Fastest non-binary may awards sa 2026 Pride Run

ni Anthony E. Servinio @Sports | May 15, 2026

Photo: Magbabalik ang Runrio Pride Run sa SM Lanang (Hunyo 7), Seaside City (14) at MOA (21) hatid ng SM Supermalls. Kasama sa paglunsad ng bonggang takbuhan sina Patricia Domingo ng Mogu Mogu, Joaquin San Agustin ng SM, Coach Rio dela Cruz ng Runrio at Thysz Estrada ng PANTAY. (A. Servinio)

Magbalik sa ikatlong sunod na taon ang pinakabongga at pinakamakulay na Runrio Pride Run. Aapaw ang kasiyahan sa SM Lanang sa Hunyo 7, Seaside City sa 14 at MOA sa 21.

May malaking pagbabago ngayong 2026 at hiwalay na kikilalanin ang pinakamabilis na lalake, babae at kasama na ngayon ang mga non-binary. Sa unang dalawang edisyon ay umakyat sa entablado ang ipinagsamang Top 10 na kahit anong kasarian.

Ayon kay Coach Rio dela Cruz, hindi muna bibigyan ng gantimpalang salapi ang mga non-binary at pagkilala ito sa kanilang naabot. Maaaring ipatupad ang bagong kategorya sa ibang mga parating na karera ng Runrio.

Pangalawa, dahil patuloy ang pagtaas ng dami at kalidad ng mga mananakbo ay magkakaroon na ng 16 kilometro. Gaganapin pa rin ang mga kinagawiang karera sa 10, lima at tatlong kilometro at isang kilometro kasama ang alagang aso.

Isa pang pagbabago ay ang pagtatakda ng mga pampublikong ensayo bago ang mga yugto. Magkakaroon din ng costume contest, pinakamalaking delegasyon at virtual run para sa mga hindi makakarating sa takdang araw at lugar.

Kaakit-akit ang disenyo ng singlet, bandana at medalya at dagdag t-shirt para sa magtatapos sa 16 kilometro. Ilang mapapalad na kalahok ay makakakuha ng kakaibang medalya na tiyak pag-aagawan.

Napiling advocacy partner ang PANTAY. Noong 2025 ay tumanggap ang NGO na sumusulong sa karapatan ng LGBTQIA+ ng ₱200,000 at tinatayang aakyat ito sa ₱500,000.

Matapos ang tatlong taon, ang Pride Run na hatid ng SM Supermalls at Mogu Mogu ay hindi lang paligsahang pisikal. Simbolo na rin ito ng patuloy na paglaban para sa pantay na karapatan at respeto sa lahat ng kasarian.                  

Thunder diretso sa West Final, Lakers inilaglag

ni Anthony E. Servinio @Sports | May 13, 2026

Photo: Dilat na dilat sa pag-uunahan na makakuha ng bola sina Oklahoma City Thunder guard Shai Gilgeous-Alexander (2) at Los Angeles Lakers forward LeBron James (23) sa second half ng 2026 NBA Playoffs. (Jayne Kamin-Oncea-Imagn Images)

Laro ngayong Miyerkules - Frost Bank

8:00 AM Minnesota vs. SA

Winakasan ng World Champion Oklahoma City Thunder ang kampanya ng Los Angeles Lakers, 115-110 at tumuloy sa Western Conference Finals ng 2026 NBA Playoffs kahapon sa Crypto.com Arena. Sa East, buhay na buhay ang Cleveland Cavaliers sa 112-103 panalo sa bisitang Detroit Pistons .

Sa gitgitang katapusan, isinalpak ni Chet Holmgren ang bola upang ibalik ang lamang sa OKC na may 33 segundong nalalabi, 111-110. Biglang nagmintis ang Lakers na nagbunga ng mga paniguradong free throw nina MVP Shai Gilgeous-Alexander at Ajay Mitchell para isara ng maaga ang seryeng best-of-seven, 4-0.

Nagtapos na may 35 puntos si SGA habang 28 si Mitchell. Nagdagdag ng 16 si Holmgren.

Nahanap ni Donovan Mitchell ang kanyang shooting at umapoy para sa 39 ng kanyang 43 sa huling dalawang quarter at pinantay ng Cavs ang serye, 2-2. Kasama rito ang puntos na nagtayo ng 98-77 agwat sa huling 9 na minuto at kinapos ng panahon ang paghabol ng Pistons.

Sumuporta si James Harden na may 24 at 11 assist at Evan Mobley na may 17 para sundan ang 116-109 tagumpay sa Game 3. Nagtala ng 24 si reserba Caris LeVert para sa Detroit.

Babasagin ng San Antonio Spurs at bisitang Minnesota Timberwolves ang kanilang 2-2 tabla sa kabilang West Semifinals ngayong Miyerkules. May mahabang pahinga ang OKC bago malaman ang kanilang sunod na makakalaro sa dalawang koponan.

East finalist ang Knicks, pantay ang T'wolves, 2-2

ni Anthony E. Servinio @Sports | May 12, 2026

Photo: Binubundol ni New York Knicks' Karl-Anthony Towns, (kaliwa) si Philadelphia 76ers' Joel Embiid sa laro nilang ito sa NBA basketball playoff series kahapon. (AP/Matt Slocum)

Laro ngayong Martes

8:00 AM Detroit vs. Cleveland

10:30 AM OKC vs. LA Lakers

Winalis ng New York Knicks ang malamyang Philadelphia 76ers, 144-114 at pumasok sa Eastern Conference Finals ng 2026 NBA Playoffs kahapon sa Xfinity Mobile Arena. Pinantay sa 2-2 ng Minnesota Timberwolves ang kanilang serye sa San Antonio Spurs, 114-109.

Ibinalik ni kabayan Dylan Harper ang lamang sa Spurs, 101-100, pero sinagot ito ng mga shoot ni Rudy Gobert at Anthony Edwards para maagaw ang T-Wolves ang bentahe na may 2 minutong nalalabi, 107-101. Siniguro ng free throw ni Ayo Dosunmu at pandiin na buslo ni Naz Reid ang resulta sa gitna nga pagpalag nina Harper at Julian Champagnie.

Uminit para sa 36 si Edwards. Sumuporta si Reid na may 15 at Jaden McDaniels na may 14.

Malaking dagok sa Spurs ang pagpapalabas kay Victor Wembanyama sa pangalawang quarter nang masiko niya sa bandang balikat si Reid. Sinikap buhatin ang koponan nina Harper at De'Aaron Fox na parehong may 24.

Puro Knicks ang nagsulat ng kuwento sa 43 puntos sa unang quarter pa lang. Umabot ang agwat sa 128-84 matapos ang limang sunod na puntos ni Jose Alvarado at "nagpahinga" na ang NYK sa nalalabing 9 na minuto.

Unang quarter pa lang ay doble-pigura na sila at nagtapos na may 25 si Miles McBride at 22 si Jalen Brunson kahit umupo sila sa buong huling quarter. Tig-17 sina Mikal Bridges at Karl-Anthony Towns para wakasan ang seryeng best-of-seven, 4-0.

Ito ang pangalawang sunod na taon na pasok ang Knicks sa East Finals. Habang naghihintay ng kalaro ay may panahon silang magpahinga lalo na si OG Anunoby na napilay ang singit, dahilan na lumiban siya sa huling dalawang laro.