NISPEROS NG NU BULLPUPS AT UST, SUMIKLAB SA HS VOLLEYBALL
PINATAOB ng defending four-time girls champion National University ang Adamson University, 25-19, 25-18, 31-29, upang paabutin ang kanilang winning run hanggang pitong games sa UAAP Season 81 high school volleyball tournament sa Far Eastern University-Diliman Gym.
Umiskor si Faith Nisperos ng 14 na puntos lahat galing sa attacks kasunod si reigning MVP Mhicaela Belen ng 13 hits, bukod pa sa 7 digs at 4 na receptions upang pangunahan ang Junior Lady Bullpups.
Nagtapos na topscorer si Kate Santiago na tumapos na may 9 na puntos para sa Baby Falcons.
Nakahugot ang University of Santo Tomas ng pinagsamang 18 puntos mula kina Renee Lou Penafiel at Imee Hernandez upang pangunahan ang 25-22, 25-11, 25-10 panalo nila kontra University of Philippines Integrated School.
Sanhi ng tagumpay, tumabla sila sa Adamson University sa ikatlong posisyon hawak ang markang 5-3, panalo-talo. Napayukod ng De La Salle-Zobel ang UPIS, 25-15, 25-16, 25-19, sa simula ng second round noong Sabado sa Blue Eagle Gym para umangat sa ikalawang puwesto hawak ang markang 5-2.
Nagsalansan si Alexis Miner ng 13-puntos para pangunahan ang FEU-Diliman sa paggapi sa UE, 25-19, 25-15, 25-17, na nag-angat sa kanila sa patas na markang 4-4.
Samantala sa boys division, iginupo ng NU ang titleholder UST, 25-18, 25-20, 32-30 at Adamson University, 12-25, 25-22, 19-25, 25-22, 15-13 para manatiling walang talo matapos ang siyam na laro.
Matapos matalo, 26-28, 24-26, 25-27 sa UE, bumawi ang FEU-Diliman sa pamamagitan ng 23-25, 25-16, 25-27, 25-14, 15-9 paggapi sa La Salle-Zobel upang umangat sa ikalawang puwesto hawak ang 7-2 baraha.
Samantala, pinadapa ng UE ang UPIS, 25-9, 25-22, 25-17 para makapagsolo sa ikatlong puwesto hawak ang 6-3, panalo-talong marka kasunod ang Tiger Cubs at Baby Falcons na tabla sa 5-4 na baraha. (VA)
Comments