Serrano at Caluya mga kampeon sa Earth Run

ni Anthony E. Servinio @Sports | December 15, 2025

Photo: Nagkampeon sa 25km run sina Aldrin Serrano at Anisha Caluya sa Takbo Para sa Kalikasan Earth Run na nagsimula at nagtapos sa Quirino Grandstand kahapon.    (Gen Villota)

Bumida sina Aldrin Serrano at Anisha Caluya sa Earth Run, ang ika-apat at huling yugto ng seryeng Takbo Para Sa Kalikasan 2025 kahapon umaga sa Quirino Grandstand. Lumipas muli ang isang taon ng pagsulong sa pag-alaga sa Inang Kalikasan at kalusugan ng katawan.

Umoras si Serrano sa tampok na 25 kilometro karera sa kahabaan ng Roxas Boulevard sa dominanteng 1:44:00. Ito malapit na sa 10 minutong agwat sa pumangalawang si Richard Romero (1:53:31) at pangatlong si Ramil Nucup (1:56:53)

Sa kabaihan, madaling nakuha ni Caluya ang kampeonato sa 2:03:38. Sumunod sina Angeline Limbaco (2:20:00) at Diana Grace Galindez (2:21:53).

Sa 10 kilometro, nagpakita ng sportsmanship si Jay Fernandez at kusang ibinigay ang panalo kay Mark Biagtan. Sabay silang tumawid sa 36:12 at pangatlo si Crifankreadel Indapan sa 38:23.

Walang duda na si Jessica Blakeley ang bida sa mga babae sa 47:24. Sinundan siya nina Carizza Joy Sotalbo (50:34) at Sheila Hernandez (53:02).

Pinakamabilis sa limang kilometro si Neil Christopher Maramba (17:42), King Agas (17:43) at Rhainer Simbajan (20:08). Umakyat din sa entablo sina Syzel Gabriel (24:36), Jhazelyn Lapuz (25:31) at Rona Amad (32:28).

Ihahayag ng Green Media Events ang kalendaryo ng TPSK sa 2026. Ang BULGAR ay nagsilbing media partner ng serye at nakatanggap ng plaque of appreciation mula sa organizer ng GME na tinanggap ng cute na mascot na si Bulgarito.

Gilas tinuluyan na ang Guam sa world qualifiers

ni Anthony E. Servinio @Sports | December 1, 2025

Photo: Naging mahigpit ang depensa ng Guam team pero hindi nagpasindak ang dugong Pinoy na si CJ Perez ng Philippine Gilas Pilipinas para sa kanilang umaatikabong aksyon para sa FIBA Basketball World Cup 2025 Qualifiers na ginanap sa Ateneo Gym, Katipunan Quezon City. Photo: Reymundo Nillama (FIBA Basketball World Cup 2025 Qualifiers @ Ateneo Gym, Katipunan Quezon City. Gilas Pilipinas VS Guam-Dec 1, 2025)

Winalis ng Gilas Pilipinas ang kanilang serye kontra Guam, 95-71, sa pagtatapos ng unang window ng FIBA World Cup Qatar 2027 Asia-Oceania Qualifiers sa napunong Blue Eagle Gym sa loob ng Ateneo de Manila.

Nanigurado agad ang Gilas at itinatak ang kalidad sa mga palabang bisita. Nagwakas ang unang quarter sa 32-15 salamat sa magandang laro nina Dwight Ramos at Scottie Thompson. Pinatuloy ng mga reserba ang atake at umabot ng 47-20 ang pagitan.

Nanguna muli sa atake sina Justin Brownlee na may 20 at Dwight Ramos may 17. Nag-ambag ng 10 si reserba Chris Newsome. Humugot ng 27 ang Guam kay Jericho Cruz at 23 kay Takumi Simon buhat sa pitong tres. May 10 at 17 rebound si Jonathan Galloway.

Sumosyo ang Gilas sa liderato ng Grupo A kasama ang kapwa perpektong Australia sa 2-0. Umulit ang Boomers sa host Aotearoa New Zealand, 79-77, sa kasabay na laro sa Wellington. Susunod para sa Gilas ang pagbisita ng New Zealand sa Pebrero 26 at Australia sa Marso 1, pareho sa MOA Arena.

Ang mga Pinoy ang dadalaw sa Tall Blacks sa Hulyo 3 at Boomers sa 6.   Bago ang laro pinarangalan si Japeth Aguilar dahil ito na ang kanyang huling laro sa pambansang koponan. Tumanggap siya ng naka-kuwadra niyang uniporme mula Kay SBP Presidente Ricky Vargas at PSC Chairman Patrick Gregorio.

Saipuddin at Tambilo kampeon sa 21-km ng TPSK Air Run 3rd leg

ni Anthony E. Servinio @Sports | November 18, 2025

Photo : Kampeon sa 21km ng TPSK Air Run si Julmaddin Saipuddin habang pinakamabilis sa 5km si Jaren Ganan sa 3rd leg series na idinaos sa MOA, Pasay City. BULGAR ang official media partner ng Takbo Para sa Kalikasan. (fbpix)

Kinoronahan si Julmaddin Saipuddin bilang kampeon sa Half-Marathon ng Air Run, ang pangatlong yugto ng serye ng Takbo Para Sa Kalikasan 2025, sa MOA.  

Mahigit 6,000 mananakbo ang sumagot sa hamon na isulong ang pag-aalaga sa Inang Kalikasan na pangunahing layunin ng karera.

Umoras si Saipuddin ng 1:20:39 sa 21.1 kilometro na umikot sa Roxas Boulevard.  Pumangalawa si Neil Kristopher Maramba (1:21:51) na isang segundo lang ang agwat sa pumangatlong si Mark Biagtan (1:21:52).

Sa panig ng kababaihan, pinakamabilis si Marilee Tambilo sa 1:47:18.  Malayong pangal6awa si Rachel de Guzman (1:59:26) at pangatlo si Diana Grace Galindez (2:03:10).

Sa 10 kilometro, nanaig si Mark John Castro (36:44), Jun Faduhilao (40:02) ay Crifankreadel Indapan (40:05).  Sina Dennese Lagac (54:18), Marikit Gomez (54:36) at Carizza Joy Sotalbo (54:57) ang umakyat sa entablo sa kababaihan.

Wagi sa limang kilometro sina Jaren Ganan (16:48), King Agas (17:20) at Kean Gutierrez (19:00).  Kampeon sa kababaihan sina Seande Gallardo (22:50), Kamille Mendoza (26:58) at Asher Dabu (27:00).

Ang ika-apat at huling yugto ng TPSK -Earth Run - ay sa Disyembre 14 sa Quirino Grandstand kung saan 25 kilometro ang pangunahing karera.  Ang BULGAR ang opisyal na media partner ng serye at namigay ng tubig mula sa Maynilad at mga diyaryo sa mga tumakbo kasabay ng paglahok ng ilang mga ka-BULGAR.

Abangan din ang isa pang handog ng Green Media Events na UTOL Family Fun Run sa Disyembre 7 sa Luneta.  Tampok ang 16, 10 at limang kilometro.