon ng Ikalawang Digmaang Pandaigdig at nais sakupin ng bansang Japan ang mga kaalyado ng Amerika, kabilang ang Pilipinas.

Upang hindi kaagad mapasok ng mga sundalong Hapon ang Maynila, naglagay ng matinding depensa ang bansa sa Corregidor, at kasangga ng mga sundalong Pilipino at mga sundalong Amerikano.

‘Yung Maynila, bago ‘yan madaanan ng mga barko, ay daraan muna ‘yan sa Cavite at Bataan. Sa pagitan ng Cavite at Bataan, nandiyan ‘yung tinatawag na Island of Corregidor.

D’yan malaki ang naging partisipasyon ng ating mga ninuno dahil binigo nila ang mga Hapones na hindi ganap ang pananakop ng todo-todo. Dahil hindi nga nila mailagay ang kanilang supplies sa Maynila.

Kahanga-hanga ang ipinamalas na pagdepensa ng ating mga sundalo sa Corregidor dahil napabagal nila ang pagsakop ng mga Hapones sa bansa.

Ang higit na nakakabilib, marami sa nagtanggol sa Corregidor ay hindi talaga mga tunay na sundalo dahil karamihan ay reservist lamang o mga ordinaryong mamamayan na kulang na kulang sa pagsasanay, ngunit napatagal nila ang laban.

Napatagal nila ang laban dahil pinatatag lamang ng tapang at pagmamahal sa bayan kontra sa mga tunay na sundalo ng Japan. 

Marami sa mga nagtanggol sa Corregidor ay mga reservist na karaniwang mga indibidwal o manggagawa at hindi talaga mga propesyonal na mga sundalo.

Pero noong Abril 9, 1942 ay nakumpirmang bumagsak na ang Bataan at umabot sa 70,000 mga sundalong Pinoy at Amerikano, kung saan naganap ang ‘Bataan Death March’ — nasa 20,000 sundalo ang namatay.

Pinaglakad sila ng mahigit 100 kilometro mula Mariveles, Bataan hanggang sa San Fernando, Pampanga. At saka isinakay at isiniksik sa bagon na papunta sa Camp O’Donnel sa Capas, Tarlac.

Hindi natin ipinagdiriwang ang ‘Fall of Bataan’ ngunit ginugunita natin ito upang alalahanin ang kabayanihan ng marami nating kababayan na nag-alay ng buhay, at sana ay hindi na maulit pa ito sa ating kasaysayan.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com