Gilas Women kinapos na naman, Japan wagi sa FIBA Asia Cup

ni Anthony E. Servinio @Sports | July 15, 2025

Photo: Asia Women's Cup China 2025 - FIBA

Laro ngayong Miyerkules – Shenzhen 1:30 PM Lebanon vs. Pilipinas        

Nilasap ng Gilas Pilipinas ang kanilang ikalawang sunod na talo sa FIBA Women’s Asia Cup China 2025 Division A kagabi sa Shenzhen Sports Center. Nanaig ang Japan sa mga Pinay, 85-82, upang matiyak ang lugar nila sa playoffs.         

Napako ang mga Haponesa sa 83 puntos at bumuhos ng 18 sunod-sunod ang mga Pinay para maging 79-83 at 15 segundo sa orasan. Nakakuha ng foul si Okoye at ipinasok ang dalawang free throw, 85-79, bago bumanat ng three-points si Vanessa de Jesus sabay tunog ng huling busina.

Unang quarter lang nakasabay ang Gilas ang tabla ang laban, 18-18. Biglang rumatrat ng 13 walang-sagot na puntos ang mga Haponesa, 31-18, bago tinapos ng shoot ni Khate Castillo ang quarter, 20-31.

Mula doon ay lalong tinambakan ang mga Pinay at umabot ng 22 sa buslo ni Monica Okoye na nagbukas ng huling quarter, 79-57. Kung may konswelo para sa Gilas, tinakot nila ang Japan.

Namuno sa Japan si Maki Takada na may 20 at Minami Yabu na may 15. Pumantay ang Japan sa Australia sa 2-0 para sa liderato ng Grupo B.

Bumawi si Jack Danielle Animam mula sa kanyang malamyang laro kontra Australia at nagtala ng 24 puntos at 13 rebound. Sumunod sina de Jesus at Naomi Panganiban na parehong may 13 at Sumayah Sugapong na may 12.

Susunod para sa Gilas sa Miyerkules ang kapwa walang panalo Lebanon. Tinambakan ng Australia ang mga Lebanese sa naunang laro, 113-34.         

Mahalaga na manaig sa Lebanon upang maiwasan ang playoff kasama sa huling koponan sa Grupo A at ang matatalo ay bababa sa Division B sa 2027. Ang unang anim ng torneo ay tutuloy sa qualifier para sa FIBA Women’s World Cup 2026 sa Alemanya.

Tropang 5G nauna sa Game 1 Finals

ni Anthony E. Servinio @Sports | July 14, 2025

Photo: Tropang 5G vs SMB - PBA PH

Laro ngayong Miyerkules – Araneta 7:30 PM SMB vs. TNT         

Naitakas ng TNT Topang 5G ang Game One ng 2025 PBA Philippine Cup Finals kontra San Miguel Beer, 99-96, kagabi sa Araneta Coliseum. Subalit ang makapigil-hiningang laro ay nabalutan ng kontrobersya.          

Isinalpak ni Moala Tautuaa ang bola subalit tumalbog ito pero biglang pumasok upang ibigay sa Beermen ng 98-97 lamang at 56 segundo sa orasan. Binalikan ang video ng shoot at nagpasya ang committee na bawian ang buslo at ibalik ang iskor sa 97-96 pabor sa Tropa dahil nakitang hinawakan ni Tautuaa ang ring bago ito pumasok.           

Napilitan bigyan ng foul si Calvin Oftana at ipinasok niya ang dalawang free throw na may tatlong segundong nalalabi, 99-96. Tumawag ng timeout ang SMB pero nagmintis ang three-points ni Cjay Perez.          

Pagtunog ng busina ay sumugod sina Governor Robert Non, Coach Leo Austria at coaching staff sa mga opisyal upang iprotesta ang tawag kay Tautuaa. Naawat ang mga panig bago ito lumaki.           

Malupit na paghabol ang ginawa ng Beermen mula sa 41-61 butas matapos ang dalawang quarter. Nagtulungan sina Perez, Jun Mar Fajardo, Don Trollano at Chris Ross subalit napawalang-bisa ang kanilang itinabaho.          

Bumalik galing pilay si Roger Pogoy at agad naramdaman ang kanyang epekto sa laro sa 23 puntos buhat sa tatlong three-points at dalawang four-points sa loob ng 18 minuto lang at mapiling Best Player. Matalas din ang shooting nina Jordan Heading na may 19 at Calvin Oftana at Brandon Ganuelas-Rosser na parehong may 13.          

Ipinasok ni Fajardo ang 16 ang kanyang 26 sa huling dalawang quarter at humakot ng 15 rebound. Double-double din si Perez na 19 at 11 rebound at nag-ambag ng 13 si Trollano at 10 kay Tautuaa. 

Strong Group 'di pinaporma ang Chinese Taipei sa Jones Cup

ni Anthony E. Servinio @Sports | July 14, 2025

Photo: Strong Group Athletics vs Chinese Taipei - Jones Cup

Laro ngayong Lunes – Xinzhuang Gym 5:00 PM SGA vs. Japan          

Linimitahan ng depensa ng defending champion Strong Group Athletics (SGA) ng Pilipinas sa dalawang puntos lang sa pangatlong quarter ang host Chinese-Taipei A upang magwagi, 67-56, sa simula ng kanilang kampanya sa pangalawang araw ng 2025 William Jones Cup sa Xinzhuang Gym ng New Taipei City. Sunod na haharapin nila ang Japan ngayong Lunes.

Hawak ng Taiwan ang 35-28 lamang matapos ang pangalawang quarter bago ang arangkada ng SGA para baliktarin ang takbo pabaligtad pabor sa kanila, 54-37. Sapat na sapin iyon at kinapos ang tangkang paghabol ng Taiwan sa huling quarter.

Halimaw ang numero ni Andre Roberson na 17 puntos at 19 rebound habang ang kanyang kapwa-import Ian Miller ay nagtala ng 16. Sumuporta si Rhenz Abando na may 11.          

Si Cheng Ying Chun ang nag-iisang Taiwanese na may higit 10 at nagtala ng 14. Siyam lang si Lin Ting Chien. Galing ang mga Hapon sa 86-84 pagtakas sa Qatar para pantayin ang kartada sa 1-1. Noong Sabado ay natalo sila sa Bahrain, 69-85.

Ang Bahrain at SGA na lang mga koponang walang talo matapos ang ikalawang araw ng torneo. Umakyat sa 2-0 ang Bahrain ng magtagumpay sila sa Chinese-Taipei B, 71-63.