Israel at Hezbollah, nagkasundo sa tigil-putukan sa tulong ng US at France

ni Angela Fernando @World News | Nov. 27, 2024

Sa larawang ito sa Tel Aviv, ay makikita sina US President Joe Biden (kaliwa) at Prime Minister Benjamin Netanyahu. (October 18, 2023) File Photo: Haim Zach / GPO

Magkakabisa ngayong Miyerkules ang tigil-putukan sa pagitan ng Israel at ng Iran-backed Hezbollah matapos tanggapin ng magkabilang panig ang kasunduan na binuo ng United States (US) at France, ayon kay Pangulong Joe Biden.

Naglalayon ang kasunduang ito na tapusin ang labanan sa pagitan ng Israel at Lebanon na kumitil ng libu-libong buhay simula nang pumutok ang Gaza war nu'ng nakaraang taon.

Ipinaalam ni Biden na nagbigay ng pag-apruba ang security cabinet ng Israel sa kasunduan sa botong 10-1.

"This is designed to be a permanent cessation of hostilities," saad ni Biden.

Samantala, sa kanyang pahayag mula sa White House, sinabi niyang nakipag-usap siya kay Punong Ministro Benjamin Netanyahu ng Israel at pansamantalang Prime Minister Najib Mikati ng Lebanon.

Nakatakdang magwakas ang labanan sa ganap na alas-4 ng umaga (0200 GMT).

Biden at Macron, iaanunsyo ang tigil-putukan sa Israel at Hezbollah

ni Angela Fernando @Overseas News | Nov. 26, 2024

Photo: Sina United States (US) Pres. Joe Biden at French Pres. Emmanuel Macron - File-Jim Watson / The Associated Press

Inaasahan si United States (US) Pres. Joe Biden at French Pres. Emmanuel Macron na mag-anunsyo ng ceasefire sa pagitan ng Hezbollah at Israel sa lalong madaling panahon, ayon sa apat na matataas na opisyal ng Lebanon.

Nagpahayag si White House national security spokesperson John Kirby sa Washington, na malapit na ngunit nilinaw na hindi pa tapos ang pag-uusap ukol sa ceasefire.

Ayon naman sa French presidency, malaki na ang naging progreso ng mga pag-uusap tungkol sa tigil-putukan.

Samantala, isang mataas na opisyal mula sa Israel ang nagsabi na magpupulong ang gabinete ng Israel ngayong Martes, upang aprubahan ang kasunduan sa ceasefire.

Gayunman, kahit may mga senyales ng diplomatic breakthrough, patuloy pa rin ang malalakas na airstrike ng Israel sa mga suburb ng Beirut na kontrolado ng Hezbollah, bilang bahagi ng kanilang pag-atake na sinimulan nu'ng Setyembre kasunod ng halos isang taon ng mga labanan sa mga borders.

Tumanggi naman ang opisina ni Prime Minister Benjamin Netanyahu na magkomento ukol sa mga ulat na nagsasabing sinang-ayunan na ng parehong Israel at Lebanon ang nilalaman ng kasunduan.

UAE inaresto ang 3 suspek para sa pagpaslang sa isang Israeli

ni Angela Fernando @Overseas News | Nov. 25, 2024

Photo: Si Rabbi Zvi Kogan, Chabad supervisor ng kosher kitchens sa UAE, taong 2021. Times of Israel / Lazar Berman

Inaresto ang tatlong indibidwal sa United Arab Emirates (UAE) kaugnay sa sinasabing pagpatay sa isang Israeli citizen, ayon sa pahayag ng Emirati Interior Ministry kamakailan.

Hindi binanggit sa pahayag ng ministeryo ang mga detalye tungkol sa mga suspek o kung sila ay kinasuhan, ngunit sinabi nitong gagamitin ang lahat ng legal na hakbang upang tugunan nang tama ang anumang aksyon o pagtatangkang nagbabanta sa tibay ng lipunan.

Binigyang-diin ng opisina ni Israeli Prime Minister Benjamin Netanyahu ang pagpatay kay Rabbi Zvi Kogan, 28, bilang karumal-dumal at teroristang aksyon. Sinabi rin ng Israel na gagawin nila ang lahat ng kanilang makakaya upang maparusahan ang mga responsable.

Ayon sa mga lokal na otoridad, si Kogan ay isang residente ng UAE at mayroong Moldovan nationality.

Nagtatrabaho siya sa New York-based na Orthodox Jewish Chabad movement at unang iniulat na nawawala nu'ng Huwebes. Natagpuan naman ang kanyang katawan nu'ng Linggo.