Bilisan ang pagpapabakuna para sa ligtas na pagbubukas ng mga paaralan

ni Kuya Win Gatchalian - @Win Tayong Lahat | May 25, 2021

Upang lalong madagdagan ang kumpiyansa ng publiko sa muling pagkakaroon ng face-to-face classes sa mga low-risk areas, dapat pababain nang husto ang mga kaso ng COVID-19 at bilisan ang pagbabakuna kontra sa virus.

Hindi naman kaila sa atin na ang pagpigil sa pagkalat ng virus ay ang pinakamabisang paraan upang tiyakin ang kaligtasan ng mga mag-aaral at mga guro kasunod ng paglobo ng kaso ng COVID-19 noong unang bahagi ng taon.

Ayon kay Socioeconomic Planning Secretary Karl Chua, ang dahan-dahang pagpapatupad ng quarantine relaxation ay makatutulong sa pagbangon ng ekonomiya kapag tuluyan nang makontrol ang pagkalat ng virus. Sa isang pahayag nga ay binanggit din ng mga economic managers na pinahihintulutan ng pinaluwag na restrictions ang mas maraming mga pamilya na makilahok sa mga gawaing pang-ekonomiya. Bukod dito, sinabi rin nilang maaaring kasunod na rin nito ang muling pagsasagawa ng face-to-face schooling.

Mahalagang isinama na ang basic education frontliners sa A4 priority list sa programang pagpapabakuna dahil makatutulong itong mapigilan ang pagkalat ng virus kapag nagbukas na ang mga paaralan. Ngunit ayon sa National Task Force Against COVID-19, nakasalalay sa suplay ng bakuna ang pagpapaturok ng mga nasa A4 priority group.

Kung sakaling hindi pa rin ligtas ang sitwasyon para sa limited face-to-face classes, maaari namang magtakda ang Pangulo, ayon sa rekomendasyon ng kalihim ng Department of Education (DepEd), ng ibang petsa ng pagbubukas ng mga paaralan kapag may kalamidad o sakuna. Ito ay sa bisa ng Republic Act 11480, kung saan ang inyong lingkod ang sponsor at co-author.

Sa ilalim ng Republic Act No. 7797 na inamyendahan ng Republic Act No. 11480, ang simula ng klase ay maaaring itakda sa unang Lunes ng Hunyo hanggang sa huling araw ng Agosto.

Sa ilalim naman ng Adopted Resolution No. 92 na ating isinulong at inaprubahan ng Senado noong Marso, ang pakikilahok sa limited face-to-face classes ay boluntaryo at dapat mayroong pahintulot ng magulang o guardian.

Kung mapapababa lang natin ang kaso ng COVID-19 at mabigyan ng bakuna ang mas marami nating kababayan, magiging mas kampante ang ating mga magulang at mga mag-aaral na makilahok sa limited face-to-face classes.

Habang tuluy-tuloy ngayon ang edukasyon, prayoridad pa rin natin ang kaligtasan at kapakanan ng bawat guro at mag-aaral. Kaya umaasa at nananalangin tayong malagpasan na natin ang mga pagsubok ng pandemyang ito.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Hasain sa artificial intelligence ang mga kabataan

ni Kuya Win Gatchalian - @Win Tayong Lahat | May 18, 2021

Magandang balita ang panukalang pagkakaroon ng National Center for AI Research (N-CAIR) sa ilalim ng inilunsad na artificial intelligence (AI) roadmap ng bansa. Upang masuportahan ang kahandaan ng bansa sa pagsulong ng artificial intelligence, isinusulong ng inyong lingkod na hasain ang kakayahan ng mga mag-aaral sa senior high school para sa Fourth Industrial Revolution o ang tinatawag na Industry 4.0.

Ayon kay Department of Trade and Industry Secretary Ramon Lopez, ang panukalang N-CAIR na pamumunuan ng pribadong sektor ay magsusulong sa pananaliksik at pagdami ng mga eksperto pagdating sa AI at data science.

Base sa estima noong 2020 ng mga research firm na EDBI at Kearney, tinatayang aabot sa isang trilyong dolyar ang itataas ng gross domestic product (GDP) ng Southeast Asia sa 2030 dahil sa AI. Sa Pilipinas, inaasahan namang 12 porsiyento o katumbas ng 92 bilyong dolyar ang itataas ng GDP dahil sa AI. Inaasahang halos 50 porsiyento ng mga trabaho sa bansa ay magiging automated, ayon naman sa worldwide management consulting firm na McKinsey & Company noong 2017.

Dapat tiyakin ng sektor ng edukasyon sa bansa, kabilang ang sistema ng basic education, na ang mga kasanayang nakukuha ng mga mag-aaral ay magiging angkop sa inaasahang pag-angat ng AI sa bansa. Maliban sa pagkakaroon ng angkop na kurikulum na kasalukuyang nirerepaso ng Department of Education (DepEd), nais bigyang-diin ng inyong lingkod na dapat ihanda rin ang mga guro para magkaroon sila ng competency pagdating sa pagtuturo ng AI.

Mahalaga rin ang pagkakaroon ng imprastruktura sa mga pampublikong paaralan upang maging epektibo ang pagsulong ng AI sa bansa. Malaki ang magiging papel dito ng Public Education Network (PEN) na balak buuin ng DepEd at ng Department of Information and Communications Technology (DICT). Kung ating matatandaan, nagkaroon ng kasunduan ang dalawang ahensiya noong Abril sa pagbuo ng PEN para pabilisin ang pagkakaroon ng digital connectivity sa mga pampublikong paaralan.

Dahil sa inaasahang papel ng artificial intelligence sa pag-unlad ng ating bansa, kailangang siguruhin natin na ang kakayahan ng mga kabataang mag-aaral ay tugma sa mga pangangailangan ng ating bansa para sa hinaharap. Mahalagang simulan natin ang paghahandang ito sa antas pa lamang ng senior high school upang maging matibay at malalim ang pundasyon ng kanilang kaalaman at kakayahan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Karagdagang pondo para sa sektor ng edukasyon sa 2022, isinusulong

ni Kuya Win Gatchalian - @Win Tayong Lahat | May 11, 2021

Bilang Chairman ng Senate Committee on Basic Education, Arts, and Culture, trabaho nating tiyakin na ang budget para sa sektor ng edukasyon ay angkop sa new normal sa pamamagitan ng paglalaan ng pondo sa distance learning, pagpapalawig ng paggamit sa internet at pangangalaga sa kalusugan ng ating mga guro, school officials at mag-aaral.

Kaya kasalukuyan, isinusulong ng inyong lingkod ang paglalaan ng hanggang anim na porsiyento ng Gross Domestic Product (GDP) para sa pangkalahatang budget ng sektor ng edukasyon sa susunod na taon kaugnay ng pagbangon ng sektor mula sa pinsala ng pandemya. Ito ay kasunod ng rekomendasyon ng United Nations sa ilalim ng Sustainable Development Goal 4 (SDG 4).

Nakalaan ang pondong P759 bilyon para sa sektor ng edukasyon ngayon taon, katumbas ng apat na porsiyento ng GDP. Malaking bahagi ng pondong ito ay para sa basic education na katumbas ng 3.2 porsiyento ng GDP.

Bilang pagtugon sa rekomendasyon ng UN, naniniwala tayong ang mabisang paglalaan ng mas malaking pondo ay para maiangat ang kalidad ng edukasyon, lalo na sa lokal na lebel. Bukod dito, iminumungkahi rin natin ang paglalaan ng sapat na pondo para sa tinatawag na vulnerable groups at gawing angkop ang Pambansang Budget para sa new normal.

Nakita naman na natin ang epekto ng hindi sapat na pondo sa academic performance ng ating mga estudyante sa pamamagitan ng mga nagdaang global assessments. Ayon sa datos ng 2018 Programme for International Student Assessment (PISA), ang Pilipinas ay naglalaan ng mahigit P8,000 kada mag-aaral na may edad na anim hanggang 15 sa kabuuang panahon ng kanilang pag-aaral.

Sa Singapore, mahigit P100,000 ang ginagasta kada mag-aaral. Sa 79 bansang lumahok sa PISA, ang Singapore ang nakakuha ng pangalawang pinakamataas na marka (549) sa Reading samantalang pinakamababa naman ang markang natanggap ng Pilipinas (340).

Upang madagdagan naman ang pondo sa edukasyon sa ilalim ng mga lokal na pamahalaan, isinusulong natin ang Senate Bill No. 1579 o ang 21st Century School Boards Act upang mapalawig ang paggamit ng Special Education Fund (SEF).

Sa ilalim ng naturang panukala, ang SEF ay maaari na ring gamitin para sa sahod ng mga guro sa pampublikong paaralan, non-teaching, utility at security personnel. Kabilang din dito ang pasuweldo sa preschool teachers, capital outlay para sa preschool, pagpapatakbo ng Alternative Learning System (ALS), distance learning at mga programa para sa pagsasanay ng mga guro.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com