Sobrang mahal daw kasi ng ticket… CONCERT NG PBB HOUSEMATES, MAS PUNO KESA KINA VICE AT REGINE

ni Ambet Nabus @Let's See | August 12, 2025

Photo: PBB Collab - IG

Grabe ang sigawan, tilian at palakpakan ng mga aliw na aliw na audience ng parehong ACER 2025 Day at Pinoy Big Brother (PBB) The Big ColLOVE Fancon events.

Kumpara raw sa nanlalait na concert ni Vice Ganda with Regine Velasquez, ibang-iba ang kalidad ng production at entertainment values ng mga nabanggit na magkasunod na events last weekend.

In fact, nakasabay pa ng ACER Day ‘yung last night nina Vice at Regine. Nasa MOA ang Acer Habing nasa Araneta naman ‘yung kina Vice last Saturday.

“We were in MOA dahil sa SB19 at kay Sarah G. Grabe ‘yung pagka-world-class ng performances nila. Finally, nakahanap si Sarah ng katapat n’ya sa husay sa sayawan at kantahan. Napaka-coordinated ng lahat sa kanila, from costumes to the stunts. Ibang level ang energy. Ang sarap sa feeling, very positive vibes,” reaksiyon ng mga nakapanood.

“Full packed, jampacked. Solid at literal na filled to the rafters ang crowd. Walang bakanteng upuan at nag-uumapaw pa ‘yung nakatayo,” hirit pa nila.

Bukod nga kina Sarah at SB19, humataw din sa naturang event ang G22 na naikumpara pa sa BINI bilang mas magagaling at magaganda raw. 

Kasama rin sa concert ang KMKZ, si Maki at ang Itchyworms.

At dahil usung-uso nga ang PBB collab housemates, bentang-benta nga raw sina Klarisse de Guzman (na balitang sumegue pa sa Vice Ganda concert that same night), Mika Salamanca, Shuvee Etrata, Esnyr Ranollo, Will Ashley, Brent Manalo, Ralph De Leon, at Charlie Fleming.

“Sobra rin ang naging tilian sa kanila. Si Shuvee, halos solohin na si Stell at hindi binibitawan. Nakakaaliw,” dagdag pa ng mga nag-enjoy sa show.

Kuwela rin daw ang hosting chores nina Robi Domingo at Esnyr Ranollo na tinawag ang tandem nila bilang EsBi, in relation to SB19, na ikinatuwa ng mga ka-Atin (fans ng SB19).

---

THEN last Sunday nga ay turn naman ng Pinoy Big Brother (PBB) Big ColLOVE

Ayon naman sa nakausap nating sources from the Ticketnet group, mas naunang na-soldout ang mga tickets nila kumpara sa two-night event nina Vice at Regine, kaya may mga nagsasabing hindi nga ito ganu’n kalakas. 

Well, naging isyu nga rin kasi ang sobrang mahal na ticket prices ng Vice-Regine concert na halos 1/3 lang ng sa ColLOVE.

to be fair, tinao naman daw ‘yung show nina Vice na sa last night nga ay inabot ng halos 4 hours dahil sa paghihintay marahil sa ibang guest artists (like Klarisse) na dumating at nag-participate. 

“At siguro, dahil na rin sa mahahabang joke parodies and jokes ni Vice,” sey pa ng kilig na kilig na mga concertgoers.

Kinapitalan talaga ang kasikatan ng mga housemates sa nasabing fancon na in all honesty ay punumpuno rin daw ng entertainment at mga bago at fresh na pagmumukha.

Lutang na lutang ang mga names nina Will, Dustin, Brent, River, Mika, Bianca, Shuvee, Vince, Charlie, Esnyr at siyempre pa, si Klarisse, na sumikat talaga after ng PBB. In fact, mukhang mayroong planong gawan ng project ang Pamilya de Guzman (‘yung nabuong family sa PBB with Klang as Mowm) featuring those housemates.

---

MAY nakakaaliw namang tsika ang ilang friends na bahagi ng glam team ni Joshua Garcia.

Pinag-usapan kasi kamakailan ang photos ng guwapong aktor kasama si Maui Taylor.

Aliw na aliw kasi ang mga netizens sa inilagay o ginamit na caption ng isang socmed (social media) follower sa naturang pics.

“Ang itinakdang pagkikita ng ang pinatangkad at ang nagpatangkad,” sey ng caption na ni-like at kinomentuhan pa ni Maui ng “Gusto ko ito.”

Kuwento naman ng mga kaibigan ni Joshua, “Naaliw din si Josh, tangkad. Tawa nga nang tawa at sinabi pang, ‘Totoo naman.’”

Hahaha! Hay, buhay!

Bentang-benta sa fans na relate sa ugali niya… VICE, GAMIT NA GAMIT ANG CONCERT PARA BANATAN ANG MGA PULITIKO AT KALABAN

ni Ambet Nabus @Let's See | August 10, 2025

Photo: Vice Ganda - IG

“Peryang-perya. Masaya, makulit, makulay, mahusay, mapangahas at matapang. Sana lang, kayanin niya ang consequences ng mga aksiyon at salita n’ya,” ang unsolicited advice ng mga nakapanood ng concert nina Vice Ganda at Regine Velasquez kamakailan.

Bukod daw kasi sa usual presentation ng songs and dances ng pagka-Songbird ni Regine at high valued production numbers ng mga guest artists, ‘yung pagiging matalas ni Vice ang naging sentro ng humor na may sarcasm, may political stance at nire-receive naman ng mga tawang-tawang audience.

Gamit na gamit nga raw ni Vice ang mga usapin sa DDS, BBM, Duterte, Pinklawan, Cristy Fermin and company, at mga content creators na diumano’y pinagkakakitaan siya, kasama na ang mga birada sa iba pang isyu ng bayan.

Sey pa ng mga nakapanood, “Sa panahon ngayon na uso ang magbigay ng pahayag at saloobin sa mga isyu, hindi naman naiiba si Vice. ‘Yun nga lang, sana ay ready din siya sa backlash, sa responde o anumang posibleng gawin din sa kanya ng mga tao at grupong ang feeling nila’y nayurakan, na-disrespect at pinagkakitaan din somehow.”

“‘Yung mga taong nandu’n na tumawa at natawa ay bahagi lang ng isang komunidad na nakaka-relate at posibleng may ganu’ng emosyon din na mas matalas at matapang lang na inirerepresenta ni Vice. In fact, pinagtatawanan nila ang sarili nilang kahinaan,” pag-analisa pa ng mga kausap naming mas nangangamba raw sa posibleng consequence ng pagmamatapang ng comedian-host.

“Iba na talaga ang panahon ngayon. Kung nasa era pa tayo ng diktadurya, malamang na literal na ipinakain kay Vice ang mikropono sa inasal n’yang ‘yun,” susog pa ng mga kausap namin.

---

Wala nang bagong maipakita… REGINE, HINAYAAN NA LANG NA LAITIN SIYA NI VICE SA CONCERT

“NAGING dekorasyon na lang. Isang magandang dekorasyon,” pakli naman ng mga naghahanap ng bago kay Regine Velasquez sa naturang concert.

Very obvious daw kasing parang naging VIP guest lang ang Songbird dahil nilamon daw talaga ito nang todo sa kudaan at wit ni Vice Ganda.

At gaya sa isang malaking comedy bar, hinayaan lang umano ni Regine na maging subject din siya ng panlalait, pati ang asawang si Ogie Alcasid para lang mapatawa ang audience.

“‘Yung mga lipad-lipad scene n’ya, napanood na namin ‘yun years ago. ‘Yung boses n’ya, paiba-iba na. May sabit, may garalgal at hindi na kasinglinis ng dati. Kaya marahil ipinaubaya na lang n’ya kay Vice ang malaking portion ng show na ikinagalak ng mga manonood. But as for Regine being the concert queen or so, iba na, pero sulit pa rin

naman,” reaksiyon ng mga nakapanood.

Wish daw sana kasi nilang makita ang Songbird na nag-a-ala-Madonna, Beyonce o kahit man lang daw Sarah Geronimo.

---

HINDI rin nakaligtas sa mga kausap namin ang pansinin ang kakaibang glow at pride umano kay Bea Alonzo na kasama ang BF na si Vincent Co sa Day 2 ng concert nina Vice at Regine.

Pagpasok pa lang daw sa gate ay pinagkaguluhan na ang mga ito at may ilang concertgoers na pinagbigyang mapiktyuran sila at makipag-hi and hello.

Sa ilang beses din daw na napopokus ang mga ito ng giant monitor while enjoying the antics of Vice Ganda or the sweet songs by Regine, halata raw na inlabey sa isa’t isa ang dalawa.

“Pero in fairness kay Bea, ha, nu’ng portion na nilalait ni Vice sina Cristy (Fermin) and co. at binanggit nitong kakampi nila si Bea, nag-smile lang si Bea at may pa-muwestra pa itong tila nagsasaway o gustong sawayin si Vice,” kuwento pa ng kausap namin.

Ang parehong mga sources din ay naaliw sa pagkukumpara sa kanila ni Atasha Muhlach na sa ngayon nga ay nali-link kay Jacob Ang, anak ng SMB top boss na si Ramon Ang.

“Dati, mga pulitiko at artista ang madalas na pinag-uusapang kombinasyon. Ngayon, matataas na tao sa negosyo at mga kaedad lang nila kaya’t bongga,” hirit pa nila.

Anak ni Aga, jackpot sa anak ni Ramon Ang… PAMILYA NINA ATASHA AT JACOB, SAMA-SAMA SA DINNER

ni Ambet Nabus @Let's See | August 10, 2025

Photo: Atasha at Jacob - Circulated / FB

Napanood namin ang pagbabalik-Eat… Bulaga! (EB!) ng baby naming si Atasha Muhlach last Saturday.

Sa portion ng The Clones (TC), masayang nakipagkulitan ang magandang dilag na finally nga ay natapos na sa pagsu-shoot ng kauna-unahan niyang pagbibidahang series sa Viva One, ang Bad Genius (BG).

Mas makulit, mas matabil at mas kuwela ang mga hirit ni Tash na halatang na-miss ang Dabarkads at ang live audience.

Kasabay ng pagbabalik nito ay umugong at lumabas din ang mga photo ng dinner ng pamilya niya kasama ang nali-link ditong anak ni SMB top brass Ramon Ang na si Jacob Ang.

Although medyo last 2 months na namin itong nababalitaan, hindi naman conclusive na magdyowa na sila.

Good friendship daw ang foundation ng lahat dahil may mga common friends silang nakasama nila during their schooling days sa London.

Bongga nga lang dahil pormal at talagang kasali ang mga respective families nila sa kanilang bonding moments, gaya nga ng dinner time.

Ultimo ang big boss na si Sir Ramon ay nagpahayag din ng pagkatuwa sa kaibigan ng anak na inilarawan pa niyang maganda, mabait at responsable.

Bunsong anak ni Sir Ramon si Jacob. Actually, dalawa lang naman ang anak niya at dahil namatay na nga ‘yung panganay, lumalabas na nag-iisa na si Jacob kaya marami ang naiinggit kay Tash, if ever man daw na mag-level-up into something more romantic ang friendship nila.

---

MALUNGKOT ang ‘Tondo Boys’ ng Batang Quiapo (BQ) series na kinabibilangan ng mga character actors, na sa loob ng halos tatlong taon nga ay nagturingan na bilang magkakapatid.

Nang magpaalam nga ang karakter ni Ping Medina, marami rin ang nalungkot kahit aware naman daw silang lahat na anytime soon ay magbaba-bye rin ang bawat karakter.

“Lahat kami ay nagpapasalamat kay Direk Coco (Martin). S’ya talaga ang nagpasimula ng lahat kung bakit mas lumaki ang pamilya namin. Ito nga ‘yung show na malungkot akong aalis,” sey pa ng character actor na anak ng pamosong si Pen Medina na parte rin ng BQ.

Ang bongga nga raw sa naturang extended families nila ay ‘yung suportang ibinibigay ni Coco. Mapa-personal at negosyo, lagi raw nakaalalay ang aktor-direktor sa kanilang lahat.

---

“KAHIT sa mga usaping pulitika o programa para sa nakararami, suportahan kami. ‘Yung tatay-tatayan naming si Pinuno, Sen. Lito Lapid, lagi ring kaming may bukas na komunikasyon,” pakli pa ng tropang Batang Quiapo (BQ).

Sa katunayan nga raw ay madalas din silang nagtatalu-talo sa mga isyu ng bayan.

“Naku! Ibang klase ang diskusyon. May kani-kanyang opinyon talaga, nagbabanggaan, pero hindi kami nagtatapos na magkaaway dahil nandu’n ‘yung pagrespeto,” dagdag pa nila.

Nasentro nga ang topic sa pagboto ng “YES” ni Sen. Lito kamakailan sa usaping pag-archive ng impeachment case laban kay Vice President Sara Duterte.

Sobra raw ang respetong nanatili sa bawat isa kahit pa raw may mga katropa silang taliwas sa naging boto ng tatay-tatayan nila.

“But at the end of the day, nagkakaisa kami sa pagsuporta at paggalang sa naging boto n’ya at inunawa ang kanyang posisyon sa naging desisyon ng Supreme Court at ng buong Senado na nakuha nga ang majority vote. Ganu’n ang demokrasya dapat,” paliwanag pa nila. 

Kaya nga raw sa BQ series ay may subplot ng pulitika para naman daw mai-present ng show ang iba’t ibang realidad sa gobyerno kahit fictional and yet intriguing ang mga karakter.

“Naku! ‘Yung karakter ni Mayor (Albert Martinez) na nabuking nang bading, bongga ang peg n’ya ru’n. Itanong natin kay Direk Joel Lamangan (na bongga ang karakter bilang si Roda) kung s’ya nga ang nag-suggest na gayahin si… (name ng pulitiko),” hirit pa ng makukulit na BQ boys.

Hahaha! Sino’ng may sabi na puro barilan at suntukan lang ang meron ang Batang Quiapo? Usung-uso rin daw ang Maritesan sa kanila. Hahaha!