Publiko, huwag magpadala sa mga black propaganda

ni Bong Revilla @Anak ng Teteng | Sep. 23, 2024

Nakakatuwang malaman na ang nangungunang political party na Lakas-Christian Muslim Democrats (Lakas-CMD) ay isinama ang inyong lingkod sa listahan ng mga opisyal na kakandidatong senador sa 2025 midterm elections.

Sa isang resolusyon na kinandili ng national convention ng partido na isinagawa sa Malacañang, ang inyong lingkod ay nominado bilang nag-iisang kandidato ng Lakas-CMD na kanilang isasabak sa Mataas na Kapulungan ng Kongreso.

Bilang chairperson ng partido ay tinanggap natin ang endorsement at agad nating pinasalamatan si Lakas-CMD President House Speaker Ferdinand Martin Romualdez at ang buong partido dahil sa muling pagtitiwala sa atin.

Hangad ko na patuloy kaming magtutulungan para sa mas maliwanag na kinabukasan ng ating bayan. Ang tiwala na muling ibinigay nila sa akin ay isang responsibilidad na buong puso kong tatanggapin at dadalhin.

Sa ilalim ng liderato ni Speaker Martin, ang aming partido ay mas lalong naging buo at narating namin ang mataas na lebel ng pagkakaisa. Dahil sa kanya, ang aming pananagutan sa aming misyon bilang isang partido ay mas lalong tumibay at lumakas.

Siya ang naging dahilan kung bakit ang Lakas-CMD ang nangungunang partido sa bansa — at dahil diyan ay masasabi kong nasa mabuti akong kamay.

Alam naman ng lahat na simula ng ako ay pumasok sa pulitika — simula pa noong bise gobernador pa lamang ako ng Cavite ay nasa Lakas-CMD na ako — nasa 30 taon na akong miyembro nito.

Mula sa aking unang hakbang sa paglilingkod, ang ating partido ang nagbigay sa akin ng lakas at inspirasyon upang tumindig at magserbisyo. Hindi ko iniwan ang ating samahan, kahit sa mga panahong hindi maginhawa at puno ng pagsubok. Sa bawat laban, sa bawat pagkakataon, I remained steadfast – because I am a loyal soldier of the party, but more importantly, I am a loyal servant of the people. 

Ang Lakas-CMD ay isa sa major political parties na kaalyansa ni Pangulong Ferdinand R. Marcos sa kanyang Partido Federal ng Pilipinas, bilang paghahanda sa susunod na eleksyon.

Napakabilis ng panahon, kamakailan lamang ay kumakandidato tayo, at papalapit na naman ang eleksyon, at ngayon ay hangad natin ang ikaapat na termino sa Senado -- hindi naman tayo nagbutas lang ng upuan sa Senado.

Katunayan ay napakarami nating panukala na naging ganap na batas tulad ng ‘Kabalikat sa Pagtuturo Act’ (RA 11997), ‘Expanded Centenarians Act’ (RA 11982), ‘No Permit, No Exam Prohibition Act’ (RA 11984), ‘Free College Entrance Examinations Act’ (RA 12006), and ‘Permanent Validity of the Certificates of Live Birthday, Death, and Marriage Act’ (RA 11909). 

Napakarami pa nating nakabinbing panukala na hanggang ngayon ay ipinaglalaban natin sa Senado at ayokong amagin na lamang ang lahat ng kapaki-pakinabang kong panukala kung hindi na ako tatakbo sa darating na eleksyon — nakapanghihinayang.

Lalo pa at puro sa kapakanan ng mga overseas Filipino workers (OFWs), mga manggagawa at mga teacher ang kasalukuyan nating tinatrabaho na masasayang kung hindi ako magpapatuloy sa Senado.

Huwag na ring malungkot ang ating mga tagasuporta dahil hindi ko kayo basta iiwan sa ere —ako pa rin ang inyong lingkod-bayan na palaging bibisita sa inyong mga lugar sa oras ng pangangailangan lalo na sa mga sinalanta ng kalamidad, hindi ko kayo matitiis.

Napakarami rin ng umaasa sa atin dahil sa panunungkulan natin sa Senado at hindi ko ito tatalikuran dahil lamang sa ibang plano sa buhay. Inihatid ninyo ako sa Senado kaya hinding-hindi ko kayo tatalikdan.

Sama-sama pa rin nating itatawid ang paparating na eleksyon upang manatili ang ating samahan at mas marami pang batas ang ating maisulong na lahat ay para sa kapakanan ng ating mga kababayan.

Kung paano ako nananatili sa aking partido simula noon hanggang ngayon ay ganyan din ako naninindigan sa aking mga tagasuporta at mga umaasa akin -- kaya hanggang sa dulo ay hindi ko kayo ipagpapalit sa ano pa man dahil kayo ang aking prayoridad.

Ngayon, buong puso kong inaanunsiyo sa inyong lahat na kasama ako sa opisyal na listahan ng Lakas-CMD na pambato bilang senador. Pagkatapos ng filing ng candidacy sa susunod na buwan ay simula na ng kampanya kaya siyempre excited na ang lahat.

Ipagpaumanhin ninyo dahil tiyak na darami na naman ang mga mukha ng kandidato sa iba’t ibang lugar dahil sa mga poster at tarpaulin. Magiging maingay din dahil sa mga campaign jingle ng mga kandidato, pero saglit lang naman ito para makapamili kayo ng inyong iboboto.

Mag-ingat lang sa mga fake news dahil tiyak na may mga masasamang loob na magpapakalat niyan para pagkakitaan at guluhin ang isip ng mga botante!

Huwag magpadala sa mga black propaganda. Tiyak na maglalabasan ang iba’t ibang klase nito --nakakalungkot nga at nagiging kultura na natin ang ganitong klase ng pangangampanya na sobrang dumi na minsan!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Salamat sa pagmamahal at pagtanggap ng mga taga-QC

ni Bong Revilla @Anak ng Teteng | Sep. 20, 2024

Naging matagumpay ang isinagawa nating bloodletting na tinawag nating ‘Dugong Alay, Pandugtong Buhay’ na ginanap sa Amoranto Sport Complex at dinaluhan ng maraming taga-Quezon City kabilang na si Mayor Joy Belmonte at ng kanilang mga lokal na opisyales.

Taun-taon nating pinangungunahan ang paghahandog ng dugo bilang bahagi ng ating kaarawan tuwing ika-25 ng Setyembre upang makaipon ng maraming dugo at tuloy ay makatulong sa mga kababayan nating nangangailangan nito sa oras ng kagipitan.

Tulad ng dati ay nakipagtulungan  ang Chinese General Hospital and Medical Center at Lung Center of the Philippines na silang nanguna sa pagkuha ng dugo sa mga donor.

Nais din nating pasalamatan ang mga regular na nagbigay ng dugo gaya ng mga grupong Alpha Phi Omega, Agimat Riders, AFP, Phil. Marines,  Phil. Navy, Phil. Air Force, BFP, BJMP at PNP.

Ilang ulit na nating napatunayan na malaking tulong ang may ipon tayong dugo dahil sa maraming pagkakataon ay naisasalba natin sa tiyak na kamatayan ang ating mga kababayan na walang makuhang dugo.

Naging panata ko na taun-taon na bahagi ng aking kaarawan ang magsagawa ng bloodletting dahil naranasan ko ang kahalagahan nito lalo pa’t palagi tayong nakadalo sa pangangailangan ng marami nating kababayan.

Noong isang araw, bago naganap ang bloodletting ay binisita rin natin ang mga kababayan natin sa Brgy. Batasan Hills sa Quezon City upang alalayan naman sila at doon ay namahagi tayo ng cash assistance sa pamamagitan ng Assistance for Individual in Crisis Situation (AICS) kung saan tumanggap ng tig-P2,000 ang bawat dumalo.

Bago kami nagtungo sa Amoranto Sports Complex ay namahagi rin kami ng ayuda at nakakataba ng puso dahil mismong si Mayor Joy ay naroon din sa ating pagdiriwang.

Nagbigay tayo ng maikling pananalita at ramdam na ramdam natin ang mainit na pagtanggap ng mga taga-QC. Nais ko ring pasalamatan si Mayor Belmonte nang isigaw niya sa mikropono ang katagang, “Pangako, number one ka (Sen. Bong) sa amin sa Quezon City,” kasunod ng napakahabang palakpakan.

Kaya labis ang aking pasasalamat sa butihing mayor ng QC, habang may ngiti akong natulog dahil sa binitawan niyang salita. 

Kahapon naman, alas-6:15 ng umaga ay lumipad kami patungo sa Tacloban, Southern Leyte, Borongan at Calbayog.

Ganap na alas-7:30 ng umaga ay lumapag kami sa Tacloban City airport at alas-8:00 ng umaga ay nasa People’s Center sa Tacloban City at kasama na si Mayor Alfred Romualdez at namahagi  ng P4M cash assistance sa pamamagitan din ng AICS kung saan tumanggap ng tig-P2,000 bawat residente na dumalo.

Bandang alas-9:30 ng umaga ay nagtungo naman tayo sa Provincial Capitol Gymnasium sa Southern Leyte, Maasin City at doon ay nakasama natin sina Gov. Damian Mercado, Cong. Roger Mercado & Mayor Nino Mercado at namahagi tayo ng panibagong P4M cash assistance at nabahaginan din ng tig-P2,000 bawat residenteng dumalo.

Alas-10:30 ng umaga ay dumiretso kami sa Borongan airport at bumiyahe patungong Eastern Samar, Borongan at doon ay inalalayan kami ni Gov. Ben Evardone, at sa ikatlong pagkakataon ay namahagi kami ng panibagong P4M at nakatanggap din ng tig-P2,000 bawat isa.

Alas-12 ng tanghali ay saglit kaming kumain sa conference hall ng Provincial Capitol ng Borongan City kasama pa rin si Gov. Evardone.

Mga ala-1 ng hapon habang nagpapababa kami ng kinain ay dumalo kami sa groundbreaking ng Medical Arts Bldg. sa Eastern Samar Provincial Hospital kung saan sisimulan na ang proyekto nating ospital.

Ala-1:30 ng hapon ay bumiyahe kami at halos kalahating oras lamang ay nasa Western Samar, Calbayog City at nakasama namin doon si Gov. Sharee Ann Tan.

Mahigit sa 2,000 katao ang inabutan naming naghihintay sa Calbayog Sports Center at muli ay namahagi tayo ng karagdagang P4M sa pamamagitan ng AICS at lahat ay nabigyan natin. 

Lumipad kami pabalik ng Manila at alas-5 ng hapon ay nakauwi na ako sa bahay.

Mahaba pa ang selebrasyon ng aking kaarawan ngunit mas masaya ako na kapiling ko ang ating mga kababayan at kahit paano ay nabigyan natin sila ng pantawid-alalay na ang kanilang mga ngiti at yakap ay malaking ambag sa mga regalong ibinigay sa akin sa mga panahong ito.

Napakarami pa nating lugar na bibisitahin at karaniwang inaanunsiyo ko naman sa pitak kong ito kung saan at kailan kami pupunta. Tumutok lamang para hindi kayo mawala, baka kasi nasa lugar niyo na ako pero hindi niyo pa alam. 

Sa personal kong pagdiriwang sa Setyembre 25 na mismong aking birthday ay wala naman akong malaking selebrasyon, maliban sa pagsasama-sama lang ng buong pamilya at ng aking staff habang balik-trabaho sa pagseserbisyo-publiko.

Pinasasalamatan ko rin siyempre ang mga gobernador, bise gobernadora, mayor at iba pang lokal na opisyal na umalalay sa ating mga pinuntahang lugar. Maraming salamat sa inyo.

Special mention ko lang si Mayor Belmonte dahil ipinaramdam niya sa akin na number one ako sa Quezon City. Hinding-hindi ko makakalimutan ang napakainit na pagtanggap ng mga taga-QC, grabe!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Dadanak ng dugo sa Kyusi sa pagdiriwang ng aking kaarawan

ni Bong Revilla @Anak ng Teteng | September 18, 2024

Nakatakdang dumanak ang dugo ngayong araw, Setyembre 18, mula alas-8 ng umaga hanggang alas-12 ng tanghali na gaganapin sa Amoranto Sports Complex lobby na taunang isinasagawa bilang paggunita sa aking ika-58 kaarawan na tinawag na ‘Dugong Alay, Pandugtong Buhay’.

Makikipagtulungan sa atin ang Chinese General Hospital and Medical Center at Lung Center of the Philippines na silang mangunguna sa pagkuha ng dugo sa mga donor. Inimbitahan natin ang mga donor na regular ding naghahandog ng dugo ang grupo ng Alpha Phi Omega, Agimat Riders, AFP, Phil. Marines, Phil. Navy, Phil. Air Force, BFP, BJMP at PNP.

Inaasahang dadagsa rin ang marami nating tagasuporta na taun-taon ding nagdo-donate ng dugo kabilang na ang mga kaibigan natin sa showbiz, mga supporter at iba pang nais magboluntaryo.

Iniingatan ang mga naipong dugo at ipadadala ito sa mga ka-partner na ospital upang makatulong sa mga kababayan nating walang pambili ng dugo sa oras ng pangangailangan.

Ako mismo ay nagpapakuha ng dugo dahil bukod sa nakakapagdugtong tayo ng buhay, mabuti pa sa kalusugan ang regular na pagdo-donate ng dugo.

Hindi na rin mabilang sa daliri ang mga kababayan nating natulungan dahil sa wala na silang mahagilap na dugo kahit may sapat silang pera, at dumarating talaga ang pagkakataon na nagkakaubusan ng kailangang dugo.

Kaya malaking bagay ang ginagawa nating bloodletting dahil marami ang natutulungan ng proyektong ito na tuwing sasapit ang aking kaarawan ay bahagi na ito ng aking pagdiriwang ‘pag dumarating na ang ika-25 ng Setyembre kada taon.

Last year, umabot sa 550 ang nag-donate ng dugo kung saan ay nakaipon tayo ng 266 bags na pinakinabangan natin buong taon.

Inaasahan nating mas marami ang maghahandog ng dugo ngayong araw lalo pa at marami rin ang nakikipag-ugnayan sa atin bago maganap ang ating bloodletting.

Huwag kayong malilito, ngayon lamang araw na ito isasagawa ang bloodletting, ngunit sa Setyembre 25 pa ang aking birthday, dahil ngayong araw lamang naisaayos ang lahat.

Sa mga wala namang masyadong pinagkakaabalahan today ay maari kayong magtungo sa Amoranto Stadium upang makisaya sa aking kaarawan at tuloy maisali kayo sa talaan ng mga naghandog ng dugo, at prayoridad din kayo sakaling kayo naman ang mangailangan ng dugo o isa sa inyong mga kaanak.

May nakahanda naman tayong pagkain para sa mga magbibigay ng dugo at bibigyan natin sila ng certificate na katunayan ay nag-donate ng blood na maaari nilang magamit kapag sila naman ang nangailangan nito.

Bukod sa pagkain ay may mga giveaway din tayong inihanda na ipapamahagi para sa mga boluntaryong maghahandog ng dugo.

Maraming media ang nakatakdang dumalo sa ating bloodletting upang i-cover ang buong event at inaasahang marami ring media ang magdo-donate ng dugo habang may mga picture taking na magaganap kasama ang dadalong mga celebrity.

Napakaganda ng adhikaing ito na ‘Dugong Alay, Pandugtong Buhay’ dahil kitang-kita ang bayanihan at pagtutulungan ng ating mga kababayan para makaipon ng dugo at magamit sa panahon ng pangangailangan.

Subok na ang proyektong ito na sinimulan natin noong 2017 na tuluy-tuloy hanggang ngayon, at ilang ulit na rin itong napatunayan kung paano tumugon sa mga nangangailangan ng dugo at naitawid ang maraming buhay.

Taun-taong matagumpay ang ‘Dugong Alay, Pandugtong Buhay’ kaya inaasahang magiging matagumpay din ito ngayong araw.

Kaya inaanyayahan ko ang lahat ng ating mga kababayan na may kakayahang maghandog ng dugo ay agad na makipag-ugnayan o magtungo sa Amoranto Stadium para mas marami tayong matulungan.

Bago ang bloodletting, magpapamahagi kami ng cash assistance sa Brgy. Batasan Hills sa Quezon City din upang alalayan naman ang mga nangangailangan nating kababayan at tuloy ay anyayahan ang lahat na may kapasidad na maghandog ng dugo.

Magbibigay tayo ng tig-P2,000 bawat isa sa pamamagitan ng Assistance for Individual in Crisis hanapbuhay (AICS) sa Serbisyong Bayan (SB) Park, Batasan Hills ng QC, na inaasahang aabot sa mahigit 2,000 katao ang mabibiyayaan bago ang bloodletting sa Amoranto Stadium na ilang minuto lang ang layo sa Batasan Hills.

Antabayanan lang ninyo ang iba pang anunsiyo hinggil sa ating mga aktibidades dahil marami pa tayong naka-schedule ng pamamahagi ng cah assistance sa mga lugar sa bansa lalo na sa mga naging biktima ng kalamidad.

Maaari ninyong bisitahin ang ating Facebook account upang magkaroon kayo ng ideya kung saan-saang mga lugar na nakatakda nating bisitahin para mabigyan ng ayuda.

Tulad ng dati ay kasama natin ang staff ng Bayanihan Relief (BR) na palagi nating katuwang sa pamamahagi sa iba’t ibang bahagi ng bansa.

Sa ating mga pag-iikot ay palagi tayong may nakahandang family food packs na ibinibigay sa mga kababayan, bukod pa sa financial assistance at regular natin itong ginagawa simula pa noon.

Bukas ay bibisitahin naman natin ang Tacloban City kasama si Mayor Alfred Romualdez at mamamahagi rin tayo ng financial assistance sa may 2,000 benepisyaryo.

Kasunod nito ay didiretso tayo sa Maasin City, Southern , Leyte at sasalubungin naman tayo nina Governor Damian Mercado, Cong. Roger Mercado at Mayor Nino Mercado para mamahagi rin ng ayuda sa mga residente. 

Abangan ninyo kami sa Amoranto Stadium para sa bloodletting at masaya ito dahil maraming personalidad ang bibisita na nais ding maghandog ng dugo.

Huwag kayong bibitaw sa pagsubaybay sa mga aktibidades natin baka isang araw ay magawi rin kami sa inyong mga lugar. Kita-kits!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com