Ginanahan sa sigaw na MVP ng fans, SGA tumaga ng 2-0

ni Anthony E. Servinio @Sports | May 24, 2025

Photo: Shai Gilgeous-Alexander - Oklahoma City Thunder - IG

Sabay-sabay sumisigaw ng “M-V-P” ang mga tagahanga sa Paycom Center at nagtulak ito sa bagong-hirang na MVP Shai Gilgeous-Alexander at Oklahoma City Thunder na humarurot sa 118-103 panalo sa bisitang Minnesota Timberwolves kahapon. Hawak na ng OKC ang nakasasindak na 2-0 lamang sa 2025 NBA Western Conference Finals at lilipat na ang serye sa Target Center para sa susunod na dalawang laro sa Linggo at Martes. 

Tulad ng Game 1 na nagtapos sa 114-88, humataw ang todo ang Thunder sa pangatlong quarter. Biglang lumobo ang kanilang 58-50 lamang sa simula ng nasabing quarter sa 93-69 sa likod ng 11 puntos ni SGA bago humabol ng shoot si Anthony Edwards para isara ang quarter. 

Itinatak ni SGA ang kalidad bilang MVP sa kanyang 38 puntos.  Umani siya ng malaking tulong kay Jalen Williams na may 26 at 10 rebound at Chet Holmgren na may 22. 

Apat na beses lang nahawakan ng Timberwolves ang lamang at ang huli ay 37-36 noong pangalawang quarter. Nagawa nilang ipilit ang 45-45 tabla pero lumayo ng tuluyan ang OKC sa mga buslo nina Isaiah Hartenstein at SGA at ilatag ang pundasyon para sa malupit na pangatlong quarter.

Nanguna sa Minnesota si Edwards na may 32 habang may 22 si Jaden McDaniels.  Hinanap ang opensa ni Julius Randle na nalimitahan sa anim lang matapos ang 28 sa Game 1.

Samantala, sisikapin ng ganadong Indiana Pacers na tumbasan ang 2-0 bentahe ng OKC sa pagharap nila sa New York Knicks sa Game 2 ng East Finals ngayong Sabado sa Madison Square. Naisahan ni Tyrese Haliburton ang mga dating kakampi sa Team USA noong 2023 FIBA World Cup sa MOA Arena na sina Jalen Brunson, Josh Hart at Mikal Bridges patungo sa 138-135 himalang overtime tagumpay sa Game 1 noong Huwebes.  

Pacers inagaw ang Game 1 vs. Knicks sa East Finals

ni Anthony E. Servinio @Sports | May 23, 2025

Photo: Dinumog si Indiana Pacers guard Tyrese Haliburton (0) ng teammates habang nakaaktong hawak ang leeg matapos ang winning shot laban sa New York Knicks sa pagtatapos ng regulation period para makuha ang Game 1 ng NBA basketball Eastern Conference final kahapon sa New York.  (AP Photo/Adam Hunger)

Naglabas ng nakahihilong huling hirit ang bisitang Indiana Pacers sa overtime upang maagaw ang Game 1 ng 2025 NBA Eastern Conference Finals laban sa New York Knicks, 138-135, kahapon sa Madison Square Garden. Kasabay nito ay iginawad ang 2025 MVP kay Shai Gilgeous-Alexander ng numero unong Oklahoma City Thunder.

Ibinalik ng buslo ni Andrew Nembhard ang lamang sa Pacers, 136-135, at 27 segundo ang nalalabi sa overtime. Itinapon ng Knicks ang bola na nagresulta sa dunk ni Obi Toppin para dagdagan ang agwat, 138-135, at nagmintis ang mga tres nina Jalen Brunson at Karl-Anthony Towns sabay ubos ng oras. 

Sinayang ng Knicks ang 111-94 lamang na may 6 na minuto pa sa huling quarter at humabol ang Indiana. Ipinilit ni Tyrese Haliburton ang karagdagang 5 minuto sa three-points kasabay ng busina, 125-125.

Nagtapos na may 31 puntos at 11 assist si Haliburton habang 30 si Aaron Nesmith.  Nagtala ng pito sa kanyang 15 sa overtime si Nembhard. Nawalan ng bisa ang 43 ni Brunson at 35 ni KAT. Ang Game 2 ay sa Sabado sa parehong palaruan at gagawin ng Knicks ang lahat para makaiwas na bumaba sa 0-2 sa seryeng best-of-seven. 

Ito ang unang MVP ni SGA na nagtala ng 32.7 puntos at 6.4 assist sa 76 laro na pinakamataas sa 7 taon sa liga at tinalo ang iba pang nominado Nikola Jokic ng Denver Nuggets at Giannis Antetokounmpo ng Milwaukee Bucks. Siya ang pangatlong Thunder na MVP matapos sina Kevin Durant (2014) at Russell Westbrook (2017). 

Taga-Canada ang bagong MVP at patuloy na ang parangal ay napunta sa isang banyaga matapos ang huling Amerikano James Harden ng Houston Rockets noong 2018.  

Saglit lang malalasap ang karangalan at sasabak ang OKC sa Game 2 ng West Finals ngayong araw sa Paycom Center laban sa bisitang Minnesota Timberwolves. Nagwagi ang Thunder sa Game 1. 

Thunder ginisa agad sa West Finals ang T'wolves

ni Anthony E. Servinio @Sports | May 22, 2025

Photo: Kapuna-punang nakalalamang sa atletismo ang Oklahoma City Thunder sa pangunguna ni Shai Gilgeous Alexander kaysa sa Minnesota Timberwolves sa Game 1 ng Western Conference Finals kahapon. (nba.com)

Bumomba ng todo ang numero unong Oklahoma City Thunder sa huling dalawang quarter upang mabigo ang bisitang Minnesota Timberwolves, 114-88 sa Game 1 ng 2025 NBA Western Conference Finals kahapon sa Paycom Center. Walang ipinakitang kapaguran ang OKC na kagagaling lang sa malupit na 125-93 Game 7 panalo laban sa Denver Nuggets noong Lunes. 

Tumalon ang Timberwolves sa 47-38 bentahe bago ang huling minuto ng 2nd  quarter sa likod ng 12 puntos ni Anthony Edwards. Tinabasan nina Shai Gilgeous-Alexander, Jalen Williams at Isaiah Joe ang agwat para lumapit, 44-48 at bitbitin ang bagong-tuklas na lakas sa 3rd quarter.

Doon na rumatrat ng 12 si SGA at dumagdag ng 9 si Williams upang maagaw ang lamang at lumayo papasok ng huling quarter, 76-66. Hindi na nagpreno ang Thunder at ang huling talaan ay siya ring pinakamalaking bentahe ng laro. 

Pinangunahan ni SGA ang lahat sa kanyang 31, ilan dito laban sa depensa ng kanyang pinsan Nickeil Alexander-Walker. Sumuporta si Williams na may 19 at Chet Holmgren na may 15. 

Nalimitahan si Edwards sa 18 lang subalit mas malaking dagok ang hindi niya pagpuntos sa huling quarter. Nanguna sa Minnesota si Julius Randle na may 28. 

Magbubukas ang East Finals ngayong Huwebes sa pagbisita ng Indiana Pacers sa paboritong New York Knicks. Maliban sa bentahe na paglalaro sa tahanan ng Madison Square Garden, tinalo ng Knicks ang Pacers sa dalawa ng tatlo nilang tapatan ngayong taon. 

Huling nakapasok ang Knicks sa East Finals noong 2000 kung saan tinalo sila ng Pacers sa anim na laro. Inabot ng 25 taon bago mabigyan ang New York ng pagkakataon na bawian ang karibal na matapos ang serye ay tinalo ng Los Angeles Lakers sa Finals, 4-2.