Bigyang-pansin ang kaligtasan ng kabataan at kababaihan ngayon pandemic

ni Kuya Win Gatchalian - @Win Tayong Lahat | August 10, 2021

Ngayong ipinatutupad muli ang Enhanced Community Quarantine (ECQ) sa Kalakhang Maynila at iba pang lugar sa bansa, hinihimok ng inyong lingkod ang mga awtoridad na maging alerto sa posibleng paglobo ng mga kaso ng karahasan laban sa kabataan.

Matatandaang noong nakaraang taon ay tinukoy ng grupong Save the Children ang datos ng Philippine National Police (PNP) na nagpapakitang dumami ang mga krimen laban sa mga kababaihan at kabataan noong magpatupad ng ECQ noong 2020.

Noong Abril 30, 2020, pumalo sa 1,284 ang bilang ng kasong naitala ng PNP, kung saan mahigit 500 dito ay mga bata at higit 700 ay laban sa kababaihan. Umakyat naman ito sa 3,600 noong Hunyo 4, 2020, kung saan higit 1,700 ang mga kaso laban sa kabataan at halos 2,000 naman sa kababaihan.

Nang ipatupad ang mga lockdown noong nakaraang taon, nakita natin ang paglobo ng mga kaso ng karahasan sa kababaihan at kabataan. Nanganganib na maulit ito kung hindi natin paiigtingin ang ating mga hakbang upang masugpo ang mga kaso ng karahasan. Nakababahala dahil ang maaaring maging bunsod ng karahasan laban sa kababaihan at kabataan ay ang hirap sa kabuhayan na dulot ng mga lockdown. Ang pinangangambahan natin dito ay ang posibilidad na mahirapang humingi ng tulong ang mga biktina dahil sa bagong mga paghihigpit sa health protocols.

Dapat panatilihin ang mga helplines ng National Bureau of Investigation Violence Against Women and Children Desk pati na rin ang PNP Women and Children Protection Center. Mahalaga rin ang papel ng mga barangay dahil mas malapit ang mga ito sa mga posibleng biktima.

Sa ilalim ng Protocol for Case Management of Child Victims of Abuse, Neglect, and Exploitation ng Committee for the Special Protection of Children, dapat magkaroon ang mga barangay ng help desk upang matutukan ang mga kaso ng karahasan at pang-aabuso laban sa kabataan at kababaihan. Mandato rin sa mga barangay na makipag-ugnayan sa mga social workers, health officials, at mga women and children protection units upang tulungan ang mga biktima.

Bilang Chairman ng Senate Committee on Basic Education, Arts and Culture, katuwang ang inyong lingkod upang bantayan at sugpuin ang ganitong uri ng karahasan at pang-aabuso. Huwag nating hahayaang masira ang kinabukasan ng kabataan. Kaya naman, sama-sama at ating pagtulungan ang mga wastong pamamaraan upang hindi na lumaganap ang krimeng ito sa mga komunidad.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Palawigin ang papel ng mga punong guro upang matugunan ang education crisis

ni Kuya Win Gatchalian - @Win Tayong Lahat | August 05, 2021

Upang maging mas epektibo ang pagtugon sa krisis sa edukasyong dinaranas natin ngayon sa bansa, isinusulong ng inyong lingkod ang pagpapalawig sa kapangyarihan at papel ng mga punong guro sa bawat paaralan.

Sa Senate Committee on Basic Education, Arts and Culture na pinamumunuan ng inyong lingkod, ito ay ating tatalakayin sa panukalang muling pagkakaroon ng Congressional Oversight Committee on Education (EDCOM), kung saan layon nating suriin kung paano mapalawig ang awtoridad ng mga punong guro upang maging mas “flexible” sila sa pagtugon sa pangangailangan ng mga mag-aaral.

Kung istrikto ang ating sistema ng edukasyon pagdating sa ilang tungkulin na dapat lamang ipatupad ng mga punong guro at hindi sila magiging “flexible”, mahihirapan silang tugunan ang mga pangangailangan ng mga mag-aaral tungo sa dekalidad na edukasyon.

Ayon sa Philippines Public Education Expenditure Tracking and Quantitative Service Delivery Study (PETS-QSDS) na inilabas ng World Bank at Australian Aid noong 2016, nakikitang mas mahusay ang mga mag-aaral sa mga paaralang pinatatakbo nang maayos.

Base pa sa parehong ulat, ang mga pangunahing kahinaang nakikita ng mga punong guro ay may kinalaman sa awtonomiya ng mga paaralan. Lumalabas na madalas ireklamo ng mga punong guro ang paghihigpit sa paggamit ng mga pondo para sa pagpapatakbo ng mga paaralan.

Kabilang sa mga naturang paghihigpit ang paggamit ng pondo sa pagbili ng mga laptops, LCD projectors, at iba pang kagamitan para sa pagtuturo.

Bukod dito ay hirap din ang mga punong guro sa pamamahala ng maintenance and other operating expenses o ang MOOE. Ang rekomendasyon ng PETS-QSDS ay gawing mas simple ang pamamahala sa requirements ng mga pondong ito upang magkaroon ang mga punong guro ng sapat na panahon sa pamumuno ng paaralan.

Tinukoy din ng PETS-QSDS ang maaaring papel ng mga punong guro at governing council sa pag-monitor ng mga proyekto, lalo na pagdating sa imprastruktura. Inirekomenda rin ng pag-aaral ang iba pang karagdagang papel para sa mga punong guro tulad ng paggawa ng on-site reports sa lagay ng proyekto, pati na rin ang pag-apruba sa mga inspection reports at completion certificates.

Mahalagang suriin natin ang istruktura ng pamamahala sa mga paaralan at tingnan kung paano natin bibigyan ang mga punong guro ng ‘flexibility’ na tumugon sa mga suliranin. Naniniwala tayo na bahagi ng solusyon ang empowerment o pagpapalawig sa maaaring gawin ng ating mga punong guro. Gawin natin silang bahagi ng pagtugon sa krisis sa edukasyon at bigyan natin sila ng dagdag-kapangyarihan upang paigtingin ang kakayahan ng ating mga mag-aaral at edukasyon ng ating mga guro.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Tutukan ang pag-aaral ng mga estudyante sa math at science

ni Kuya Win Gatchalian - @Win Tayong Lahat | July 29, 2021

Sa pagsulong ng inobasyon sa new normal at pagbangon ng bansa mula sa pinsala ng COVID-19 pandemic, dapat maging prayoridad ang pag-angat sa kakayahan ng kabataang mag-aaral pagdating sa math at science.

Bilang Chairman ng Senate Committee on Basic Education, Arts and Culture, nais nating bigyang-diin na ang kakayahan ng mag-aaral sa Math at Science ay pundasyon sa inobasyon. Nagsisilbi itong mahalagang aspeto sa pagbangon ng bansa mula sa pangkalusugang krisis at paghahanda para sa anumang krisis na susuungin pa ng bansa sa hinaharap.

Kung matatandaan, hindi naging maganda ang resulta ng 2019 Trends in International Mathematics and Science Study (TIMSS), kung saan lumahok ang mga mag-aaral ng bansa mula sa ika-apat na baitang. Nakadidismayang 19 porsiyento lamang ang marunong ng basic Math habang 13 porsiyento naman ang nagpakita ng limitadong kaalaman sa mga pangunahing konsepto at impormasyon pagdating sa Science.

Sa 2019 Southeast Asia Primary Learning Metrics (SEA-PLM) naman, 17 porsiyento lamang ng mag-aaral sa ika-limang baitang ang may sapat na kaalaman sa Math upang magpatuloy sa high school. Sa 2018 Programme for International Student Assessment (PISA), matatandaang ang Pilipinas ang nakatanggap ng pangalawang pinakamababang marka pagdating sa Math at Science.

Bagama’t kasalukuyang nirerepaso ng Department of Education (DepEd) ang K to 12 kurikulum, kailangan ding iangat ang kalidad ng mga guro at resolbahin ang mga isyu sa “spiral progression approach” na mandato ng Enhanced Basic Education Act of 2013 o ang Republic Act No. 10533. Sa ilalim ng spiral progression approach, maraming paksa at konsepto ang inaaral ng mga estudyante kaya naman nagiging mabigat ang nilalaman ng kurikulum o congested. Para sa ilan, hamon ang tinatawag na congested kurikulum para makapagturo ng mas malalim ang mga guro at makapag-focus ang mag-aaral sa core academic subjects, tulad ng Math at Science.

Sa isang workshop na ating inorganisa sa tulong ng non-government organization na Synergeia Foundation, lumalabas na kakaunti o walang guro ang sanay na ituro ang lahat ng sangay ng subject.

Patuloy ding isinusulong ng inyong lingkod ang Senate Bill No. 2152 o ang Teacher Education Excellence Act upang maiangat ang kalidad ng edukasyon at pagsasanay ng mga guro. Sa ilalim ng naturang panukala, patatatagin ang Teacher Education Council (TEC) upang maging mas maigting ang ugnayan sa pagitan ng DepEd, Commission on Higher Education (CHED) at Professional Regulation Commission (PRC). Layon nitong maging magkaugnay ang edukasyon at pagsasanay ng mga guro mula sa kolehiyo hanggang sa sila ay sumabak na sa kanilang propesyon.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com