Hirit sa mga out-of-school youth, tangkilikin ang ALS para sa mas magandang kinabukasan

ni Kuya Win Gatchalian - @Win Tayong Lahat | September 28, 2021

Kasalukuyang isinusulong ng inyong lingkod ang pagkakaroon ng mas marami pang mag-aaral sa ilalim ng Alternative Learning System (ALS), kung saan ang bilang ng mga rehistrado ngayong school year ay katumbas lamang ng mahigit 33 porsiyento ng mga nagpatala noong nakaraang taon.

Nasa halos 200,000 pa lamang ang rehistrado sa ALS para sa School Year 2021-2022, batay sa datos na naitala noong Setyembre 15. Noong nakaraang school year, pumalo sa halos 600,000 ang mga mag-aaral ng ALS. Umabot naman sa 26.3 milyon ang bilang ng mga mag-aaral na nagpa-enroll sa mga pampubliko at pribadong paaralan, pati na rin sa sate at local universities and colleges (SUCs at LUCs) at nalampasan nito ang enrollment noong nagdaang taon na 26.2 milyon.

Kung kinaya ang mas mataas na bilang ng mga mag-aaral sa pormal na sistema ng edukasyon ngayong school year, kailangang mapantayan man lang ng ALS ang bilang ng mga enrollees nito noong nagdaang taon. Kaya nga dapat hanapin ng Department of Education (DepEd) ang mga mag-aaral na ito upang maipagpatuloy nila ang kanilang pag-aaral.

Pinalawig ang ALS sa ilalim ng Republic Act No. 11510 o ang ALS Act, kung saan ang inyong lingkod ang pangunahing may-akda at sponsor, upang mabigyan ng pangalawang pagkakataon na makapag-aral ang mga hindi nakapagtapos o kaya naman ‘yung nahihirapang ipagpatuloy ang kanilang pag-aaral. Kabilang sa enrollees ng ALS ang mga mag-aaral na may kapansanan, indigenous peoples, ang children in conflict with the law, learners in emergency situations o sakuna, at nakatatandang nais ipagpatuloy ang kanilang pag-aaral.

Layunin ng ALS na hasain ang mga mag-aaral pagdating sa basic at functional literacy at life skills. Mandato rin ng naturang batas ang pagkakaroon ng ALS Community Learning Centers sa bawat lungsod at munisipalidad sa bansa.

Sa isang ulat ng World Bank noong 2018, tinatayang 24 milyong Pilipinong may edad 15 pataas ang hindi nakatapos ng basic education. Base pa sa ulat, may mahigit dalawang milyong mag-aaral na may edad lima hanggang 14 ang hindi pumapasok sa paaralan. Nakalulungkot na dahil dito ay napag-iwanan na sila ng mahigit tatlong taon mula sa antas na dapat kinabibilangan nila.

Dahil sa kalagayang ito, kailangan ng masinsinang paghahanap sa mga kababayan nating maaaring makapag-aral sa ilalim ng ALS. Nararapat lamang na ihatid natin sa kanila ang edukasyon at tulungan natin silang magkaroon ng mas magandang kinabukasan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Gawing batas ang pagkamit ng ‘zero illiteracy’ sa buong bansa

ni Kuya Win Gatchalian - @Win Tayong Lahat | September 02, 2021

Bilang Chairman ng Senate Committee on Basic Education, Arts and Culture, inihain ng inyong lingkod ang panukalang-batas na layong pabilisin ang pag-abot ng “zero illiteracy” sa ating bansa.

Sa ilalim ng Senate Bill No. 2348 o ang National Literacy Council Act, ang Literacy Coordinating Council (LCC), na nabuo dahil sa Republic Act No. 7165 ay magiging National Literacy Council. Isinusulong din ng naturang panukala ang pagkakaroon ng three-year roadmap upang makamit ang zero illiteracy.

Ayon sa 2019 Functional Literacy, Education and Mass Media Survey (FLEMMS), anim sa 100 na Pilipinong may edad na lima pataas ang hindi pa rin maituturing na “basically literate.” Ibig sabihin, may anim na milyong Pilipino ang hindi makapagbasa at makapagsulat na may pag-unawa sa mga simpleng mensahe.

Sa parehong taon, walong porsiyento ng mga Pilipinong may edad 10 hanggang 64 ang lumalabas na functionally illiterate. Ibig sabihin, halos pitong milyong Pilipino sa age group na ito ang walang sapat at angkop na kakayahang makilahok sa pang-araw-araw na gawain gamit ang wikang panulat.

Sa ating pagsugpo sa illiteracy, mahalaga ang magiging papel ng Alternative Learning System (ALS) habang ang mga Local School Boards (LSBs) naman ay magsisilbing de-facto local literacy councils. Alam nating ang ALS ay sistema ng non-formal education na nagbibigay-oportunidad sa mga hindi nakapag-aral o hindi nakatapos sa ilalim ng pormal na sistema. Kasama rin sa layunin ng ALS na linangin ang literasiya ng mamamayan.

Sa ilalim ng panukalang-batas, ang technical secretariat ng Council ay ililipat sa Bureau of Alternative Education (BAE) para sa administrative at technical support. Sa ilalim ng Republic Act No. 11510 o ang ALS Act, ang BAE ay itinatag upang pamunuan ang pagpapatupad ng mga programa para sa ALS.

Ang pagpapakilos sa mga LSBs naman ay sang-ayon sa pagpapatupad ng Republic Act No. 11315 o Community-Based Monitoring System (CBMS) Act, kung saan binibigyan nito ang mga lokal na pamahalaan at komunidad ng kakayahang gumawa ng sarili nilang database para sa mas mabisang pagdisenyo, pag-target, at impact monitoring ng mga programang pangkaunlaran at laban sa kahirapan.

Sa isinusulong nating panukalang-batas, mahalaga ang magiging papel ng parehong ALS at ng ating mga lokal na pamahalaan upang makamit ang zero illiteracy sa bansa. Ang pag-abot ng zero illiteracy ang isa sa mga unang mahalagang hakbang upang matiyak na wala tayong kababayang mapagkakaitan ng magandang kinabukasan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Remedial program sa buong bansa, malaking tulong sa edukasyon

ni Kuya Win Gatchalian - @Win Tayong Lahat | August 26, 2021

Para maiwasan ang pag-urong ng kaalaman ng kabataan dahil sa mahigit isang taong pagsasara ng mga paaralan, naghain ang inyong lingkod ng panukalang-batas na nagsusulong sa remedial program sa buong bansa. Sa pamamagitan nito, ang mga mag-aaral ay makatatanggap ng libreng tutorial sessions.

Sa ilalim ng Senate Bill No. 2355, ang naturang programa ay kikilalanin bilang Academic Recovery and Accessible Learning (ARAL) Program. Kabilang sa magiging benepisaryo ng ARAL Program ay ang mga hindi nag-enroll noong School Year 2020-2021 at iyong mga nahihirapan sa Language, Mathematics, at Science. Saklaw ng ARAL ang tinaguriang most essential learning competencies sa Language at Mathematics para sa Grade 1 hanggang Grade 10, at Science para sa Grade 3 hanggang Grade 10.

Upang linangin naman ang critical at analytical thinking skills ng mga mag-aaral, bibigyang-prayoridad ng programa ang Reading o pagbasa na kabilang sa mga most essential learning competencies sa ilalim ng Language. Layon din ng panukalang programa na linangin ang mga foundational skills ng mga mag-aaral sa Kindergarten upang iangat ang kanilang literacy at numeracy competencies.

Isasagawa ang mga tutorial sessions sa pamamagitan ng face-to-face, online, o blended learning kung saan maaaring isagawa tuwing weekends ng school year o kaya naman ay tuwing semestral breaks.

Magsisilbing tutor para sa ARAL ang mga guro at para-teachers na bibigyan ng karampatang sahod para sa kanilang serbisyo. Ang mga kuwalipikadong mag-aaral sa kolehiyo ay maaaring mag-volunteer bilang tutor na dapat makapasa sa mock tutoring session na isasagawa ng Department of Education (DepEd). Ang kanilang mga serbisyo para sa dalawang semestre ay ituturing na pagkumpleto ng Literacy Training Service sa ilalim ng National Service Training Program (NSTP).

Magiging mandato naman sa mga Public Telecommunication Entities (PTEs) ang pagbibigay sa mga mag-aaral at tutor ng libreng access sa online educational platforms ng DepEd, kabilang ang mga digital libraries at iba pang online knowledge hubs.

Layon din ng programang ARAL ang pagbibigay ng nutritional, social, emotional, at mental health support sa mga mag-aaral. Isinusulong din ng panukalang-batas ang mga mass awareness campaigns upang hikayatin ang mga mag-aaral na magbalik-eskuwela. Kabilang sa mga hakbang na isinusulong upang matugunan ito ay ang pagkakaroon ng flexible dates sa enrollment, pagpapatuloy ng school feeding programs, pagkakaroon ng sapat na pasilidad sa sanitation at hygiene at pagpapatupad ng mga public health protocols.

Sa pamamagitan ng isinusulong nating ARAL Program, maiiwasan natin ang pag-urong ng kaalaman ng mga mag-aaral at matutulungan natin silang makahabol sa kanilang pag-aaral. Ito ay magiging bahagi ng pagbangon ng sektor ng edukasyon mula sa pinsalang dulot ng pandemya.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com